सुदर्शनचक्रस्तोत्रम् अथवा सुदर्शनपूजाविधानम् Shri Sudarshana Chakra Stotram

रुद्र उवाच ।सुदर्शनस्य पूजां मे वद शङ्खगदाधर ।ग्रहरोगादिकं सर्वं यत्कृत्वा नाशमेति वै ॥ १॥

rudra uvāca |sudarśanasya pūjāṃ me vada śaṅkhagadādhara |graharogādikaṃ sarvaṃ yatkṛtvā nāśameti vai || 1||

हरिरुवाच ।सुदर्शनस्य चक्रस्य शृणु पूजां वृषध्वज ।स्नानमादौ प्रकुर्वीत पूजयेच्च हरिं ततः ॥ २॥

hariruvāca |sudarśanasya cakrasya śṛṇu pūjāṃ vṛṣadhvaja |snānamādau prakurvīta pūjayecca hariṃ tataḥ || 2||

मूलमन्त्रेण वै न्यासं मूलमन्त्रं शृणुष्व च ।सहस्रारं हुं फट् नमो मन्त्रः प्रणवपूर्वकः ॥ ३॥

mūlamantreṇa vai nyāsaṃ mūlamantraṃ śṛṇuṣva ca |sahasrāraṃ huṃ phaṭ namo mantraḥ praṇavapūrvakaḥ || 3||

कथितः सर्वदुष्टानां नाशको मन्त्रभेदकः ।ध्यायेत्सुदर्शनं देवं हृदि पद्मेऽमले शुभे ॥ ४॥

kathitaḥ sarvaduṣṭānāṃ nāśako mantrabhedakaḥ |dhyāyetsudarśanaṃ devaṃ hṛdi padme'male śubhe || 4||

शङ्खचक्रगदापद्मधरं सौम्यं किरीटिनम् ।आवाह्य मण्डले देवं पूर्वोक्तविधिना हर ॥ ५॥

śaṅkhacakragadāpadmadharaṃ saumyaṃ kirīṭinam |āvāhya maṇḍale devaṃ pūrvoktavidhinā hara || 5||

पूजयेद्गन्धपुष्पाद्यैरुपचारैर्महेश्वर ।पूजयित्वा जपेन्मन्त्रं शतमष्टोत्तरं नरः ॥ ६॥

pūjayedgandhapuṣpādyairupacārairmaheśvara |pūjayitvā japenmantraṃ śatamaṣṭottaraṃ naraḥ || 6||

एवं यः कुरुते रुद्र चक्रस्यार्चनमुत्तमम् ।सर्वरोगविनिर्मुक्तो विष्णुलोकं समाप्नुयात् ॥ ७॥

evaṃ yaḥ kurute rudra cakrasyārcanamuttamam |sarvarogavinirmukto viṣṇulokaṃ samāpnuyāt || 7||

एतत्स्तोत्रं जपेत्पश्चात्सर्वव्याधिविनाशनम् ।अथ स्तोत्रम् ।नमः सुदर्शनायैव सहस्रादित्यवर्चसे ॥ ८॥

etatstotraṃ japetpaścātsarvavyādhivināśanam |atha stotram |namaḥ sudarśanāyaiva sahasrādityavarcase || 8||

ज्वालामालाप्रदीप्ताय सहस्राराय चक्षुषे ।सर्वदुष्टविनाशाय सर्वपातकमर्दिने ॥ ९॥

jvālāmālāpradīptāya sahasrārāya cakṣuṣe |sarvaduṣṭavināśāya sarvapātakamardine || 9||

सुचक्राय विचक्राय सर्वमन्त्रविभेदिने ।प्रसवित्रे जगद्धात्रे जगद्विध्वंसिने नमः ॥ १०॥

sucakrāya vicakrāya sarvamantravibhedine |prasavitre jagaddhātre jagadvidhvaṃsine namaḥ || 10||

पालनार्थाय लोकानां दुष्टासुरविनाशिने ।उग्राय चैव सौम्याय चण्डाय च नमो नमः ॥ ११॥

pālanārthāya lokānāṃ duṣṭāsuravināśine |ugrāya caiva saumyāya caṇḍāya ca namo namaḥ || 11||

नमश्चक्षुःस्वरूपाय संसारभयभेदिने ।मायापञ्जरभेत्रे च शिवाय च नमो नमः ॥ १२॥

namaścakṣuḥsvarūpāya saṃsārabhayabhedine |māyāpañjarabhetre ca śivāya ca namo namaḥ || 12||

ग्रहातिग्रहरूपाय ग्रहाणां पतेय नमः ।कालाय मृत्यवे चैव भीमाय च नमो नमः ॥ १३॥

grahātigraharūpāya grahāṇāṃ pateya namaḥ |kālāya mṛtyave caiva bhīmāya ca namo namaḥ || 13||

भक्तानुग्रहदात्रे च भक्तगोप्त्रे नमो नमः ।विष्णुरूपाय शान्ताय चायुधानां धराय च ॥ १४॥

bhaktānugrahadātre ca bhaktagoptre namo namaḥ |viṣṇurūpāya śāntāya cāyudhānāṃ dharāya ca || 14||

विष्णुशस्त्राय चक्राय नमो भूयो नमो नमः ।इति स्तोत्रं महापुण्यं चक्रस्य तव कीर्तितम् ॥ १५॥

viṣṇuśastrāya cakrāya namo bhūyo namo namaḥ |iti stotraṃ mahāpuṇyaṃ cakrasya tava kīrtitam || 15||

यः पठेत्परया भक्त्या विष्णुलोकं स गच्छति ।चक्रपूजाविधिं यश्च पठेद्रुद्र जितोन्द्रियः ।स पापं भस्मसात्कृत्वा विष्णुलोकाय कल्पते ॥ १६॥

yaḥ paṭhetparayā bhaktyā viṣṇulokaṃ sa gacchati |cakrapūjāvidhiṃ yaśca paṭhedrudra jitondriyaḥ |sa pāpaṃ bhasmasātkṛtvā viṣṇulokāya kalpate || 16||

इति श्रीगारुडे महापुराणे पूर्वखण्डे प्रथमांशाख्ये आचारकाण्डेसुदर्शनपूजाविधिर्नाम त्रयस्त्रिंशोऽध्यायः सम्पूर्णः ।ग़रुदपुरन, आचारकाण्ड, अध्याय ३३

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍesudarśanapūjāvidhirnāma trayastriṃśo'dhyāyaḥ sampūrṇaḥ |ग़rudapurana, ācārakāṇḍa, adhyāya 33