विष्णुस्तोत्रम् (क्षुपकृतं लिङ्गपुराणान्तर्गतम् पूजया तस्य सन्तुष्टो भगवान्पुरुषोत्तमः) Kshupakritam Vishnu Stotram

नन्द्युवाच ।पूजया तस्य सन्तुष्टो भगवान्पुरुषोत्तमः ।श्रीभूमिसहितः श्रीमाञ्शङ्खचक्रगदाधरः ॥ १॥

nandyuvāca |pūjayā tasya santuṣṭo bhagavānpuruṣottamaḥ |śrībhūmisahitaḥ śrīmāñśaṅkhacakragadādharaḥ || 1||

किरीटी पद्महस्तश्च सर्वाभरणभूषितः ।पीताम्बरश्च भगवान्देवैर्दैत्यैश्च संवृतः ॥ २॥

kirīṭī padmahastaśca sarvābharaṇabhūṣitaḥ |pītāmbaraśca bhagavāndevairdaityaiśca saṃvṛtaḥ || 2||

प्रददौ दर्शनं तस्मै दिव्यं वै गरुडध्वजः ।दिव्येन दर्शनेनैव दृष्ट्वा देवं जनार्दनम् ॥ ३॥

pradadau darśanaṃ tasmai divyaṃ vai garuḍadhvajaḥ |divyena darśanenaiva dṛṣṭvā devaṃ janārdanam || 3||

तुष्टाव वाग्भिरिष्टाभिः प्रणम्य गरुडध्वजम् ।क्षुप उवाच ।त्वमादिस्त्वमनादिश्च प्रकृतिस्त्वं जनार्दनः ॥ ४॥

tuṣṭāva vāgbhiriṣṭābhiḥ praṇamya garuḍadhvajam |kṣupa uvāca |tvamādistvamanādiśca prakṛtistvaṃ janārdanaḥ || 4||

पुरुषस्त्वं जगन्नाथो विष्णुर्विश्वेश्वरो भवान् ।योऽयं ब्रह्मासि पुरुषो विश्वमूर्तिः पितामहः ॥ ५॥

puruṣastvaṃ jagannātho viṣṇurviśveśvaro bhavān |yo'yaṃ brahmāsi puruṣo viśvamūrtiḥ pitāmahaḥ || 5||

तत्त्वमाद्यं भवानेव परं ज्योतिर्जनार्दन ।परमात्मा परन्धाम श्रीपते भूपते प्रभो ॥ ६॥

tattvamādyaṃ bhavāneva paraṃ jyotirjanārdana |paramātmā parandhāma śrīpate bhūpate prabho || 6||

त्वत्क्रोधसम्भवो रुद्रस्तमसा च समावृतः ।त्वत्प्रसादाज्जगद्धाता रजसा च पितामहः ॥ ७॥

tvatkrodhasambhavo rudrastamasā ca samāvṛtaḥ |tvatprasādājjagaddhātā rajasā ca pitāmahaḥ || 7||

त्वत्प्रसादात्स्वयं विष्णुः सत्त्वेन पुरुषोत्तमः ।कालमूर्ते हरे विष्णो नारायण जगन्मय ॥ ८॥

tvatprasādātsvayaṃ viṣṇuḥ sattvena puruṣottamaḥ |kālamūrte hare viṣṇo nārāyaṇa jaganmaya || 8||

महांस्तथा च भूतादिस्तन्मात्राणीन्द्रियाणि च ।त्वयैवाधिष्ठितान्येव विश्वमूर्ते महेश्वर ॥ ९॥

mahāṃstathā ca bhūtādistanmātrāṇīndriyāṇi ca |tvayaivādhiṣṭhitānyeva viśvamūrte maheśvara || 9||

महादेव जगन्नाथ पितामह जगद्गुरो ।प्रसीद देवदेवेश प्रसीदपरमेश्वर ॥ १०॥

mahādeva jagannātha pitāmaha jagadguro |prasīda devadeveśa prasīdaparameśvara || 10||

प्रसीद त्वं जगन्नाथ शरण्यं शरणं गतः ।वैकुण्ठ शौरे सर्वज्ञ वासुदेव महाभुज ॥ ११॥

prasīda tvaṃ jagannātha śaraṇyaṃ śaraṇaṃ gataḥ |vaikuṇṭha śaure sarvajña vāsudeva mahābhuja || 11||

सङ्कर्षण महाभाग प्रद्युम्न पुरुषोत्तम ।अनिरुद्ध महाविष्णो सदा विष्णो नमोऽस्तु ते ॥ १२॥

saṅkarṣaṇa mahābhāga pradyumna puruṣottama |aniruddha mahāviṣṇo sadā viṣṇo namo'stu te || 12||

विष्णो तवासनं दिव्यमव्यक्तं मध्यतो विभुः ।सहस्रफणसंयुक्तस्तमोमूर्तिर्धराधरः ॥ १३॥

viṣṇo tavāsanaṃ divyamavyaktaṃ madhyato vibhuḥ |sahasraphaṇasaṃyuktastamomūrtirdharādharaḥ || 13||

अधश्च धर्मो देवेश ज्ञानं वैराग्यमेव च ।ऐश्वर्यमासनस्यास्य पादरूपेण सुव्रत ॥ १४॥

adhaśca dharmo deveśa jñānaṃ vairāgyameva ca |aiśvaryamāsanasyāsya pādarūpeṇa suvrata || 14||

सप्तपातालपादस्त्वं धराजघनमेव च ।वासांसि सागराः सप्त दिशश्चैव महाभुजाः ॥ १५॥

saptapātālapādastvaṃ dharājaghanameva ca |vāsāṃsi sāgarāḥ sapta diśaścaiva mahābhujāḥ || 15||

द्यौर्मूर्धा ते विभो नाभिः खं वायुर्नासिकां गतः ।नेत्रे सोमश्च सूर्यश्च केशा वै पुष्करादयः ॥ १६॥

dyaurmūrdhā te vibho nābhiḥ khaṃ vāyurnāsikāṃ gataḥ |netre somaśca sūryaśca keśā vai puṣkarādayaḥ || 16||

नक्षत्रतारका द्यौश्च ग्रैवेयकविभूषणम् ।कथं स्तोष्यामि देवेशं पूज्यश्च पुरुषोत्तमः ॥ १७॥

nakṣatratārakā dyauśca graiveyakavibhūṣaṇam |kathaṃ stoṣyāmi deveśaṃ pūjyaśca puruṣottamaḥ || 17||

श्रद्धया च कृतं दिव्यं यच्छ्रयं यच्च कीर्तितम् ।यदिष्टं तत्क्षमस्वेश नारायण नमोऽस्तु ते ॥ १८॥

śraddhayā ca kṛtaṃ divyaṃ yacchrayaṃ yacca kīrtitam |yadiṣṭaṃ tatkṣamasveśa nārāyaṇa namo'stu te || 18||

शैलादिरुवाच ।इदं तु वैष्णवं स्तोत्रं सर्वपापप्रणाशनम् ।यः पठेच्छृणुयाद्वापि क्षुपेण परिकीर्तितम् ॥ १९॥

śailādiruvāca |idaṃ tu vaiṣṇavaṃ stotraṃ sarvapāpapraṇāśanam |yaḥ paṭhecchṛṇuyādvāpi kṣupeṇa parikīrtitam || 19||

श्रावयेद्वा द्विजान् भक्त्या विष्णुलोकं स गच्छति ॥ २०॥

śrāvayedvā dvijān bhaktyā viṣṇulokaṃ sa gacchati || 20||

सम्पूज्य चैवं त्रिदशेश्वराद्यैः स्तुत्वा स्तुतं देवमजेयमीशम् ।विज्ञापयामास निरीक्ष्य भक्त्या जनार्दनाय प्रणिपत्य मूर्ध्ना ॥ २१॥

sampūjya caivaṃ tridaśeśvarādyaiḥ stutvā stutaṃ devamajeyamīśam |vijñāpayāmāsa nirīkṣya bhaktyā janārdanāya praṇipatya mūrdhnā || 21||

इति श्रीलिङ्गमहापुराणे पूर्वभागे षट्त्रिंशाध्यायानेतर्गतंक्षुपकृतं विष्णुस्तोत्रं समाप्तम् ।लिङ्गपुराण । पूर्वभाग । अध्याय ३६/४२०॥लिन्गपुराण । पूर्वभाग । अध्याय ३६/४-२०॥

iti śrīliṅgamahāpurāṇe pūrvabhāge ṣaṭtriṃśādhyāyānetargataṃkṣupakṛtaṃ viṣṇustotraṃ samāptam |liṅgapurāṇa | pūrvabhāga | adhyāya 36/420||lingapurāṇa | pūrvabhāga | adhyāya 36/4-20||