रुद्राष्टाध्यायी शुक्लयजुर्वेदीय अथवा रुद्री पाठ सस्वरः Shri Shuklayajurvediya Sasvara Rudrashtadhyayi

॥ ॐ श्री गणेशाय नमः ॥ॐ

|| oṃ śrī gaṇeśāya namaḥ ||oṃ

वन्दे सिद्धिप्रदं देवं गणेशं प्रियपालकम् ।विश्वगर्भं च विघ्नेशं अनादिं मङ्गलं विभूम् ॥अथ ध्यानम्ध्यायेन्नित्यं महेशं रजतगिरिनिभं चारु चन्द्रवतंसम् ।रत्नाकल्पोज्ज्वलाङ्गं परशुमृगवराभीतिहस्तं प्रसन्नम् ॥ १॥

vande siddhipradaṃ devaṃ gaṇeśaṃ priyapālakam |viśvagarbhaṃ ca vighneśaṃ anādiṃ maṅgalaṃ vibhūm ||atha dhyānamdhyāyennityaṃ maheśaṃ rajatagirinibhaṃ cāru candravataṃsam |ratnākalpojjvalāṅgaṃ paraśumṛgavarābhītihastaṃ prasannam || 1||

पद्मासीनं समन्तात्स्तुतममरगणैर्व्याघ्रकृतिं वसानम् ।विश्वाद्यं विश्ववन्द्यं निखिलभयहरं पञ्चवक्त्रं त्रिनेत्रम् ॥ २॥

padmāsīnaṃ samantātstutamamaragaṇairvyāghrakṛtiṃ vasānam |viśvādyaṃ viśvavandyaṃ nikhilabhayaharaṃ pañcavaktraṃ trinetram || 2||

हरिः॑ ॐग॒णानां॑ त्वा ग॒णप॑ति+ हवामहे प्रि॒याणां॑ त्वा प्रि॒यप॑ति+ हवामहेनि॒धीनां॑ त्वा॑ निधि॒पति॑+ हवामहे वसो मम ।आहम॑जानि गर्भ॒धमा त्वम॑जासि गर्भ॒धम् ॥ १॥

hariḥ oṃgaṇānāṃ tvā gaṇapati+ havāmahe priyāṇāṃ tvā priyapati+ havāmahenidhīnāṃ tvā nidhipati+ havāmahe vaso mama |āhamajāni garbhadhamā tvamajāsi garbhadham || 1||

गा॒य॒त्री त्रि॒ष्टुब्जग॑त्यनु॒ष्टुप्प॒ङ्क्त्या स॒ह ।बृ॒ह॒त्युष्णिहा॑ क॒कुप्सू॒चीभिः॑ शम्यन्तु त्वा ॥ २॥

gāyatrī triṣṭubjagatyanuṣṭuppaṅktyā saha |bṛhatyuṣṇihā kakupsūcībhiḥ śamyantu tvā || 2||

द्विप॑दा॒याश्चतु॑ष्पदा॒स्त्रिप॑दा॒याश्च॒षट्प॑दाः ।विच्छ॑न्दा॒ याश्च॒ सच्छ॑न्दाः सू॒चीभिः॑ शम्यन्तु त्वा ॥ ३॥

dvipadāyāścatuṣpadāstripadāyāścaṣaṭpadāḥ |vicchandā yāśca sacchandāḥ sūcībhiḥ śamyantu tvā || 3||

स॒हस्तो॑माः स॒हच्छ॑न्दस आ॒वृतः॑ स॒हप्र॑मा॒ ऋष॑यः स॒प्त दै॑व्याः ।पूर्वे॑षां॒ पन्था॑मनु॒दृश्य॒ धीरा॑ अ॒न्वाले॑भिरे र॒थ्यो न र॒श्मीन् ॥ ४॥

sahastomāḥ sahacchandasa āvṛtaḥ sahapramā ṛṣayaḥ sapta daivyāḥ |pūrveṣāṃ panthāmanudṛśya dhīrā anvālebhire rathyo na raśmīn || 4||

शिवसङ्कल्पसूक्तम् ।यज्जाग्र॑तो दू॒रमु॒दैति॒ दैवं॒ तदु॑ सु॒प्तस्य॒ तथै॒वैति॑ ।दू॒र॒ङ्ग॒मं ज्योति॑षां॒ ज्योति॒रेकं॒ तन्मे॒ मनः॑ शि॒वस॑ङ्कल्पमस्तु ॥ १॥

śivasaṅkalpasūktam |yajjāgrato dūramudaiti daivaṃ tadu suptasya tathaivaiti |dūraṅgamaṃ jyotiṣāṃ jyotirekaṃ tanme manaḥ śivasaṅkalpamastu || 1||

येन॒ कर्मा॑ण्य॒पसो॑ मनी॒षिणो॑ य॒ज्ञे कृ॒ण्वन्ति॑ वि॒दथे॑षु॒ धीराः॑ ।यद॑पू॒र्वं य॒क्षम॒न्तः प्र॒जानां॒ तन्मे॒ मनः॑ शि॒वस॑ङ्कल्पमस्तु ॥ २॥

yena karmāṇyapaso manīṣiṇo yajñe kṛṇvanti vidatheṣu dhīrāḥ |yadapūrvaṃ yakṣamantaḥ prajānāṃ tanme manaḥ śivasaṅkalpamastu || 2||

यत्प्र॒ज्ञान॑मु॒त चेतो॒ धृति॑श्च॒ यज्ज्योति॑र॒न्तर॒मृतं॑ प्र॒जासु॑ ।यस्मा॒न्नऽऋ॒ते किं च॒न कर्म॑ क्रि॒यते॒ तन्मे॒ मनः॑ शि॒वस॑ङ्कल्पमस्तु ॥ ३॥

yatprajñānamuta ceto dhṛtiśca yajjyotirantaramṛtaṃ prajāsu |yasmānna'ṛte kiṃ cana karma kriyate tanme manaḥ śivasaṅkalpamastu || 3||

येने॒दं भू॒तं भुव॑नं भवि॒ष्यत्परि॑गृहीतम॒मृते॑न॒ सर्व॑म् ।येन॑ य॒ज्ञस्ता॒यते॑ स॒प्तहो॑ता॒ तन्मे॒ मनः॑ शि॒वस॑ङ्कल्पमस्तु ॥ ४॥

yenedaṃ bhūtaṃ bhuvanaṃ bhaviṣyatparigṛhītamamṛtena sarvam |yena yajñastāyate saptahotā tanme manaḥ śivasaṅkalpamastu || 4||

यस्मि॒न्नृचः॒ साम॒ यजू॑+षि॒ यस्मि॒न् प्रति॑ष्ठिता रथना॒भावि॑वा॒राः ।यस्मि॑+श्चि॒त्त+ सर्व॒मोतं॑ प्र॒जानां॒ तन्मे॒ मनः॑ शि॒वस॑ङ्कल्पमस्तु ॥ ५॥

yasminnṛcaḥ sāma yajū+ṣi yasmin pratiṣṭhitā rathanābhāvivārāḥ |yasmi+ścitta+ sarvamotaṃ prajānāṃ tanme manaḥ śivasaṅkalpamastu || 5||

सु॒षा॒र॒थिरश्वा॑निव॒ यन्म॑नु॒ष्या॒न्नेनी॒यते॒ऽभीशु॑भिर्वा॒जिन॑ इव ।हृ॒त्प्रति॑ष्ठं॒ यद॑जि॒रं जवि॑ष्ठं॒ तन्मे॒ मनः॑ शि॒वस॑ङ्कल्पमस्तु ॥ ६॥

suṣārathiraśvāniva yanmanuṣyānnenīyate'bhīśubhirvājina iva |hṛtpratiṣṭhaṃ yadajiraṃ javiṣṭhaṃ tanme manaḥ śivasaṅkalpamastu || 6||

इति रुद्रे प्रथमोऽध्यायः ॥ १॥

iti rudre prathamo'dhyāyaḥ || 1||

(पुरुषसूक्तम् ।)हरिः॑ ॐस॒हस्र॑शीर्षा॒ पुरु॑षः सहस्रा॒क्षः स॒हस्र॑पात् ।स भूमि॑+ स॒र्वतः॑ स्पृ॒त्वात्य॑तिष्ठद्दशाङ्गु॒लम् ॥ १॥

(puruṣasūktam |)hariḥ oṃsahasraśīrṣā puruṣaḥ sahasrākṣaḥ sahasrapāt |sa bhūmi+ sarvataḥ spṛtvātyatiṣṭhaddaśāṅgulam || 1||

पुरु॑ष ए॒वेद+ सर्वं॒ यद्भू॒तं यच्च॑ भा॒व्य॒म् ।उ॒तामृ॑त॒त्वस्येशा॑नो॒ यदन्ने॑नाति॒रोह॑ति ॥ २॥

puruṣa eveda+ sarvaṃ yadbhūtaṃ yacca bhāvyam |utāmṛtatvasyeśāno yadannenātirohati || 2||

ए॒तावा॑नस्य महि॒मातो॒ ज्यायाँ॑श्च॒ पूरु॑षः ।पादो॑ऽस्य॒ विश्वा॑ भू॒तानि॑ त्रि॒पाद॑स्या॒मृतं॑ दि॒वि ॥ ३॥

etāvānasya mahimāto jyāyām̐śca pūruṣaḥ |pādo'sya viśvā bhūtāni tripādasyāmṛtaṃ divi || 3||

त्रि॒पादू॒र्ध्व उदै॒त्पुरु॑षः॒ पादो॑ऽस्ये॒हाभ॑व॒त्पुनः॑ ।ततो॒ विष्व॒ङ् व्य॒क्रामत्साशनानश॒ने अ॒भि ॥ ४॥

tripādūrdhva udaitpuruṣaḥ pādo'syehābhavatpunaḥ |tato viṣvaṅ vyakrāmatsāśanānaśane abhi || 4||

ततो॑ वि॒राड॑जायत वि॒राजो॒ अधि॒ पूरु॑षः ।स जा॒तो अत्य॑रिच्यत प॒श्चाद्भूमि॒मथो॑ पु॒रः ॥ ५॥

tato virāḍajāyata virājo adhi pūruṣaḥ |sa jāto atyaricyata paścādbhūmimatho puraḥ || 5||

तस्मा॑द्य॒ज्ञात्स॑र्व॒हुतः॒ सम्भृ॑तं पृषदा॒ज्यम् ।प॒शूँस्ताँश्च॑क्रे वाय॒व्या॒नार॒ण्या ग्रा॒म्याश्च॒ ये ॥ ६॥

tasmādyajñātsarvahutaḥ sambhṛtaṃ pṛṣadājyam |paśūm̐stām̐ścakre vāyavyānāraṇyā grāmyāśca ye || 6||

तस्मा॑द्य॒ज्ञात्स॑र्व॒हुत॒ ऋचः॒ सामा॑नि जज्ञिरे ।छन्दा॑+सि जज्ञिरे॒ तस्मा॒द्यजु॒स्तस्मा॑दजायत ॥ ७॥

tasmādyajñātsarvahuta ṛcaḥ sāmāni jajñire |chandā+si jajñire tasmādyajustasmādajāyata || 7||

तस्मा॒दश्वा॑ अजायन्त॒ ये के चो॑भ॒याद॑तः ।गावो॑ ह जज्ञिरे॒ तस्मा॒त्तस्मा॑ज्जा॒ता अ॑जा॒वयः॑ ॥ ८॥

tasmādaśvā ajāyanta ye ke cobhayādataḥ |gāvo ha jajñire tasmāttasmājjātā ajāvayaḥ || 8||

तं य॒ज्ञं ब॒र्हिषि॒ प्रौक्ष॒न्पुरु॑षं जा॒तम॑ग्र॒तः ।तेन॑ दे॒वा अ॑यजन्त सा॒ध्या ऋष॑यश्च॒ ये ॥ ९॥

taṃ yajñaṃ barhiṣi praukṣanpuruṣaṃ jātamagrataḥ |tena devā ayajanta sādhyā ṛṣayaśca ye || 9||

यत्पुरु॑षं॒ व्यद॑धुः कति॒धा व्य॑कल्पयन् ।मुखं॒ किम॑स्यासी॒त् किं बा॒हू किमू॒रू पादा॑ उच्येते ॥ १०॥

yatpuruṣaṃ vyadadhuḥ katidhā vyakalpayan |mukhaṃ kimasyāsīt kiṃ bāhū kimūrū pādā ucyete || 10||

ब्रा॒ह्म॒णो॒ऽस्य॒ मुख॑मासीद्बा॒हू रा॑ज॒न्यः॒ कृ॒तः ।ऊ॒रू तद॑स्य॒ यद्वै॑श्यः प॒द्भ्या+ शू॒द्रो अ॑जायत ॥ ११॥

brāhmaṇo'sya mukhamāsīdbāhū rājanyaḥ kṛtaḥ |ūrū tadasya yadvaiśyaḥ padbhyā+ śūdro ajāyata || 11||

च॒न्द्रमा॒ मन॑सो जा॒तश्चक्षोः॒ सूर्यो॑ अजायत ।श्रोत्रा॑द्वा॒युश्च॑ प्रा॒णश्च॒ मुखा॑द॒ग्निर॑जायत ॥ १२॥

candramā manaso jātaścakṣoḥ sūryo ajāyata |śrotrādvāyuśca prāṇaśca mukhādagnirajāyata || 12||

नाभ्या॑ आसीद॒न्तरि॑क्ष+ शी॒र्ष्णो द्यौः॒ सम॑वर्तत ।प॒द्भ्यां भूमि॒र्दिशः॒ श्रोत्रा॒त्तथा॑ लो॒काँ२ ॥ अ॑कल्पयन् ॥ १३॥

nābhyā āsīdantarikṣa+ śīrṣṇo dyauḥ samavartata |padbhyāṃ bhūmirdiśaḥ śrotrāttathā lokām̐2 || akalpayan || 13||

यत्पुरु॑षेण ह॒विषा॑ दे॒वा य॒ज्ञमत॑न्वत ।व॒स॒न्तो॒ऽस्यासी॒दाज्यं॑ ग्री॒ष्म इ॒ध्मः श॒रद्ध॒विः ॥ १४॥

yatpuruṣeṇa haviṣā devā yajñamatanvata |vasanto'syāsīdājyaṃ grīṣma idhmaḥ śaraddhaviḥ || 14||

स॒प्तास्या॑सन्परि॒धय॒स्त्रिःस॒प्त स॒मिधः॑ कृ॒ताः ।दे॒वा यद्य॒ज्ञं त॑न्वा॒ना अब॑ध्न॒न् पुरु॑षं प॒शुम् ॥ १५॥

saptāsyāsanparidhayastriḥsapta samidhaḥ kṛtāḥ |devā yadyajñaṃ tanvānā abadhnan puruṣaṃ paśum || 15||

य॒ज्ञेन॑ य॒ज्ञम॑यजन्त दे॒वास्तानि॒ धर्मा॑णि प्रथ॒मान्या॑सन् ।ते ह॒ नाकं॑ महि॒मानः॑ सचन्त॒ यत्र॒ पूर्वे॑ सा॒ध्याः सन्ति॑ दे॒वाः ॥ १६॥

yajñena yajñamayajanta devāstāni dharmāṇi prathamānyāsan |te ha nākaṃ mahimānaḥ sacanta yatra pūrve sādhyāḥ santi devāḥ || 16||

अ॒द्भ्यः सम्भृ॑तः पृथिव्यै॒ रसा॑च्च वि॒श्वक॑र्मणः॒ सम॑वर्त॒ताग्रे॑ ।तस्य॒ त्वष्टा॑ वि॒दध॑द्रू॒पमे॑ति॒ तन्मर्त्य॑स्य देव॒त्वमा॒जान॒मग्रे॑ ॥ १७॥

adbhyaḥ sambhṛtaḥ pṛthivyai rasācca viśvakarmaṇaḥ samavartatāgre |tasya tvaṣṭā vidadhadrūpameti tanmartyasya devatvamājānamagre || 17||

वेदा॒हमे॒तं पुरु॑षं म॒हान्त॑मादि॒त्यव॑र्णं॒ तम॑सः प॒रस्ता॑त् ।तमे॒व वि॑दि॒त्वाऽति॑ मृ॒त्युमे॑ति॒ नान्यः पन्था॑ विद्य॒तेऽय॑नाय ॥ १८॥

vedāhametaṃ puruṣaṃ mahāntamādityavarṇaṃ tamasaḥ parastāt |tameva viditvā'ti mṛtyumeti nānyaḥ panthā vidyate'yanāya || 18||

प्र॒जाप॑तिश्च॒रति॒ गर्भे॑ अ॒न्तरजा॑यमानो बहु॒धा वि जा॑यते ।तस्य॒ योनिं॒ परि॑पश्यन्ति॒ धीरा॒स्तस्मि॑न्ह तस्थु॒र्भुव॑नानि॒ विश्वा॑ ॥ १९॥

prajāpatiścarati garbhe antarajāyamāno bahudhā vi jāyate |tasya yoniṃ paripaśyanti dhīrāstasminha tasthurbhuvanāni viśvā || 19||

यो दे॒वेभ्य॑ आ॒तप॑ति॒ यो दे॒वानां॑ पु॒रोहि॑तः ।पूर्वो॒ यो दे॒वेभ्यो॑ जा॒तो नमो॑ रु॒चाय॒ ब्राह्म॑ये ॥ २०॥

yo devebhya ātapati yo devānāṃ purohitaḥ |pūrvo yo devebhyo jāto namo rucāya brāhmaye || 20||

रु॒चं ब्रा॒ह्म्यं ज॒नय॑न्तो दे॒वा अग्रे॒ तद॑ब्रुवन् ।यस्त्वै॒वं ब्रा॑ह्म॒णो वि॒द्यात्तस्य॑ दे॒वा अ॑स॒न्वशे॑ ॥ २१॥

rucaṃ brāhmyaṃ janayanto devā agre tadabruvan |yastvaivaṃ brāhmaṇo vidyāttasya devā asanvaśe || 21||

श्रीश्च॑ ते ल॒क्ष्मीश्च॒ पत्न्या॑वहोरा॒त्रे पा॒र्श्वे नक्ष॑त्राणि रू॒पम॒श्विनौ॒ व्यात्त॑म् ।इ॒ष्णन्नि॑षाणा॒मुं म॑ इषाण सर्वलो॒कं म॑ इषाण ॥ २२॥

śrīśca te lakṣmīśca patnyāvahorātre pārśve nakṣatrāṇi rūpamaśvinau vyāttam |iṣṇanniṣāṇāmuṃ ma iṣāṇa sarvalokaṃ ma iṣāṇa || 22||

इति रुद्रे द्वितीयोऽध्यायः ॥ २॥

iti rudre dvitīyo'dhyāyaḥ || 2||

(अप्रतिरथसूक्तम् ।)हरि॑ ॐआ॒शुः शिशा॑नो वृष॒भो न भी॒मो घ॑नाघ॒नः क्षोभ॑णश्चर्षणी॒नाम् ।सं॒क्रन्द॑नोऽनिमि॒ष ए॑कवी॒रः श॒त+ सेना॑ अजयत्सा॒कमिन्द्रः॑ ॥ १॥

(apratirathasūktam |)hari oṃāśuḥ śiśāno vṛṣabho na bhīmo ghanāghanaḥ kṣobhaṇaścarṣaṇīnām |saṃkrandano'nimiṣa ekavīraḥ śata+ senā ajayatsākamindraḥ || 1||

सं॒क्रन्द॑नेनाऽनिमि॒षेण॑ जि॒ष्णुना॑ युत्का॒रेण॑ दुश्च्यव॒नेन॑ धृ॒ष्णुना॑ ।तदिन्द्रे॑ण जयत॒ तत्स॑हध्वं॒ युधो॑ नर॒ इषु॑हस्तेन॒ वृष्णा॑ ॥ २॥

saṃkrandanenā'nimiṣeṇa jiṣṇunā yutkāreṇa duścyavanena dhṛṣṇunā |tadindreṇa jayata tatsahadhvaṃ yudho nara iṣuhastena vṛṣṇā || 2||

स इषु॑हस्तैः॒ स नि॑ष॒ङ्गिभि॑र्व॒शी स+स्र॑ष्टा॒ स युध॒ इन्द्रो॑ ग॒णेन॑ ।स॒+सृष्ट॒जित्सो॑म॒पा बा॑हुश॒र्ध्युग्रध॑न्वा॒ प्रति॑हिताभि॒रस्ता॑ ॥ ३॥

sa iṣuhastaiḥ sa niṣaṅgibhirvaśī sa+sraṣṭā sa yudha indro gaṇena |sa+sṛṣṭajitsomapā bāhuśardhyugradhanvā pratihitābhirastā || 3||

बृह॑स्पते॒ परि॑दीया॒ रथे॑न रक्षो॒हामित्राँ॑२ अप॒बाध॑मानः ।प्र॒भ॒ञ्जन्त्सेनाः॑ प्रमृ॒णो यु॒धा जय॑न्न॒स्माक॑मेध्यवि॒ता रथा॑नाम् ॥ ४॥

bṛhaspate paridīyā rathena rakṣohāmitrām̐2 apabādhamānaḥ |prabhañjantsenāḥ pramṛṇo yudhā jayannasmākamedhyavitā rathānām || 4||

ब॒ल॒वि॒ज्ञा॒यः स्थवि॑रः॒ प्रवी॑रः॒ सह॑स्वान्वा॒जी सह॑मान उ॒ग्रः ।अ॒भिवी॑रो अ॒भिस॑त्वा सहो॒जा जै॑त्रमिन्द्र॒ रथ॒माति॑ष्ठ गो॒वित् ॥ ५॥

balavijñāyaḥ sthaviraḥ pravīraḥ sahasvānvājī sahamāna ugraḥ |abhivīro abhisatvā sahojā jaitramindra rathamātiṣṭha govit || 5||

गो॒त्र॒भिदं॑ गो॒विदं॒ वज्र॑बाहुं॒ जय॑न्त॒मज्म॑ प्रमृ॒णन्त॒मोज॑सा ।इ॒म+ स॑जाता॒ अनु॑ वीरयध्व॒मिन्द्र॑+ सखायो॒ अनु॒ स+र॑भध्वम् ॥ ६॥

gotrabhidaṃ govidaṃ vajrabāhuṃ jayantamajma pramṛṇantamojasā |ima+ sajātā anu vīrayadhvamindra+ sakhāyo anu sa+rabhadhvam || 6||

अ॒भि गो॒त्राणि॒ सह॑सा॒ गाह॑मानोऽद॒यो वी॒रः श॒तम॑न्यु॒रिन्द्रः॑ ।दु॒श्च्य॒व॒नः पृ॑तना॒षाड॑यु॒ध्योऽस्माक॒+ सेना॑ अवतु॒ प्र यु॒त्सु ॥ ७॥

abhi gotrāṇi sahasā gāhamāno'dayo vīraḥ śatamanyurindraḥ |duścyavanaḥ pṛtanāṣāḍayudhyo'smāka+ senā avatu pra yutsu || 7||

इन्द्र॑ आसां ने॒ता बृह॒स्पति॒र्दक्षि॑णा य॒ज्ञः पु॒र ए॑तु॒ सोमः॑ ।दे॒व॒से॒नाना॑मभिभञ्जती॒नां जय॑न्तीनां म॒रुतो॑ य॒न्त्वग्र॑म् ॥ ८॥

indra āsāṃ netā bṛhaspatirdakṣiṇā yajñaḥ pura etu somaḥ |devasenānāmabhibhañjatīnāṃ jayantīnāṃ maruto yantvagram || 8||

इन्द्र॑स्य॒ वृष्णो॒ वरु॑णस्य॒ राज्ञ॑ आदि॒त्यानां॑ म॒रुता॒+ शर्ध॑ उ॒ग्रम् ।म॒हाम॑नसां भुवनच्य॒वानां॒ घोषो॑ दे॒वानां॒ जय॑ता॒मुद॑स्थात् ॥ ९॥

indrasya vṛṣṇo varuṇasya rājña ādityānāṃ marutā+ śardha ugram |mahāmanasāṃ bhuvanacyavānāṃ ghoṣo devānāṃ jayatāmudasthāt || 9||

उद्ध॑र्षय मघव॒न्नायु॑धा॒न्युत्सत्व॑नां माम॒कानां॒ मना॑+सि ।उद्वृ॑त्रहन्वा॒जिनां॒ वाजि॑ना॒न्युद्रथा॑नां॒ जय॑तां यन्तु॒ घोषाः॑ ॥ १०॥

uddharṣaya maghavannāyudhānyutsatvanāṃ māmakānāṃ manā+si |udvṛtrahanvājināṃ vājinānyudrathānāṃ jayatāṃ yantu ghoṣāḥ || 10||

अ॒स्माक॒मिन्द्रः॒ समृ॑तेषु ध्व॒जेष्व॒स्माकं॒ या इष॑व॒स्ता ज॑यन्तु ।अ॒स्माकं॑ वी॒रा उत्त॑रे भवन्त्व॒स्माँ२ उ॑ देवा अवता॒ हवे॑षु ॥ ११॥

asmākamindraḥ samṛteṣu dhvajeṣvasmākaṃ yā iṣavastā jayantu |asmākaṃ vīrā uttare bhavantvasmām̐2 u devā avatā haveṣu || 11||

अ॒मीषां॑ चि॒त्तं प्र॑तिलो॒भय॑न्ती गृहा॒णाङ्गा॑न्यप्वे॒ परे॑हि ।अ॒भि प्रेहि॒ निर्द॑ह हृ॒त्सु शोकै॑र॒न्धेना॒मित्रा॒स्तम॑सा सचन्ताम् ॥ १२॥

amīṣāṃ cittaṃ pratilobhayantī gṛhāṇāṅgānyapve parehi |abhi prehi nirdaha hṛtsu śokairandhenāmitrāstamasā sacantām || 12||

अव॑सृष्टा॒ परा॑पत॒ शर॑व्ये॒ ब्रह्म॑स+शिते ।गच्छा॒मित्रा॒न्प्रप॑द्यस्व॒ मामीषाङ्कञ्चनोच्छि॑षः ॥ १३॥

avasṛṣṭā parāpata śaravye brahmasa+śite |gacchāmitrānprapadyasva māmīṣāṅkañcanocchiṣaḥ || 13||