कालिकाशतनामस्तोत्रम् अथवा आद्याकालिकाशतनामस्तोत्रम् श्रीककारकूटघटितं Adya Kalikadevyah Shatanamastotram

कालिकाशतनामस्तोत्रम्॥ श्रीगणेशाय नमः ॥॥ श्रीउमामहेश्वराभ्यां नमः ॥श्रीसदाशिव उवाच ॥शृणु देवि जगद्वन्द्ये स्तोत्रमेतदनुत्तमम् ।पठनात् श्रवणाद्यस्य सर्वसिद्धीश्वरो भवेत् ॥ १॥

kālikāśatanāmastotram|| śrīgaṇeśāya namaḥ |||| śrīumāmaheśvarābhyāṃ namaḥ ||śrīsadāśiva uvāca ||śṛṇu devi jagadvandye stotrametadanuttamam |paṭhanāt śravaṇādyasya sarvasiddhīśvaro bhavet || 1||

असौभाग्यप्रशमनं सुखसम्पद्विवर्धनम् ।अकालमृत्युहरणं सर्वापद्विनिवारणम् ॥ २॥

asaubhāgyapraśamanaṃ sukhasampadvivardhanam |akālamṛtyuharaṇaṃ sarvāpadvinivāraṇam || 2||

श्रीमदाद्याकालिकायाः सुखसान्निध्यकारणम् ।स्तवस्यास्य प्रसादेन त्रिपुरारिरहं शिवे ॥ ३॥

śrīmadādyākālikāyāḥ sukhasānnidhyakāraṇam |stavasyāsya prasādena tripurārirahaṃ śive || 3||

स्तोत्रस्यास्य ऋषिर्देवि सदाशिव उदाहृतः ।छन्दोऽनुष्टुब्देवताऽऽद्या कालिका परिकीर्त्तिता ।धर्मकामार्थमोक्षेषु विनियोगः प्रकीर्त्तितः ॥ ४॥

stotrasyāsya ṛṣirdevi sadāśiva udāhṛtaḥ |chando'nuṣṭubdevatā''dyā kālikā parikīrttitā |dharmakāmārthamokṣeṣu viniyogaḥ prakīrttitaḥ || 4||

ॐ अस्य श्रीआद्याकालिकाशतनामस्तोत्रमन्त्रस्य श्रीसदाशिवऋषिः ।अनुष्टुप्छन्दः । श्री आद्याकालिका देवता ।धर्मकामार्थमोक्ष सिध्यर्थे जपे विनियोगः ॥ह्रीँ काली श्रीँ कराली च क्रीँ कल्याणी कलावती ।कमला कलिदर्पघ्नी कपर्दीशकृपान्विता ॥ ५॥

oṃ asya śrīādyākālikāśatanāmastotramantrasya śrīsadāśivaṛṣiḥ |anuṣṭupchandaḥ | śrī ādyākālikā devatā |dharmakāmārthamokṣa sidhyarthe jape viniyogaḥ ||hrīm̐ kālī śrīm̐ karālī ca krīm̐ kalyāṇī kalāvatī |kamalā kalidarpaghnī kapardīśakṛpānvitā || 5||

कालिका कालमाता च कालानलसमद्युतिः ।कपर्दिनी करालास्या करुणामृतसागरा ॥ ६॥

kālikā kālamātā ca kālānalasamadyutiḥ |kapardinī karālāsyā karuṇāmṛtasāgarā || 6||

कृपामयी कृपाधारा कृपापारा कृपागमा ।कृशानुः कपिला कृष्णा कृष्णानन्दविवर्द्धिनी ॥ ७॥

kṛpāmayī kṛpādhārā kṛpāpārā kṛpāgamā |kṛśānuḥ kapilā kṛṣṇā kṛṣṇānandavivarddhinī || 7||

कालरात्रिः कामरूपा कामपाशविमोचनी ।कादम्बिनी कलाधारा कलिकल्मषनाशिनी ॥ ८॥

kālarātriḥ kāmarūpā kāmapāśavimocanī |kādambinī kalādhārā kalikalmaṣanāśinī || 8||

कुमारीपूजनप्रीता कुमारीपूजकालया ।कुमारीभोजनानन्दा कुमारीरूपधारिणी ॥ ९॥

kumārīpūjanaprītā kumārīpūjakālayā |kumārībhojanānandā kumārīrūpadhāriṇī || 9||

कदम्बवनसञ्चारा कदम्बवनवासिनी ।कदम्बपुष्पसन्तोषा कदम्बपुष्पमालिनी ॥ १०॥

kadambavanasañcārā kadambavanavāsinī |kadambapuṣpasantoṣā kadambapuṣpamālinī || 10||

किशोरी कलकण्ठा च कलनादनिनादिनी ।कादम्बरीपानरता तथा कादम्बरीप्रिया ॥ ११॥

kiśorī kalakaṇṭhā ca kalanādaninādinī |kādambarīpānaratā tathā kādambarīpriyā || 11||

कपालपात्रनिरता कङ्कालमाल्यधारिणी ।कमलासनसन्तुष्टा कमलासनवासिनी ॥ १२॥

kapālapātraniratā kaṅkālamālyadhāriṇī |kamalāsanasantuṣṭā kamalāsanavāsinī || 12||

कमलालयमध्यस्था कमलामोदमोदिनी ।कलहंसगतिः क्लैब्यनाशिनी कामरूपिणी ॥ १३॥

kamalālayamadhyasthā kamalāmodamodinī |kalahaṃsagatiḥ klaibyanāśinī kāmarūpiṇī || 13||

कामरूपकृतावासा कामपीठविलासिनी ।कमनीया कल्पलता कमनीयविभूषणा ॥ १४॥

kāmarūpakṛtāvāsā kāmapīṭhavilāsinī |kamanīyā kalpalatā kamanīyavibhūṣaṇā || 14||

कमनीयगुणाराध्या कोमलाङ्गी कृशोदरी ।कारणामृतसन्तोषा कारणानन्दसिद्धिदा ॥ १५॥

kamanīyaguṇārādhyā komalāṅgī kṛśodarī |kāraṇāmṛtasantoṣā kāraṇānandasiddhidā || 15||

कारणानन्दजापेष्टा कारणार्चनहर्षिता ।कारणार्णवसम्मग्ना कारणव्रतपालिनी ॥ १६॥

kāraṇānandajāpeṣṭā kāraṇārcanaharṣitā |kāraṇārṇavasammagnā kāraṇavratapālinī || 16||

कस्तूरीसौरभामोदा कस्तूरितिलकोज्ज्वला ।कस्तूरीपूजनरता कस्तूरीपूजकप्रिया ॥ १७॥

kastūrīsaurabhāmodā kastūritilakojjvalā |kastūrīpūjanaratā kastūrīpūjakapriyā || 17||

कस्तूरीदाहजननी कस्तूरीमृगतोषिणी ।कस्तूरीभोजनप्रीता कर्पूरामोदमोदिता ॥ १८॥

kastūrīdāhajananī kastūrīmṛgatoṣiṇī |kastūrībhojanaprītā karpūrāmodamoditā || 18||

कर्पूरमालाभरणा कर्पूरचन्दनोक्षिता ।कर्पूरकारणाह्लादा कर्पूरामृतपायिनी ॥ १९॥

karpūramālābharaṇā karpūracandanokṣitā |karpūrakāraṇāhlādā karpūrāmṛtapāyinī || 19||

कर्पूरसागरस्नाता कर्पूरसागरालया ।कूर्चबीजजपप्रीता कूर्चजापपरायणा ॥ २०॥

karpūrasāgarasnātā karpūrasāgarālayā |kūrcabījajapaprītā kūrcajāpaparāyaṇā || 20||

कुलीना कौलिकाराध्या कौलिकप्रियकारिणी ।कुलाचारा कौतुकिनी कुलमार्गप्रदर्शिनी ॥ २१॥

kulīnā kaulikārādhyā kaulikapriyakāriṇī |kulācārā kautukinī kulamārgapradarśinī || 21||

काशीश्वरी कष्टहर्त्री काशीशवरदायिनी ।काशीश्वरकृतामोदा काशीश्वरमनोरमा ॥ २२॥

kāśīśvarī kaṣṭahartrī kāśīśavaradāyinī |kāśīśvarakṛtāmodā kāśīśvaramanoramā || 22||

कलमञ्जीरचरणा क्वणत्काञ्चीविभूषणा ।काञ्चनाद्रिकृतागारा काञ्चनाचलकौमुदी ॥ २३॥

kalamañjīracaraṇā kvaṇatkāñcīvibhūṣaṇā |kāñcanādrikṛtāgārā kāñcanācalakaumudī || 23||

कामबीजजपानन्दा कामबीजस्वरूपिणी ।कुमतिघ्नी कुलीनार्त्तिनाशिनी कुलकामिनी ॥ २४॥

kāmabījajapānandā kāmabījasvarūpiṇī |kumatighnī kulīnārttināśinī kulakāminī || 24||

क्रीँ ह्रीँ श्रीँ मन्त्रवर्णेन कालकण्टकघातिनी ।इत्याद्याकालिकादेव्याः शतनाम प्रकीर्त्तितम् ॥ २५॥

krīm̐ hrīm̐ śrīm̐ mantravarṇena kālakaṇṭakaghātinī |ityādyākālikādevyāḥ śatanāma prakīrttitam || 25||

ककारकूटघटितं कालीरूपस्वरूपकम् ।पूजाकाले पठेद्यस्तु कालिकाकृतमानसः ॥ २६॥

kakārakūṭaghaṭitaṃ kālīrūpasvarūpakam |pūjākāle paṭhedyastu kālikākṛtamānasaḥ || 26||

मन्त्रसिद्धिर्भवेदाशु तस्य काली प्रसीदति ।बुद्धिं विद्याञ्च लभते गुरोरादेशमात्रतः ॥ २७॥

mantrasiddhirbhavedāśu tasya kālī prasīdati |buddhiṃ vidyāñca labhate gurorādeśamātrataḥ || 27||

धनवान् कीर्त्तिमान् भूयाद्दानशीलो दयान्वितः ।पुत्रपौत्रसुखैश्वर्यैर्मोदते साधको भुवि ॥ २८॥

dhanavān kīrttimān bhūyāddānaśīlo dayānvitaḥ |putrapautrasukhaiśvaryairmodate sādhako bhuvi || 28||

भौमावास्यानिशाभागे मपञ्चकसमन्वितः ।पूजयित्वा महाकालीमाद्यां त्रिभुवनेश्वरीम् ॥ २९॥

bhaumāvāsyāniśābhāge mapañcakasamanvitaḥ |pūjayitvā mahākālīmādyāṃ tribhuvaneśvarīm || 29||

पठित्वा शतनामानि साक्षात् कालीमयो भवेत् ।नासाध्यं विद्यते तस्य त्रिषु लोकेषु किञ्चन ॥ ३०॥

paṭhitvā śatanāmāni sākṣāt kālīmayo bhavet |nāsādhyaṃ vidyate tasya triṣu lokeṣu kiñcana || 30||

विद्यायां वाक्पतिः साक्षात् धने धनपतिर्भवेत् ।समुद्र इव गाम्भीर्ये बले च पवनोपमः ॥ ३१॥

vidyāyāṃ vākpatiḥ sākṣāt dhane dhanapatirbhavet |samudra iva gāmbhīrye bale ca pavanopamaḥ || 31||

तिग्मांशुरिव दुष्प्रेक्ष्यः शशिवत् शुभदर्शनः ।रूपे मूर्त्तिधरः कामो योषितां हृदयङ्गमः ॥ ३२॥

tigmāṃśuriva duṣprekṣyaḥ śaśivat śubhadarśanaḥ |rūpe mūrttidharaḥ kāmo yoṣitāṃ hṛdayaṅgamaḥ || 32||

सर्वत्र जयमाप्नोति स्तवस्यास्य प्रसादतः ।यं यं कामं पुरस्कृत्य स्तोत्रमेतदुदीरयेत् ॥ ३३॥

sarvatra jayamāpnoti stavasyāsya prasādataḥ |yaṃ yaṃ kāmaṃ puraskṛtya stotrametadudīrayet || 33||

तं तं काममवाप्नोति श्रीमदाद्याप्रसादतः ।रणे राजकुले द्यूते विवादे प्राणसङ्कटे ॥ ३४॥

taṃ taṃ kāmamavāpnoti śrīmadādyāprasādataḥ |raṇe rājakule dyūte vivāde prāṇasaṅkaṭe || 34||

दस्युग्रस्ते ग्रामदाहे सिंहव्याघ्रावृते तथा ।अरण्ये प्रान्तरे दुर्गे ग्रहराजभयेऽपि वा ॥ ३५॥

dasyugraste grāmadāhe siṃhavyāghrāvṛte tathā |araṇye prāntare durge graharājabhaye'pi vā || 35||

ज्वरदाहे चिरव्याधौ महारोगादिसङ्कुले ।बालग्रहादिरोगे च तथा दुःस्वप्नदर्शने ॥ ३६॥

jvaradāhe ciravyādhau mahārogādisaṅkule |bālagrahādiroge ca tathā duḥsvapnadarśane || 36||

दुस्तरे सलिले वापि पोते वातविपद्गते ।विचिन्त्य परमां मायामाद्यां कालीं परात्पराम् ॥ ३७॥

dustare salile vāpi pote vātavipadgate |vicintya paramāṃ māyāmādyāṃ kālīṃ parātparām || 37||

यः पठेच्छतनामानि दृढभक्तिसमन्वितः ।सर्वापद्भ्यो विमुच्येत देवि सत्यं न संशयः ॥ ३८॥

yaḥ paṭhecchatanāmāni dṛḍhabhaktisamanvitaḥ |sarvāpadbhyo vimucyeta devi satyaṃ na saṃśayaḥ || 38||

न पापेभ्यो भयं तस्य न रोगेभ्यो भयं क्वचित् ।सर्वत्र विजयस्तस्य न कुत्रापि पराभवः ॥ ३९॥

na pāpebhyo bhayaṃ tasya na rogebhyo bhayaṃ kvacit |sarvatra vijayastasya na kutrāpi parābhavaḥ || 39||

तस्य दर्शनमात्रेण पलायन्ते विपद्गणाः ।स वक्ता सर्वशास्त्राणां स भोक्ता सर्वसम्पदाम् ॥ ४०॥

tasya darśanamātreṇa palāyante vipadgaṇāḥ |sa vaktā sarvaśāstrāṇāṃ sa bhoktā sarvasampadām || 40||

स कर्त्ता जातिधर्माणां ज्ञातीनां प्रभुरेव सः ।वाणी तस्य वसेद्वक्त्रे कमला निश्चला गृहे ॥ ४१॥

sa karttā jātidharmāṇāṃ jñātīnāṃ prabhureva saḥ |vāṇī tasya vasedvaktre kamalā niścalā gṛhe || 41||

तन्नाम्ना मानवाः सर्वे प्रणमन्ति ससम्भ्रमाः ।दृष्ट्या तस्य तृणायन्ते ह्यणिमाद्यष्टसिद्धयः ॥ ४२॥

tannāmnā mānavāḥ sarve praṇamanti sasambhramāḥ |dṛṣṭyā tasya tṛṇāyante hyaṇimādyaṣṭasiddhayaḥ || 42||

आद्याकालीस्वरूपाख्यं शतनाम प्रकीर्तितम् ।अष्टोत्तरशतावृत्त्या पुरश्चर्याऽस्य गीयते ॥ ४३॥

ādyākālīsvarūpākhyaṃ śatanāma prakīrtitam |aṣṭottaraśatāvṛttyā puraścaryā'sya gīyate || 43||

पुरस्क्रियान्वितं स्तोत्रं सर्वाभीष्टफलप्रदम् ।शतनामस्तुतिमिमामाद्याकालीस्वरूपिणीम् ॥ ४४॥

puraskriyānvitaṃ stotraṃ sarvābhīṣṭaphalapradam |śatanāmastutimimāmādyākālīsvarūpiṇīm || 44||

पठेद्वा पाठयेद्वापि शृणुयाच्छ्रावयेदपि ।सर्वपापविनिर्मुक्तो ब्रह्मसायुज्यमाप्नुयात् ॥ ४५॥

paṭhedvā pāṭhayedvāpi śṛṇuyācchrāvayedapi |sarvapāpavinirmukto brahmasāyujyamāpnuyāt || 45||

इति महानिर्वाण्तन्त्रान्तर्गतं आद्या कालिकादेव्याः शतनामस्तोत्रं सम्पूर्णम् ।

iti mahānirvāṇtantrāntargataṃ ādyā kālikādevyāḥ śatanāmastotraṃ sampūrṇam |