धूम्रवर्णभक्तिपञ्चकस्तोत्रम् अहंकृतं Dhumravarna Bhaktipanchaka Stotram Ahamkritam

॥ श्रीगणेशाय नमः ॥अहमुवाच ।यदि मे वरदोऽसि त्वं धूम्रवर्ण गजानन ।तदा ते पादपद्मे वै भक्तिं देहि परां विभो ॥ १॥

|| śrīgaṇeśāya namaḥ ||ahamuvāca |yadi me varado'si tvaṃ dhūmravarṇa gajānana |tadā te pādapadme vai bhaktiṃ dehi parāṃ vibho || 1||

गाणपत्यं कुरुष्व त्वं मां गणेशपरायणम् ।गाणपत्यप्रियं तात सदा सद्भावभाविकम् ॥ २॥

gāṇapatyaṃ kuruṣva tvaṃ māṃ gaṇeśaparāyaṇam |gāṇapatyapriyaṃ tāta sadā sadbhāvabhāvikam || 2||

स्थानं देहि तथा वृत्तिं योगक्षेमकरीं पराम् ।तत्रस्थस्त्वां भविष्यामि दासोऽहं ते गजानन ॥ ३॥

sthānaṃ dehi tathā vṛttiṃ yogakṣemakarīṃ parām |tatrasthastvāṃ bhaviṣyāmi dāso'haṃ te gajānana || 3||

नान्यं याचे कदा नाथ श्र्योङ्कारामोहमोहितम् ।सिद्धिबुद्धियुतं त्वाहं भजिष्यामि विशेषतः ॥ ४॥

nānyaṃ yāce kadā nātha śryoṅkārāmohamohitam |siddhibuddhiyutaṃ tvāhaṃ bhajiṣyāmi viśeṣataḥ || 4||

बोधितो गुरुणाऽत्यन्तं तस्य वाक्यपरायणः ।योगशान्तिमयं रूपं भजिष्यामि महोदर ॥ ५॥

bodhito guruṇā'tyantaṃ tasya vākyaparāyaṇaḥ |yogaśāntimayaṃ rūpaṃ bhajiṣyāmi mahodara || 5||

(फलश्रुतिः)धूम्रवर्ण उवाच ।मयि भक्तिर्दृढा तेऽस्तु मयि दास्यपरायणः ।गाणपत्यप्रियो भूत्वा चरिष्यसि न संशयः ॥ ६॥

(phalaśrutiḥ)dhūmravarṇa uvāca |mayi bhaktirdṛḍhā te'stu mayi dāsyaparāyaṇaḥ |gāṇapatyapriyo bhūtvā cariṣyasi na saṃśayaḥ || 6||

यत्रादौ मे महादैत्य पूजनं नैव विद्यते ।तत्र कर्मसु ते स्थानं भुङ्क्ष्व कर्मफलं महत् ॥ ७॥

yatrādau me mahādaitya pūjanaṃ naiva vidyate |tatra karmasu te sthānaṃ bhuṅkṣva karmaphalaṃ mahat || 7||

कार्यादौ स्मरणं मे न तत्र त्वं सुस्थिरो भव ।आसुरेण स्वभावेन भ्रंशयस्व निरन्तरम् ॥ ८॥

kāryādau smaraṇaṃ me na tatra tvaṃ susthiro bhava |āsureṇa svabhāvena bhraṃśayasva nirantaram || 8||

स्वपुरे गच्छ दैत्येन्द्र मद्भक्तान् रक्ष सर्वदा ।मदहङ्कृतिसंयुक्तान् कुरु त्वं नित्यमादरात् ॥ ९॥

svapure gaccha daityendra madbhaktān rakṣa sarvadā |madahaṅkṛtisaṃyuktān kuru tvaṃ nityamādarāt || 9||

यत्र मे स्मरणं चादौ पूजनं सर्वकर्मसु ।तत्र साधुस्वभावेन वर्तस्व तदहङ्कृतिः ॥ १०॥

yatra me smaraṇaṃ cādau pūjanaṃ sarvakarmasu |tatra sādhusvabhāvena vartasva tadahaṅkṛtiḥ || 10||

गणेशभक्तिसंयुक्तो मदीयाहङ्कृतेर्धरः ।भविष्यसि न सन्देहो गच्छ गच्छ मदाज्ञया ॥ ११॥

gaṇeśabhaktisaṃyukto madīyāhaṅkṛterdharaḥ |bhaviṣyasi na sandeho gaccha gaccha madājñayā || 11||

श्रीशिव उवाच ।एवमुक्त्वा गणाधीशस्तमहं विरराम है ।प्रणम्य तमहङ्कारः ययौ स्वनगरं मुदा ॥ १२॥

śrīśiva uvāca |evamuktvā gaṇādhīśastamahaṃ virarāma hai |praṇamya tamahaṅkāraḥ yayau svanagaraṃ mudā || 12||

तादृशं तं परिज्ञाय दैत्येशा दुःखसंयुताः ।त्यक्त्वा पातालगाः सर्वे बभूवुर्भयविह्वलाः ॥ १३॥

tādṛśaṃ taṃ parijñāya daityeśā duḥkhasaṃyutāḥ |tyaktvā pātālagāḥ sarve babhūvurbhayavihvalāḥ || 13||

स एव सुखसंयुक्तोऽभजत्तं गणनायकम् ।अनन्यमनसा ध्यात्वा धूम्रवर्णधरं परम् ॥ १४॥

sa eva sukhasaṃyukto'bhajattaṃ gaṇanāyakam |ananyamanasā dhyātvā dhūmravarṇadharaṃ param || 14||

यथा जगाद विघ्नेशस्तथा चकार भावतः ।अहङ्कारासुरश्चैव शान्तरूपो बभूव ह ॥ १५॥

yathā jagāda vighneśastathā cakāra bhāvataḥ |ahaṅkārāsuraścaiva śāntarūpo babhūva ha || 15||

इति अहंकृतं धूम्रवर्णभक्तिपञ्चकस्तोत्रं सम्पूर्णम् ॥॥ मुद्गलपुराणं अष्टमः खण्डः । अध्यायः ७ । ८\।७ ३२४६॥– ॥ मुद्गलपुराणं अष्टमः खण्डः । अध्यायः ७ । ८।७ ३२-४६॥

iti ahaṃkṛtaṃ dhūmravarṇabhaktipañcakastotraṃ sampūrṇam |||| mudgalapurāṇaṃ aṣṭamaḥ khaṇḍaḥ | adhyāyaḥ 7 | 8\|7 3246||– || mudgalapurāṇaṃ aṣṭamaḥ khaṇḍaḥ | adhyāyaḥ 7 | 8|7 32-46||