एकदन्तस्तुतिः नारदमुनिकृता ३ Ekadanta Stuti Naradamunikrita (3)

॥ श्रीगणेशाय नमः ॥देवर्षय ऊचुः ।सदात्मरूपं सकलादिभूतममायिनं सोऽहमचिन्त्यबोधम् ।अथादिमध्यान्तविहीनमेकं तमेकदन्तं शरणं व्रजामः ॥ ३॥

|| śrīgaṇeśāya namaḥ ||devarṣaya ūcuḥ |sadātmarūpaṃ sakalādibhūtamamāyinaṃ so'hamacintyabodham |athādimadhyāntavihīnamekaṃ tamekadantaṃ śaraṇaṃ vrajāmaḥ || 3||

अनन्तचिद्रूपमयं गणेशमभेदभेदादिविहीनमाद्यम् ।हृदि प्रकाशस्य धरं स्वधीस्थं तमेकदन्तं शरणं व्रजामः ॥ ४॥

anantacidrūpamayaṃ gaṇeśamabhedabhedādivihīnamādyam |hṛdi prakāśasya dharaṃ svadhīsthaṃ tamekadantaṃ śaraṇaṃ vrajāmaḥ || 4||

समाधिसंस्थं हृदि योगिनां तु प्रकाशरूपेण विभान्तमेवम् ।सदा निरालम्बसमाधिगम्यं तमेकदन्तं शरणं व्रजामः ॥ ५॥

samādhisaṃsthaṃ hṛdi yogināṃ tu prakāśarūpeṇa vibhāntamevam |sadā nirālambasamādhigamyaṃ tamekadantaṃ śaraṇaṃ vrajāmaḥ || 5||

स्वबिम्बभावेन विलासयुक्तां प्रकृत्य मायां विविधस्वरूपाम् ।सुवीर्यकं तत्र ददाति यो वै तमेकदन्तं शरणं व्रजामः ॥ ६॥

svabimbabhāvena vilāsayuktāṃ prakṛtya māyāṃ vividhasvarūpām |suvīryakaṃ tatra dadāti yo vai tamekadantaṃ śaraṇaṃ vrajāmaḥ || 6||

यदीय वीर्येण समर्थभूतं स्वमायया संरचितं च विश्वम् ।तुरीयकं ह्यात्मकवित्तिसंज्ञं तमेकदन्तं शरणं व्रजामः ॥ ७॥

yadīya vīryeṇa samarthabhūtaṃ svamāyayā saṃracitaṃ ca viśvam |turīyakaṃ hyātmakavittisaṃjñaṃ tamekadantaṃ śaraṇaṃ vrajāmaḥ || 7||

त्वदीयसत्ताधरमेकदन्तं गुणेश्वरं यं गुणबोधितारम् ।भजन्त आद्यं तमजं त्रिसंस्थास्तमेकदन्तं शरणं व्रजामः ॥ ८॥

tvadīyasattādharamekadantaṃ guṇeśvaraṃ yaṃ guṇabodhitāram |bhajanta ādyaṃ tamajaṃ trisaṃsthāstamekadantaṃ śaraṇaṃ vrajāmaḥ || 8||

ततस्त्वया प्रेरितनादकेन सुषुप्तिसंज्ञं रचितं जगद्वै ।समानरूपं च तथैकभूतं तमेकदन्तं शरणं व्रजामः ॥ ९॥

tatastvayā preritanādakena suṣuptisaṃjñaṃ racitaṃ jagadvai |samānarūpaṃ ca tathaikabhūtaṃ tamekadantaṃ śaraṇaṃ vrajāmaḥ || 9||

तदेव विश्वं कृपया प्रभूतं द्विभावमादौ तमसा विभातम् ।अनेकरूपं च तथैकभूतं तमेकदन्तं शरणं व्रजामः ॥ १०॥

tadeva viśvaṃ kṛpayā prabhūtaṃ dvibhāvamādau tamasā vibhātam |anekarūpaṃ ca tathaikabhūtaṃ tamekadantaṃ śaraṇaṃ vrajāmaḥ || 10||

ततस्त्वया प्रेरितकेन सृष्टं सुसूक्ष्मभावं जगदेकसंस्थम् ।सुसात्त्विकं स्वप्नमनन्तमाद्यं तमेकदन्तं शरणं व्रजामः ॥ ११॥

tatastvayā preritakena sṛṣṭaṃ susūkṣmabhāvaṃ jagadekasaṃstham |susāttvikaṃ svapnamanantamādyaṃ tamekadantaṃ śaraṇaṃ vrajāmaḥ || 11||

तत् स्वप्नमेवं तपसा गणेश सुसिद्धिरूपं द्विविधं बभूव ।सदैकरूपं कृपया च ते यत्तमेकदन्तं शरणं व्रजामः ॥ १२॥

tat svapnamevaṃ tapasā gaṇeśa susiddhirūpaṃ dvividhaṃ babhūva |sadaikarūpaṃ kṛpayā ca te yattamekadantaṃ śaraṇaṃ vrajāmaḥ || 12||

त्वदाज्ञया तेन सदा हृदिस्थ तथा सुसृष्टं जगदंशरूपम् ।विभिन्नजाग्रन्मयमप्रमेयं तमेकदन्तं शरणं व्रजामः ॥ १३॥

tvadājñayā tena sadā hṛdistha tathā susṛṣṭaṃ jagadaṃśarūpam |vibhinnajāgranmayamaprameyaṃ tamekadantaṃ śaraṇaṃ vrajāmaḥ || 13||

तदेव जाग्रद्रजसा विभातं विलोकितं त्वत्कृपया स्मृतेश्च ।बभूव भिन्नं च सदैकरूपं तमेकदन्तं शरणं व्रजामः ॥ १४॥

tadeva jāgradrajasā vibhātaṃ vilokitaṃ tvatkṛpayā smṛteśca |babhūva bhinnaṃ ca sadaikarūpaṃ tamekadantaṃ śaraṇaṃ vrajāmaḥ || 14||

तदैव सृष्ट्वा प्रकृतिस्वभावात्तदन्तरे त्वं च विभासि नित्यम् ।धियः प्रदाता गणनाथ एकस्तमेकदन्तं शरणं व्रजामः ॥ १५॥

tadaiva sṛṣṭvā prakṛtisvabhāvāttadantare tvaṃ ca vibhāsi nityam |dhiyaḥ pradātā gaṇanātha ekastamekadantaṃ śaraṇaṃ vrajāmaḥ || 15||

सर्वे ग्रहा भानि यदाज्ञया च प्रकाशरूपाणि विभान्ति खे वै ।भ्रमन्ति नित्यं स्वविहारकार्यात्तमेकदन्तं शरणं व्रजामः ॥ १६॥

sarve grahā bhāni yadājñayā ca prakāśarūpāṇi vibhānti khe vai |bhramanti nityaṃ svavihārakāryāttamekadantaṃ śaraṇaṃ vrajāmaḥ || 16||

त्वदाज्ञया सृष्टिकरो विधाता त्वदाज्ञया पालक एव विष्णुः ।त्वदाज्ञया संहारको हरो वै तमेकदन्तं शरणं व्रजामः ॥ १७॥

tvadājñayā sṛṣṭikaro vidhātā tvadājñayā pālaka eva viṣṇuḥ |tvadājñayā saṃhārako haro vai tamekadantaṃ śaraṇaṃ vrajāmaḥ || 17||

यदाज्ञया भूस्तु जले प्रसंस्था यदाज्ञयाऽऽपः प्रवहन्ति नद्यः ।स्वतीरसंस्थश्च कृतः समुद्रस्तमेकदन्तं शरणं व्रजामः ॥ १८॥

yadājñayā bhūstu jale prasaṃsthā yadājñayā''paḥ pravahanti nadyaḥ |svatīrasaṃsthaśca kṛtaḥ samudrastamekadantaṃ śaraṇaṃ vrajāmaḥ || 18||

यदाज्ञया देवगणा दिविस्था यच्छन्ति वै कर्मफलानि नित्यम् ।यदाज्ञया शैलगणाः स्थिरा वै तमेकदन्तं शरणं व्रजामः ॥ १९॥

yadājñayā devagaṇā divisthā yacchanti vai karmaphalāni nityam |yadājñayā śailagaṇāḥ sthirā vai tamekadantaṃ śaraṇaṃ vrajāmaḥ || 19||

यदाज्ञया शेष इलाधरो वै यदाज्ञया मोहद एव कामः ।यदाज्ञया कालधरोऽर्यमा च तमेकदन्तं शरणं व्रजामः ॥ २०॥

yadājñayā śeṣa ilādharo vai yadājñayā mohada eva kāmaḥ |yadājñayā kāladharo'ryamā ca tamekadantaṃ śaraṇaṃ vrajāmaḥ || 20||

यदाज्ञया वाति विभाति वायुर्यदाज्ञयाऽग्निर्जठरादिसंस्थः ।यदाज्ञयेदं सचराचरं च तमेकदन्तं शरणं व्रजामः ॥ २१॥

yadājñayā vāti vibhāti vāyuryadājñayā'gnirjaṭharādisaṃsthaḥ |yadājñayedaṃ sacarācaraṃ ca tamekadantaṃ śaraṇaṃ vrajāmaḥ || 21||

तदन्तरिक्षं स्थितमेकदन्तं त्वदाज्ञया सर्वमिदं विभाति ।अनन्तरूपं हृदि बोधकं त्वां तमेकदन्तं शरणं व्रजामः ॥ २२॥

tadantarikṣaṃ sthitamekadantaṃ tvadājñayā sarvamidaṃ vibhāti |anantarūpaṃ hṛdi bodhakaṃ tvāṃ tamekadantaṃ śaraṇaṃ vrajāmaḥ || 22||

सुयोगिनो योगबलेन साध्यं प्रकुर्वते कः स्तवने समर्थः ।अतः प्रणामेन सुसिद्धिदोऽस्तु तमेकदन्तं शरणं व्रजामः ॥ २३॥

suyogino yogabalena sādhyaṃ prakurvate kaḥ stavane samarthaḥ |ataḥ praṇāmena susiddhido'stu tamekadantaṃ śaraṇaṃ vrajāmaḥ || 23||

गृत्समद उवाच ।एवं स्तुत्वा गणेशानं देवाः समुनयः प्रभुम् ।तूष्णीम्भावं प्रपद्यैव ननृतुर्हर्षसंयुताः ॥ २४॥

gṛtsamada uvāca |evaṃ stutvā gaṇeśānaṃ devāḥ samunayaḥ prabhum |tūṣṇīmbhāvaṃ prapadyaiva nanṛturharṣasaṃyutāḥ || 24||

स तानुवाच प्रीतात्मा देवर्षीणां स्तवेन वै ।एकदन्तो महाभागान् देवर्षीन् भक्तवत्सलः ॥ २५॥

sa tānuvāca prītātmā devarṣīṇāṃ stavena vai |ekadanto mahābhāgān devarṣīn bhaktavatsalaḥ || 25||

(फलश्रुतिः)एकदन्त उवाच ।स्तोत्रेणाऽहं प्रसन्नोऽस्मि सुराः सर्षिगणाः खलु ।वृणुध्वं वरदोऽहं वो दास्यामि मनसीप्सितम् ॥ २६॥

(phalaśrutiḥ)ekadanta uvāca |stotreṇā'haṃ prasanno'smi surāḥ sarṣigaṇāḥ khalu |vṛṇudhvaṃ varado'haṃ vo dāsyāmi manasīpsitam || 26||

भवत्कृतं मदीयं यत् स्तोत्रं प्रीतिप्रदं च तत् ।भविष्यति न सन्देहः सर्वसिद्धिप्रदायकम् ॥ २७॥

bhavatkṛtaṃ madīyaṃ yat stotraṃ prītipradaṃ ca tat |bhaviṣyati na sandehaḥ sarvasiddhipradāyakam || 27||

यद्यदिच्छति तत्तद्वै प्राप्नोति स्तोत्रपाठकः ।पुत्रपौत्रादिकं सर्वं कलत्रं धनधान्यकम् ॥ २८॥

yadyadicchati tattadvai prāpnoti stotrapāṭhakaḥ |putrapautrādikaṃ sarvaṃ kalatraṃ dhanadhānyakam || 28||

गजाश्वादिकमत्यन्तं राज्यभोगादिकं ध्रुवम् ।भुक्तिं मुक्तिं च योगं वै लभते शान्तिदायकम् ॥ २९॥

gajāśvādikamatyantaṃ rājyabhogādikaṃ dhruvam |bhuktiṃ muktiṃ ca yogaṃ vai labhate śāntidāyakam || 29||

मारणोच्चाटनादीनि राज्यबन्धादिकं च यत् ।पठतां शृण्वतां नॄणां भवेत्तद्बन्धहीनता ॥ ३०॥

māraṇoccāṭanādīni rājyabandhādikaṃ ca yat |paṭhatāṃ śṛṇvatāṃ nṝṇāṃ bhavettadbandhahīnatā || 30||

एकविंशतिवारं यः श्लोकानेवैकविंशतिम् ।पठेद्वै हृदि मां स्मृत्वा दिनानि त्वेकविंशतिम् ॥ ३१॥

ekaviṃśativāraṃ yaḥ ślokānevaikaviṃśatim |paṭhedvai hṛdi māṃ smṛtvā dināni tvekaviṃśatim || 31||

न तस्य दुर्लभं किञ्चित् त्रिषु लोकेषु वै भवेत् ।असाध्यं साधयेन् मर्त्यः सर्वत्र विजयी भवेत् ॥ ३२॥

na tasya durlabhaṃ kiñcit triṣu lokeṣu vai bhavet |asādhyaṃ sādhayen martyaḥ sarvatra vijayī bhavet || 32||

नित्यं यः पठति स्तोत्रं ब्रह्मीभूतः स वै नरः ।तस्य दर्शनतः सर्वे देवाः पूता भवन्ति च ॥ ३३॥

nityaṃ yaḥ paṭhati stotraṃ brahmībhūtaḥ sa vai naraḥ |tasya darśanataḥ sarve devāḥ pūtā bhavanti ca || 33||

इति नारदमुनिकृता एकदन्तस्तुतिः सम्पूर्णा ॥एकविंशतिस्तोत्रं॥ मुद्गलपुराणं द्वितीयः खण्डः । अध्यायः ५५ । २\।५५। ३३३॥– ॥ मुद्गलपुराणं द्वितीयः खण्डः । अध्यायः ५५ । २।५५। ३-३३॥

iti nāradamunikṛtā ekadantastutiḥ sampūrṇā ||ekaviṃśatistotraṃ|| mudgalapurāṇaṃ dvitīyaḥ khaṇḍaḥ | adhyāyaḥ 55 | 2\|55| 333||– || mudgalapurāṇaṃ dvitīyaḥ khaṇḍaḥ | adhyāyaḥ 55 | 2|55| 3-33||