अन्तर्मायास्तुतिः देवैः कृता Devaih Krita Antarmaya Stuti

देवा ऊचुःश्रीशक्तिः पावनी तान्तु पुष्टिं परमनिष्कलाम् ।वयं स्तुमो महाभक्त्या महदव्यक्तरूपिणीम् ॥ ९॥

devā ūcuḥśrīśaktiḥ pāvanī tāntu puṣṭiṃ paramaniṣkalām |vayaṃ stumo mahābhaktyā mahadavyaktarūpiṇīm || 9||

शिवां शिवकरीं शुद्धां स्थूलां सूक्ष्मां परावराम् ।अन्तर्विद्यामविद्याख्यां प्रीतिमेकाग्रयोगनीम् ॥ १०॥

śivāṃ śivakarīṃ śuddhāṃ sthūlāṃ sūkṣmāṃ parāvarām |antarvidyāmavidyākhyāṃ prītimekāgrayoganīm || 10||

त्वं मेधा त्वं धृतिस्त्वं ह्रीस्त्वमेका सर्वगोचरा ।त्वं दीधितिः सूर्यगता सुप्रपञ्चप्रकाशिनी ॥ ११॥

tvaṃ medhā tvaṃ dhṛtistvaṃ hrīstvamekā sarvagocarā |tvaṃ dīdhitiḥ sūryagatā suprapañcaprakāśinī || 11||

या तु ब्रह्माण्डसंस्थानं जगद्बीजेषु या जगत् ।आप्याययति ब्रह्मादींस्तम्बान्तान् या त्वमापगा ॥ १२॥

yā tu brahmāṇḍasaṃsthānaṃ jagadbījeṣu yā jagat |āpyāyayati brahmādīṃstambāntān yā tvamāpagā || 12||

य एकः सर्वजगतां प्राणभूतः सदागतिः ।देवानाञ्च य आधारः स नभस्वांस्तवांशकः ॥ १३॥

ya ekaḥ sarvajagatāṃ prāṇabhūtaḥ sadāgatiḥ |devānāñca ya ādhāraḥ sa nabhasvāṃstavāṃśakaḥ || 13||

एवं विसारि यत्तेजः सर्वत्रैव समिध्यते ।तत्ते रूपं जगद्बीजं बहुधा यच्च दृश्यते ॥ १४॥

evaṃ visāri yattejaḥ sarvatraiva samidhyate |tatte rūpaṃ jagadbījaṃ bahudhā yacca dṛśyate || 14||

या ब्रह्मलोकपातालसान्तरालगता सदा ।सा त्वं वियन्मध्यबहिर्ब्रह्माण्डस्य च सर्वतः ॥ १५॥

yā brahmalokapātālasāntarālagatā sadā |sā tvaṃ viyanmadhyabahirbrahmāṇḍasya ca sarvataḥ || 15||

अचलाचलचक्रेण यन्त्रिता या प्रपञ्चसूः ।जगद्धात्री लोकमाता सा च त्वं माधवी क्षितिः ॥ १६॥

acalācalacakreṇa yantritā yā prapañcasūḥ |jagaddhātrī lokamātā sā ca tvaṃ mādhavī kṣitiḥ || 16||

त्वं बुद्धिस्त्वं तद्विषया त्वं माता छन्दसां गतिः ।गायत्री त्वं वेदमाता त्वं सावित्री सरस्वती ॥ १७॥

tvaṃ buddhistvaṃ tadviṣayā tvaṃ mātā chandasāṃ gatiḥ |gāyatrī tvaṃ vedamātā tvaṃ sāvitrī sarasvatī || 17||

त्वं माता सर्वजगतां त्वं त्रयी कामरूपिणी ।त्वं हि निद्रास्वरूपेण प्राणिनो निर्जरादयः ।ये स्वर्गाद्योकसः सर्वान् सुखयन्ती प्रमोहसि ॥ १८॥

tvaṃ mātā sarvajagatāṃ tvaṃ trayī kāmarūpiṇī |tvaṃ hi nidrāsvarūpeṇa prāṇino nirjarādayaḥ |ye svargādyokasaḥ sarvān sukhayantī pramohasi || 18||

त्वं लक्ष्मीः पुण्यकर्त्रीणां पापिनां त्वं हि यातना ।तथा नीतिभृतां श्रीश्च सुखदानैशिकी धृतिः ॥ १९॥

tvaṃ lakṣmīḥ puṇyakartrīṇāṃ pāpināṃ tvaṃ hi yātanā |tathā nītibhṛtāṃ śrīśca sukhadānaiśikī dhṛtiḥ || 19||

त्वं शान्तिः सर्वजगतां त्वं कान्तिश्चन्द्रगोचरा ।त्वं धात्री सर्वभूतानां लक्ष्मीस्त्वं विष्णुमोहिनी ॥ २०॥

tvaṃ śāntiḥ sarvajagatāṃ tvaṃ kāntiścandragocarā |tvaṃ dhātrī sarvabhūtānāṃ lakṣmīstvaṃ viṣṇumohinī || 20||

त्वं तत्त्वरूपा भूतानां पञ्चानामपि सारकृत् ।त्वं त्रिलोकी महामाया त्वं नीतिर्मोहकारिणी ॥ २१॥

tvaṃ tattvarūpā bhūtānāṃ pañcānāmapi sārakṛt |tvaṃ trilokī mahāmāyā tvaṃ nītirmohakāriṇī || 21||

संसारचक्रेष्वारोप्य सर्वभूतं महेश्वरः ।भ्रामयन्नस्ति च यथा सा त्वं माया महेश्वरि ॥ २२॥

saṃsāracakreṣvāropya sarvabhūtaṃ maheśvaraḥ |bhrāmayannasti ca yathā sā tvaṃ māyā maheśvari || 22||

जयन्ती जययुक्तानां ह्रीर्विद्या नीतिरुत्तमा ।गीतिस्त्वं सामवेदस्य ग्रन्थिस्त्वं यजुषां हुतिः ॥ २३॥

jayantī jayayuktānāṃ hrīrvidyā nītiruttamā |gītistvaṃ sāmavedasya granthistvaṃ yajuṣāṃ hutiḥ || 23||

समस्तगीर्वाणगणस्य शक्तिस्तमोमयी सत्त्वगुणैकदृश्या ।रजःप्रपञ्चानुभवैककारिणी या न स्तुता भव्यकरीह सास्तु ॥ २४॥

samastagīrvāṇagaṇasya śaktistamomayī sattvaguṇaikadṛśyā |rajaḥprapañcānubhavaikakāriṇī yā na stutā bhavyakarīha sāstu || 24||

संसारसागरकरालतरङ्गदुःखनिस्तारकारितरणिश्चितिरीतिहीना ।याष्टाङ्गरूपपरपावनकेलिगीतविक्षेपकारिणी गिरौ प्रणनाम तां वै ॥ २५॥

saṃsārasāgarakarālataraṅgaduḥkhanistārakāritaraṇiścitirītihīnā |yāṣṭāṅgarūpaparapāvanakeligītavikṣepakāriṇī girau praṇanāma tāṃ vai || 25||

नासाक्षिवक्त्रभुजवक्षसि मानसे चधृत्वा सुखानि विदधाति सदैव जन्तोः ।निद्रेति याति सुभगा जगतीभवानांसा नः प्रसीदतु धृतिस्मृतिवृत्तिरूपा ॥ २६॥

nāsākṣivaktrabhujavakṣasi mānase cadhṛtvā sukhāni vidadhāti sadaiva jantoḥ |nidreti yāti subhagā jagatībhavānāṃsā naḥ prasīdatu dhṛtismṛtivṛttirūpā || 26||

सृष्टिस्थित्यन्तरूपा या सृष्टिस्थित्यन्तकारिणी ।सृष्टिस्थित्यन्तशक्तिर्या सा माया नः प्रसीदतु ॥ २७॥

sṛṣṭisthityantarūpā yā sṛṣṭisthityantakāriṇī |sṛṣṭisthityantaśaktiryā sā māyā naḥ prasīdatu || 27||

इति कालिकापुराणे चतुर्विंशाध्यायान्तर्गतादेवैः कृता अन्तर्मायास्तुतिः समाप्ता ।

iti kālikāpurāṇe caturviṃśādhyāyāntargatādevaiḥ kṛtā antarmāyāstutiḥ samāptā |