बगलामुखीस्तवराजः Shri Bagalamukhi Stavarajah

वन्दे सकलसन्देहदावपावकमीश्वरम् ।करुणावरुणावासं भक्तकल्पतरुं गुरुम् ॥ १॥

vande sakalasandehadāvapāvakamīśvaram |karuṇāvaruṇāvāsaṃ bhaktakalpataruṃ gurum || 1||

उल्लसत्पीतविद्योति विद्योतित तनुत्रयम् ।निगमागमसर्वस्वमीडेऽहं तन्महन्महः ॥ २॥

ullasatpītavidyoti vidyotita tanutrayam |nigamāgamasarvasvamīḍe'haṃ tanmahanmahaḥ || 2||

ॐ पूर्वं स्थिरमायां च बगलामुखी सर्वतः ।दुष्टानां वाचमुच्चार्य मुखं पदं तथोद्धरेत् ॥ ३॥

oṃ pūrvaṃ sthiramāyāṃ ca bagalāmukhī sarvataḥ |duṣṭānāṃ vācamuccārya mukhaṃ padaṃ tathoddharet || 3||

स्तम्भयेति ततो जिह्वां कीलयेति समुद्धरेत् ।बुद्धिं विनाशयेति पदं स्थिरमायामनुस्मरेत् ॥ ४॥

stambhayeti tato jihvāṃ kīlayeti samuddharet |buddhiṃ vināśayeti padaṃ sthiramāyāmanusmaret || 4||

प्रणवं वह्निजाया चेत्येव पैताम्बरो मनुः ।पातु मां सर्वदा सर्वं निग्रहानुग्रहक्षमः ॥ ५॥

praṇavaṃ vahnijāyā cetyeva paitāmbaro manuḥ |pātu māṃ sarvadā sarvaṃ nigrahānugrahakṣamaḥ || 5||

कण्ठं नारद ऋषिः पातु पङ्क्तिछन्दोऽवतान्मुखम् ।पीताम्बरा देवता तु हृन्मध्यमवतान्मम ॥ ६॥

kaṇṭhaṃ nārada ṛṣiḥ pātu paṅktichando'vatānmukham |pītāmbarā devatā tu hṛnmadhyamavatānmama || 6||

हली बीजं स्तनयोर्मेऽव्यात् स्वाहा शक्तिश्च दन्तयोः ।स कीलकं तथा गुह्ये विनियोगोऽवताद्वपुः ॥ ७॥

halī bījaṃ stanayorme'vyāt svāhā śaktiśca dantayoḥ |sa kīlakaṃ tathā guhye viniyogo'vatādvapuḥ || 7||

षड्दीर्घभाजा बीजेन व्यासोऽव्यान्मे करादिकम् ।द्विपञ्जपञ्च नन्देषु दशभिर्मन्त्रवर्णकैः ॥ ८॥

ṣaḍdīrghabhājā bījena vyāso'vyānme karādikam |dvipañjapañca nandeṣu daśabhirmantravarṇakaiḥ || 8||

षडङ्गकल्पना पातु षडङ्गानि ह्यनुक्रमात् ।ऐं विद्यातत्त्वं क्लीं मायातत्त्वं सौश्च शिवात्मकम् ॥ ९॥

ṣaḍaṅgakalpanā pātu ṣaḍaṅgāni hyanukramāt |aiṃ vidyātattvaṃ klīṃ māyātattvaṃ sauśca śivātmakam || 9||

तत्त्वत्रयं सं बीजं च मूलं हृत्कण्ठं मध्यगः ।सुधाब्धौ हेमभूरूढचम्पकोद्यानमध्यतः ॥ १०॥

tattvatrayaṃ saṃ bījaṃ ca mūlaṃ hṛtkaṇṭhaṃ madhyagaḥ |sudhābdhau hemabhūrūḍhacampakodyānamadhyataḥ || 10||

गारुडोत्पलनिर्व्यूढस्वर्णसिंहासनोपरि ।स्वर्णपङ्कजसंविष्टां त्रिनेत्रां शशिशेखराम् ॥ ११॥

gāruḍotpalanirvyūḍhasvarṇasiṃhāsanopari |svarṇapaṅkajasaṃviṣṭāṃ trinetrāṃ śaśiśekharām || 11||

पीतालङ्कारवसनां मल्लीचन्दनशोभिताम् ।सव्याभां पञ्चशाखायां वज्रजिह्वां च बिभ्रतीम् ॥ १२॥

pītālaṅkāravasanāṃ mallīcandanaśobhitām |savyābhāṃ pañcaśākhāyāṃ vajrajihvāṃ ca bibhratīm || 12||

मुद्गरं नागपाशं च दक्षिणाभ्यां मदालसाम् ।भक्तारिविग्रहोद्योगप्रगल्भां बगलामुखीम् ॥ १३॥

mudgaraṃ nāgapāśaṃ ca dakṣiṇābhyāṃ madālasām |bhaktārivigrahodyogapragalbhāṃ bagalāmukhīm || 13||

ध्यायमानस्य मे पातु शास्त्रवोद्वेषणे भृशम् ।भूकलादलदिक्पत्रषट्कोणं त्र्यस्त्रबैन्दुकम् ॥ १४॥

dhyāyamānasya me pātu śāstravodveṣaṇe bhṛśam |bhūkalādaladikpatraṣaṭkoṇaṃ tryastrabaindukam || 14||

यन्त्रं पैताम्बरं पातु सा मां पायादविग्रहा ।आधारशक्तिमारभ्य ज्ञानात्मान्तास्तु शक्तयः ॥ १५॥

yantraṃ paitāmbaraṃ pātu sā māṃ pāyādavigrahā |ādhāraśaktimārabhya jñānātmāntāstu śaktayaḥ || 15||

पीठाद्याः पान्तु पीठेऽत्रं प्रथमं मां च रक्षतु ।शान्तिशङ्खविशेषात्मशक्तिभूतानि पान्तु माम् ॥ १६॥

pīṭhādyāḥ pāntu pīṭhe'traṃ prathamaṃ māṃ ca rakṣatu |śāntiśaṅkhaviśeṣātmaśaktibhūtāni pāntu mām || 16||

आवाहनाद्याः पञ्चापि मुद्राश्च सुमनोजलैः ।त्रिकोणमध्यमारभ्य पूजिता बगलामुखी ॥ १७॥

āvāhanādyāḥ pañcāpi mudrāśca sumanojalaiḥ |trikoṇamadhyamārabhya pūjitā bagalāmukhī || 17||

क्रोधिनी स्तम्भिनी चापि धारिण्यश्चापि मध्यगाः ।ओजः पूषादिपीठानि कोणाग्रेषु स्थितानि वै ॥ १८॥

krodhinī stambhinī cāpi dhāriṇyaścāpi madhyagāḥ |ojaḥ pūṣādipīṭhāni koṇāgreṣu sthitāni vai || 18||

त्रिकोण बाह्यतः सिद्धनाथाद्या गुरवस्तथा ।सिद्धनाथः सिद्धानन्दनाथः सिद्धपरमेष्ठि हि ॥ १९॥

trikoṇa bāhyataḥ siddhanāthādyā guravastathā |siddhanāthaḥ siddhānandanāthaḥ siddhaparameṣṭhi hi || 19||

नाथः सिद्धः श्रीकण्ठश्च नाथः सिद्धचतुष्टयम् ।पातु मामथ षट्कोणे सुभगा भगरूपिणी ॥ २०॥

nāthaḥ siddhaḥ śrīkaṇṭhaśca nāthaḥ siddhacatuṣṭayam |pātu māmatha ṣaṭkoṇe subhagā bhagarūpiṇī || 20||

भगोदया च भगनिपातिनी भगमालिनी ।भगवाहा च मां पातु षट्कोणाग्रेषु च क्रमात् ॥ २१॥

bhagodayā ca bhaganipātinī bhagamālinī |bhagavāhā ca māṃ pātu ṣaṭkoṇāgreṣu ca kramāt || 21||

त्वगात्मा शोणितात्मा च मांसात्मा मेदसात्मकः ।रूपात्मा परमात्मा च पातु मां स्थिरविग्रहा ॥ २२॥

tvagātmā śoṇitātmā ca māṃsātmā medasātmakaḥ |rūpātmā paramātmā ca pātu māṃ sthiravigrahā || 22||

अष्टपत्रेषु मूलेषु ब्राह्मी माहेश्वरी तथा ।कौमारी वैष्णवी वाराहीन्द्राणी च तथा पुनः ॥ २३॥

aṣṭapatreṣu mūleṣu brāhmī māheśvarī tathā |kaumārī vaiṣṇavī vārāhīndrāṇī ca tathā punaḥ || 23||

चामुण्डा च महालक्ष्मीस्तत्र मध्ये पुनर्जया ।विजया च जयाम्बा च राजिता जृम्भिणी तथा ॥ २४॥

cāmuṇḍā ca mahālakṣmīstatra madhye punarjayā |vijayā ca jayāmbā ca rājitā jṛmbhiṇī tathā || 24||

स्तम्भिनी मोहिनी वश्याऽकर्षिण्यथ तदग्रके ।असिताङ्गो रुरुश्चण्डः क्रौधोन्मत्तकपालिनः ।भीषणाश्चापि संहार एते रक्षन्तु मां सदा ॥ २५॥

stambhinī mohinī vaśyā'karṣiṇyatha tadagrake |asitāṅgo ruruścaṇḍaḥ kraudhonmattakapālinaḥ |bhīṣaṇāścāpi saṃhāra ete rakṣantu māṃ sadā || 25||

ततः षोडशपत्रेषु मङ्गला स्तम्भिनी तथा ।जृम्भिणी मोहिनी वश्या ज्वाला सिंही बलाहका ॥ २६॥

tataḥ ṣoḍaśapatreṣu maṅgalā stambhinī tathā |jṛmbhiṇī mohinī vaśyā jvālā siṃhī balāhakā || 26||

भूधरा कल्मषा धात्री कन्यका कालकर्षिणी ।भान्तिका मन्दगमना भोगस्था भावकेति च ॥ २७॥

bhūdharā kalmaṣā dhātrī kanyakā kālakarṣiṇī |bhāntikā mandagamanā bhogasthā bhāvaketi ca || 27||

पातु मामथ भूसद्म दशदिक्षु दिगीश्वराः ।इन्द्रोऽनलो यमो रक्षो वरुणो मारुतः शशिः ॥ २८॥

pātu māmatha bhūsadma daśadikṣu digīśvarāḥ |indro'nalo yamo rakṣo varuṇo mārutaḥ śaśiḥ || 28||

ईशोऽनन्तः स्वयम्भूश्च दशैते पान्तु मे वपुः ।वज्रशक्तिर्दण्डखड्गौ पाशाङ्कुशगदाः क्रमात् ।शूलं चक्रं सरोजं च तत्तच्छस्त्राणि पान्तु माम् ॥ २९॥

īśo'nantaḥ svayambhūśca daśaite pāntu me vapuḥ |vajraśaktirdaṇḍakhaḍgau pāśāṅkuśagadāḥ kramāt |śūlaṃ cakraṃ sarojaṃ ca tattacchastrāṇi pāntu mām || 29||

अथ च पूर्वादि चतुर्दिशासु परतः क्रमात् ।पातु विघ्नेशबटुकौ योगिनी क्षेत्रपालकः ॥ ३०॥

atha ca pūrvādi caturdiśāsu parataḥ kramāt |pātu vighneśabaṭukau yoginī kṣetrapālakaḥ || 30||

गुरुत्रयं त्रिरेखासु पातु मे वपुरञ्जसा ।पुनः पीताम्बरा पातु उपचारैः प्रपूजिता ॥ ३१॥

gurutrayaṃ trirekhāsu pātu me vapurañjasā |punaḥ pītāmbarā pātu upacāraiḥ prapūjitā || 31||

साङ्गावरणशक्तिश्च जयश्रीः पातु सर्वदा ।वलयं बटुकादिभ्यो रक्षां कुर्वन्तु मे सदा ॥ ३२॥

sāṅgāvaraṇaśaktiśca jayaśrīḥ pātu sarvadā |valayaṃ baṭukādibhyo rakṣāṃ kurvantu me sadā || 32||

शक्तयः साधका वीराः पातु मे देवता इमाः ।इत्यर्चाक्रमतः प्रोक्तं स्तोत्रं पैताम्बरं परम् ॥ ३३॥

śaktayaḥ sādhakā vīrāḥ pātu me devatā imāḥ |ityarcākramataḥ proktaṃ stotraṃ paitāmbaraṃ param || 33||

यः पठेत् सकृदप्येतत् सोऽर्चाफलमवाप्नुयात् ।सर्वथा कारयेत् क्षिप्रं प्रपद्यन्ते गदातुरान् ॥ ३४॥

yaḥ paṭhet sakṛdapyetat so'rcāphalamavāpnuyāt |sarvathā kārayet kṣipraṃ prapadyante gadāturān || 34||

राजानो राजपत्न्यश्च पौरजानपदास्तथा ।वशगास्तस्य जायन्ते सततं सेवका इव ॥ ३५॥

rājāno rājapatnyaśca paurajānapadāstathā |vaśagāstasya jāyante satataṃ sevakā iva || 35||

गुरुकल्पाश्च विबुधा मूकतां यान्ति तेऽग्रतः ।स्थिरा भवति तद्गेहे चपलापि हरिप्रिया ॥ ३६॥

gurukalpāśca vibudhā mūkatāṃ yānti te'grataḥ |sthirā bhavati tadgehe capalāpi haripriyā || 36||

पीताम्बराङ्गवसनो यदि लक्षसङ्ख्यंपैताम्बरं मनुममुं प्रजपेन्नरो यः ।हेमी सकृन्नियमवान् विधिना हरिद्रामालां दधद्भवति तद्वशगा त्रिलोकी ॥ ३७॥

pītāmbarāṅgavasano yadi lakṣasaṅkhyaṃpaitāmbaraṃ manumamuṃ prajapennaro yaḥ |hemī sakṛnniyamavān vidhinā haridrāmālāṃ dadhadbhavati tadvaśagā trilokī || 37||

भवानि बगलामुखि त्रिदशकल्पवल्लि प्रभोकृपाजलनिधे तव चरणधूतबाधाखिलः ।सुरासुरनरादिकसकलभक्तभाग्यप्रदेत्वदङ्घ्रिसरसीरुहद्वयमहं तु ध्याये सदा ॥ ३८॥

bhavāni bagalāmukhi tridaśakalpavalli prabhokṛpājalanidhe tava caraṇadhūtabādhākhilaḥ |surāsuranarādikasakalabhaktabhāgyapradetvadaṅghrisarasīruhadvayamahaṃ tu dhyāye sadā || 38||

त्वमस्य जगतां जनिस्थितिविनाशबीजं निजप्रकाशबहुलद्युतिर्भवति भक्तहृन्मध्यगा ।त्रयीमनु सुपूजिता हरिहरादि वृन्दारकैरनुक्षणमनुक्षणं मयि शिवे क्षणं वीक्ष्यताम् ॥ ३९॥

tvamasya jagatāṃ janisthitivināśabījaṃ nijaprakāśabahuladyutirbhavati bhaktahṛnmadhyagā |trayīmanu supūjitā hariharādi vṛndārakairanukṣaṇamanukṣaṇaṃ mayi śive kṣaṇaṃ vīkṣyatām || 39||

शिवे तव तनूमहं हरिहराद्यगम्यां परांनिखिलतापप्रत्यूहहृदयाभावयुक्तां स्मरे ।विदारय विचूर्णय ग्लपय शोषय स्तम्भयप्रणोदय विरोधय प्रविलय प्रबद्धारिणाम् ॥ ४०॥

śive tava tanūmahaṃ hariharādyagamyāṃ parāṃnikhilatāpapratyūhahṛdayābhāvayuktāṃ smare |vidāraya vicūrṇaya glapaya śoṣaya stambhayapraṇodaya virodhaya pravilaya prabaddhāriṇām || 40||

पार्वति कृपालसन्मयि कटाक्षपातं मनागनाकुलतया क्षणं क्षिप विपक्षसंक्षोभिणि ।यदीक्षणपथं गतः सकृदपि प्रभुः कश्चनस्फुटं मम वशंवदो भवतु तेन पीताम्बरे ॥ ४१॥

pārvati kṛpālasanmayi kaṭākṣapātaṃ manāganākulatayā kṣaṇaṃ kṣipa vipakṣasaṃkṣobhiṇi |yadīkṣaṇapathaṃ gataḥ sakṛdapi prabhuḥ kaścanasphuṭaṃ mama vaśaṃvado bhavatu tena pītāmbare || 41||

ॐ नमो भगवते महारुद्राय हुं फट् स्वाहा ।इति अथर्वणरहस्यान्तर्गतः श्रीबगलामुखीस्तवराजः समाप्तः ।

oṃ namo bhagavate mahārudrāya huṃ phaṭ svāhā |iti atharvaṇarahasyāntargataḥ śrībagalāmukhīstavarājaḥ samāptaḥ |