कुशापमार्जनस्तोत्रम् Kushapamarjana Stotram

मार्जनविधानंअग्निरुवाच ।रक्षां स्वस्य परेषाञ्च वक्ष्ये तां मार्जनाह्वयाम् ।यया विमुच्यते दुःखैः सुखञ्च प्राप्नुयान्नरः ॥ १॥

mārjanavidhānaṃagniruvāca |rakṣāṃ svasya pareṣāñca vakṣye tāṃ mārjanāhvayām |yayā vimucyate duḥkhaiḥ sukhañca prāpnuyānnaraḥ || 1||

ॐ नमः परमार्थाय पुरुषाय महात्मने ।अरूपबहुरूपाय व्यापिने परमात्मने ॥ २॥

oṃ namaḥ paramārthāya puruṣāya mahātmane |arūpabahurūpāya vyāpine paramātmane || 2||

निष्कल्मषाय शुद्धाय ध्यानयोगरताय च ।नमस्कृत्य प्रवक्ष्यामि यत्तत्सिध्यतु मे वचः ॥ ३॥

niṣkalmaṣāya śuddhāya dhyānayogaratāya ca |namaskṛtya pravakṣyāmi yattatsidhyatu me vacaḥ || 3||

वराहाय नृसिंहाय वामनाय महामुने ।नमस्कृत्य प्रक्ष्यामि यत्तत्सिध्यतु मे वचः ॥ ४॥

varāhāya nṛsiṃhāya vāmanāya mahāmune |namaskṛtya prakṣyāmi yattatsidhyatu me vacaḥ || 4||

त्रिविक्रमाय रामाय वैकुण्ठाय नराय च ।नमस्कृत्य प्रवक्ष्यामि यत्तत्सिध्यतु मे वचः ॥ ५॥

trivikramāya rāmāya vaikuṇṭhāya narāya ca |namaskṛtya pravakṣyāmi yattatsidhyatu me vacaḥ || 5||

वराह नरसिंहेश वामनेश त्रिविक्रम ।हयग्रीवेश सर्वेश हृषीकेश हराशुभम् ॥ ६॥

varāha narasiṃheśa vāmaneśa trivikrama |hayagrīveśa sarveśa hṛṣīkeśa harāśubham || 6||

अपराजितचक्राद्यैश्चतुर्भिः परमायुधैः ।अखण्डितानुभावैस्त्वं सर्वदुष्टहरो भव ॥ ७॥

aparājitacakrādyaiścaturbhiḥ paramāyudhaiḥ |akhaṇḍitānubhāvaistvaṃ sarvaduṣṭaharo bhava || 7||

हरामुकस्य दुरितं सर्वञ्च कुशलं कुरु ।मृत्युबन्धार्त्तिभयदं दुरितस्य च यत् फलम् ॥ ८॥

harāmukasya duritaṃ sarvañca kuśalaṃ kuru |mṛtyubandhārttibhayadaṃ duritasya ca yat phalam || 8||

पराभिध्यानसहितैः प्रयुक्तञ्चाभिचारकाम् ।गरस्पर्शमहारोगप्रयोगं जरया जर ॥ ९॥

parābhidhyānasahitaiḥ prayuktañcābhicārakām |garasparśamahārogaprayogaṃ jarayā jara || 9||

ॐ नमो वासुदेवाय नमः कृष्णाय खड्गिने ।नमः पुष्करनेत्राय केशवायादिचक्रिणे ॥ १०॥

oṃ namo vāsudevāya namaḥ kṛṣṇāya khaḍgine |namaḥ puṣkaranetrāya keśavāyādicakriṇe || 10||

नमः कमलकिञ्चल्कपीतनिर्म्मलवाससे ।महाहररिपुस्कन्धसृष्टचक्राय चक्रिणे ॥ ११॥

namaḥ kamalakiñcalkapītanirmmalavāsase |mahāhararipuskandhasṛṣṭacakrāya cakriṇe || 11||

दंष्ट्रोद्धृतक्षितिभृते त्रयीमूर्त्तिमते नमः ।महायज्ञवराहाय शेषभोगाङ्कशायिने ॥ १२॥

daṃṣṭroddhṛtakṣitibhṛte trayīmūrttimate namaḥ |mahāyajñavarāhāya śeṣabhogāṅkaśāyine || 12||

तप्तहाटककेशाग्र(न्त)ज्वलत्पावकलोचन ।वज्राधिकनखस्पर्श दिव्यसिंह नमोऽस्तु ते ॥ १३॥

taptahāṭakakeśāgra(nta)jvalatpāvakalocana |vajrādhikanakhasparśa divyasiṃha namo'stu te || 13||

काश्यपायातिह्रस्वाय ऋग्यजुःसामभूषित ।तुभ्यं वामनरूपायाऽक्रमते गां नमो नमः ॥ १४॥

kāśyapāyātihrasvāya ṛgyajuḥsāmabhūṣita |tubhyaṃ vāmanarūpāyā'kramate gāṃ namo namaḥ || 14||

वराहाशेषदुष्टानि सर्वपापफलानि वै ।मर्द्द मर्द्द महादंष्ट्र मर्द मर्द च यत्फलम् ॥ १५॥

varāhāśeṣaduṣṭāni sarvapāpaphalāni vai |mardda mardda mahādaṃṣṭra marda marda ca yatphalam || 15||

नरसिंह करालास्य दन्तप्रान्तानलोज्ज्वल ।भञ्ज भञ्च निनादेन दुष्टान्पश्यार्तिनाशन ॥ १६॥

narasiṃha karālāsya dantaprāntānalojjvala |bhañja bhañca ninādena duṣṭānpaśyārtināśana || 16||

ऋग्यजुःसामगर्भाभिर्वाग्भिर्वामनरूपधृक् ।प्रशमं सर्वदुःखानि नयत्वस्य जनार्द्दनः ॥ १७॥

ṛgyajuḥsāmagarbhābhirvāgbhirvāmanarūpadhṛk |praśamaṃ sarvaduḥkhāni nayatvasya janārddanaḥ || 17||

ऐकाहिकं द्व्याहिकञ्च तथा त्रिदिवसं ज्वरम् ।चातुर्थकं तथात्युग्रं तथैव सततज्वरम् ॥ १८॥

aikāhikaṃ dvyāhikañca tathā tridivasaṃ jvaram |cāturthakaṃ tathātyugraṃ tathaiva satatajvaram || 18||

दोषोत्थं सन्निपातोत्थं तथैवागन्तुकं ज्वरम् ।शमं नयाशु गोविन्द छिन्धि छिन्ध्यस्य वेदनाम् ॥ १९॥

doṣotthaṃ sannipātotthaṃ tathaivāgantukaṃ jvaram |śamaṃ nayāśu govinda chindhi chindhyasya vedanām || 19||

नेत्रदुःखं शिरोदुःखं दुःखञ्चोदरसम्भवम् ।अन्तः श्वासमतिश्वासं परितापं सवेपथुम् ॥ २०॥

netraduḥkhaṃ śiroduḥkhaṃ duḥkhañcodarasambhavam |antaḥ śvāsamatiśvāsaṃ paritāpaṃ savepathum || 20||

गुदघ्राणाङ्घ्रिरोगांश्च कुष्ठरोगांस्तथा क्षयम् ।कामलादींस्तथा रोगान् प्रमेहांश्चातिदारुणान् ॥ २१॥

gudaghrāṇāṅghrirogāṃśca kuṣṭharogāṃstathā kṣayam |kāmalādīṃstathā rogān pramehāṃścātidāruṇān || 21||

भगन्दरातिसारांश्च मुखरोगाँश्च वल्गुलीम् ।अश्मरीं मूत्रकृच्छ्रांश्च रोगानन्यांश्च दारुणान् ॥ २२॥

bhagandarātisārāṃśca mukharogām̐śca valgulīm |aśmarīṃ mūtrakṛcchrāṃśca rogānanyāṃśca dāruṇān || 22||

ये वातप्रभवा रोगा ये च पित्तसमुद्भवाः ।कफोद्भवाश्च ये केचित् ये चान्ये सान्निपातिकाः ॥ २३॥

ye vātaprabhavā rogā ye ca pittasamudbhavāḥ |kaphodbhavāśca ye kecit ye cānye sānnipātikāḥ || 23||

आगन्तुकाश्च ये रोगा लूता विस्फोटकादयः ।ते सर्वे प्रशमं यान्तु वासुदेवापमार्जिताः ॥ २४॥

āgantukāśca ye rogā lūtā visphoṭakādayaḥ |te sarve praśamaṃ yāntu vāsudevāpamārjitāḥ || 24||

विलयं यान्तु ते सर्वे विष्णोरुच्चारणेन च ।क्षयं गच्छन्तु चाशेषास्ते चात्राभिहता हरेः ॥ २५॥

vilayaṃ yāntu te sarve viṣṇoruccāraṇena ca |kṣayaṃ gacchantu cāśeṣāste cātrābhihatā hareḥ || 25||

अच्युतानन्तगोविन्दनामोच्चारणभेषिजात् ।नश्यन्तु सकला रोगाः सत्यं स्त्यं वदाम्यहम् ॥ २६॥

acyutānantagovindanāmoccāraṇabheṣijāt |naśyantu sakalā rogāḥ satyaṃ styaṃ vadāmyaham || 26||

स्थावरं जङ्गमं वापि कृत्रिमञ्चापि यद्विषम् ।दन्तोद्भवं नखभवमाकाशप्रभवं विषम् ॥ २७॥

sthāvaraṃ jaṅgamaṃ vāpi kṛtrimañcāpi yadviṣam |dantodbhavaṃ nakhabhavamākāśaprabhavaṃ viṣam || 27||

लूतादिप्रभवं यच्च विषमन्यत्तु दुःखदम् ।शमं नयतु तत्सर्वं कीर्त्तितोऽस्य जनार्द्दनः ॥ २८॥

lūtādiprabhavaṃ yacca viṣamanyattu duḥkhadam |śamaṃ nayatu tatsarvaṃ kīrttito'sya janārddanaḥ || 28||

ग्रहान् प्रेतग्रहांश्चापि तथा वै डाकिनीग्रहान् ।वेतालांश्च पिशाचांश्च गन्धर्वान् यक्षराक्षसान् ॥ २९॥

grahān pretagrahāṃścāpi tathā vai ḍākinīgrahān |vetālāṃśca piśācāṃśca gandharvān yakṣarākṣasān || 29||

शकुनीपूतनाद्यांश्च तथा वैनायकान् ग्रहान् ।मुखमण्डीं तथा क्रूरां रेवतीं वृद्धरेवतीम् ॥ ३०॥

śakunīpūtanādyāṃśca tathā vaināyakān grahān |mukhamaṇḍīṃ tathā krūrāṃ revatīṃ vṛddharevatīm || 30||

वृद्धकाख्यान् ग्रहांश्चोग्रांस्तथा मातृग्रहानपि ।बालस्य विष्णोश्चरितं हन्तु बालग्रहानिमान् ॥ ३१॥

vṛddhakākhyān grahāṃścogrāṃstathā mātṛgrahānapi |bālasya viṣṇoścaritaṃ hantu bālagrahānimān || 31||

वृद्धाश्च ये ग्रहाः केचिद्ये च बालग्रहाः क्वचित् ।नरसिंहस्य ते दृष्ट्या दग्धा ये चापि यौवने ॥ ३२॥

vṛddhāśca ye grahāḥ kecidye ca bālagrahāḥ kvacit |narasiṃhasya te dṛṣṭyā dagdhā ye cāpi yauvane || 32||

सदा करालवदनो नरसिंहो महाबलः ।ग्रहानशेषान्निःशेषान् करोतु जगतो हितः ॥ ३३॥

sadā karālavadano narasiṃho mahābalaḥ |grahānaśeṣānniḥśeṣān karotu jagato hitaḥ || 33||

नरसिंह महासिंह ज्वालामालोज्ज्वलानन ।ग्रहानशेषान् सर्वेश खाद खादाग्निलोचन ॥ ३४॥

narasiṃha mahāsiṃha jvālāmālojjvalānana |grahānaśeṣān sarveśa khāda khādāgnilocana || 34||

ये रोगा ये महोत्पाता यद्विषं ये महाग्रहाः ।यानि च क्रूरभूतानि ग्रहपीडाश्च दारुणाः ॥ ३५॥

ye rogā ye mahotpātā yadviṣaṃ ye mahāgrahāḥ |yāni ca krūrabhūtāni grahapīḍāśca dāruṇāḥ || 35||

शस्त्रक्षतेषु ये दोषा ज्वालागर्दभकादयः ।तानि सर्वाणि सर्वात्मा परमात्मा जनार्द्दनः ॥ ३६॥

śastrakṣateṣu ye doṣā jvālāgardabhakādayaḥ |tāni sarvāṇi sarvātmā paramātmā janārddanaḥ || 36||

किञ्चिद्रूपं समास्थाय वासुदेवास्य नाशय ।क्षिप्त्वा सूदर्शनञ्चक्रं ज्वालामालातिभीषणम् ॥ ३७॥

kiñcidrūpaṃ samāsthāya vāsudevāsya nāśaya |kṣiptvā sūdarśanañcakraṃ jvālāmālātibhīṣaṇam || 37||

सर्वदुष्टोपशमनं कुरु देववराच्युत ।सुदर्शन महाज्वाल छिन्धि छिन्धि महारव ॥ ३८॥

sarvaduṣṭopaśamanaṃ kuru devavarācyuta |sudarśana mahājvāla chindhi chindhi mahārava || 38||

सर्वदुष्टानि रक्षांसि क्षयं यान्तु विभीषण ।प्राच्यां प्रतीच्यां च दिशि दक्षिणोत्तरतस्तथा ॥ ३९॥

sarvaduṣṭāni rakṣāṃsi kṣayaṃ yāntu vibhīṣaṇa |prācyāṃ pratīcyāṃ ca diśi dakṣiṇottaratastathā || 39||

रक्षाङ्करोतु सर्वात्मा नरसिंहः सुगर्ज्जितः ।दिवि भुव्यन्तरीक्षे च पृष्ठतः पार्श्वतोऽग्रतः ॥ ४०॥

rakṣāṅkarotu sarvātmā narasiṃhaḥ sugarjjitaḥ |divi bhuvyantarīkṣe ca pṛṣṭhataḥ pārśvato'grataḥ || 40||

रक्षाङ्करोत् भगवान् बहुरूपी जनार्द्दनः ।यथा विष्णुर्ज्जगत्सर्वं सदेवासुरमानुषम् ॥ ४१॥

rakṣāṅkarot bhagavān bahurūpī janārddanaḥ |yathā viṣṇurjjagatsarvaṃ sadevāsuramānuṣam || 41||

तेन सत्येन दुष्टानि सममस्य व्रजन्तु वै ।यथा विष्णौ स्मृते सद्यः सङ्क्षयं यान्ति पातकाः ॥ ४२॥

tena satyena duṣṭāni samamasya vrajantu vai |yathā viṣṇau smṛte sadyaḥ saṅkṣayaṃ yānti pātakāḥ || 42||

सत्येन तेन सकलं दुष्टमस्य प्रशाम्यतु ।यथा यज्ञेश्वरो विष्णुर्द्देवेष्वपि हि गीयते ॥ ४३॥

satyena tena sakalaṃ duṣṭamasya praśāmyatu |yathā yajñeśvaro viṣṇurddeveṣvapi hi gīyate || 43||

तेन सत्येन सकलं दुष्टमस्य प्रशाम्यतु ।शान्तिरस्तु शिवञ्चास्तु दुष्टमस्य प्रशाम्यतु ॥ ४४॥

tena satyena sakalaṃ duṣṭamasya praśāmyatu |śāntirastu śivañcāstu duṣṭamasya praśāmyatu || 44||

वासुदेवशरीरोत्थैः कुशैर्न्निर्म्मथितं मया ।अपमार्जति गोविन्दो नरो नारायणस्तथा ॥ ४५॥

vāsudevaśarīrotthaiḥ kuśairnnirmmathitaṃ mayā |apamārjati govindo naro nārāyaṇastathā || 45||

तथास्तु सर्वदुखानां प्रशमो वचनाद्धरेः ।अपमार्जनकं शस्त्रं सर्वरोगादिवारणम् ॥ ४६॥

tathāstu sarvadukhānāṃ praśamo vacanāddhareḥ |apamārjanakaṃ śastraṃ sarvarogādivāraṇam || 46||

अहं हरिः कुशा विष्णुर्हता रोगा मया तव ॥ ४७॥

ahaṃ hariḥ kuśā viṣṇurhatā rogā mayā tava || 47||

इत्यादिमहापुराणे आग्नेये कुशापमार्जनं नाम एकत्रिंशोऽध्यायः ।अग्निपुराण । अध्याय ३१/२४६॥अग्निपुराण । अध्याय ३१/२-४६॥

ityādimahāpurāṇe āgneye kuśāpamārjanaṃ nāma ekatriṃśo'dhyāyaḥ |agnipurāṇa | adhyāya 31/246||agnipurāṇa | adhyāya 31/2-46||