विष्णुस्तोत्रम् (गरुडकृतं १ स्कन्दपुराणान्तर्गतम् जय जय त्रिभुवनजनमनोभवन विदलिताघगुण) Garudakritam 1 Vishnu Stotram

गरुड उवाच ।जय जय त्रिभुवनजनमनोभवन विदलिताघगुणसकलगीर्वाणवन्दितचरणकमलयुगलपरिमलबहलरिपुवनविभञ्जन विद्योतमान सकलसुरासुरमुकुटकोटिविलसितनिजपीठकमलनिरसित निजजनहृदयतिमिरपटलबहलहिमकर इव त्रिविधसन्तापसन्दोहहरणचरणजगदुदयस्थितिलयविलासविलसित त्रिविधमूर्तिकीर्तिविस्फूर्जितजगदुदयसन्दोहदिनकर इव निजजनमानससरोजषट्पदविदितसकलवेदविद्योतमानमानस निजजनमुनिजनवन्दितपदनखनीरपवित्रीकृत गीर्वाणमुनिमानसवन्दितचरणरजःप्रसादसारभूत जगतामधीश नमस्ते नमस्ते ॥ ३\।४\।१०॥अपि च ।अष्टशक्तिसहितो वनमाली पीतचैलकुसुमावलिशोभः ।पङ्कजाकरविराजितपादः पातु मामवहितेन्द्रियवर्गः ॥ ११॥

garuḍa uvāca |jaya jaya tribhuvanajanamanobhavana vidalitāghaguṇasakalagīrvāṇavanditacaraṇakamalayugalaparimalabahalaripuvanavibhañjana vidyotamāna sakalasurāsuramukuṭakoṭivilasitanijapīṭhakamalanirasita nijajanahṛdayatimirapaṭalabahalahimakara iva trividhasantāpasandohaharaṇacaraṇajagadudayasthitilayavilāsavilasita trividhamūrtikīrtivisphūrjitajagadudayasandohadinakara iva nijajanamānasasarojaṣaṭpadaviditasakalavedavidyotamānamānasa nijajanamunijanavanditapadanakhanīrapavitrīkṛta gīrvāṇamunimānasavanditacaraṇarajaḥprasādasārabhūta jagatāmadhīśa namaste namaste || 3\|4\|10||api ca |aṣṭaśaktisahito vanamālī pītacailakusumāvaliśobhaḥ |paṅkajākaravirājitapādaḥ pātu māmavahitendriyavargaḥ || 11||

भक्तहृत्कमलराजितमूर्तिर्दुष्टदैत्यदलनोत्थितकीर्तिः ।बद्धसेतुरविताऽऽश्रितलोकः पातु मामनुदिनं भुवनेशः ॥ १२॥

bhaktahṛtkamalarājitamūrtirduṣṭadaityadalanotthitakīrtiḥ |baddhaseturavitā''śritalokaḥ pātu māmanudinaṃ bhuvaneśaḥ || 12||

स्थिरचलत्रिविधतापहिमांशुर्भासमानतरणिप्रतिभासः ।एक एव बहुधा कृतवेषो माययावतु महामतिरीशः ॥ १३॥

sthiracalatrividhatāpahimāṃśurbhāsamānataraṇipratibhāsaḥ |eka eva bahudhā kṛtaveṣo māyayāvatu mahāmatirīśaḥ || 13||

भक्तचिन्तनकृते कृतरूपः शैशवेन बहुशासितभूपः ।वेदमार्ग उरुधा हितकारी रीतिरीशितुरियं गुणशाली ॥ १४॥

bhaktacintanakṛte kṛtarūpaḥ śaiśavena bahuśāsitabhūpaḥ |vedamārga urudhā hitakārī rītirīśituriyaṃ guṇaśālī || 14||

यज्ञभुग्घृदयबन्धनधारी विश्वमूर्तिरबलांशुकहारी ।पालनेऽपि महतां बहुदेहो रास एष तनुमानवतान्नः ॥ १५॥

yajñabhugghṛdayabandhanadhārī viśvamūrtirabalāṃśukahārī |pālane'pi mahatāṃ bahudeho rāsa eṣa tanumānavatānnaḥ || 15||

प्रेमभक्तिपुरुषैरुपलभ्यः पूरुषः कृतसमस्तनिवासः ।दास्यवृन्दहृषितो निजदासः प्रेक्षणैककरुणोऽवतु विश्वम् ॥ १६॥

premabhaktipuruṣairupalabhyaḥ pūruṣaḥ kṛtasamastanivāsaḥ |dāsyavṛndahṛṣito nijadāsaḥ prekṣaṇaikakaruṇo'vatu viśvam || 16||

कण्ठलम्बिततरक्षुनखाग्रक्रुष्टगोपरमणीकुचभारः ।लीलया युवतिभिः कृतवेषः शेष एष भवतादुपशान्त्यै ॥ १७॥

kaṇṭhalambitatarakṣunakhāgrakruṣṭagoparamaṇīkucabhāraḥ |līlayā yuvatibhiḥ kṛtaveṣaḥ śeṣa eṣa bhavatādupaśāntyai || 17||

दण्डपाणिरयमेव जनानां शासितात्मनियमोक्तहितानाम् ।पावनाय महतामनुशाली विश्वदुःखशमनो भवतान्नः ॥ १८॥

daṇḍapāṇirayameva janānāṃ śāsitātmaniyamoktahitānām |pāvanāya mahatāmanuśālī viśvaduḥkhaśamano bhavatānnaḥ || 18||

इति श्रीस्कन्दपुराणे वैष्णवखण्डे बदरिकाश्रममाहात्म्ये चतुर्थाध्यायान्तर्गतंगरुडकृतं विष्णुस्तोत्रं समाप्तम् ।स्कन्दपुराण । वैष्णवखण्ड । बदरिकाखण्ड । अध्याय ४/१०१८॥स्कन्दपुराण । वैष्णवखण्ड । बदरिकाखण्ड । अध्याय ४/१०-१८॥

iti śrīskandapurāṇe vaiṣṇavakhaṇḍe badarikāśramamāhātmye caturthādhyāyāntargataṃgaruḍakṛtaṃ viṣṇustotraṃ samāptam |skandapurāṇa | vaiṣṇavakhaṇḍa | badarikākhaṇḍa | adhyāya 4/1018||skandapurāṇa | vaiṣṇavakhaṇḍa | badarikākhaṇḍa | adhyāya 4/10-18||