ब्रह्मचामुण्डिकास्तवः Shri Brahmachamundika Stava

वेदवक्त्रां चतुर्हस्तां सर्वालङ्कार भासुराम् ।त्रिशूलं चाक्षमालां च पानपात्रं सिताम्बुजम् ॥ १॥

vedavaktrāṃ caturhastāṃ sarvālaṅkāra bhāsurām |triśūlaṃ cākṣamālāṃ ca pānapātraṃ sitāmbujam || 1||

बिभ्रतीं रक्तवसनां करण्डमकुटान्विताम् ।प्रेतासनां स्मरेद्देवीं ब्रह्मचामुण्डिरूपिणीम् ॥ २॥

bibhratīṃ raktavasanāṃ karaṇḍamakuṭānvitām |pretāsanāṃ smareddevīṃ brahmacāmuṇḍirūpiṇīm || 2||

उद्यद्भास्करसन्निभां त्रिणयनां वेदाननाब्जां चतुर्हस्तैरम्बुजशूलदामचषकान् सम्बिभ्रतीं शूलिनः ।नृत्ताडम्बरधूर्वहां शिवमयीं प्रेतासनाध्यासिनींध्यायेत्तिल्लवनेश्वरीं हृदि सदा श्रीब्रह्मचामुण्डिकाम् ॥ ३॥

udyadbhāskarasannibhāṃ triṇayanāṃ vedānanābjāṃ caturhastairambujaśūladāmacaṣakān sambibhratīṃ śūlinaḥ |nṛttāḍambaradhūrvahāṃ śivamayīṃ pretāsanādhyāsinīṃdhyāyettillavaneśvarīṃ hṛdi sadā śrībrahmacāmuṇḍikām || 3||

ओङ्काराम्बुज संस्थितामुपनिषद्गीतापदानोत्तमांओड्याणादि चतुर्विधोन्नत महापीठाधिरूढां शिवाम् ।ओजोदीप्तरवीन्दुवह्निमुखरामोघत्रयाभ्यर्चितांवन्देऽहं विपदं सदा शमयितुं श्रीब्रह्मचामुण्डिकाम् ॥ ४॥

oṅkārāmbuja saṃsthitāmupaniṣadgītāpadānottamāṃoḍyāṇādi caturvidhonnata mahāpīṭhādhirūḍhāṃ śivām |ojodīptaravīnduvahnimukharāmoghatrayābhyarcitāṃvande'haṃ vipadaṃ sadā śamayituṃ śrībrahmacāmuṇḍikām || 4||

ब्रह्मेन्द्राग्नि मुखामरेडितपदां ब्रह्मांशजातां बृहच्छूलप्रोतनिशुम्भदैत्यहृदयां ब्राह्म्यादिभिः संवृताम् ।बाधाहीनपदप्रदां बुधनुतां बन्धूकरागाम्बरांवन्देऽहं विपदं सदा शमयितुं श्रीब्रह्मचामुण्डिकाम् ॥ ५॥

brahmendrāgni mukhāmareḍitapadāṃ brahmāṃśajātāṃ bṛhacchūlaprotaniśumbhadaityahṛdayāṃ brāhmyādibhiḥ saṃvṛtām |bādhāhīnapadapradāṃ budhanutāṃ bandhūkarāgāmbarāṃvande'haṃ vipadaṃ sadā śamayituṃ śrībrahmacāmuṇḍikām || 5||

हर्यक्षासनसंस्थितां हयमुखागस्त्यादिपूज्यां हठात्कारध्वस्तबलोच्छ्रयासुरगणां हारावलीभासुराम् ।हाहाहूहु मुखैः स्तुतां हुतवहज्वालाभकेशान्वितांवन्देऽहं विपदं सदा शमयितुं श्रीब्रह्मचामुण्डिकाम् ॥ ६॥

haryakṣāsanasaṃsthitāṃ hayamukhāgastyādipūjyāṃ haṭhātkāradhvastabalocchrayāsuragaṇāṃ hārāvalībhāsurām |hāhāhūhu mukhaiḥ stutāṃ hutavahajvālābhakeśānvitāṃvande'haṃ vipadaṃ sadā śamayituṃ śrībrahmacāmuṇḍikām || 6||

चातुर्योक्तिविमोहितप्रियतमां चन्द्रार्कवह्नीक्षणांचण्डानेकसुरान्तकान्तककरीं चापल्यहीनेष्टदाम् ।चारुस्मेर चतुर्मुखां प्रबलदोश्शूलाक्षपात्राम्बुजांवन्देऽहं विपदं सदा शमयितुं श्रीब्रह्मचामुण्डिकाम् ॥ ७॥

cāturyoktivimohitapriyatamāṃ candrārkavahnīkṣaṇāṃcaṇḍānekasurāntakāntakakarīṃ cāpalyahīneṣṭadām |cārusmera caturmukhāṃ prabaladośśūlākṣapātrāmbujāṃvande'haṃ vipadaṃ sadā śamayituṃ śrībrahmacāmuṇḍikām || 7||

मुक्ताहारमनोहरां मुनिजनाभीष्टां मुकुन्दार्चितांमुद्रामुद्रित मुण्डचण्डदनुजां मुक्तिप्रदां मोहिनीम् ।मुग्धां मुग्धविभूषणां मुकुरसच्छायातपत्रामुमांवन्देऽहं विपदं सदा शमयितुं श्रीब्रह्मचामुण्डिकाम् ॥ ८॥

muktāhāramanoharāṃ munijanābhīṣṭāṃ mukundārcitāṃmudrāmudrita muṇḍacaṇḍadanujāṃ muktipradāṃ mohinīm |mugdhāṃ mugdhavibhūṣaṇāṃ mukurasacchāyātapatrāmumāṃvande'haṃ vipadaṃ sadā śamayituṃ śrībrahmacāmuṇḍikām || 8||

डाकिन्यादिभिरावृतां डमरुनिध्वानप्रियां डामरींडिम्भप्रार्थिमहीसुरादि जनतास्तोत्रप्रपञ्चालयाम् ।डोलाडम्बर नर्तनेश्वरवाक्प्रोत्साहितां डम्भिनींवन्देऽहं विपदं सदा शमयितुं श्रीब्रह्मचामुण्डिकाम् ॥ ९॥

ḍākinyādibhirāvṛtāṃ ḍamarunidhvānapriyāṃ ḍāmarīṃḍimbhaprārthimahīsurādi janatāstotraprapañcālayām |ḍolāḍambara nartaneśvaravākprotsāhitāṃ ḍambhinīṃvande'haṃ vipadaṃ sadā śamayituṃ śrībrahmacāmuṇḍikām || 9||

नम्यां नम्रदिगीश्वरीं नगसुतां नारायणीं नर्तकींनानारत्नकिरीटकुण्डलधरां नित्यां नितान्तेष्टदाम् ।नीहारेशधरां निशुम्भशमनीं निर्वैरिणीं निश्चलांवन्देऽहं विपदं सदा शमयितुं श्रीब्रह्मचामुण्डिकाम् ॥ १०॥

namyāṃ namradigīśvarīṃ nagasutāṃ nārāyaṇīṃ nartakīṃnānāratnakirīṭakuṇḍaladharāṃ nityāṃ nitānteṣṭadām |nīhāreśadharāṃ niśumbhaśamanīṃ nirvairiṇīṃ niścalāṃvande'haṃ vipadaṃ sadā śamayituṃ śrībrahmacāmuṇḍikām || 10||

मोहध्वान्तरविप्रभां मधुरिमाकारां मरालोद्वहांमायां माधवसोदरीं मरकतच्छायां मनोदूरगाम् ।मान्यां माहिषमस्तकस्थितिजुषीं मारप्रियां मातरंवन्देऽहं विपदं सदा शमयितुं श्रीब्रह्मचामुण्डिकाम् ॥ ११॥

mohadhvāntaraviprabhāṃ madhurimākārāṃ marālodvahāṃmāyāṃ mādhavasodarīṃ marakatacchāyāṃ manodūragām |mānyāṃ māhiṣamastakasthitijuṣīṃ mārapriyāṃ mātaraṃvande'haṃ vipadaṃ sadā śamayituṃ śrībrahmacāmuṇḍikām || 11||

एतं स्तोत्रवरं पठन्तु सुधियः सङ्कल्पकल्पद्रुमंभूतप्रेतपिशाचमोहनकरं सर्वापदां नाशकम् ।कान्तापुत्रधनप्रदं सरसवाग्वेगप्रदं सर्वदंदुर्गापाङ्गकटाक्षपातनकरं दुःखाम्बुधेस्तारकम् ॥ १२॥

etaṃ stotravaraṃ paṭhantu sudhiyaḥ saṅkalpakalpadrumaṃbhūtapretapiśācamohanakaraṃ sarvāpadāṃ nāśakam |kāntāputradhanapradaṃ sarasavāgvegapradaṃ sarvadaṃdurgāpāṅgakaṭākṣapātanakaraṃ duḥkhāmbudhestārakam || 12||

इति श्री ब्रह्मचामुण्डिकास्तवः सम्पूर्णः ।श्री श्रीमूलयोगीन्द्रकृत

iti śrī brahmacāmuṇḍikāstavaḥ sampūrṇaḥ |śrī śrīmūlayogīndrakṛta