बगलामुखीकवचम् ३ Shri Bagalamukhi Kavacham

श्री गणेशाय नमः । श्री बगलायै नमः ।प्रथमं गुरुं ध्यात्वा प्राणायामं कृत्वा कवचं पठेत् ।ॐ अस्य श्रीपीताम्बराबगलामुखीकवचस्य महादेव ऋषिः,उष्णिक् छन्दः, श्रीपीताम्बरा देवता, स्थिरमाया बीजम्, स्वाहाशक्तिः, अं ठः कीलकम्, मम सन्निहितानां दूरस्थानांसर्वदुष्टानां वाङ्मुखपदजिह्वापवर्गाणां स्तम्भनपूर्वकंसर्वसम्पत्तिप्राप्तिचतुर्वर्गफलसाधनार्थे जपे विनियोगः ।ध्यानम्मध्येसुधाब्धि मणिमण्डपरत्नवेद्यांसिंहासनोपरि गतां परिपीतवर्णाम् ॥पीताम्बराभरणमाल्यविभूषिताङ्गींदेवीं भजामि धृतमुद्गरवैरिजिह्वाम् ॥ १॥

śrī gaṇeśāya namaḥ | śrī bagalāyai namaḥ |prathamaṃ guruṃ dhyātvā prāṇāyāmaṃ kṛtvā kavacaṃ paṭhet |oṃ asya śrīpītāmbarābagalāmukhīkavacasya mahādeva ṛṣiḥ,uṣṇik chandaḥ, śrīpītāmbarā devatā, sthiramāyā bījam, svāhāśaktiḥ, aṃ ṭhaḥ kīlakam, mama sannihitānāṃ dūrasthānāṃsarvaduṣṭānāṃ vāṅmukhapadajihvāpavargāṇāṃ stambhanapūrvakaṃsarvasampattiprāpticaturvargaphalasādhanārthe jape viniyogaḥ |dhyānammadhyesudhābdhi maṇimaṇḍaparatnavedyāṃsiṃhāsanopari gatāṃ paripītavarṇām ||pītāmbarābharaṇamālyavibhūṣitāṅgīṃdevīṃ bhajāmi dhṛtamudgaravairijihvām || 1||

जिह्वाग्रमादाय करेण देवीं वामेन शत्रून् परिपीडयन्तीम् ।गदाभिघातेन च दक्षिणेन पीताम्बराढ्यां द्विभुजां नमामि ॥ २॥

jihvāgramādāya kareṇa devīṃ vāmena śatrūn paripīḍayantīm |gadābhighātena ca dakṣiṇena pītāmbarāḍhyāṃ dvibhujāṃ namāmi || 2||

इति ध्यात्वा पठेत् ।हिमवत्तनया गौरी कैलासेऽथ शिलोच्चये ।अपृच्छद् गिरिशं देवी साधकानुग्रहेच्छया ॥ १॥

iti dhyātvā paṭhet |himavattanayā gaurī kailāse'tha śiloccaye |apṛcchad giriśaṃ devī sādhakānugrahecchayā || 1||

श्रीपार्वत्युवाच ।देवदेव महादेव भक्तानुग्रहकारक ।शृणु विज्ञाप्यते यत्तु श्रुत्वा सर्वं निवेदय ॥ २॥

śrīpārvatyuvāca |devadeva mahādeva bhaktānugrahakāraka |śṛṇu vijñāpyate yattu śrutvā sarvaṃ nivedaya || 2||

विशुद्धाः कौलिका लोके ये मत्कर्मपरायणाः ।तेषां निन्दाकरा लोके बहवः किल दुर्जनाः ॥ ३॥

viśuddhāḥ kaulikā loke ye matkarmaparāyaṇāḥ |teṣāṃ nindākarā loke bahavaḥ kila durjanāḥ || 3||

मनोबाधां विदधते मुहुः कटुभिरुक्तिभिःतेषामाशु विनाशाय त्वया देव प्रकाशितः ॥ ४॥

manobādhāṃ vidadhate muhuḥ kaṭubhiruktibhiḥteṣāmāśu vināśāya tvayā deva prakāśitaḥ || 4||

यो मन्त्रो बगलामुख्याः सर्वकामसमृद्धिदः ।कवचं तस्य मन्त्रस्य प्रकाशय दयानिधे ॥ ५॥

yo mantro bagalāmukhyāḥ sarvakāmasamṛddhidaḥ |kavacaṃ tasya mantrasya prakāśaya dayānidhe || 5||

यस्य स्मरणमात्रेण पशूनां निग्रहो भवेत् ।आत्मानं सततं रक्षेद् व्याघ्राग्निरिपुराजतः ॥ ६॥

yasya smaraṇamātreṇa paśūnāṃ nigraho bhavet |ātmānaṃ satataṃ rakṣed vyāghrāgniripurājataḥ || 6||

श्रुत्वाऽथ पार्वतीवाक्यं ज्ञात्वा तस्या मनोगतम् ।विहस्य तां परिष्वज्य साधु साध्वित्यपूजयत् ॥ ७॥

śrutvā'tha pārvatīvākyaṃ jñātvā tasyā manogatam |vihasya tāṃ pariṣvajya sādhu sādhvityapūjayat || 7||

तदाह कवचं देव्यै कृपया करुणानिधिः ।श्रीशङ्कर उवाच ।शृणु त्वं बगलामुख्याः कवचं सर्वकामदम् ॥ ८॥

tadāha kavacaṃ devyai kṛpayā karuṇānidhiḥ |śrīśaṅkara uvāca |śṛṇu tvaṃ bagalāmukhyāḥ kavacaṃ sarvakāmadam || 8||

यस्य स्मरणमात्रेण बगलामुखी प्रसीदति ।सर्वसिद्धिप्रदा प्राच्यां पातु मां बगलामुखी ॥ ९॥

yasya smaraṇamātreṇa bagalāmukhī prasīdati |sarvasiddhipradā prācyāṃ pātu māṃ bagalāmukhī || 9||

पीताम्बरा तु चाग्नेय्यां याम्यां महिषमर्दिनी ।नैरृत्यां चण्डिका पातु भक्तानुग्रहकारिणी ॥ १०॥

pītāmbarā tu cāgneyyāṃ yāmyāṃ mahiṣamardinī |nairṛtyāṃ caṇḍikā pātu bhaktānugrahakāriṇī || 10||

पातु नित्यं महादेवी प्रतीच्यां शूकरानना ।वायव्ये पातु मां काली कौवेर्यां त्रिपुराऽवतु ॥ ११॥

pātu nityaṃ mahādevī pratīcyāṃ śūkarānanā |vāyavye pātu māṃ kālī kauveryāṃ tripurā'vatu || 11||

ईशान्यां भैरवी पातु पातु नित्यं सुरप्रिया ।ऊर्ध्वं वागीश्वरी पातु मध्ये मां ललिताऽवतु ॥ १२॥

īśānyāṃ bhairavī pātu pātu nityaṃ surapriyā |ūrdhvaṃ vāgīśvarī pātu madhye māṃ lalitā'vatu || 12||

अधस्ताद् अपि मां पातु वाराही चक्रधारिणि ।मस्तकं पातु मे नित्यं श्रीदेवी बगलामुखी ॥ १३॥

adhastād api māṃ pātu vārāhī cakradhāriṇi |mastakaṃ pātu me nityaṃ śrīdevī bagalāmukhī || 13||

भालं पीताम्बरा पातु नेत्रे त्रिपुरभैरवी ।श्रवणौ विजया पातु नासिकायुगलं जया ॥ १४॥

bhālaṃ pītāmbarā pātu netre tripurabhairavī |śravaṇau vijayā pātu nāsikāyugalaṃ jayā || 14||

शारदा वचनं पातु जिह्वां पातु सुरेश्वरी ।कण्ठं रक्षतु रुद्राणी स्कन्धौ मे विन्ध्यवासिनी ॥ १५॥

śāradā vacanaṃ pātu jihvāṃ pātu sureśvarī |kaṇṭhaṃ rakṣatu rudrāṇī skandhau me vindhyavāsinī || 15||

सुन्दरी पातु बाहू मे जया पातु करौ सदा ।भवानी हृदयं पातु मध्यं मे भुवनेश्वरी ॥ १६॥

sundarī pātu bāhū me jayā pātu karau sadā |bhavānī hṛdayaṃ pātu madhyaṃ me bhuvaneśvarī || 16||

नाभिं पातु महामाया कटिं कमललोचना ।ऊरू मे पातु मातङ्गी जानुनी चापराजिता ॥ १७॥

nābhiṃ pātu mahāmāyā kaṭiṃ kamalalocanā |ūrū me pātu mātaṅgī jānunī cāparājitā || 17||

जङ्घे कपालिनी पातु चरणौ चञ्चलेक्षणा ।सर्वतः पातु मां तारा योगिनी पातु चाग्रतः ॥ १८॥

jaṅghe kapālinī pātu caraṇau cañcalekṣaṇā |sarvataḥ pātu māṃ tārā yoginī pātu cāgrataḥ || 18||

पृष्ठं मे पातु कौमारी दक्षपार्श्वे शिवाऽवतु ।रुद्राणी वामपार्श्वे तु पातु मां सर्वदेष्टदा ॥ १९॥

pṛṣṭhaṃ me pātu kaumārī dakṣapārśve śivā'vatu |rudrāṇī vāmapārśve tu pātu māṃ sarvadeṣṭadā || 19||

स्तुता सर्वेषु देवेषु रक्तबीजविनाशिनी ।इत्येतत् कवचं दिव्यं धर्मकामार्थसाधनम् ॥ २०॥

stutā sarveṣu deveṣu raktabījavināśinī |ityetat kavacaṃ divyaṃ dharmakāmārthasādhanam || 20||

गोपनीयं प्रयत्नेन कस्यचिन्न प्रकाशयेत् ।यः सकृच्छृणुयाद् एतत् कवचं मन्मुखोदितम् ॥ २१॥

gopanīyaṃ prayatnena kasyacinna prakāśayet |yaḥ sakṛcchṛṇuyād etat kavacaṃ manmukhoditam || 21||

स सर्वान् लभते कामान् मूर्खो विद्यामवाप्नुयात् ।तस्याशु शत्रवो यान्ति यमस्य भवते शिवे ॥ २२॥

sa sarvān labhate kāmān mūrkho vidyāmavāpnuyāt |tasyāśu śatravo yānti yamasya bhavate śive || 22||

इति श्रीरुद्रयामले महातन्त्रे श्रीमहाविद्यापीताम्बराबगलामुखीकवचं समाप्तम् ।

iti śrīrudrayāmale mahātantre śrīmahāvidyāpītāmbarābagalāmukhīkavacaṃ samāptam |