गजाननस्तोत्रम् (मुद्गलपुराणान्तर्गतम्) Gajanana Stotram

श्रीगणेशाय नमः ।देवर्षय ऊचुः ।नमस्ते गजवक्त्राय गजाननसुरूपिणे ।पराशरसुतायैव वत्सलासूनवे नमः ॥ १॥

śrīgaṇeśāya namaḥ |devarṣaya ūcuḥ |namaste gajavaktrāya gajānanasurūpiṇe |parāśarasutāyaiva vatsalāsūnave namaḥ || 1||

व्यासभ्रात्रे शुकस्यैव पितृव्याय नमो नमः ।अनादिगणनाथाय स्वानन्दावासिने नमः ॥ २॥

vyāsabhrātre śukasyaiva pitṛvyāya namo namaḥ |anādigaṇanāthāya svānandāvāsine namaḥ || 2||

रजसा सृष्टिकर्ते ते सत्त्वतः पालकाय वै ।तमसा सर्वसंहर्त्रे गणेशाय नमो नमः ॥ ३॥

rajasā sṛṣṭikarte te sattvataḥ pālakāya vai |tamasā sarvasaṃhartre gaṇeśāya namo namaḥ || 3||

सुकृतेः पुरुषस्यापि रूपिणे परमात्मने ।बोधाकाराय वै तुभ्यं केवलाय नमो नमः ।४॥

sukṛteḥ puruṣasyāpi rūpiṇe paramātmane |bodhākārāya vai tubhyaṃ kevalāya namo namaḥ |4||

स्वसंवेद्याय देवाय योगाय गणपाय च ।शान्तिरूपाय तुभ्यं वै नमस्ते ब्रह्मनायक ॥ ५॥

svasaṃvedyāya devāya yogāya gaṇapāya ca |śāntirūpāya tubhyaṃ vai namaste brahmanāyaka || 5||

विनायकाय वीराय गजदैत्यस्य शत्रवे ।मुनिमानसनिष्ठाय मुनीनां पालकाय च ॥ ६॥

vināyakāya vīrāya gajadaityasya śatrave |munimānasaniṣṭhāya munīnāṃ pālakāya ca || 6||

देवरक्षकरायैव विघ्नेशाय नमो नमः ।वक्रतुण्डाय धीराय चैकदन्ताय ते नमः ॥ ७॥

devarakṣakarāyaiva vighneśāya namo namaḥ |vakratuṇḍāya dhīrāya caikadantāya te namaḥ || 7||

त्वयाऽयं निहतो दैत्यो गजनामा महाबलः ।ब्रह्माण्डे मृत्यु संहीनो महाश्चर्यं कृतं विभो!॥ ८॥

tvayā'yaṃ nihato daityo gajanāmā mahābalaḥ |brahmāṇḍe mṛtyu saṃhīno mahāścaryaṃ kṛtaṃ vibho!|| 8||

हते दैत्येऽधुना कृत्स्नं जगत्सन्तोषमेष्यति ।स्वाहास्वधा युतं पूर्णं स्वधर्मस्थं भविष्यति ॥ ९॥

hate daitye'dhunā kṛtsnaṃ jagatsantoṣameṣyati |svāhāsvadhā yutaṃ pūrṇaṃ svadharmasthaṃ bhaviṣyati || 9||

एवमुक्त्वा गणाधीश सर्वे देवर्षयस्ततः ।प्रणम्य तूष्णीभावं ते सम्प्राप्ता विगतज्वराः ॥ १०॥

evamuktvā gaṇādhīśa sarve devarṣayastataḥ |praṇamya tūṣṇībhāvaṃ te samprāptā vigatajvarāḥ || 10||

कर्णौ सम्पीड्।ह्य गणपचरणे शिरसो ध्वनिः ।मधुरः प्रकृतस्तैस्तु तेन तुष्टो गजाननः ॥ ११॥

karṇau sampīḍ|hya gaṇapacaraṇe śiraso dhvaniḥ |madhuraḥ prakṛtastaistu tena tuṣṭo gajānanaḥ || 11||

तानुवाच मदीया ये भक्ताः परमभाविताः ।तैश्च नित्यं प्रकर्तव्यं भवद्भिर्नमनं यथा ॥ १२॥

tānuvāca madīyā ye bhaktāḥ paramabhāvitāḥ |taiśca nityaṃ prakartavyaṃ bhavadbhirnamanaṃ yathā || 12||

तेभ्योऽहं परमप्रीतो दास्यामि मनसीप्सिताम् ।एतादृशं प्रियं मे च मननं नाऽत्र संशयः ॥ १३॥

tebhyo'haṃ paramaprīto dāsyāmi manasīpsitām |etādṛśaṃ priyaṃ me ca mananaṃ nā'tra saṃśayaḥ || 13||

एवमुक्त्वा स तान् सर्वान् सिद्धिबुद्ध्यादिसंयुतः ।अन्तर्दधे ततो देवा मनुयः स्वस्थलं ययुः ॥ १४॥

evamuktvā sa tān sarvān siddhibuddhyādisaṃyutaḥ |antardadhe tato devā manuyaḥ svasthalaṃ yayuḥ || 14||

पिता पराशरस्तस्य माता वै वत्सला प्रभोः ।शोकसागरमग्नौ तौ श्रुत्वा वार्तां निपेततुः ॥ १५॥

pitā parāśarastasya mātā vai vatsalā prabhoḥ |śokasāgaramagnau tau śrutvā vārtāṃ nipetatuḥ || 15||

ततः कारुणिको देवस्तयोश्चित्तप्रकाशकः ।योगशान्तिमयं ज्ञानं बोधयामास शाश्वतम् ॥ १६॥

tataḥ kāruṇiko devastayościttaprakāśakaḥ |yogaśāntimayaṃ jñānaṃ bodhayāmāsa śāśvatam || 16||

मूर्तिं मदीयां वै कृत्वा संस्थाप्य ब्राह्मणैः सह ।तस्याः पूजा प्रकर्तव्या भवद्भ्यां नित्यमादरात् ॥ १७॥

mūrtiṃ madīyāṃ vai kṛtvā saṃsthāpya brāhmaṇaiḥ saha |tasyāḥ pūjā prakartavyā bhavadbhyāṃ nityamādarāt || 17||

देहव्यापारिता तत्र कर्तव्या हृदि शान्तिदम् ।योगरूपधरं दृष्ट्वा कालमाक्रमतं सदा ॥ १८॥

dehavyāpāritā tatra kartavyā hṛdi śāntidam |yogarūpadharaṃ dṛṣṭvā kālamākramataṃ sadā || 18||

एवमुक्त्वा हृदिस्थोऽसौ गणेशोंऽतर्दधे ततः ।कृतवन्तौ महाभागौ तथा दक्षसुयोगिनौ ॥ १९॥

evamuktvā hṛdistho'sau gaṇeśoṃ'tardadhe tataḥ |kṛtavantau mahābhāgau tathā dakṣasuyoginau || 19||

अचला स्थापिता मूर्तिः सिद्धिदा साऽभवत्परा ।दर्शनान् मोक्षदा दक्ष सकामानां प्रकामदा ॥ २०॥

acalā sthāpitā mūrtiḥ siddhidā sā'bhavatparā |darśanān mokṣadā dakṣa sakāmānāṃ prakāmadā || 20||

एतत्ते कथितं सर्वं गजासुरवधाश्रितम् ।चरितं गणनाथस्य सर्वपापहरं शुभम् ॥ २१॥

etatte kathitaṃ sarvaṃ gajāsuravadhāśritam |caritaṃ gaṇanāthasya sarvapāpaharaṃ śubham || 21||

यः शृणोति नरो भक्त्या पठेद्वा तु प्रजापते ।तस्मै भुक्तिप्रदं पूर्णं मुक्तिदं प्रभविष्यति ॥ २२॥

yaḥ śṛṇoti naro bhaktyā paṭhedvā tu prajāpate |tasmai bhuktipradaṃ pūrṇaṃ muktidaṃ prabhaviṣyati || 22||

॥ इति श्रीमदान्त्ये मौद्गले द्वितीयखण्डे गजासुरवधे गजाननस्तोत्रं सम्पूर्णम् ॥॥ मुद्गलपुराणं द्वितीयः खण्डः । अध्यायः ३३ । २\।३३ ३३५४॥– ॥ मुद्गलपुराणं द्वितीयः खण्डः । अध्यायः ३३ । २।३३ ३३-५४॥

|| iti śrīmadāntye maudgale dvitīyakhaṇḍe gajāsuravadhe gajānanastotraṃ sampūrṇam |||| mudgalapurāṇaṃ dvitīyaḥ khaṇḍaḥ | adhyāyaḥ 33 | 2\|33 3354||– || mudgalapurāṇaṃ dvitīyaḥ khaṇḍaḥ | adhyāyaḥ 33 | 2|33 33-54||