वज्रविलासिनीस्तोत्रम् Vajravilasini Stotram

ॐ नमः श्रीवज्रयोगिन्यै ।देवासुरनरवन्दितचरणे भवमग्नोद्धरणार्पितचरणे ।त्वयि रोदिमि नुतिसव्यपदेशः किं पश्यसि पुनरनिशमशेषम् ॥ १॥

oṃ namaḥ śrīvajrayoginyai |devāsuranaravanditacaraṇe bhavamagnoddharaṇārpitacaraṇe |tvayi rodimi nutisavyapadeśaḥ kiṃ paśyasi punaraniśamaśeṣam || 1||

मातर्देवि किरसि कणमुष्टिं जनयद् यज्ञसुतः किमतुष्टिम् ।वज्रवाराहि नराहिसुराणां त्वं शरणं तव नामपराणाम् ॥ २॥

mātardevi kirasi kaṇamuṣṭiṃ janayad yajñasutaḥ kimatuṣṭim |vajravārāhi narāhisurāṇāṃ tvaṃ śaraṇaṃ tava nāmaparāṇām || 2||

हरिकर(रि)शिखिफणितस्करभीतिस्त्वत्परचित्ते नैव समेति ।मातर्देवि निभालय मह्यं किं सहसे मम दुःखमसह्यम् ॥ ३॥

harikara(ri)śikhiphaṇitaskarabhītistvatparacitte naiva sameti |mātardevi nibhālaya mahyaṃ kiṃ sahase mama duḥkhamasahyam || 3||

तर्जनवज्रकरोट(वि)धारिणि दुष्टं तुष्टय मारनिवारिणि ।अभिनवकोमलकरचरणाङ्गि त्रिवलिसमुच्छदसप्तविभङ्गि ॥ ४॥

tarjanavajrakaroṭa(vi)dhāriṇi duṣṭaṃ tuṣṭaya māranivāriṇi |abhinavakomalakaracaraṇāṅgi trivalisamucchadasaptavibhaṅgi || 4||

ग्राह्यग्राहकभावविशुद्धे पादकराङ्गुलिजालपिनद्धे ।आयतपार्श्वाङ्गुलिकरचरणे ध्वस्तव्याधिजराजनिमरणे ॥ ५॥

grāhyagrāhakabhāvaviśuddhe pādakarāṅgulijālapinaddhe |āyatapārśvāṅgulikaracaraṇe dhvastavyādhijarājanimaraṇe || 5||

उद्गतरेणुरूर्ध्वगतरोमा वज्रयोगविवृतामृतधामा ।बालमरीचिविलोकनरक्ते जगतां दुःखनिराकृतिशक्ते ॥ ६॥

udgatareṇurūrdhvagataromā vajrayogavivṛtāmṛtadhāmā |bālamarīcivilokanarakte jagatāṃ duḥkhanirākṛtiśakte || 6||

सुभ्रु तनूदरि मध्यकृशाङ्गि कर्णान्तायतलोचनभृङ्गि(भङ्गि) ।डाकिन्ये (व हि) विश्वमशेषं लोको वेत्ति न ते बहुवेषम् ॥ ७॥

subhru tanūdari madhyakṛśāṅgi karṇāntāyatalocanabhṛṅgi(bhaṅgi) |ḍākinye (va hi) viśvamaśeṣaṃ loko vetti na te bahuveṣam || 7||

यत्नमृते जगदर्थसमृद्धिश्चिन्तितमात्रजनेप्सितसिद्धिः ।मूढो वेत्ति न दुष्कृतकर्म प्रावृषीव न शिलाङ्कुरजन्म ॥ ८॥

yatnamṛte jagadarthasamṛddhiścintitamātrajanepsitasiddhiḥ |mūḍho vetti na duṣkṛtakarma prāvṛṣīva na śilāṅkurajanma || 8||

अन्ध इवार्कशशाङ्कादर्शी पापजनो ह्यनुभावस्पर्शी ।चिन्तामणिमज्ञा न विदन्ति प्रज्ञे त्वस्य फलानि फलन्ति ॥ ९॥

andha ivārkaśaśāṅkādarśī pāpajano hyanubhāvasparśī |cintāmaṇimajñā na vidanti prajñe tvasya phalāni phalanti || 9||

चक्राङ्कितकरपादमनोज्ञे ज्ञानानलभस्मीकृतसङ्गे ।कायवचनमनसा कृतदुरितं रागद्वेषमोहपरिकरि(लि)तम् ॥ १०॥

cakrāṅkitakarapādamanojñe jñānānalabhasmīkṛtasaṅge |kāyavacanamanasā kṛtaduritaṃ rāgadveṣamohaparikari(li)tam || 10||

तद्दिशामि तव देवि समक्षं यावद्यामि न दुर्गतिपक्षम् ।मनः परमार्थं तनुस्तव वेदी स भवति नैव दुरितपरिखेदी ॥ ११॥

taddiśāmi tava devi samakṣaṃ yāvadyāmi na durgatipakṣam |manaḥ paramārthaṃ tanustava vedī sa bhavati naiva duritaparikhedī || 11||

लक्षणनिखिलालक्षितगात्रे सकलानुव्यञ्जनगतपात्रे ।नवयौवनमदमन्थरपिण्डे चलकुण्डलयुगमण्डितगण्डे ॥ १२॥

lakṣaṇanikhilālakṣitagātre sakalānuvyañjanagatapātre |navayauvanamadamantharapiṇḍe calakuṇḍalayugamaṇḍitagaṇḍe || 12||

तुङ्गनितम्बघनस्तनभारे गलकालम्बिनिरंशुक(ङ्कुश)हारे ।संवरमधुपविचुम्बिमुखाब्जे तद्भुजयुगपरिरब्धहृदब्जे ॥ १३॥

tuṅganitambaghanastanabhāre galakālambiniraṃśuka(ṅkuśa)hāre |saṃvaramadhupavicumbimukhābje tadbhujayugaparirabdhahṛdabje || 13||

निर्भरसुरतसुखाविकलाक्षि मुक्तशिरोरुहवसननिरपेक्षे ।हेरुकराहुदष्टमुखचन्द्रे सस्मितरचित हूं हूं कृतमन्त्रे ॥ १४॥

nirbharasuratasukhāvikalākṣi muktaśiroruhavasananirapekṣe |herukarāhudaṣṭamukhacandre sasmitaracita hūṃ hūṃ kṛtamantre || 14||

पतिमौलिस्थितविधुममृषन्ती किमु चन्द्रार्कौ वपु(र)मुषन्ती ।मातस्ते जगदनुपमरूपं तद्विचारय परमार्थ स(स्व)रूपम् ॥ १५॥

patimaulisthitavidhumamṛṣantī kimu candrārkau vapu(ra)muṣantī |mātaste jagadanupamarūpaṃ tadvicāraya paramārtha sa(sva)rūpam || 15||

क्लेशदाहिं(ह)शमनामृतवचनं तद्विनेयजनशुद्धिविरचनम् ।पद्मिनीति नलिनामलगन्धः करुणापरजगदर्थनिबन्धः ॥ १६॥

kleśadāhiṃ(ha)śamanāmṛtavacanaṃ tadvineyajanaśuddhiviracanam |padminīti nalināmalagandhaḥ karuṇāparajagadarthanibandhaḥ || 16||

दिव्यसुधाधर(गत)रसपानं तज्जगदद्वयबोधिनिधानम् ।प्रत्यङ्गस्पर्शोऽप्यनिमित्तं सहजाम्बुधिविप्लावितचित्तम् ॥ १७॥

divyasudhādhara(gata)rasapānaṃ tajjagadadvayabodhinidhānam |pratyaṅgasparśo'pyanimittaṃ sahajāmbudhiviplāvitacittam || 17||

किं त्वं मातः करिष्यसि ताभिः षट्त्रिंशच्छतकोट्यबलाभिः ।यद्यन्यां मनुते बहुतातस्तद्विहाय झगिति देहि नु मातः ॥ १८॥

kiṃ tvaṃ mātaḥ kariṣyasi tābhiḥ ṣaṭtriṃśacchatakoṭyabalābhiḥ |yadyanyāṃ manute bahutātastadvihāya jhagiti dehi nu mātaḥ || 18||

नाडीचक्रनिरोध \ महासुखसंवर ।देवि त्वं शतभावविकल्पा शून्यसमाधिरपाकृततुल्या (तल्पा) ॥ १९॥

nāḍīcakranirodha \ mahāsukhasaṃvara |devi tvaṃ śatabhāvavikalpā śūnyasamādhirapākṛtatulyā (talpā) || 19||

शून्यकृपे सहजाद्वयमुक्तं वज्राय(ज्रया)नमिदमवधि(वि)भक्तम् ।भावाभावसमस्ताकाशव्यापी भवति स तत्त्वविकाशः ॥ २०॥

śūnyakṛpe sahajādvayamuktaṃ vajrāya(jrayā)namidamavadhi(vi)bhaktam |bhāvābhāvasamastākāśavyāpī bhavati sa tattvavikāśaḥ || 20||

उद्भवन्ति तत एव विमोक्षा बोधिपक्षनिखिलप्रतिपक्षाः ।बुद्धानामावेणिकधर्मः सत्त्वराशिपरिपाचितकर्मः ॥ २१॥

udbhavanti tata eva vimokṣā bodhipakṣanikhilapratipakṣāḥ |buddhānāmāveṇikadharmaḥ sattvarāśiparipācitakarmaḥ || 21||

यद्वा यानत्रयनिर्याणं धूमादिकमपि चापरिमाणम् ।त्वद्भक्त्या यदलम्भि शुभं मे भवतु मनो भवतीपरमं मे ।सकलकलुषरहितं गुणसिन्धुस्त्वत्परमं ह्यत एव न बन्धुः ॥ २२॥

yadvā yānatrayaniryāṇaṃ dhūmādikamapi cāparimāṇam |tvadbhaktyā yadalambhi śubhaṃ me bhavatu mano bhavatīparamaṃ me |sakalakaluṣarahitaṃ guṇasindhustvatparamaṃ hyata eva na bandhuḥ || 22||

गुह्यसमयसाधनतन्त्रे श्रीवज्रविलासिनीस्तोत्रं सम्पूर्णम् ।इति महापण्डितविभूतिचन्द्रपादकृतं वज्रविलासिनीस्तोत्रं सम्पूर्णम् ॥

guhyasamayasādhanatantre śrīvajravilāsinīstotraṃ sampūrṇam |iti mahāpaṇḍitavibhūticandrapādakṛtaṃ vajravilāsinīstotraṃ sampūrṇam ||