कल्किस्तोत्रम् Kalkistotram

श्रीगणेशाय नमः ।सुशान्तोवाच ।जय हरेऽमराधीशसेवितं तव पदांबुजं भूरिभूषणम् ।कुरु ममाग्रतः साधुसत्कृतं त्यज महामते मोहमात्मनः ॥ १॥तव वपुर्जगद्रूपसम्पदा विरचितं सतां मानसे स्थितम् ।रतिपतेर्मनो मोहदायकं कुरु विचेष्टितं कामलंपटम् ॥ २॥तव यशोजगच्छोकनाशकं मृदुकथामृतं प्रीतिदायकम् ।स्मितसुधोक्षितं चन्द्रवन्मुखं तव करोत्यलं लोकमङ्गलम् ॥ ३॥मम पतिस्त्वयं सर्वदुर्जयो यदि तवाप्रियं कर्मणाऽऽचरेत् ।जहि तदात्मनः शत्रुमुद्यतं कुरु कृपां न चेदीदृगीश्वरः ॥ ४॥महदहंयुतं पञ्चमात्रया प्रकृतिजायया निर्मितं वपुः ।तव निरीक्षणाल्लीलया जगत्स्थितिलयोदयं ब्रह्मकल्पितम् ॥ ५॥भूवियन्मरुद्वारितेजसां राशिभिः शरीरेन्द्रियाश्रितैः ।त्रिगुणया स्वया मायया विभो कुरु कृपां भवत्सेवनार्थिनाम् ॥ ६॥तव गुणालयं नाम पावनं कलिमलापहं कीर्तयन्ति ये ।भवभयक्षयं तापतापिता मुहुरहो जनाः संसरन्ति नो ॥ ७॥तव जनुः सतां मानवर्धनं जिनकुलक्षयं देवपालकम् ।कृतयुगार्पकं धर्मपूरकं कलिकुलान्तकं शं तनोतु मे ॥ ८॥मम गृहं पतिपुत्रनप्तृकं गजरथैर्ध्वजैश्चामरैर्धनैः ।मणिवरासनं सत्कृतिं विना तव पदाब्जयोः शोभयन्ति किम् ॥ ९॥तव जगद्वपुः सुन्दरस्मितं मुखमनिन्दितं सुन्दरत्विषम् ।यदि न मे प्रियं वल्गुचेष्टितं परिकरोत्यहो मृत्युरस्त्विह ॥ १०॥हयवर भयहर करहरशरणखरतरवरशर दशबलदमन ।जय हतपरभरभववरनाशन शशधर शतसमरसभरमदन ॥ ११॥इति श्रीकल्किपुराणे सुशान्ताकृतं कल्किस्तोत्रं सम्पूर्णम् ।

śrīgaṇeśāya namaḥ |suśāntovāca |jaya hare'marādhīśasevitaṃ tava padāṃbujaṃ bhūribhūṣaṇam |kuru mamāgrataḥ sādhusatkṛtaṃ tyaja mahāmate mohamātmanaḥ || 1||tava vapurjagadrūpasampadā viracitaṃ satāṃ mānase sthitam |ratipatermano mohadāyakaṃ kuru viceṣṭitaṃ kāmalaṃpaṭam || 2||tava yaśojagacchokanāśakaṃ mṛdukathāmṛtaṃ prītidāyakam |smitasudhokṣitaṃ candravanmukhaṃ tava karotyalaṃ lokamaṅgalam || 3||mama patistvayaṃ sarvadurjayo yadi tavāpriyaṃ karmaṇā''caret |jahi tadātmanaḥ śatrumudyataṃ kuru kṛpāṃ na cedīdṛgīśvaraḥ || 4||mahadahaṃyutaṃ pañcamātrayā prakṛtijāyayā nirmitaṃ vapuḥ |tava nirīkṣaṇāllīlayā jagatsthitilayodayaṃ brahmakalpitam || 5||bhūviyanmarudvāritejasāṃ rāśibhiḥ śarīrendriyāśritaiḥ |triguṇayā svayā māyayā vibho kuru kṛpāṃ bhavatsevanārthinām || 6||tava guṇālayaṃ nāma pāvanaṃ kalimalāpahaṃ kīrtayanti ye |bhavabhayakṣayaṃ tāpatāpitā muhuraho janāḥ saṃsaranti no || 7||tava januḥ satāṃ mānavardhanaṃ jinakulakṣayaṃ devapālakam |kṛtayugārpakaṃ dharmapūrakaṃ kalikulāntakaṃ śaṃ tanotu me || 8||mama gṛhaṃ patiputranaptṛkaṃ gajarathairdhvajaiścāmarairdhanaiḥ |maṇivarāsanaṃ satkṛtiṃ vinā tava padābjayoḥ śobhayanti kim || 9||tava jagadvapuḥ sundarasmitaṃ mukhamaninditaṃ sundaratviṣam |yadi na me priyaṃ valguceṣṭitaṃ parikarotyaho mṛtyurastviha || 10||hayavara bhayahara karaharaśaraṇakharataravaraśara daśabaladamana |jaya hataparabharabhavavaranāśana śaśadhara śatasamarasabharamadana || 11||iti śrīkalkipurāṇe suśāntākṛtaṃ kalkistotraṃ sampūrṇam |