दत्तात्रेयभक्तिनिरूपणस्तोत्रम् Dattatreyabhaktinirupanastotram

श्रीगणेशाय नमः ॥प्रयतेः सुलभो भक्त्याऽयमात्मा पुरुषः परः ।इति वेदादिनोक्तं तद्भक्तिर्मुख्याऽधुनोच्यते ॥ १॥

śrīgaṇeśāya namaḥ ||prayateḥ sulabho bhaktyā'yamātmā puruṣaḥ paraḥ |iti vedādinoktaṃ tadbhaktirmukhyā'dhunocyate || 1||

निर्विकल्पं परं ब्रह्म साक्षात्कर्तुमनीश्वराः ।ये मन्दास्तेऽनुकम्प्यन्ते सविशेषनिरूपणैः ॥ २॥

nirvikalpaṃ paraṃ brahma sākṣātkartumanīśvarāḥ |ye mandāste'nukampyante saviśeṣanirūpaṇaiḥ || 2||

वशीकृते मनस्येषां सगुणव्रह्मशीलनात् ।तदेवाविर्भवेत्साक्षादपेतोपाधिकल्पनम् ॥ ३॥

vaśīkṛte manasyeṣāṃ saguṇavrahmaśīlanāt |tadevāvirbhavetsākṣādapetopādhikalpanam || 3||

इत्युक्तेर्नवधा भक्तिर्वाच्यात्र स्मरणात्मिका ।श्रेष्ठार्थ्यान्यत्र च व्याप्ता हृच्छुद्ध्यास्य पदप्रदा ॥ ४॥

ityukternavadhā bhaktirvācyātra smaraṇātmikā |śreṣṭhārthyānyatra ca vyāptā hṛcchuddhyāsya padapradā || 4||

सहस्राङ्गात्मकर्माख्यभगवत्स्मरणात्सदा ।कृतं कर्माप्यकर्मैव येनैष द्राग्विमुच्यते ॥ ५॥

sahasrāṅgātmakarmākhyabhagavatsmaraṇātsadā |kṛtaṃ karmāpyakarmaiva yenaiṣa drāgvimucyate || 5||

कृत्वेश्वरे परां भक्तिं भगवत्कीर्तनादपि ।सद्भक्तो मायिकं पाशं छित्त्वा याति स सद्गतिम् ॥ ६॥

kṛtveśvare parāṃ bhaktiṃ bhagavatkīrtanādapi |sadbhakto māyikaṃ pāśaṃ chittvā yāti sa sadgatim || 6||

तद्गुणश्रवणाच्चापि श्रद्धावानबहिर्मुखः ।समाहितोऽनसूयुर्ना क्षिप्रं नैष्कर्म्यसिद्धिभाक् ॥ ७॥

tadguṇaśravaṇāccāpi śraddhāvānabahirmukhaḥ |samāhito'nasūyurnā kṣipraṃ naiṣkarmyasiddhibhāk || 7||

वज्राङ्कुशध्वजाब्जाङ्कभगवत्पादसेवनात् ।भित्त्वा मायावृतिं सत्त्वशुद्धो याति परं पदम् ॥ ८॥

vajrāṅkuśadhvajābjāṅkabhagavatpādasevanāt |bhittvā māyāvṛtiṃ sattvaśuddho yāti paraṃ padam || 8||

जलेष्टास्रं कनिष्ठिक्या लिखित्वा तारमन्तरे ।पत्रेष्वष्टाक्षरं चैकं हृत्स्थमावाह्य तत्र षट् ॥ ९॥

jaleṣṭāsraṃ kaniṣṭhikyā likhitvā tāramantare |patreṣvaṣṭākṣaraṃ caikaṃ hṛtsthamāvāhya tatra ṣaṭ || 9||

प्रदर्श्य मुद्रा ऋष्यादीन्स्मृत्वा विन्यस्य चोङ्कृतेः ।मात्राः शाखाङ्गेषु भूखवाताग्न्यब्बीजतो हृदा ॥ १०॥

pradarśya mudrā ṛṣyādīnsmṛtvā vinyasya coṅkṛteḥ |mātrāḥ śākhāṅgeṣu bhūkhavātāgnyabbījato hṛdā || 10||

दत्त्वोपचारान् गन्धादीन् जपित्वाऽष्टसहस्रकम् ।तर्पयित्वा चाष्टशतमृष्यादीनेकवारतः ॥ ११॥

dattvopacārān gandhādīn japitvā'ṣṭasahasrakam |tarpayitvā cāṣṭaśatamṛṣyādīnekavārataḥ || 11||

पुनः सम्पूज्य विन्यस्य तं स्वात्मन्युद्वसेत्परम् ।त्रिसन्ध्यमर्चनं त्वेवं यतेरन्यस्य चोच्यते ॥ १२॥

punaḥ sampūjya vinyasya taṃ svātmanyudvasetparam |trisandhyamarcanaṃ tvevaṃ yateranyasya cocyate || 12||

लब्ध्वा पूर्वं स्वगृह्योक्तं द्विजत्वं भक्तिमान्शुचिः ।ज्ञात्वा धनर्णसिद्धारिचक्रसिद्धं मनुं गुरोः ॥ १३॥

labdhvā pūrvaṃ svagṛhyoktaṃ dvijatvaṃ bhaktimānśuciḥ |jñātvā dhanarṇasiddhāricakrasiddhaṃ manuṃ guroḥ || 13||

लब्ध्वाऽर्णसङ्ख्यालक्षां प्राक् पुरश्चर्यां यथाविधि ।कृत्वाऽनेनार्चयेदर्चां नियतो नित्यकर्मकृत् ॥ १४॥

labdhvā'rṇasaṅkhyālakṣāṃ prāk puraścaryāṃ yathāvidhi |kṛtvā'nenārcayedarcāṃ niyato nityakarmakṛt || 14||

लौहीं वा संस्कृतां शैलीं विभोः सास्त्रां सलक्षणाम् ।सोऽपि लब्ध्वाखिलान्कामान् देहान्ते तन्मयो भवेत् ॥ १५॥

lauhīṃ vā saṃskṛtāṃ śailīṃ vibhoḥ sāstrāṃ salakṣaṇām |so'pi labdhvākhilānkāmān dehānte tanmayo bhavet || 15||

पुरा नारायणं ब्रह्मा सत्यक्षेत्रे दयानिधिम् ।प्रणतोऽपृच्छदेकं किमुपास्यं दैवतं परम् ॥ १६॥

purā nārāyaṇaṃ brahmā satyakṣetre dayānidhim |praṇato'pṛcchadekaṃ kimupāsyaṃ daivataṃ param || 16||

स प्राह मामकं धाम यद्दत्तात्रेयसंज्ञितम् ।सदानन्दात्मकं शुद्धं सात्त्विकं तारकं परम् ॥ १७॥

sa prāha māmakaṃ dhāma yaddattātreyasaṃjñitam |sadānandātmakaṃ śuddhaṃ sāttvikaṃ tārakaṃ param || 17||

विश्वरूपं जगद्योनिं तदेकोपास्स्व दैवतम् ।लकारं वह्निसंयुक्तं सतुण्डाक्षरबिन्दुकम् ॥ १८॥

viśvarūpaṃ jagadyoniṃ tadekopāssva daivatam |lakāraṃ vahnisaṃyuktaṃ satuṇḍākṣarabindukam || 18||

तदर्चने मनुं विद्धि छन्दो गायत्रिकास्य च ।सदाशिवऋषिर्देवो दत्तात्रेयश्चतुर्भुजः ॥ १९॥

tadarcane manuṃ viddhi chando gāyatrikāsya ca |sadāśivaṛṣirdevo dattātreyaścaturbhujaḥ || 19||

मनुरेकाक्षरोऽस्यायं जाप्यो गर्भादितारणः ।तारः श्रीदुर्गा क्रों भूमिदत्तैकाक्षरयुङ्मनुः ॥ २०॥

manurekākṣaro'syāyaṃ jāpyo garbhāditāraṇaḥ |tāraḥ śrīdurgā kroṃ bhūmidattaikākṣarayuṅmanuḥ || 20||

षडक्षरो योगदोऽयं सर्वसम्पत्समृद्धिकृत् ।ऋष्यादिः पूर्ववन्न्यासो बीजैः शाखाहृदादिषु ॥ २१॥

ṣaḍakṣaro yogado'yaṃ sarvasampatsamṛddhikṛt |ṛṣyādiḥ pūrvavannyāso bījaiḥ śākhāhṛdādiṣu || 21||

दत्तात्रेयं शिवं शान्तमिन्द्रनीलनिभं विभुम् ।आत्ममायारतं देवमवधूतं दिगम्बरम् ॥ २२॥

dattātreyaṃ śivaṃ śāntamindranīlanibhaṃ vibhum |ātmamāyārataṃ devamavadhūtaṃ digambaram || 22||

भस्मोद्धूलितसर्वाङ्गं जटाजूटधरं विभुम् ।चतुर्बाहुमुदाराङ्गं प्रफुल्लकमलेक्षणम् ॥ २३॥

bhasmoddhūlitasarvāṅgaṃ jaṭājūṭadharaṃ vibhum |caturbāhumudārāṅgaṃ praphullakamalekṣaṇam || 23||

ज्ञानयोगनिधिं विश्वगुरुं योगिजनप्रियम् ।भक्तानुकम्पिनं सर्वसाक्षिणं सिद्धसेवितम् ॥ २४॥

jñānayoganidhiṃ viśvaguruṃ yogijanapriyam |bhaktānukampinaṃ sarvasākṣiṇaṃ siddhasevitam || 24||

इत्यौपनिषदं दत्तं ध्यात्वैकाग्र्यं मनुं जपेत् ।स वाञ्छितफलं भुक्त्वा परत्र श्रेय आप्नुयात् ॥ २५॥

ityaupaniṣadaṃ dattaṃ dhyātvaikāgryaṃ manuṃ japet |sa vāñchitaphalaṃ bhuktvā paratra śreya āpnuyāt || 25||

सैकाक्षरं चतुर्थ्यन्तं दत्तात्रेयं नमोऽन्वितम् ।अष्टार्णमन्त्रं गायत्रं विद्धि द्रां बीजमस्य तु ॥ २६॥

saikākṣaraṃ caturthyantaṃ dattātreyaṃ namo'nvitam |aṣṭārṇamantraṃ gāyatraṃ viddhi drāṃ bījamasya tu || 26||

चतुर्थी कलिकं शक्तिर्नम आर्षः सदाशिवः ।दत्तात्रेयपदस्यार्थः सत्यानन्दचिदात्मकः ॥ २७॥

caturthī kalikaṃ śaktirnama ārṣaḥ sadāśivaḥ |dattātreyapadasyārthaḥ satyānandacidātmakaḥ || 27||

प्रह्वीभावो नमोऽर्थस्तु पूर्णानन्दैकविग्रहः ।तारं सबिन्दुं तुण्डार्णं दुर्गां क्रों तुर्यमेहि च ॥ २८॥

prahvībhāvo namo'rthastu pūrṇānandaikavigrahaḥ |tāraṃ sabinduṃ tuṇḍārṇaṃ durgāṃ kroṃ turyamehi ca || 28||

दत्तात्रेयेति सम्बुद्ध्या स्वाहान्तं द्वादशाक्षरम् ।सर्वकामदुघं विद्धि गायत्रं भो शिवार्षकम् ॥ २९॥

dattātreyeti sambuddhyā svāhāntaṃ dvādaśākṣaram |sarvakāmadughaṃ viddhi gāyatraṃ bho śivārṣakam || 29||

वराभयदहस्तं यो भजेदाभ्यां महाव्रतः ।सर्वान्कामानिहैवाप्त्वा सोऽमृतो भवति धुवम् ॥ ३०॥

varābhayadahastaṃ yo bhajedābhyāṃ mahāvrataḥ |sarvānkāmānihaivāptvā so'mṛto bhavati dhuvam || 30||

ओं बीजं स्वाहात्र शक्तिः सम्बुद्धिः कलिकं क्रमात् ।द्वाभ्यां हृदि च के द्वाभ्यां शिखायां क्रियया न्यसेत् ॥ ३१॥

oṃ bījaṃ svāhātra śaktiḥ sambuddhiḥ kalikaṃ kramāt |dvābhyāṃ hṛdi ca ke dvābhyāṃ śikhāyāṃ kriyayā nyaset || 31||

सम्बुद्धिभ्यां स्कन्धचक्षुर्द्वयेऽस्त्रेऽन्त्येन तन्मयः ।चतुर्बीजैः सक्रियाख्यान्त्याभ्यां करादिषु ॥ ३२॥

sambuddhibhyāṃ skandhacakṣurdvaye'stre'ntyena tanmayaḥ |caturbījaiḥ sakriyākhyāntyābhyāṃ karādiṣu || 32||

कृत्वा यजेद्देवदेवं यन्त्रन्यस्तमभीष्टदम् ।दत्तात्रेय हरे कृष्ण उन्मत्तानन्ददायक ॥ ३३॥

kṛtvā yajeddevadevaṃ yantranyastamabhīṣṭadam |dattātreya hare kṛṣṇa unmattānandadāyaka || 33||

दिगम्बर मुने बाल पिशाचज्ञानसागर ।आनुष्टुभः शिवार्षोऽयं षड्भुजात्रेयदैवतः ॥ ३४॥

digambara mune bāla piśācajñānasāgara |ānuṣṭubhaḥ śivārṣo'yaṃ ṣaḍbhujātreyadaivataḥ || 34||

द्वाभ्यां द्वाभ्यां हृच्छिरसोः शिखायामेकतो गले ।द्वाभ्यामेकैकेन दोर्दृग्द्वये द्वाभ्यां तथास्त्रके ॥ ३५॥

dvābhyāṃ dvābhyāṃ hṛcchirasoḥ śikhāyāmekato gale |dvābhyāmekaikena dordṛgdvaye dvābhyāṃ tathāstrake || 35||

विन्यस्य जपिता दोषमुक्ता सर्वोपकारकृत् ।तारं वायुं क्लां कामं क्लं हां दुर्गा ह्रूं च विद्धि सौः ॥ ३६॥

vinyasya japitā doṣamuktā sarvopakārakṛt |tāraṃ vāyuṃ klāṃ kāmaṃ klaṃ hāṃ durgā hrūṃ ca viddhi sauḥ || 36||

दत्तात्रेयं चतुर्थ्यन्तं स्वाहान्तं षोडशाक्षरम् ।वायुस्थाने तु वाग्बीजं नमोऽन्ते योजयाथवा ॥ ३७॥

dattātreyaṃ caturthyantaṃ svāhāntaṃ ṣoḍaśākṣaram |vāyusthāne tu vāgbījaṃ namo'nte yojayāthavā || 37||

स्वाहैकत्र नमोऽन्यत्र शक्तिर्बीजं च कीलकम् ।तारश्चतुर्थी गायत्री मन्त्रराजः शिवोदितः ॥ ३८॥

svāhaikatra namo'nyatra śaktirbījaṃ ca kīlakam |tāraścaturthī gāyatrī mantrarājaḥ śivoditaḥ || 38||

हृदि द्वे के त्रीणि शिखायां चैकं कवचे दृशोः ।चतुर्थीमन्त्यमस्त्रे च विन्यस्य जपकामदम् ॥ ३९॥

hṛdi dve ke trīṇi śikhāyāṃ caikaṃ kavace dṛśoḥ |caturthīmantyamastre ca vinyasya japakāmadam || 39||

सच्चिदानन्दस्वरूपी सुखी मुक्तो भवत्यतः ।सिद्धगन्धर्वादिसङ्गी लक्षजाप्यष्टसिद्धिभाक् ॥ ४०॥

saccidānandasvarūpī sukhī mukto bhavatyataḥ |siddhagandharvādisaṅgī lakṣajāpyaṣṭasiddhibhāk || 40||

त्रिदेवलोकसञ्चारी कोटिजापि च दत्तवत् ।दशकोटिजपी साक्षाज्जरामरणवर्जितः ॥ ४१॥

tridevalokasañcārī koṭijāpi ca dattavat |daśakoṭijapī sākṣājjarāmaraṇavarjitaḥ || 41||

द्व्यष्टकोटिजपी सिद्धः परकायगतादिकृत् ।मन्त्रशक्तिरियं श्लोका अभिगीता इहाप्यमी ॥ ४२॥

dvyaṣṭakoṭijapī siddhaḥ parakāyagatādikṛt |mantraśaktiriyaṃ ślokā abhigītā ihāpyamī || 42||

खड्गस्तम्भो जलस्तम्भः सैनास्तम्भस्तथैव च ।इच्छासिद्धिर्वशित्वं च दिक्पालैः सह भाषणम् ॥ ४३॥

khaḍgastambho jalastambhaḥ saināstambhastathaiva ca |icchāsiddhirvaśitvaṃ ca dikpālaiḥ saha bhāṣaṇam || 43||

वायुवद्गतिरित्याहुराह्लादित्वं च चन्द्रवत् ।अग्निवत्सर्वभक्षत्वं नित्यतृप्तत्वमेव च ॥ ४४॥

vāyuvadgatirityāhurāhlāditvaṃ ca candravat |agnivatsarvabhakṣatvaṃ nityatṛptatvameva ca || 44||

सर्वभाषापरिज्ञानं सर्वचित्तावबोधनम् ।वापीकूपसमुद्राणां पर्वतानां च चालनम् ॥ ४५॥

sarvabhāṣāparijñānaṃ sarvacittāvabodhanam |vāpīkūpasamudrāṇāṃ parvatānāṃ ca cālanam || 45||

दत्तात्रेयमयः स्वच्छो भवेत्स व्यासवत्कविः ।इतीदं षोडशार्णस्य माहात्म्यं तत्प्रयत्नतः ॥ ४६॥

dattātreyamayaḥ svaccho bhavetsa vyāsavatkaviḥ |itīdaṃ ṣoḍaśārṇasya māhātmyaṃ tatprayatnataḥ || 46||

प्राणो देयो मनश्चक्षुश्छित्त्वा देयं शिरो वपुः ।न देयः षोडशार्णोऽसौ सच्छिष्याय महात्मने ॥ ४७॥

prāṇo deyo manaścakṣuśchittvā deyaṃ śiro vapuḥ |na deyaḥ ṣoḍaśārṇo'sau sacchiṣyāya mahātmane || 47||

महागुणवते देयः कुप्येत प्रभुरन्यथा ।मालाकमण्डलूवाद्यत्रिशूले शङ्खचक्रके ॥ ४८॥

mahāguṇavate deyaḥ kupyeta prabhuranyathā |mālākamaṇḍalūvādyatriśūle śaṅkhacakrake || 48||

दधानमत्रिवरदं दत्तात्रेयं त्र्यधीश्वरम् ।ध्यात्वेत्थं विधिवन्मन्त्रजाप्युक्तफलभाग्भवेत् ॥ ४९॥

dadhānamatrivaradaṃ dattātreyaṃ tryadhīśvaram |dhyātvetthaṃ vidhivanmantrajāpyuktaphalabhāgbhavet || 49||

ओं नमो भगवान्दत्तात्रेयः स्मरणमात्रसन्तुष्टोमहाभयनिवारणो महाज्ञानप्रदः ॥ ५०॥

oṃ namo bhagavāndattātreyaḥ smaraṇamātrasantuṣṭomahābhayanivāraṇo mahājñānapradaḥ || 50||

चिदानन्दात्मा बालोन्मत्तपिशाचवेषोमहायोग्यवधूतोऽनसूयानन्दवर्धनोऽत्रिपुत्रः ॥ ५१॥

cidānandātmā bālonmattapiśācaveṣomahāyogyavadhūto'nasūyānandavardhano'triputraḥ || 51||

अं भवबन्धविमोचनो ह्रीं सर्वभूतिदःक्रों असाध्याकर्षण ऐं वाक्प्रदः ॥ ५२॥

aṃ bhavabandhavimocano hrīṃ sarvabhūtidaḥkroṃ asādhyākarṣaṇa aiṃ vākpradaḥ || 52||

क्लीञ्जगत्त्रयवशीकरणः सौः सर्वमनःक्षोभणःश्रीम्महासम्पत्प्रदो ग्लौं भूमण्डलाधिपत्यप्रदः ॥ ५३॥

klīñjagattrayavaśīkaraṇaḥ sauḥ sarvamanaḥkṣobhaṇaḥśrīmmahāsampatprado glauṃ bhūmaṇḍalādhipatyapradaḥ || 53||

द्रां चिरजीवी वषड्वशीकुरु वौषडाकर्षयहुं विद्वेषय फड्डुच्चाटय ठः ठः ॥ ५४॥

drāṃ cirajīvī vaṣaḍvaśīkuru vauṣaḍākarṣayahuṃ vidveṣaya phaḍḍuccāṭaya ṭhaḥ ṭhaḥ || 54||

स्तम्भय खें खें मारय नमः सम्पन्नय स्वाहापोषय परमन्त्रपरयन्त्रपरतन्त्राणि ॥ ५५॥

stambhaya kheṃ kheṃ māraya namaḥ sampannaya svāhāpoṣaya paramantraparayantraparatantrāṇi || 55||

छिन्धि ग्रहान्निवारय व्याधीन्विनाशय दुःखंहर दारिद्र्यं विद्रावय देहं पोषय ॥ ५६॥

chindhi grahānnivāraya vyādhīnvināśaya duḥkhaṃhara dāridryaṃ vidrāvaya dehaṃ poṣaya || 56||

चित्तं तोषय सर्वमन्त्रस्वरूपः सर्वतन्त्रस्त्ररूपःसर्वपल्लवस्वरूपः ॥ ५७॥

cittaṃ toṣaya sarvamantrasvarūpaḥ sarvatantrastrarūpaḥsarvapallavasvarūpaḥ || 57||

ॐ नमो महासिद्धः स्वाहान्तो मालामन्त्रः ।प्रथमान्तां चतुर्थ्या द्विः क्रियाश्च व्याहरेत् ॥ ५८॥

oṃ namo mahāsiddhaḥ svāhānto mālāmantraḥ |prathamāntāṃ caturthyā dviḥ kriyāśca vyāharet || 58||

विष्णुनोक्ता इमे मन्त्रा ब्रह्मणे कामधेनवः ।प्रयोगग्रहभूतारिकुदृग्रुक्तापभीतिहाः ॥ ५९॥

viṣṇunoktā ime mantrā brahmaṇe kāmadhenavaḥ |prayogagrahabhūtārikudṛgruktāpabhītihāḥ || 59||

कामिनोऽभीष्टफलदा देवसान्निध्यकारकाः ।तद्वच्च वज्रकवचं दत्तनामसहस्रकम् ॥ ६०॥

kāmino'bhīṣṭaphaladā devasānnidhyakārakāḥ |tadvacca vajrakavacaṃ dattanāmasahasrakam || 60||

एषामन्यतमेनेशं यो वैदिकविधानतः ।उपास्ते चित्तशुद्ध्या स मुच्यतेऽत्र परत्र वा ॥ ६१॥

eṣāmanyatameneśaṃ yo vaidikavidhānataḥ |upāste cittaśuddhyā sa mucyate'tra paratra vā || 61||

दत्तात्रेयनिवासं तदाचण्डालश्वगोखरम् ।ब्रह्मादिस्तम्बपर्यन्तं समदृक् प्रणमेत्सुधीः ॥ ६२॥

dattātreyanivāsaṃ tadācaṇḍālaśvagokharam |brahmādistambaparyantaṃ samadṛk praṇametsudhīḥ || 62||

चालको भासकोऽस्त्येषां सच्चिदात्मा स्वयम्प्रभः ।अस्ति भाति प्रियत्वेन भगवानेव नापरः ॥ ६३॥

cālako bhāsako'styeṣāṃ saccidātmā svayamprabhaḥ |asti bhāti priyatvena bhagavāneva nāparaḥ || 63||

यथाधिपे वशा भृत्या निर्माना ईश्वरे तथा ।विदध्यात्स्वामिनो दास्यं निरीहं द्वैतदर्शने ॥ ६४॥

yathādhipe vaśā bhṛtyā nirmānā īśvare tathā |vidadhyātsvāmino dāsyaṃ nirīhaṃ dvaitadarśane || 64||

सख्योः सख्यं यथा लोके निरीपेक्षं तथाऽऽत्मनः ।परात्मनापि सततं समाधेः प्राक् प्रकल्पयेत् ॥ ६५॥

sakhyoḥ sakhyaṃ yathā loke nirīpekṣaṃ tathā''tmanaḥ |parātmanāpi satataṃ samādheḥ prāk prakalpayet || 65||

कर्तृत्वादि न मय्येके शुद्धे देहादिसाक्षिणि ।इतीक्षणमसन्दिग्धं सर्वस्वात्मनिवेदनम् ॥ ६६॥

kartṛtvādi na mayyeke śuddhe dehādisākṣiṇi |itīkṣaṇamasandigdhaṃ sarvasvātmanivedanam || 66||

अतीत्य वरदेशादीन् काश्यां सन्तोष्य दीपकः ।वेदधर्मगुरुं रुग्णं कष्टेन हि महामतिः ॥ ६७॥

atītya varadeśādīn kāśyāṃ santoṣya dīpakaḥ |vedadharmaguruṃ rugṇaṃ kaṣṭena hi mahāmatiḥ || 67||

श्रीदत्तलीलाश्रवणं नयाचे तुष्ट एव सः ।गुरुः शिष्याय यत्प्राह मुक्त्यै तत्सार उच्यते ॥ ६८॥

śrīdattalīlāśravaṇaṃ nayāce tuṣṭa eva saḥ |guruḥ śiṣyāya yatprāha muktyai tatsāra ucyate || 68||

इति श्रीदत्तात्रेयभक्तिनिरूपणस्तोत्रं सम्पूर्णम् ।

iti śrīdattātreyabhaktinirūpaṇastotraṃ sampūrṇam |