एकदन्तशरणागतिस्तोत्रम् Ekadantasharanagatistotram

श्रीगणेशाय नमः ।देवर्षय ऊचुः ।सदात्मरूपं सकलादिभूतममायिनं सोऽहमचिन्त्यबोधम् ।अनादिमध्यान्तविहीनमेकं तमेकदन्तं शरणं व्रजामः ॥ १॥

śrīgaṇeśāya namaḥ |devarṣaya ūcuḥ |sadātmarūpaṃ sakalādibhūtamamāyinaṃ so'hamacintyabodham |anādimadhyāntavihīnamekaṃ tamekadantaṃ śaraṇaṃ vrajāmaḥ || 1||

अनन्तचिद्रूपमयं गणेशमभेदभेदादिविहीनमाद्यम् ।हृदि प्रकाशस्य धरं स्वधीस्थं तमेकदन्तं शरणं व्रजामः ॥ २॥

anantacidrūpamayaṃ gaṇeśamabhedabhedādivihīnamādyam |hṛdi prakāśasya dharaṃ svadhīsthaṃ tamekadantaṃ śaraṇaṃ vrajāmaḥ || 2||

समाधिसंस्थं हृदि योगिनां यं प्रकाशरूपेण विभातमेतम् ।सदा निरालम्बसमाधिगम्यं तमेकदन्तं शरणं व्रजामः ॥ ३॥

samādhisaṃsthaṃ hṛdi yogināṃ yaṃ prakāśarūpeṇa vibhātametam |sadā nirālambasamādhigamyaṃ tamekadantaṃ śaraṇaṃ vrajāmaḥ || 3||

स्वबिम्बभावेन विलासयुक्तां प्रत्यक्षमायां विविधस्वरूपाम् ।स्ववीर्यकं तत्र ददाति यो वै तमेकदन्तं शरणं व्रजामः ॥ ४॥

svabimbabhāvena vilāsayuktāṃ pratyakṣamāyāṃ vividhasvarūpām |svavīryakaṃ tatra dadāti yo vai tamekadantaṃ śaraṇaṃ vrajāmaḥ || 4||

त्वदीयवीर्येण समर्थभूतस्वमायया संरचितं च विश्वम् ।तुरीयकं ह्यात्मप्रतीतिसंज्ञं तमेकदन्तं शरणं व्रजामः ॥ ५॥

tvadīyavīryeṇa samarthabhūtasvamāyayā saṃracitaṃ ca viśvam |turīyakaṃ hyātmapratītisaṃjñaṃ tamekadantaṃ śaraṇaṃ vrajāmaḥ || 5||

स्वदीयसत्ताधरमेकदन्तं गुणेश्वरं यं गुणबोधितारम् ।भजन्तमत्यन्तमजं त्रिसंस्थं तमेकदन्तं शरणं व्रजामः ॥ ६॥

svadīyasattādharamekadantaṃ guṇeśvaraṃ yaṃ guṇabodhitāram |bhajantamatyantamajaṃ trisaṃsthaṃ tamekadantaṃ śaraṇaṃ vrajāmaḥ || 6||

ततस्वया प्रेरितनादकेन सुषुप्तिसंज्ञं रचितं जगद्वै ।समानरूपं ह्युभयत्रसंस्थं तमेकदन्तं शरणं व्रजामः ॥ ७॥

tatasvayā preritanādakena suṣuptisaṃjñaṃ racitaṃ jagadvai |samānarūpaṃ hyubhayatrasaṃsthaṃ tamekadantaṃ śaraṇaṃ vrajāmaḥ || 7||

तदेव विश्वं कृपया प्रभूतं द्विभावमादौ तमसा विभान्तम् ।अनेकरूपं च तथैकभूतं तमेकदन्तं शरणं व्रजामः ॥ ८॥

tadeva viśvaṃ kṛpayā prabhūtaṃ dvibhāvamādau tamasā vibhāntam |anekarūpaṃ ca tathaikabhūtaṃ tamekadantaṃ śaraṇaṃ vrajāmaḥ || 8||

ततस्त्वया प्रेरितकेन सृष्टं बभूव सूक्ष्मं जगदेकसंस्थम् ।सुसात्विकं स्वप्नमनन्तमाद्यं तमेकदन्तं शरण व्रजामः ॥ ९॥

tatastvayā preritakena sṛṣṭaṃ babhūva sūkṣmaṃ jagadekasaṃstham |susātvikaṃ svapnamanantamādyaṃ tamekadantaṃ śaraṇa vrajāmaḥ || 9||

तदेव स्वप्नं तपसा गणेश सुसिद्धरूपं विविधं बभूव ।सदैकरूपं कृपया च तेऽद्य तमेकदन्तं शरणं व्रजामः ॥ १०॥

tadeva svapnaṃ tapasā gaṇeśa susiddharūpaṃ vividhaṃ babhūva |sadaikarūpaṃ kṛpayā ca te'dya tamekadantaṃ śaraṇaṃ vrajāmaḥ || 10||

त्वदाज्ञया तेन त्वया हृदिस्थं तथा सुसृष्टं जगदंशरूपम् ।विभिन्नजाग्रन्मयमप्रमेयं तमेकदन्तं शरणं व्रजामः ॥ ११॥

tvadājñayā tena tvayā hṛdisthaṃ tathā susṛṣṭaṃ jagadaṃśarūpam |vibhinnajāgranmayamaprameyaṃ tamekadantaṃ śaraṇaṃ vrajāmaḥ || 11||

तदेव जाग्रद्रजसा विभातं विलोकितं त्वत्कृपया स्मृतेन ।बभूव भिन्नं च सदैकरूपं तमेकदन्तं शरणं व्रजामः ॥ १२॥

tadeva jāgradrajasā vibhātaṃ vilokitaṃ tvatkṛpayā smṛtena |babhūva bhinnaṃ ca sadaikarūpaṃ tamekadantaṃ śaraṇaṃ vrajāmaḥ || 12||

सदेव सृष्ट्वा प्रकृतिस्वभावात्तदन्तरे त्वं च विभासि नित्यम् ।धियः प्रदाता गणनाथ एकस्तमेकदन्तं शरणं व्रजामः ॥ १३॥

sadeva sṛṣṭvā prakṛtisvabhāvāttadantare tvaṃ ca vibhāsi nityam |dhiyaḥ pradātā gaṇanātha ekastamekadantaṃ śaraṇaṃ vrajāmaḥ || 13||

त्वदाज्ञया भान्ति ग्रहाश्च सर्वे प्रकाशरूपाणि विभान्ति खे वै ॥भ्रमन्ति नित्यं स्वविहारकार्यास्तमेकदन्तं शरणं व्रजामः ॥ १४॥

tvadājñayā bhānti grahāśca sarve prakāśarūpāṇi vibhānti khe vai ||bhramanti nityaṃ svavihārakāryāstamekadantaṃ śaraṇaṃ vrajāmaḥ || 14||

त्वदाज्ञया सृष्टिकरो विधाता त्वदाज्ञया पालक एव विष्णुः ।त्वदाज्ञया संहरको हरोऽपि तमेकदन्तं शरणं व्रजामः ॥ १५॥

tvadājñayā sṛṣṭikaro vidhātā tvadājñayā pālaka eva viṣṇuḥ |tvadājñayā saṃharako haro'pi tamekadantaṃ śaraṇaṃ vrajāmaḥ || 15||

यदाज्ञया भूमिजलेऽत्र संस्थे यदाज्ञयापः प्रवहन्ति नद्यः ।स्वतीर्थसंस्थश्च कृतः समुद्रस्तमेकदन्तं शरणं व्रजामः॥ १६॥

yadājñayā bhūmijale'tra saṃsthe yadājñayāpaḥ pravahanti nadyaḥ |svatīrthasaṃsthaśca kṛtaḥ samudrastamekadantaṃ śaraṇaṃ vrajāmaḥ|| 16||

यदाज्ञया देवगणा दिविस्था ददन्ति वै कर्मफलानि नित्यम् ।यदाज्ञया शैलगणाः स्थिरा वै तमेकदन्तं शरणं व्रजामः ॥ १७॥

yadājñayā devagaṇā divisthā dadanti vai karmaphalāni nityam |yadājñayā śailagaṇāḥ sthirā vai tamekadantaṃ śaraṇaṃ vrajāmaḥ || 17||

यदाज्ञया शेषधराधरो वै यदाज्ञया मोहप्रदश्च कामः ।यदाज्ञया कालधरोऽर्यमा च तमेकदन्तं शरणं व्रजामः ॥ १८॥

yadājñayā śeṣadharādharo vai yadājñayā mohapradaśca kāmaḥ |yadājñayā kāladharo'ryamā ca tamekadantaṃ śaraṇaṃ vrajāmaḥ || 18||

यदाज्ञया वाति विभाति वायुर्यदाज्ञयाग्निर्जठरादिसंस्थः ।यदाज्ञयेदं सचराचरं च तमेकदन्तं शरणं व्रजामः ॥ १९॥

yadājñayā vāti vibhāti vāyuryadājñayāgnirjaṭharādisaṃsthaḥ |yadājñayedaṃ sacarācaraṃ ca tamekadantaṃ śaraṇaṃ vrajāmaḥ || 19||

यदन्तरे संस्थितमेकदन्तस्तदाज्ञया सर्वमिदं विभाति ।अनन्तरूपं हृदि बोधकं यस्तमेकदन्तं शरणं व्रजामः ॥ २०॥

yadantare saṃsthitamekadantastadājñayā sarvamidaṃ vibhāti |anantarūpaṃ hṛdi bodhakaṃ yastamekadantaṃ śaraṇaṃ vrajāmaḥ || 20||

सुयोगिनो योगबलेन साध्यं प्रकुर्वते कः स्तवनेन स्तौति ।अतः प्रणामेन सुसिद्धिदोऽस्तु तमेकदन्तं शरणं व्रजामः ॥ २१॥

suyogino yogabalena sādhyaṃ prakurvate kaḥ stavanena stauti |ataḥ praṇāmena susiddhido'stu tamekadantaṃ śaraṇaṃ vrajāmaḥ || 21||

गृत्समद उवाच ।एवं स्तुत्वा गणेशानं देवाः समुनयः प्रभुम् ॥तूष्णीम्भावं प्रपद्यैव ननृतुर्हर्षसंयुताः ॥ २२॥

gṛtsamada uvāca |evaṃ stutvā gaṇeśānaṃ devāḥ samunayaḥ prabhum ||tūṣṇīmbhāvaṃ prapadyaiva nanṛturharṣasaṃyutāḥ || 22||

स तानुवाच प्रीतात्मा देवर्षीणां स्तवेन वै ॥एकदन्तो महाभागो देवर्षीन् भक्तवत्सलः ॥ २३॥

sa tānuvāca prītātmā devarṣīṇāṃ stavena vai ||ekadanto mahābhāgo devarṣīn bhaktavatsalaḥ || 23||

एकदन्त उवाच ।स्तोत्रेणाऽहं प्रसन्नोऽस्मि सुराः सर्षिगणाः किल ।वरदं भो वृणुत वो दास्यामि मनसीप्सितम् ॥ २४॥

ekadanta uvāca |stotreṇā'haṃ prasanno'smi surāḥ sarṣigaṇāḥ kila |varadaṃ bho vṛṇuta vo dāsyāmi manasīpsitam || 24||

भवत्कृतं मदीयं यत्स्तोत्रं प्रीतिप्रदं च तत् ।भविष्यति न सन्देहः सर्वसिद्धिप्रदायकम् ॥ २५॥

bhavatkṛtaṃ madīyaṃ yatstotraṃ prītipradaṃ ca tat |bhaviṣyati na sandehaḥ sarvasiddhipradāyakam || 25||

यं यमिच्छति तं तं वै दास्यामि स्तोत्रपाठतः ।पुत्रपौत्रादिकं सर्वं कलत्रं धनधान्यकम् ॥ २६ ।

yaṃ yamicchati taṃ taṃ vai dāsyāmi stotrapāṭhataḥ |putrapautrādikaṃ sarvaṃ kalatraṃ dhanadhānyakam || 26 |

गजाश्वादिकमत्यन्तं राज्यभोगादिकं ध्रुवम् ।भुक्तिं मुक्तिं च योगं वै लभते शान्तिदायकम् ॥ २७॥

gajāśvādikamatyantaṃ rājyabhogādikaṃ dhruvam |bhuktiṃ muktiṃ ca yogaṃ vai labhate śāntidāyakam || 27||

मारणोच्चाटनादीनि राज्यबन्धादिकं च यत् ।पठतां शृण्वतां नॄणां भवेच्च बन्धहीनताम् ॥ २८॥

māraṇoccāṭanādīni rājyabandhādikaṃ ca yat |paṭhatāṃ śṛṇvatāṃ nṝṇāṃ bhavecca bandhahīnatām || 28||

एकविंशतिवारं यः श्लोकानेवैकविंशतीन् ।पठेच्च हृदि मां स्मृत्वा दिनानि त्वेकविंशतिः ॥ २९॥

ekaviṃśativāraṃ yaḥ ślokānevaikaviṃśatīn |paṭhecca hṛdi māṃ smṛtvā dināni tvekaviṃśatiḥ || 29||

न तस्य दुर्लभं किञ्चित्रिषु लोकेषु वै भवेत् ।असाध्यं साधयेन्मर्त्यः सर्वत्र विजयी भवेत् ॥ ३०॥

na tasya durlabhaṃ kiñcitriṣu lokeṣu vai bhavet |asādhyaṃ sādhayenmartyaḥ sarvatra vijayī bhavet || 30||

नित्यं यः पठति स्तोत्रं ब्रह्मभूतः स वै नरः ।तस्य दर्शनतः सर्वे देवाः पूता भवन्ति च ॥ ३१॥

nityaṃ yaḥ paṭhati stotraṃ brahmabhūtaḥ sa vai naraḥ |tasya darśanataḥ sarve devāḥ pūtā bhavanti ca || 31||

इति श्रीमुद्गलपुराणे एकदन्तशरणागतिस्तोत्रं सम्पूर्णम् ।

iti śrīmudgalapurāṇe ekadantaśaraṇāgatistotraṃ sampūrṇam |