देवीस्तोत्रम् (देवैःकृतं ०१ वामनपुराणान्तर्गतम् नमोऽस्तु ते भगवति पापनाशिनि नमोऽस्तु ते सुररिपुदर्पशातनि) Devaih Kritam 01 Devi Stotram

देवा ऊचुः ।नमोऽस्तु ते भगवति पापनाशिनि नमोऽस्तु ते सुररिपुदर्पशातनि ।नमोऽस्तु ते हरिहरराज्यदायिनि नमोऽस्तु ते मखभुजकार्यकारिणि ॥ ५६॥

devā ūcuḥ |namo'stu te bhagavati pāpanāśini namo'stu te suraripudarpaśātani |namo'stu te harihararājyadāyini namo'stu te makhabhujakāryakāriṇi || 56||

नमोऽस्तु ते त्रिदशरिपुक्षयङ्करि नमोऽस्तु ते शतमखपादपूजिते ।नमोऽस्तु ते महिषविनाशकारिणि नमोऽस्तु ते हरिहरभास्करस्तुते ॥ ५७॥

namo'stu te tridaśaripukṣayaṅkari namo'stu te śatamakhapādapūjite |namo'stu te mahiṣavināśakāriṇi namo'stu te hariharabhāskarastute || 57||

नमोऽस्तु तेऽष्टादशबाहुशालिनि नमोऽस्तु ते शुम्भनिशुम्भघातिनि ।नमोऽस्तु लोकार्त्तिहरे त्रिशूलिनि नमोऽस्तु नारायणि चक्रधारिणि ॥ ५८॥

namo'stu te'ṣṭādaśabāhuśālini namo'stu te śumbhaniśumbhaghātini |namo'stu lokārttihare triśūlini namo'stu nārāyaṇi cakradhāriṇi || 58||

नमोऽस्तु वाराहि सदा धराधरे त्वां नारसिंहि प्रणता नमोऽस्तु ते ।नमोऽस्तु ते वज्रधरे गजध्वजे नमोऽस्तु कौमारि मयूरवाहिनि ॥ ५९॥

namo'stu vārāhi sadā dharādhare tvāṃ nārasiṃhi praṇatā namo'stu te |namo'stu te vajradhare gajadhvaje namo'stu kaumāri mayūravāhini || 59||

नमोऽस्तु पैतामहहंसवाहने नमोऽस्तु मालाविकटे सुकेशिनि ।नमोऽस्तु ते रासभपृष्ठवाहिनि नमोऽस्तु सर्वार्त्तिहरे जगन्मये ॥ ६१॥

namo'stu paitāmahahaṃsavāhane namo'stu mālāvikaṭe sukeśini |namo'stu te rāsabhapṛṣṭhavāhini namo'stu sarvārttihare jaganmaye || 61||

नमोऽस्तु विश्वेश्वरि पाहि विश्वं निषूदयारीन् द्विजदेवतानाम् ।नमोऽस्तु ते सर्वमयि त्रिनेत्रे नमो नमस्ते वरदे प्रसीद ॥ ६१॥

namo'stu viśveśvari pāhi viśvaṃ niṣūdayārīn dvijadevatānām |namo'stu te sarvamayi trinetre namo namaste varade prasīda || 61||

ब्रह्माणी त्वं मृडानी वरशिखिगमना शक्तिहस्ता कुमारी वाराहीत्वं सुवक्त्रा खगपतिगमना वैष्णवी त्वं सशार्ङ्गी ।दुर्दृश्या नारसिंही घुरघुरितरवा त्वं तथैन्द्रीसवज्रा त्वं मारी चर्ममुण्डाशवगमनरता योगिनी योगसिद्धा ॥ ६२॥

brahmāṇī tvaṃ mṛḍānī varaśikhigamanā śaktihastā kumārī vārāhītvaṃ suvaktrā khagapatigamanā vaiṣṇavī tvaṃ saśārṅgī |durdṛśyā nārasiṃhī ghuraghuritaravā tvaṃ tathaindrīsavajrā tvaṃ mārī carmamuṇḍāśavagamanaratā yoginī yogasiddhā || 62||

नमस्ते त्रिनेत्रे भगवति तवचरणानुषिता ये अहरहर्विनतशिरसोऽवनताः ।न हि न हि परिभवमस्त्यशुभंच स्तुतिबलिकुसुमकराः सततं ये ॥ ६३॥

namaste trinetre bhagavati tavacaraṇānuṣitā ye aharaharvinataśiraso'vanatāḥ |na hi na hi paribhavamastyaśubhaṃca stutibalikusumakarāḥ satataṃ ye || 63||

एवं स्तुता सुरवरैः सुरशत्रुनाशिनीप्राह प्रहस्य सुरसिद्धमहर्षिवर्यान् ।प्राप्तो मयाऽद्भुततमो भवतां प्रसादात्सङ्ग्राममूर्ध्नि सुरशत्रुजयः प्रमर्दात् ॥ ६४॥

evaṃ stutā suravaraiḥ suraśatrunāśinīprāha prahasya surasiddhamaharṣivaryān |prāpto mayā'dbhutatamo bhavatāṃ prasādātsaṅgrāmamūrdhni suraśatrujayaḥ pramardāt || 64||

इमां स्तुतिं भक्तिपरा नरोत्तमा भवद्भिरुक्तामनुकीर्त्तयन्ति ।दुःस्वप्ननाशो भविता न संशयो वरस्तथान्यो व्रियतामभीप्सितः ॥ ६५॥

imāṃ stutiṃ bhaktiparā narottamā bhavadbhiruktāmanukīrttayanti |duḥsvapnanāśo bhavitā na saṃśayo varastathānyo vriyatāmabhīpsitaḥ || 65||

इति वामनपुराणे षट्पञ्चाशत्तमाध्यायान्तर्गतंदेवैः कृतं देवीस्तोत्रं समाप्तम् ।वामनपुराण । अध्याय ५६/५६६३॥वामनपुराण । अध्याय ५६/५६-६३॥

iti vāmanapurāṇe ṣaṭpañcāśattamādhyāyāntargataṃdevaiḥ kṛtaṃ devīstotraṃ samāptam |vāmanapurāṇa | adhyāya 56/5663||vāmanapurāṇa | adhyāya 56/56-63||