स्थाणुस्तवः Shri Sthanustavah

अथवा त्रिमूर्तिस्तुतिः २(शुचीन्द्रे)अम्भोरुहस्थाय चतुर्मुखाय हंसाधिरूढाय हकारधाम्ने ।हंसादिदेवाय हरीश्वराय अकाररूपाय नमो विधात्रे ॥ १॥

athavā trimūrtistutiḥ 2(śucīndre)ambhoruhasthāya caturmukhāya haṃsādhirūḍhāya hakāradhāmne |haṃsādidevāya harīśvarāya akārarūpāya namo vidhātre || 1||

जाग्रत्स्वरूपाय जगज्जनित्रे जटाधरोद्भूतिललाटधाम्ने ।जानाति कस्त्वन्महिमानमुक्तं जाकाररूपाय नमो विधात्रे ॥ २॥

jāgratsvarūpāya jagajjanitre jaṭādharodbhūtilalāṭadhāmne |jānāti kastvanmahimānamuktaṃ jākārarūpāya namo vidhātre || 2||

यवान्न नैवेद्यमहाप्रियाय यज्ञप्रभोक्त्रे यजमानधाम्ने ।यानादिरूपामलवागधीश यकाररूपाय नामे विधात्रे ॥ ३॥

yavānna naivedyamahāpriyāya yajñaprabhoktre yajamānadhāmne |yānādirūpāmalavāgadhīśa yakārarūpāya nāme vidhātre || 3||

ज्ञानात्परज्ञेयपरात्पराय नाथाय नाभीजलजोद्भवाय ।ज्ञानामृतायाम्बुजधामधात्रे नकाररूपाय नमो विधात्रे ॥ ४॥

jñānātparajñeyaparātparāya nāthāya nābhījalajodbhavāya |jñānāmṛtāyāmbujadhāmadhātre nakārarūpāya namo vidhātre || 4||

मायाजगत्सृष्टिकुतूहलाय मान्याय मार्तण्डकलाधराय ।मनोमयाय प्रथमाय कर्त्रे मकाररूपाय नमो विधात्रे ॥ ५॥

māyājagatsṛṣṭikutūhalāya mānyāya mārtaṇḍakalādharāya |manomayāya prathamāya kartre makārarūpāya namo vidhātre || 5||

(अजाय नम इति ब्रह्ममन्त्रगर्भाः पञ्चश्लोकाः ।)दिव्याय पद्मासनमाधवेशरूपाय देवैरनिशं स्तुताय ।दयार्द्रचित्ताय दिगन्तगाय नमो विरिञ्चाय जगज्जनित्रे ॥ ६॥

(ajāya nama iti brahmamantragarbhāḥ pañcaślokāḥ |)divyāya padmāsanamādhaveśarūpāya devairaniśaṃ stutāya |dayārdracittāya digantagāya namo viriñcāya jagajjanitre || 6||

सूत्रात्मने सोमकलाभिपूर्णदेवाय सर्वाध्वरसत्फलाय ।प्रकुर्वते पालनमेव नित्यं ओङ्काररूपाय नमः परस्मै ॥ ७॥

sūtrātmane somakalābhipūrṇadevāya sarvādhvarasatphalāya |prakurvate pālanameva nityaṃ oṅkārarūpāya namaḥ parasmai || 7||

नन्दात्मजायावनतत्पराय नाकादिलोके नमतां जनानाम् ।नागारिवाहाय फलप्रदाय नकाररूपाय नमः परस्मै ॥ ८॥

nandātmajāyāvanatatparāya nākādiloke namatāṃ janānām |nāgārivāhāya phalapradāya nakārarūpāya namaḥ parasmai || 8||

मुरान्तकायामरुमोहनाय मोक्षप्रदायात्मविदां जनानाम् ।मोहप्रदायाखिलगोपिकानां मोकारूपाय नमः परस्मै ॥ ९॥

murāntakāyāmarumohanāya mokṣapradāyātmavidāṃ janānām |mohapradāyākhilagopikānāṃ mokārūpāya namaḥ parasmai || 9||

नारायणायाखिलनायकाय नगन्धरायाम्बुजलोचनाय ।नागाङ्कतल्पाय नवाम्बुदाय नाकाररूपाय नमः परस्मै ॥ १०॥

nārāyaṇāyākhilanāyakāya nagandharāyāmbujalocanāya |nāgāṅkatalpāya navāmbudāya nākārarūpāya namaḥ parasmai || 10||

रामाय राजीवविलोचनाय राधाभुजङ्गाय रतीशपित्रे ।रात्रिञ्चराधीश्वरमर्दनाय राकाररूपाय नमः परस्मै ॥ ११॥

rāmāya rājīvavilocanāya rādhābhujaṅgāya ratīśapitre |rātriñcarādhīśvaramardanāya rākārarūpāya namaḥ parasmai || 11||

यमादियोगाङ्गजनप्रियाय यज्ञस्वरूपाय यतीश्वराय ।यदूत्तमानामधिनायकाय यकाररूपाय नमः परस्मै ॥ १२॥

yamādiyogāṅgajanapriyāya yajñasvarūpāya yatīśvarāya |yadūttamānāmadhināyakāya yakārarūpāya namaḥ parasmai || 12||

नन्दाय नन्दव्रजनायकाय नाभीपुटोद्भूतविधीडिताय ।नादान्तरूपाय नृसिंहधाम्ने णाकाररूपाय नमः परस्मै ॥ १३॥

nandāya nandavrajanāyakāya nābhīpuṭodbhūtavidhīḍitāya |nādāntarūpāya nṛsiṃhadhāmne ṇākārarūpāya namaḥ parasmai || 13||

यज्ञाय यज्ञावनतत्पराय यज्ञैः समाराधितपादुकाय ।यथार्थधाम्ने यजुषाम्प्रियाय यकार रूपाय नमः परस्मै ॥ १४॥

yajñāya yajñāvanatatparāya yajñaiḥ samārādhitapādukāya |yathārthadhāmne yajuṣāmpriyāya yakāra rūpāya namaḥ parasmai || 14||

(ओं नमो नारायणायेति विष्णुमन्त्रगर्भाः ७१४ श्लोकाः)त्रिमूर्तये राजमहीरुहाय त्रिधामरूपाय सुधामयाय ।तृणाद्यजान्तं परिपूर्णधाम्ने तीर्थस्वरूपाय नमः परस्मै ॥ १५॥

(oṃ namo nārāyaṇāyeti viṣṇumantragarbhāḥ 714 ślokāḥ)trimūrtaye rājamahīruhāya tridhāmarūpāya sudhāmayāya |tṛṇādyajāntaṃ paripūrṇadhāmne tīrthasvarūpāya namaḥ parasmai || 15||

नादान्तरूपाय नभःस्थिताय ज्ञानामृतायागमवल्लभाय ।नागेन्द्रभूषाय नगेन्द्रनित्यनकाररूपाय नमः परस्मै ॥ १६॥

nādāntarūpāya nabhaḥsthitāya jñānāmṛtāyāgamavallabhāya |nāgendrabhūṣāya nagendranityanakārarūpāya namaḥ parasmai || 16||

माया तमोध्वंसनभास्कराय मारान्तकायामरवन्दिताय ।मत्तेभचर्माम्बरवेष्टिताय नमो मकाराय नमः शिवाय ॥ १७॥

māyā tamodhvaṃsanabhāskarāya mārāntakāyāmaravanditāya |mattebhacarmāmbaraveṣṭitāya namo makārāya namaḥ śivāya || 17||

शिलादसूनोर्हृदि भाविताय श्रीशार्ङ्गिबाणाय पुरान्तकाय ।शीतांशुकोटीरविराजिताय नमः शिकाराय नमः शिवाय ॥ १८॥

śilādasūnorhṛdi bhāvitāya śrīśārṅgibāṇāya purāntakāya |śītāṃśukoṭīravirājitāya namaḥ śikārāya namaḥ śivāya || 18||

वामाय सद्धामकलेवराय वरप्रदायात्मविदां विशेषात् ।वटुस्वरूपाय वटालयाय नमो वकाराय नमः शिवाय ॥ १९॥

vāmāya saddhāmakalevarāya varapradāyātmavidāṃ viśeṣāt |vaṭusvarūpāya vaṭālayāya namo vakārāya namaḥ śivāya || 19||

यज्ञाय यज्ञेशसखाय यज्ञैरिज्याय पूर्णाय यमान्तकाय ।यज्ञप्रहर्त्रेऽखिलयज्ञभोक्त्रे नमो यकाराय नमः शिवाय ॥ २०॥

yajñāya yajñeśasakhāya yajñairijyāya pūrṇāya yamāntakāya |yajñaprahartre'khilayajñabhoktre namo yakārāya namaḥ śivāya || 20||

(नमः शिवायेति पञ्चाक्षरशिवमन्त्रगर्भाः १६२० श्लोकाः ।)नमोऽस्तु वागीशहरीश्वराय नगेन्द्रचापाय नदीधराय ।नाम्ना शुचीन्द्रेश इति स्तुताय ज्ञानाटवीशाय नमः शिवाय ॥ २१॥

(namaḥ śivāyeti pañcākṣaraśivamantragarbhāḥ 1620 ślokāḥ |)namo'stu vāgīśaharīśvarāya nagendracāpāya nadīdharāya |nāmnā śucīndreśa iti stutāya jñānāṭavīśāya namaḥ śivāya || 21||

एवमात्मविदां श्रेष्ठः स्तुत्वाऽऽनन्दपरोऽभवत् ।सर्वज्ञः शङ्कराचार्यः स्थाणुक्षेत्रे महास्थले ॥ २२॥

evamātmavidāṃ śreṣṭhaḥ stutvā''nandaparo'bhavat |sarvajñaḥ śaṅkarācāryaḥ sthāṇukṣetre mahāsthale || 22||

इति श्रीस्थाणुस्तवः त्रिमूर्तिस्तुतिश्च सम्पूर्णः ।

iti śrīsthāṇustavaḥ trimūrtistutiśca sampūrṇaḥ |