कुण्डलिनीस्तोत्रम् २ कन्दवासिनिस्तोत्रम् Kundalini Stotram 2 Kandavasini Stotram

श्रीआनन्दभैरवी उवाचअथ कान्त प्रवक्ष्यामि शृणुष्व मम तत्त्वतः ।शक्तिः कुण्डलिनी देवी सर्वभेदनभेदिनी ॥ ३२१॥

śrīānandabhairavī uvācaatha kānta pravakṣyāmi śṛṇuṣva mama tattvataḥ |śaktiḥ kuṇḍalinī devī sarvabhedanabhedinī || 321||

कलिकल्मषहन्त्री च जगतां मोक्षदायिनी ।तस्याः स्तोत्रं तथा ध्यानं न्यासं मन्त्रं शृणु प्रभो ॥ ३२२॥

kalikalmaṣahantrī ca jagatāṃ mokṣadāyinī |tasyāḥ stotraṃ tathā dhyānaṃ nyāsaṃ mantraṃ śṛṇu prabho || 322||

यस्य विज्ञानमात्रेण मूलपद्मे मनोलयः ।चैतन्यानन्दनिरतो भवेत् कुण्डलिसङ्गमात् ॥ ३२३॥

yasya vijñānamātreṇa mūlapadme manolayaḥ |caitanyānandanirato bhavet kuṇḍalisaṅgamāt || 323||

आकाशगामिनीं सिद्धिं ददाति कुण्डली भृशम् ।अमृतानन्दरूपाभ्यां करोषि पालनं नृणाम् ॥ ३२४॥

ākāśagāminīṃ siddhiṃ dadāti kuṇḍalī bhṛśam |amṛtānandarūpābhyāṃ karoṣi pālanaṃ nṛṇām || 324||

कुण्डलिनीध्यानम् ।श्वासोच्छ्वासकलाभ्यां च शरीरं त्रिगुणात्मकम् ।पञ्चभूतावृता नित्यं पञ्चानिला भवेद् ध्रुवम् ॥ ३२५॥

kuṇḍalinīdhyānam |śvāsocchvāsakalābhyāṃ ca śarīraṃ triguṇātmakam |pañcabhūtāvṛtā nityaṃ pañcānilā bhaved dhruvam || 325||

कोटिसूर्यप्रतीकाशां निरालम्बां विभावयेत् ।सर्वस्थितां ज्ञानरूपां श्वासोच्छ्वासनिवासिनीम् ॥ ३२६॥

koṭisūryapratīkāśāṃ nirālambāṃ vibhāvayet |sarvasthitāṃ jñānarūpāṃ śvāsocchvāsanivāsinīm || 326||

स्वयम्भूकुसुमोत्पन्नां ध्यानज्ञानप्रकाशिनीम् ।मोक्षदां शक्तिदां नित्यां नित्यज्ञानस्वरूपिणीम् ॥ ३२७॥

svayambhūkusumotpannāṃ dhyānajñānaprakāśinīm |mokṣadāṃ śaktidāṃ nityāṃ nityajñānasvarūpiṇīm || 327||

लोलां लीलाधरां सर्वां शुद्धज्ञानप्रकाशिनीम् ।कोटिकालानलसमां विद्युत्कोटिमहौजसाम् ॥ ३२८॥

lolāṃ līlādharāṃ sarvāṃ śuddhajñānaprakāśinīm |koṭikālānalasamāṃ vidyutkoṭimahaujasām || 328||

तेजसा व्याप्तकिरणां मूलादूर्ध्वप्रकाशिनीम् ।अष्टलोकप्रकाशाढ्यां फुल्लेन्दीवरलोचनाम् ॥ ३२९॥

tejasā vyāptakiraṇāṃ mūlādūrdhvaprakāśinīm |aṣṭalokaprakāśāḍhyāṃ phullendīvaralocanām || 329||

सर्वमुखीं सर्वहस्तां सर्वपादाम्बुजस्थिताम् ।मूलादिब्रह्मरन्ध्रान्तस्थानलोकप्रकाशिनीम् ॥ ३२१०॥

sarvamukhīṃ sarvahastāṃ sarvapādāmbujasthitām |mūlādibrahmarandhrāntasthānalokaprakāśinīm || 3210||

त्रिभाषां सर्वभक्षां च श्वासनिर्गमपालिनीम् ।ललितां सुन्दरीं नीलां कुण्डलीं कुण्डलाकृतिम् ॥ ३२११॥

tribhāṣāṃ sarvabhakṣāṃ ca śvāsanirgamapālinīm |lalitāṃ sundarīṃ nīlāṃ kuṇḍalīṃ kuṇḍalākṛtim || 3211||

अभूमण्डलबाह्यस्थां बाह्यज्ञानप्रकाशिनीम् ।नागिनीं नागभूषाढ्यां भयानककलेवराम् ॥ ३२१२॥

abhūmaṇḍalabāhyasthāṃ bāhyajñānaprakāśinīm |nāginīṃ nāgabhūṣāḍhyāṃ bhayānakakalevarām || 3212||

योगिज्ञेयां शुद्धरूपां विरलामूर्ध्वगामिनीम् ।एवं ध्यात्वा मूलपद्मे कुण्डलीं परदेवताम् ॥ ३२१३॥

yogijñeyāṃ śuddharūpāṃ viralāmūrdhvagāminīm |evaṃ dhyātvā mūlapadme kuṇḍalīṃ paradevatām || 3213||

भावसिद्धिर्भवेत् क्षिप्रं कुण्डलीभावनादिह ।ततो मानसजापं हि मानसं होमतर्पणम् ॥ ३२१४॥

bhāvasiddhirbhavet kṣipraṃ kuṇḍalībhāvanādiha |tato mānasajāpaṃ hi mānasaṃ homatarpaṇam || 3214||

अभिषेकं मुदा कृत्वा प्रातः काले पुनः पुनःप्राणायामं ततः कृत्वा स्तोत्रं च कवचं पठेत् ॥ ३२१५॥

abhiṣekaṃ mudā kṛtvā prātaḥ kāle punaḥ punaḥprāṇāyāmaṃ tataḥ kṛtvā stotraṃ ca kavacaṃ paṭhet || 3215||

एतत्स्तोत्रस्य पाठेन स्वयं सिद्धान्तविद्भवेत् ।कुण्डली सुकृपा तस्य मासाद्भवति निश्चितम् ॥ ३२१६॥

etatstotrasya pāṭhena svayaṃ siddhāntavidbhavet |kuṇḍalī sukṛpā tasya māsādbhavati niścitam || 3216||

निद्रादोषादिक्ं त्यक्त्वा प्रकाश्याहं शरीरके ।अहं दात्री सुयोगानामधिपाहं जगत्त्रये ॥ ३२१७॥

nidrādoṣādikṃ tyaktvā prakāśyāhaṃ śarīrake |ahaṃ dātrī suyogānāmadhipāhaṃ jagattraye || 3217||

अहं कर्म अहं धर्मः अहं देवी च कुण्डली ।यो जानाति महावीर कुण्डलीरूपसेवनात् ॥ ३२१८॥

ahaṃ karma ahaṃ dharmaḥ ahaṃ devī ca kuṇḍalī |yo jānāti mahāvīra kuṇḍalīrūpasevanāt || 3218||

इति तं पात्रकं कर्तुमवतीर्णास्मि सर्वदा ।अत एव परं मन्त्रं कुण्डलिन्याः स्तवं शुभम् ॥ ३२१९॥

iti taṃ pātrakaṃ kartumavatīrṇāsmi sarvadā |ata eva paraṃ mantraṃ kuṇḍalinyāḥ stavaṃ śubham || 3219||

प्रपठेत् सर्वदा देहे यदि वश्या न कुण्डली ।तावत् कालं जपं कुर्याद् यावत् सिद्धिर्न जायते ॥ ३२२०॥

prapaṭhet sarvadā dehe yadi vaśyā na kuṇḍalī |tāvat kālaṃ japaṃ kuryād yāvat siddhirna jāyate || 3220||

कुण्डलिनीस्तोत्रम्आधारे परदेवता भवनताधोकुण्डली देवता ।देवानामधिदेवता त्रिजगतामानन्दपुञ्जस्थिता ॥ ३२२१॥

kuṇḍalinīstotramādhāre paradevatā bhavanatādhokuṇḍalī devatā |devānāmadhidevatā trijagatāmānandapuñjasthitā || 3221||

मूलाधारनिवासिनी त्रिरमणी या ज्ञानिनी मालिनी ।सा मे मातृमनुस्थिता कुलपथानन्दैकबीजानना ॥ ३२२२॥

mūlādhāranivāsinī triramaṇī yā jñāninī mālinī |sā me mātṛmanusthitā kulapathānandaikabījānanā || 3222||

सर्वाङ्गस्थितिकारिणी सुरगणानन्दैकचिन्हा शिवा ।वीरेन्द्रा नवकामिनी वचनदा श्रीमानदा ज्ञानदा ॥ ३२२३॥

sarvāṅgasthitikāriṇī suragaṇānandaikacinhā śivā |vīrendrā navakāminī vacanadā śrīmānadā jñānadā || 3223||

सानन्दा घननन्दिनी घनगणा छिन्ना भवा योगिनी ।धीरा धैर्यवती समाप्तविषया श्रीमङ्गली कुण्डली ॥ ३२२४॥

sānandā ghananandinī ghanagaṇā chinnā bhavā yoginī |dhīrā dhairyavatī samāptaviṣayā śrīmaṅgalī kuṇḍalī || 3224||

सर्वाकारनिवासिनी जयधराधाराधरस्थागया ।गीता गोधनवर्द्धिनी गुरुमयी ज्ञानप्रिया गोधना ॥ ३२२५॥

sarvākāranivāsinī jayadharādhārādharasthāgayā |gītā godhanavarddhinī gurumayī jñānapriyā godhanā || 3225||

गार्हाग्निस्थिति चन्द्रिका सुलतिका जाड्यापहा रागदा ।दारा गोधनकारिणी मृगमना ब्रह्माण्डमार्गोज्ज्वला ॥ ३२२६॥

gārhāgnisthiti candrikā sulatikā jāḍyāpahā rāgadā |dārā godhanakāriṇī mṛgamanā brahmāṇḍamārgojjvalā || 3226||

माता मानसगोचरा हरिचरा सिंहासनकारणा ।यामा दासगणेश्वरी गुणवती छायापथस्थायिनी ॥ ३२२७॥

mātā mānasagocarā haricarā siṃhāsanakāraṇā |yāmā dāsagaṇeśvarī guṇavatī chāyāpathasthāyinī || 3227||

निद्रा क्षुब्धजनपिरया वरतृषा भाषाविशेषस्थिता ।स्थित्यन्तप्रलयापहा नरशिरोमालाधरा कुण्डली ॥ ३२२८॥

nidrā kṣubdhajanapirayā varatṛṣā bhāṣāviśeṣasthitā |sthityantapralayāpahā naraśiromālādharā kuṇḍalī || 3228||

गाङ्गेशी यमुनेश्वरी गुरुतरी गोदावरी भास्करी ।भक्तार्तिक्षयकारिणी समशिवं यद्येकभावान्विता ॥ ३२२९॥

gāṅgeśī yamuneśvarī gurutarī godāvarī bhāskarī |bhaktārtikṣayakāriṇī samaśivaṃ yadyekabhāvānvitā || 3229||

त्वं शीघ्रं कुरु कौलिके मम शिरोरन्ध्रं तदब्जं मुदा ।तत्पत्रस्थितदैवतं कुलवती मातृस्थलं पाहिकम् ॥ ३२३०॥

tvaṃ śīghraṃ kuru kaulike mama śirorandhraṃ tadabjaṃ mudā |tatpatrasthitadaivataṃ kulavatī mātṛsthalaṃ pāhikam || 3230||

भालोर्द्।ह्ध्वे धवला कलारसकला कालाग्निजालोज्ज्वला ।फेरुप्राणनिकेतने गुरुतरा गुर्व्वी सुगुर्व्वी सुरा ॥ ३२३१॥

bhālord|hdhve dhavalā kalārasakalā kālāgnijālojjvalā |pheruprāṇaniketane gurutarā gurvvī sugurvvī surā || 3231||

हालोल्लाससमोदया यतिनया माया जगत्तारिणी ।निद्रामैथुननाशिनी मम हरा मोहापहा पातुकम् ॥ ३२३२॥

hālollāsasamodayā yatinayā māyā jagattāriṇī |nidrāmaithunanāśinī mama harā mohāpahā pātukam || 3232||

भालं नीलतनुस्थिता मतिमतामर्थप्रिया मैथिली ।भालानन्दकरा महाप्रियजना पद्मानना कोमला ॥ ३२३३॥

bhālaṃ nīlatanusthitā matimatāmarthapriyā maithilī |bhālānandakarā mahāpriyajanā padmānanā komalā || 3233||

नानारङ्गसुपीठदेशवसना सिद्धासना घोषणा ।त्राणस्थावररूपिणी कलिहनी श्रीकुण्डली पातुकम् ॥ ३२३४॥

nānāraṅgasupīṭhadeśavasanā siddhāsanā ghoṣaṇā |trāṇasthāvararūpiṇī kalihanī śrīkuṇḍalī pātukam || 3234||

भ्रूमध्यं बगलामुखी शशिमुखी विद्यामुखी सम्मुखी ।नागाख्या नगवाहिनी महिषहा पञ्चाननस्थायिनी ॥ ३२३५॥

bhrūmadhyaṃ bagalāmukhī śaśimukhī vidyāmukhī sammukhī |nāgākhyā nagavāhinī mahiṣahā pañcānanasthāyinī || 3235||

पारावार विहारहेतुसफरी सेतुप्रकारा परा ।काशीवासिनमीश्वरं प्रतिदिनं श्रीकुण्डली पातुकम् ॥ ३२३६॥

pārāvāra vihārahetusapharī setuprakārā parā |kāśīvāsinamīśvaraṃ pratidinaṃ śrīkuṇḍalī pātukam || 3236||

या कुण्डोद्भवसारपाननिरता मोहादिदोषापहा ।सा नेत्रत्रयमम्बिका सुवलिका श्रीकालिका कौलिका ॥ ३२३७॥

yā kuṇḍodbhavasārapānaniratā mohādidoṣāpahā |sā netratrayamambikā suvalikā śrīkālikā kaulikā || 3237||

काकस्था द्विकचञ्चुपारणकरी संज्ञाकरी सुन्दरी ।मे पातु प्रियया तया विशदया सच्छायया छादिता ॥ ३२३८॥

kākasthā dvikacañcupāraṇakarī saṃjñākarī sundarī |me pātu priyayā tayā viśadayā sacchāyayā chāditā || 3238||

श्रीकुण्डे रणचण्डिका सुरतिका कङ्कालिका बालिका ।साकाशा परिवर्जिता सुगतिका ज्ञानोर्मिका चोत्सुका ॥ ३२३९॥

śrīkuṇḍe raṇacaṇḍikā suratikā kaṅkālikā bālikā |sākāśā parivarjitā sugatikā jñānormikā cotsukā || 3239||

सौकासूक्ष्मसुखप्रिया गुणनिका दीक्षा च सूक्ष्माख्यका ।मामन्द्यं मम कन्दवासिनि शिवे सन्त्राहि सन्त्राहिकम् ॥ ३२४०॥

saukāsūkṣmasukhapriyā guṇanikā dīkṣā ca sūkṣmākhyakā |māmandyaṃ mama kandavāsini śive santrāhi santrāhikam || 3240||

एतत्स्तोत्रं पठित्वा त्रिभुवनपवनं पावनं लौकिकानाम् ।राजा स्यात् किल्बिषाग्निः क्रतुपतिरिह यः क्षेमदं योगिनां वा ॥ ३२४१॥

etatstotraṃ paṭhitvā tribhuvanapavanaṃ pāvanaṃ laukikānām |rājā syāt kilbiṣāgniḥ kratupatiriha yaḥ kṣemadaṃ yogināṃ vā || 3241||

सर्वेशः सर्वकर्ता भवति निजगृहे योगयोगाङ्गवक्ता ।शाक्तः शैवः स एकः परमपुरुषगो निर्मलात्मा महात्मा ॥ ३२४२॥

sarveśaḥ sarvakartā bhavati nijagṛhe yogayogāṅgavaktā |śāktaḥ śaivaḥ sa ekaḥ paramapuruṣago nirmalātmā mahātmā || 3242||

प्रणवेन पुटितं कृत्वा यः स्तौति नियतः शुचिः ।स भवेत् कुण्डलीपुत्रो भूतले नात्र संशयः ॥ ३२४३॥

praṇavena puṭitaṃ kṛtvā yaḥ stauti niyataḥ śuciḥ |sa bhavet kuṇḍalīputro bhūtale nātra saṃśayaḥ || 3243||

इति श्रीरुद्रयामले उत्तरतन्त्रे महातन्त्रोद्दीपने मूलचक्रसारसङ्केतेभैरवभैरवीसंवादे कन्दवासिनीस्तोत्रं नाम द्वात्रिंशः पटलः ॥ ३२॥

iti śrīrudrayāmale uttaratantre mahātantroddīpane mūlacakrasārasaṅketebhairavabhairavīsaṃvāde kandavāsinīstotraṃ nāma dvātriṃśaḥ paṭalaḥ || 32||

ऱुद्रयमल उत्तरतन्त्र।

rudrayamala uttaratantra|