गजाननस्तोत्रम् Devarshikritam Gajananastotram

श्रीगणेशाय नमः ॥मुद्गल उवाचशान्तिरूपधरं लोभं दृष्ट्वा देवर्षयोऽमलाः ।गजाननं निजं नाथं हर्षिता नेमुरादरात् ॥गजाननं पूजयित्वा विधानेन सुरर्षयः ।पुनः प्रणम्य तं सर्वे तुष्टुवुः करसम्पुटैः ॥(सुरर्षय ऊचुः )देवर्षय ऊचुः । (मुद्गल उवाच ।)विदेहरूपं भवबन्धहारं सदा स्वनिष्ठं स्वसुखप्रदम् तम् ।अमेयसांख्येन च लक्ष्मीशं गजाननं भक्तियुतं भजामः ॥ १॥

śrīgaṇeśāya namaḥ ||mudgala uvācaśāntirūpadharaṃ lobhaṃ dṛṣṭvā devarṣayo'malāḥ |gajānanaṃ nijaṃ nāthaṃ harṣitā nemurādarāt ||gajānanaṃ pūjayitvā vidhānena surarṣayaḥ |punaḥ praṇamya taṃ sarve tuṣṭuvuḥ karasampuṭaiḥ ||(surarṣaya ūcuḥ )devarṣaya ūcuḥ | (mudgala uvāca |)videharūpaṃ bhavabandhahāraṃ sadā svaniṣṭhaṃ svasukhapradam tam |ameyasāṃkhyena ca lakṣmīśaṃ gajānanaṃ bhaktiyutaṃ bhajāmaḥ || 1||

मुनीन्द्रवन्द्यं विधिबोधहीनं सुबुद्धिदं बुद्धिधरं प्रशान्तम् ।विकारहीनं सकलांमकं वै गजाननं भक्तियुतं भजामः ॥ २॥

munīndravandyaṃ vidhibodhahīnaṃ subuddhidaṃ buddhidharaṃ praśāntam |vikārahīnaṃ sakalāṃmakaṃ vai gajānanaṃ bhaktiyutaṃ bhajāmaḥ || 2||

अमेय रूपं हृदि संस्थितं तं ब्रह्माऽहमेकं भ्रमनाशकारम् ।अनादिमध्यान्तमपाररूपं गजाननं भक्तियुतं भजामः ॥ ३॥

ameya rūpaṃ hṛdi saṃsthitaṃ taṃ brahmā'hamekaṃ bhramanāśakāram |anādimadhyāntamapārarūpaṃ gajānanaṃ bhaktiyutaṃ bhajāmaḥ || 3||

जगत्प्रमाणं जगदीशमेवमगम्यमाद्यं जगदादिहीनम् ।अनात्मनां मोहप्रदं पुराणं गजाननं भक्तियुतं भजामः ॥ ४॥

jagatpramāṇaṃ jagadīśamevamagamyamādyaṃ jagadādihīnam |anātmanāṃ mohapradaṃ purāṇaṃ gajānanaṃ bhaktiyutaṃ bhajāmaḥ || 4||

न पृथ्विरूपं न जलप्रकाशनं न तेजसंस्थं न समीरसंस्थम् ।न खे गतं पंचविभूतिहीनं गजाननं भक्तियुतं भजामः ॥ ५॥

na pṛthvirūpaṃ na jalaprakāśanaṃ na tejasaṃsthaṃ na samīrasaṃstham |na khe gataṃ paṃcavibhūtihīnaṃ gajānanaṃ bhaktiyutaṃ bhajāmaḥ || 5||

न विश्वगं तैजसगं न प्राज्ञं समष्टिव्यष्टिस्थमनन्तगं तम् ।गुणैर्विहीनं परमार्थभूतं गजाननं भक्तियुतं भजामः ॥ ६॥

na viśvagaṃ taijasagaṃ na prājñaṃ samaṣṭivyaṣṭisthamanantagaṃ tam |guṇairvihīnaṃ paramārthabhūtaṃ gajānanaṃ bhaktiyutaṃ bhajāmaḥ || 6||

गणेशगं नैव च बिन्दुसंस्थं न देहिनं बोधमयं न ढुण्ढी ।सुयोगहीनं प्रवदन्ति तत्स्थं गजाननं भक्तियुतं भजामः ॥ ७॥

gaṇeśagaṃ naiva ca bindusaṃsthaṃ na dehinaṃ bodhamayaṃ na ḍhuṇḍhī |suyogahīnaṃ pravadanti tatsthaṃ gajānanaṃ bhaktiyutaṃ bhajāmaḥ || 7||

अनागतं ग्रैवगतं गणेशं कथं तदाकारमयं वदामः ।तथापि सर्वं प्रतिदेहसंस्थं गजाननं भक्तियुतं भजामः ॥ ८॥

anāgataṃ graivagataṃ gaṇeśaṃ kathaṃ tadākāramayaṃ vadāmaḥ |tathāpi sarvaṃ pratidehasaṃsthaṃ gajānanaṃ bhaktiyutaṃ bhajāmaḥ || 8||

यदि त्वया नाथ! घृतं न किंचित्तदा कथं सर्वमिदं भजामि ।अतो महात्मानमचिन्त्यमेवं गजानन भक्तियुतं भजामः ॥ ९॥

yadi tvayā nātha! ghṛtaṃ na kiṃcittadā kathaṃ sarvamidaṃ bhajāmi |ato mahātmānamacintyamevaṃ gajānana bhaktiyutaṃ bhajāmaḥ || 9||

सुसिद्धिदं भक्तजनस्य देवं सकामिकानामिह सौख्यदं तम् ।अकामिकानां भवबन्धहारं गजाननं भक्तियुतं भजामः ॥ १०॥

susiddhidaṃ bhaktajanasya devaṃ sakāmikānāmiha saukhyadaṃ tam |akāmikānāṃ bhavabandhahāraṃ gajānanaṃ bhaktiyutaṃ bhajāmaḥ || 10||

सुरेन्द्रसेव्यं ह्यसुरैः सुसेव्यं समानभावेन विराजयन्तम् ।अनन्तबाहु मूषकध्वजं तं गजाननं भक्तियुतं भजामः ॥ ११॥

surendrasevyaṃ hyasuraiḥ susevyaṃ samānabhāvena virājayantam |anantabāhu mūṣakadhvajaṃ taṃ gajānanaṃ bhaktiyutaṃ bhajāmaḥ || 11||

सदा सुखानन्दमयं जले च समुद्रजे इक्षुरसे निवासम् ।द्वन्द्वस्य यानेन च नाशरूपे गजाननं भक्तियुतं भजामः ॥ १२॥

sadā sukhānandamayaṃ jale ca samudraje ikṣurase nivāsam |dvandvasya yānena ca nāśarūpe gajānanaṃ bhaktiyutaṃ bhajāmaḥ || 12||

चतुःपदार्था विविधप्रकाशस्तदेव हस्तं सुचतुर्भुजं तम् ।अनाथनाथं च महोदरं वै गजाननं भक्तियुतं भजामः ॥ १३॥

catuḥpadārthā vividhaprakāśastadeva hastaṃ sucaturbhujaṃ tam |anāthanāthaṃ ca mahodaraṃ vai gajānanaṃ bhaktiyutaṃ bhajāmaḥ || 13||

महाखुमारूढमकालकालं विदेहयोगेन च लभ्यमानम् ।अमायिनं मायिकमोहदं तं गजाननं भक्तियुतं भजामः ॥ १४॥

mahākhumārūḍhamakālakālaṃ videhayogena ca labhyamānam |amāyinaṃ māyikamohadaṃ taṃ gajānanaṃ bhaktiyutaṃ bhajāmaḥ || 14||

रविस्वरूपं रविभासहीनं हरिस्वरूपं हरिबोधहीनम् ।शिवस्वरूपं शिवभासनाशं गजाननं भक्तियुतं भजामः ॥ १५॥

ravisvarūpaṃ ravibhāsahīnaṃ harisvarūpaṃ haribodhahīnam |śivasvarūpaṃ śivabhāsanāśaṃ gajānanaṃ bhaktiyutaṃ bhajāmaḥ || 15||

महेश्वरीस्थं च सुशक्तिहीनं प्रभुं परेशं परवन्द्यमेवम् ।अचालकं चालकबीजरूपं गजाननं भक्तियुतं भजामः ॥ १६॥

maheśvarīsthaṃ ca suśaktihīnaṃ prabhuṃ pareśaṃ paravandyamevam |acālakaṃ cālakabījarūpaṃ gajānanaṃ bhaktiyutaṃ bhajāmaḥ || 16||

शिवादिदेवैश्च खगैश्च वन्द्यं नरैर्लतावृक्षपशुप्रमुख्यैः ।चराऽचरैर्लोकविहीनमेवं गजाननं भक्तियुतं भजामः ॥ १७॥

śivādidevaiśca khagaiśca vandyaṃ narairlatāvṛkṣapaśupramukhyaiḥ |carā'carairlokavihīnamevaṃ gajānanaṃ bhaktiyutaṃ bhajāmaḥ || 17||

मनोवचोहीनतया सुसंस्थं निवृत्तिमात्रं ह्यजमव्ययं तम् ।तथाऽपि देवं पुरसंस्थितं तं गजाननं भक्तियुतं भजामः ॥ १८॥

manovacohīnatayā susaṃsthaṃ nivṛttimātraṃ hyajamavyayaṃ tam |tathā'pi devaṃ purasaṃsthitaṃ taṃ gajānanaṃ bhaktiyutaṃ bhajāmaḥ || 18||

वयं सुधन्या गणपस्तवेन तथैव मर्त्यार्चनतस्तथैव ।गणेशरूपाश्च कृतास्त्वया तं गजाननं भक्तियुतं भजामः ॥ १९॥

vayaṃ sudhanyā gaṇapastavena tathaiva martyārcanatastathaiva |gaṇeśarūpāśca kṛtāstvayā taṃ gajānanaṃ bhaktiyutaṃ bhajāmaḥ || 19||

गजाख्यबीजं प्रवदन्ति वेदास्तदेव चिह्नेन च योगिनस्त्वाम् ।गच्छन्ति तेनैव गजाननं तं गजाननं भक्तियुतं भजामः ॥ २०॥

gajākhyabījaṃ pravadanti vedāstadeva cihnena ca yoginastvām |gacchanti tenaiva gajānanaṃ taṃ gajānanaṃ bhaktiyutaṃ bhajāmaḥ || 20||

पुराणवेदाः शिवविष्णुकाद्यामराः शुकाद्या गणपस्तवे वै ।विकुण्ठिताः किं च वयं स्तवामो गजाननं भक्तियुतं भजामः ॥ २१॥

purāṇavedāḥ śivaviṣṇukādyāmarāḥ śukādyā gaṇapastave vai |vikuṇṭhitāḥ kiṃ ca vayaṃ stavāmo gajānanaṃ bhaktiyutaṃ bhajāmaḥ || 21||

मुद्गल उवाच ॥एवं स्तुत्वा गणेशानं नेमुः सर्वे पुनः पुनः ।तानुत्थाप्य वचो रम्यं गजानन उवाच ह ॥ २२॥

mudgala uvāca ||evaṃ stutvā gaṇeśānaṃ nemuḥ sarve punaḥ punaḥ |tānutthāpya vaco ramyaṃ gajānana uvāca ha || 22||

गजानन उवाच ॥वरं ब्रूत महाभागा देवाः सर्षिगणाः परम् ।स्तोत्रेण प्रीतिसंयुक्तो दास्यामि वांछितं परम् ॥ २३॥

gajānana uvāca ||varaṃ brūta mahābhāgā devāḥ sarṣigaṇāḥ param |stotreṇa prītisaṃyukto dāsyāmi vāṃchitaṃ param || 23||

गजाननवचः श्रुत्वा हर्षयुक्ता सुरर्षयः ।जगुस्तं भक्तिभावेन साश्रुनेत्रा प्रजापते ॥ २४॥

gajānanavacaḥ śrutvā harṣayuktā surarṣayaḥ |jagustaṃ bhaktibhāvena sāśrunetrā prajāpate || 24||

देवर्षय ऊचुः ॥यदि गजानन स्वामिन् प्रसन्नो वरदोऽसि मे ।तदा भक्तिं दृढां देहि लोभहीनां त्वदीयकाम् ॥ २५॥

devarṣaya ūcuḥ ||yadi gajānana svāmin prasanno varado'si me |tadā bhaktiṃ dṛḍhāṃ dehi lobhahīnāṃ tvadīyakām || 25||

लोभासुरस्य देवेश कृता शान्तिः सुखप्रदा ।तया गजदिदं सर्वं वरयुक्तं कृतं त्वया ॥ २६॥

lobhāsurasya deveśa kṛtā śāntiḥ sukhapradā |tayā gajadidaṃ sarvaṃ varayuktaṃ kṛtaṃ tvayā || 26||

अधुना देवदेवेश! कर्मयुक्ता द्विजातयः ।भविष्यन्ति धरायां वै वयं स्वस्थानगास्तथा ॥ २७॥

adhunā devadeveśa! karmayuktā dvijātayaḥ |bhaviṣyanti dharāyāṃ vai vayaṃ svasthānagāstathā || 27||

स्वस्वधर्मरताः सर्वे कृतास्त्वया गजानन!।अतः परं वरं ढुण्ढे याचमानः किमप्यहो!॥ २८॥

svasvadharmaratāḥ sarve kṛtāstvayā gajānana!|ataḥ paraṃ varaṃ ḍhuṇḍhe yācamānaḥ kimapyaho!|| 28||

यदा ते स्मरणं नाथ करिष्यामो वयं प्रभो ।तदा संकटहीनान् वै कुरू त्वं नो गजानन!॥ २९॥

yadā te smaraṇaṃ nātha kariṣyāmo vayaṃ prabho |tadā saṃkaṭahīnān vai kurū tvaṃ no gajānana!|| 29||

एवमुक्त्वा प्रणेमुस्तं गजाननमनामयम् ।तानुवाच सप्रीत्यात्मा भक्ताधीनः स्वभावतः ॥ ३०॥

evamuktvā praṇemustaṃ gajānanamanāmayam |tānuvāca saprītyātmā bhaktādhīnaḥ svabhāvataḥ || 30||

गजानन उवाच ॥यद्यच्च प्रार्थितं देवा मुनयः सर्वमंजसा ।भविष्यति न सन्देहो मत्स्मृत्या सर्वदा हि वः ॥ ३१॥

gajānana uvāca ||yadyacca prārthitaṃ devā munayaḥ sarvamaṃjasā |bhaviṣyati na sandeho matsmṛtyā sarvadā hi vaḥ || 31||

भवत्कृतमदीयं वै स्तोत्रं सर्वत्र सिद्धिदम् ।भविष्यति विशेषेण मम भक्तिप्रदायकम् ॥ ३२॥

bhavatkṛtamadīyaṃ vai stotraṃ sarvatra siddhidam |bhaviṣyati viśeṣeṇa mama bhaktipradāyakam || 32||

पुत्रपौत्रप्रदं पूर्णं धनधान्यप्रवर्धनम् ।सर्वसम्पत्करं देवाः पठनाच्छ्रवणान्नृणाम् ॥ ३३॥

putrapautrapradaṃ pūrṇaṃ dhanadhānyapravardhanam |sarvasampatkaraṃ devāḥ paṭhanācchravaṇānnṛṇām || 33||

मारणोच्चाटनादीनि नश्यन्ति स्तोत्रपाठतः ।परकृत्यं च विप्रेन्द्रा अशुभं नैव बाधते ॥ ३४॥

māraṇoccāṭanādīni naśyanti stotrapāṭhataḥ |parakṛtyaṃ ca viprendrā aśubhaṃ naiva bādhate || 34||

संग्रामे जयदं चैव यात्राकाले फलप्रदम् ।शत्रूच्चाटनादिषु च प्रशस्तं तद् भविष्यति ॥ ३५॥

saṃgrāme jayadaṃ caiva yātrākāle phalapradam |śatrūccāṭanādiṣu ca praśastaṃ tad bhaviṣyati || 35||

कारागृहगतस्यैव बन्धनाशकरं भवेत् ।असाध्यं साधयेत् सर्वमनेनैव सुरर्षयः ॥ ३६॥

kārāgṛhagatasyaiva bandhanāśakaraṃ bhavet |asādhyaṃ sādhayet sarvamanenaiva surarṣayaḥ || 36||

एकविंशति वारं तत् चैकविंशद्दिनावधिम् ।प्रयोगं यः करोत्येव सर्वसिद्धियुतो भवेत् ॥ ३७॥

ekaviṃśati vāraṃ tat caikaviṃśaddināvadhim |prayogaṃ yaḥ karotyeva sarvasiddhiyuto bhavet || 37||

धर्माऽर्थकाममोक्षाणां ब्रह्मभूतस्य दायकम् ।भविष्यति न सन्देहः स्तोत्रं मद्भक्तिवर्धनम् ॥ ३८॥

dharmā'rthakāmamokṣāṇāṃ brahmabhūtasya dāyakam |bhaviṣyati na sandehaḥ stotraṃ madbhaktivardhanam || 38||

एवमुक्त्वा गणाधीशस्तत्रैवान्तरधीयत ॥इति मुद्गलपुराणान्तर्गतं गजाननस्तोत्रं सम्पूर्णम् ॥॥ मुद्गलपुराणं चतुर्थः खण्डः । अध्यायः ४३ । ४\।४३। ३४०॥– ॥ मुद्गलपुराणं चतुर्थः खण्डः । अध्यायः ४३ । ४।४३। ३-४०॥

evamuktvā gaṇādhīśastatraivāntaradhīyata ||iti mudgalapurāṇāntargataṃ gajānanastotraṃ sampūrṇam |||| mudgalapurāṇaṃ caturthaḥ khaṇḍaḥ | adhyāyaḥ 43 | 4\|43| 340||– || mudgalapurāṇaṃ caturthaḥ khaṇḍaḥ | adhyāyaḥ 43 | 4|43| 3-40||