वीरेश्वरस्तुतिः १ गौरीमनोरमणभजनस्तोत्रम् Vireshvara Stuti – 1

॥ वीरेश्वरस्तुतिः १ गौरीमनोरमणभजनस्तोत्रम् ॥मन्मानसं भव भवच्चरणार्चनाय तावत्प्रसूनमिदमस्तु शरीरमस्य ।धूपाय नित्यमसवोऽप्युपहारयोग्याः चक्षूंषि दीपकलिकाफलतां प्रयान्तु ॥ १॥

|| vīreśvarastutiḥ 1 gaurīmanoramaṇabhajanastotram ||manmānasaṃ bhava bhavaccaraṇārcanāya tāvatprasūnamidamastu śarīramasya |dhūpāya nityamasavo'pyupahārayogyāḥ cakṣūṃṣi dīpakalikāphalatāṃ prayāntu || 1||

यद्यन्मदीयमनघं वसु चन्द्रमौले तत्तत्तवैव पदपूजनयोग्यमस्तु ।स्वामिन् त्रिनेत्र मम गात्रमिदं पवित्रं लिङ्गार्चनाय भगवन्ननुकूलमस्तु ॥ २॥

yadyanmadīyamanaghaṃ vasu candramaule tattattavaiva padapūjanayogyamastu |svāmin trinetra mama gātramidaṃ pavitraṃ liṅgārcanāya bhagavannanukūlamastu || 2||

धीरैस्सहारसुकुमारकुमारदारैः साकं निराकुलमुमारमणार्चनेन ।कालं नयामि विमलैः कमलाविलासैः श्रीकालकाल सकलैः सकलैरलं मे ॥ ३॥

dhīraissahārasukumārakumāradāraiḥ sākaṃ nirākulamumāramaṇārcanena |kālaṃ nayāmi vimalaiḥ kamalāvilāsaiḥ śrīkālakāla sakalaiḥ sakalairalaṃ me || 3||

जन्मानि सन्तु शतशोऽथ सहस्रशो वा किं तावताऽपि यदि भक्तिरुमासहाये ।धन्यानि तानि सकलानि तदेति मन्ये धन्यं त्रिलोचनकृपैकविधानभूतम् ॥ ४॥

janmāni santu śataśo'tha sahasraśo vā kiṃ tāvatā'pi yadi bhaktirumāsahāye |dhanyāni tāni sakalāni tadeti manye dhanyaṃ trilocanakṛpaikavidhānabhūtam || 4||

मत्प्रार्थनीयमिदमेव भवत्पदाब्जभक्तिर्भवत्पादसरोरुहपूजनाय ।तेनैव मे सकलसिद्धिपरम्परा स्यात् एतावदेव मम देयमपि त्वयापि ॥ ५॥

matprārthanīyamidameva bhavatpadābjabhaktirbhavatpādasaroruhapūjanāya |tenaiva me sakalasiddhiparamparā syāt etāvadeva mama deyamapi tvayāpi || 5||

भक्तिर्भवे प्रतिभवेऽपि विरक्तिरर्थे शक्तिर्गिरीशनगमनेऽनुरक्तिः ।लिङ्गार्चने रतिरनङ्गहरे प्रवृत्तिः बिल्वार्चने मतिरुमेशकथासु मे स्यात् ॥ ६॥

bhaktirbhave pratibhave'pi viraktirarthe śaktirgirīśanagamane'nuraktiḥ |liṅgārcane ratiranaṅgahare pravṛttiḥ bilvārcane matirumeśakathāsu me syāt || 6||

अद्यावधि प्रलयकालमहावसानपर्यन्तमन्तकरिपुत्रिपुरान्तकाख्या ।नृत्यं करोतु रसनारुचिराङ्गणे मे श्रीशूलपाणिचरणे करवाणि वाणीम् ॥ ७॥

adyāvadhi pralayakālamahāvasānaparyantamantakariputripurāntakākhyā |nṛtyaṃ karotu rasanārucirāṅgaṇe me śrīśūlapāṇicaraṇe karavāṇi vāṇīm || 7||

यागैरलं सकलयोगकुलैरलं मे दानैरलं परिमलैः कमलाविलासैः ।अन्यैश्च धर्मनिकरैः सुकरैरपारे गौरीमनोरमण ते चरणौ भजामि ॥ ८॥

yāgairalaṃ sakalayogakulairalaṃ me dānairalaṃ parimalaiḥ kamalāvilāsaiḥ |anyaiśca dharmanikaraiḥ sukarairapāre gaurīmanoramaṇa te caraṇau bhajāmi || 8||

भाग्यैरलं बहुविधैर्निधिकोटिभिर्वा मातङ्गकोटिभिरलं कमलाविलासैः ।गोकोटिकोटिभिरलं महिषीकुलैर्वा गौरीमनोरमण ते चरणौ भजामि ॥ ९॥

bhāgyairalaṃ bahuvidhairnidhikoṭibhirvā mātaṅgakoṭibhiralaṃ kamalāvilāsaiḥ |gokoṭikoṭibhiralaṃ mahiṣīkulairvā gaurīmanoramaṇa te caraṇau bhajāmi || 9||

गर्भेऽर्भकत्वसमयेऽपि विवेकशून्यः त्वत्पादपद्मविमुखः कुमुखः कठोरः ।तत्तावदीशकृपया न पुनर्ममास्तु गौरीमनोरमण ते चरणौ भजामि ॥ १०॥

garbhe'rbhakatvasamaye'pi vivekaśūnyaḥ tvatpādapadmavimukhaḥ kumukhaḥ kaṭhoraḥ |tattāvadīśakṛpayā na punarmamāstu gaurīmanoramaṇa te caraṇau bhajāmi || 10||

पौगण्डमण्डिततनुव्यसनप्रहर्षवर्षाभियोगमभिभोगमपि प्रपद्य ।भक्त्या स्मृतोऽपि भगवन् न मया जडेन गौरीमनोरमण ते चरणौ भजामि ॥ ११॥

paugaṇḍamaṇḍitatanuvyasanapraharṣavarṣābhiyogamabhibhogamapi prapadya |bhaktyā smṛto'pi bhagavan na mayā jaḍena gaurīmanoramaṇa te caraṇau bhajāmi || 11||

सोन्मादयौवनवनोपहतेन तेन नाराधितोऽसि न मनागपि कीर्तितोऽसि ।तत्तावदीश्वर पुनर्न ममास्तु मास्तु गौरीमनोरमण ते चरणौ भजामि ॥ १२॥

sonmādayauvanavanopahatena tena nārādhito'si na manāgapi kīrtito'si |tattāvadīśvara punarna mamāstu māstu gaurīmanoramaṇa te caraṇau bhajāmi || 12||

नारीमनोहरविहारपराभिभूतचित्तेन तावदसकृन्न नमस्कृतोऽसि ।तन्मास्तु मास्तु हर मास्तु कदापि मास्तु गौरीमनोरमण ते चरणौ भजामि ॥ १३॥

nārīmanoharavihāraparābhibhūtacittena tāvadasakṛnna namaskṛto'si |tanmāstu māstu hara māstu kadāpi māstu gaurīmanoramaṇa te caraṇau bhajāmi || 13||

वित्तार्जनाय बहुदेशविनाशदोषव्यापारपूरिततनुर्न तदा कदाऽपि ।अभ्यर्चितोऽपि हि मया तदपास्यमेव गौरीमनोरमण ते चरणौ भजामि ॥ १४॥

vittārjanāya bahudeśavināśadoṣavyāpārapūritatanurna tadā kadā'pi |abhyarcito'pi hi mayā tadapāsyameva gaurīmanoramaṇa te caraṇau bhajāmi || 14||

दारोरुहारपरिहारविहारकारकारानुकारकरणेन वयोऽपि नीतम् ।तेनालमेव हरहारभयापहारं गौरीमनोरमण ते चरणौ भजामि ॥ १५॥

dāroruhāraparihāravihārakārakārānukārakaraṇena vayo'pi nītam |tenālameva harahārabhayāpahāraṃ gaurīmanoramaṇa te caraṇau bhajāmi || 15||

हारप्रवीरपरमादरतो हरारं हारं सहारमनुवारमपि स्मरामि ।नाद्यापि हारचिरसङ्गतिराविरासीत् गौरीमनोरमण ते चरणौ भजामि ॥ १६॥

hārapravīraparamādarato harāraṃ hāraṃ sahāramanuvāramapi smarāmi |nādyāpi hāracirasaṅgatirāvirāsīt gaurīmanoramaṇa te caraṇau bhajāmi || 16||

मारोपकारकशरप्रवरप्रहारसंहारभीरुदरुणीचरणोपघातैः ।नीतं दिनं प्रतिदिनं शमनं न मेने गौरीमनोरमण ते चरणौ भजामि ॥ १७॥

māropakārakaśarapravaraprahārasaṃhārabhīrudaruṇīcaraṇopaghātaiḥ |nītaṃ dinaṃ pratidinaṃ śamanaṃ na mene gaurīmanoramaṇa te caraṇau bhajāmi || 17||

संसारसागरविचारविदूरगर्ते वृत्तिर्न वृत्तिरपि हारमनोहरेषु ।हारोपहारकरणेऽपि न मे प्रवृत्तिः गौरीमनोरमण ते चरणौ भजामि ॥ १८॥

saṃsārasāgaravicāravidūragarte vṛttirna vṛttirapi hāramanohareṣu |hāropahārakaraṇe'pi na me pravṛttiḥ gaurīmanoramaṇa te caraṇau bhajāmi || 18||

मन्दारकुन्दनवबिल्वदलप्रवालवल्लीदलैरपि न लिङ्गसमर्चनाय ।यत्नः कृतः क्रतुशतादिकधर्मजालैः गौरीमनोहरण ते चरणौ भजामि ॥ १९॥

mandārakundanavabilvadalapravālavallīdalairapi na liṅgasamarcanāya |yatnaḥ kṛtaḥ kratuśatādikadharmajālaiḥ gaurīmanoharaṇa te caraṇau bhajāmi || 19||

अङ्गारसागरशरीरविकारभार संहार मारहर हारविचारहीनः ।दैनन्दिनप्रलयसंहरणप्रवीण गौरीमनोहरण ते चरणौ भजामि ॥ २०॥

aṅgārasāgaraśarīravikārabhāra saṃhāra mārahara hāravicārahīnaḥ |dainandinapralayasaṃharaṇapravīṇa gaurīmanoharaṇa te caraṇau bhajāmi || 20||

मामेव मामकधिया परिपश्य पश्यका तावतापि तव तात वतातिहानिः ।त्वं दीनबन्धुरिति किं श्रुतिषु श्रुतोऽपि गौरीमनोहरण ते चरणौ भजामि ॥ २१॥

māmeva māmakadhiyā paripaśya paśyakā tāvatāpi tava tāta vatātihāniḥ |tvaṃ dīnabandhuriti kiṃ śrutiṣu śruto'pi gaurīmanoharaṇa te caraṇau bhajāmi || 21||

॥ इति शिवरहस्यान्तर्गते वीरेश्वरस्तुतिः १ गौरीमनोरमणभजनस्तोत्रं सम्पूर्णम् ॥बृहस्पतिशतानन्दसंवादे वीरेश्वरस्तुतिवर्णनं॥ श्रीशिवरहस्यम् । हराख्यः तृतीयांशः । पूर्वार्धम् । अध्यायः ४७। १९३९॥

|| iti śivarahasyāntargate vīreśvarastutiḥ 1 gaurīmanoramaṇabhajanastotraṃ sampūrṇam ||bṛhaspatiśatānandasaṃvāde vīreśvarastutivarṇanaṃ|| śrīśivarahasyam | harākhyaḥ tṛtīyāṃśaḥ | pūrvārdham | adhyāyaḥ 47| 1939||

– ॥ श्रीशिवरहस्यम् ।हराख्यः तृतीयांशः ।पूर्वार्धम् ।अध्यायः ४७। १९-३९॥

– || śrīśivarahasyam |harākhyaḥ tṛtīyāṃśaḥ |pūrvārdham |adhyāyaḥ 47| 19-39||