लक्ष्मीनारायणस्तोत्रम् ३ Lakshmi Narayana Stotram 3

श्रीनिवास जगन्नाथ श्रीहरे भक्तवत्सल ।लक्ष्मीपते नमस्तुभ्यं त्राहि मां भवसागरात् ॥ १॥

śrīnivāsa jagannātha śrīhare bhaktavatsala |lakṣmīpate namastubhyaṃ trāhi māṃ bhavasāgarāt || 1||

राधारमण गोविन्द भक्तकामप्रपूरक ।नारायण नमस्तुभ्यं त्राहि मां भवसागरात् ॥ २॥

rādhāramaṇa govinda bhaktakāmaprapūraka |nārāyaṇa namastubhyaṃ trāhi māṃ bhavasāgarāt || 2||

दामोदर महोदार सर्वापत्तिनिवारण ।हृषीकेश नमस्तुभ्यं त्राहि मां भवसागरात् ॥ ३॥

dāmodara mahodāra sarvāpattinivāraṇa |hṛṣīkeśa namastubhyaṃ trāhi māṃ bhavasāgarāt || 3||

गरुडध्वज वैकुण्ठनिवासिन्केशवाच्युत ।जनार्दन नमस्तुभ्यं त्राहि मां भवसागरात् ॥ ४॥

garuḍadhvaja vaikuṇṭhanivāsinkeśavācyuta |janārdana namastubhyaṃ trāhi māṃ bhavasāgarāt || 4||

शङ्खचक्रगदापद्मधर श्रीवत्सलाञ्छन ।मेघश्याम नमस्तुभ्यं त्राहि मां भवसागरात् ॥ ५॥

śaṅkhacakragadāpadmadhara śrīvatsalāñchana |meghaśyāma namastubhyaṃ trāhi māṃ bhavasāgarāt || 5||

त्वं माता त्वं पिता बन्धुः सद्गुरुस्त्वं दयानिधिः ।त्वत्तोऽन्यो न परो देवस्त्राहि मां भवसागरात् ॥ ६॥

tvaṃ mātā tvaṃ pitā bandhuḥ sadgurustvaṃ dayānidhiḥ |tvatto'nyo na paro devastrāhi māṃ bhavasāgarāt || 6||

न जाने दानधर्मादि योगं यागं तपो जपम् ।त्वं केवलं कुरु दयां त्राहि मां भवसागरात् ॥ ७॥

na jāne dānadharmādi yogaṃ yāgaṃ tapo japam |tvaṃ kevalaṃ kuru dayāṃ trāhi māṃ bhavasāgarāt || 7||

न मत्समो यद्यपि पापकर्ता न त्वत्समोऽथापि हि पापहर्ता ।विज्ञापितं त्वेतदशेषसाक्षिन् मामुद्धरार्तं पतितं तवाग्रे ॥ ८॥

na matsamo yadyapi pāpakartā na tvatsamo'thāpi hi pāpahartā |vijñāpitaṃ tvetadaśeṣasākṣin māmuddharārtaṃ patitaṃ tavāgre || 8||

इति श्रीवासुदेवानन्दसरस्वतीविरचितं श्रीलक्ष्मीनारायणस्तोत्रं सम्पूर्णम् ।

iti śrīvāsudevānandasarasvatīviracitaṃ śrīlakṣmīnārāyaṇastotraṃ sampūrṇam |