महाकालभैरवकवचम् Shri Mahakalabhairava Kavacham

श्रीदेव्युवाच ।देवदेव महाबाहो भक्तानां सुखवर्धन ।केन सिद्धिं ददात्याशु काली त्रैलोक्यमोहन ॥ १॥

śrīdevyuvāca |devadeva mahābāho bhaktānāṃ sukhavardhana |kena siddhiṃ dadātyāśu kālī trailokyamohana || 1||

तन्मे वद दयाऽऽधार साधकाभीष्टसिद्धये ।कृपां कुरु जगन्नाथ वद वेदविदां वर ॥ २॥

tanme vada dayā''dhāra sādhakābhīṣṭasiddhaye |kṛpāṃ kuru jagannātha vada vedavidāṃ vara || 2||

श्रीभैरव उवाच ।गोपनीयं प्रयत्नेन तत्त्वात् तत्त्वं परात्परम् ।एष सिद्धिकरः सम्यक् किमथो कथयाम्यहम् ॥ ३॥

śrībhairava uvāca |gopanīyaṃ prayatnena tattvāt tattvaṃ parātparam |eṣa siddhikaraḥ samyak kimatho kathayāmyaham || 3||

महाकालमहम् वन्दे सर्वसिद्धिप्रदायकम् ।देवदानवगन्धर्वकिन्नरपरिसेवितम् ॥ ४॥

mahākālamaham vande sarvasiddhipradāyakam |devadānavagandharvakinnaraparisevitam || 4||

कवचं तत्त्वदेवस्य पठनाद् घोरदर्शने ।सत्यं भवति सान्निध्यं कवचस्तवनान्तरात् ॥ ५॥

kavacaṃ tattvadevasya paṭhanād ghoradarśane |satyaṃ bhavati sānnidhyaṃ kavacastavanāntarāt || 5||

सिद्धिं ददाति सा तुष्टा कृत्वा कवचमुत्तमम् ।साम्राज्यत्वं प्रियं दत्वा पुत्रवत् परिपालयेत् ॥ ६॥

siddhiṃ dadāti sā tuṣṭā kṛtvā kavacamuttamam |sāmrājyatvaṃ priyaṃ datvā putravat paripālayet || 6||

कवचस्य ऋषिर्देवी कालिका दक्षिणा तथाविराट्छन्दः सुविज्ञेयं महाकालस्तु देवता ।कालिका साधने चैव विनियोगः प्रकीर्त्तितः ॥ ७॥

kavacasya ṛṣirdevī kālikā dakṣiṇā tathāvirāṭchandaḥ suvijñeyaṃ mahākālastu devatā |kālikā sādhane caiva viniyogaḥ prakīrttitaḥ || 7||

ॐ श्मशानस्थो महारुद्रो महाकालो दिगम्बरः ।कपालकर्तृका वामे शूलं खट्वाङ्गम् दक्षिणे ॥ ८॥

oṃ śmaśānastho mahārudro mahākālo digambaraḥ |kapālakartṛkā vāme śūlaṃ khaṭvāṅgam dakṣiṇe || 8||

भुजङ्गभूषिते देवि भस्मास्थिमणिमण्डितः ।ज्वलत्पावकमध्यस्थो भस्मशय्याव्यवस्थितः ॥ ९॥

bhujaṅgabhūṣite devi bhasmāsthimaṇimaṇḍitaḥ |jvalatpāvakamadhyastho bhasmaśayyāvyavasthitaḥ || 9||

विपरीतरतां तत्र कालिकां हृदयोपरि ।पेयं खाद्यं च चोष्यं च तौ कृत्वा तु परस्परम् ।एवं भक्त्या यजेद् देवं सर्वसिद्धिः प्रजायते ॥ १०॥

viparītaratāṃ tatra kālikāṃ hṛdayopari |peyaṃ khādyaṃ ca coṣyaṃ ca tau kṛtvā tu parasparam |evaṃ bhaktyā yajed devaṃ sarvasiddhiḥ prajāyate || 10||

प्रणवं पूर्वमुच्चार्य महाकालाय तत्पदम् ।नमः पातु महामन्त्रः सर्वशास्त्रार्थपारगः ॥ ११॥

praṇavaṃ pūrvamuccārya mahākālāya tatpadam |namaḥ pātu mahāmantraḥ sarvaśāstrārthapāragaḥ || 11||

अष्टक्षरो महा मन्त्रः सर्वाशापरिपूरकः ।सर्वपापक्षयं याति ग्रहणे भक्तवत्सले ॥ १२॥

aṣṭakṣaro mahā mantraḥ sarvāśāparipūrakaḥ |sarvapāpakṣayaṃ yāti grahaṇe bhaktavatsale || 12||

कूर्चद्वन्द्वं महाकाल प्रसीदेति पदद्वयम् ।लज्जायुग्मं वह्निजाया स तु राजेश्वरो महान् ॥ १३॥

kūrcadvandvaṃ mahākāla prasīdeti padadvayam |lajjāyugmaṃ vahnijāyā sa tu rājeśvaro mahān || 13||

मन्त्रग्रहणमात्रेण भवेत सत्यं महाकविः ।गद्यपद्यमयी वाणी गङ्गानिर्झरिता तथा ॥ १४॥

mantragrahaṇamātreṇa bhaveta satyaṃ mahākaviḥ |gadyapadyamayī vāṇī gaṅgānirjharitā tathā || 14||

तस्य नाम तु देवेशि देवा गायन्ति भावुकाः ।शक्तिबीजद्वयं दत्वा कूर्चं स्यात् तदनन्तरम् ॥ १५॥

tasya nāma tu deveśi devā gāyanti bhāvukāḥ |śaktibījadvayaṃ datvā kūrcaṃ syāt tadanantaram || 15||

महाकालपदं दत्वा मायाबीजयुगं तथा ।कूर्चमेकं समुद्धृत्य महामन्त्रो दशाक्षरः ॥ १६॥

mahākālapadaṃ datvā māyābījayugaṃ tathā |kūrcamekaṃ samuddhṛtya mahāmantro daśākṣaraḥ || 16||

राजस्थाने दुर्गमे च पातु मां सर्वतो मुदा ।वेदादिबीजमादाय भगमान् तदनन्तरम् ॥ १७॥

rājasthāne durgame ca pātu māṃ sarvato mudā |vedādibījamādāya bhagamān tadanantaram || 17||

महाकालाय सम्प्रोच्य कूर्चं दत्वा च ठद्वयम् ।ह्रींकारपूर्वमुद्धृत्य वेदादिस्तदनन्तरम् ॥ १८॥

mahākālāya samprocya kūrcaṃ datvā ca ṭhadvayam |hrīṃkārapūrvamuddhṛtya vedādistadanantaram || 18||

महाकालस्यान्तभागे स्वाहान्तमनुमुत्तमम् ।धनं पुत्रं सदा पातु बन्धुदारानिकेतनम् ॥ १९॥

mahākālasyāntabhāge svāhāntamanumuttamam |dhanaṃ putraṃ sadā pātu bandhudārāniketanam || 19||

पिङ्गलाक्षो मञ्जुयुद्धे युद्धे नित्यं जयप्रदः ।सम्भाव्यः सर्वदुष्टघ्नः पातु स्वस्थानवल्लभः ॥ २०॥

piṅgalākṣo mañjuyuddhe yuddhe nityaṃ jayapradaḥ |sambhāvyaḥ sarvaduṣṭaghnaḥ pātu svasthānavallabhaḥ || 20||

इति ते कथितं तुभ्यं देवानामपि दुर्लभम् ।अनेन पठनाद् देवि विघ्ननाशो यथा भवेत् ॥ २१॥

iti te kathitaṃ tubhyaṃ devānāmapi durlabham |anena paṭhanād devi vighnanāśo yathā bhavet || 21||

सम्पूजकः शुचिस्नातः भक्तियुक्तः समाहितः ।सर्वव्याधिविनिर्मुक्तः वैरिमध्ये विशेषतः ॥ २२॥

sampūjakaḥ śucisnātaḥ bhaktiyuktaḥ samāhitaḥ |sarvavyādhivinirmuktaḥ vairimadhye viśeṣataḥ || 22||

महाभीमः सदा पातु सर्वस्थान वल्लभम् । ?कालीपार्श्वस्थितो देवः सर्वदा पातु मे मुखे ॥ २३॥

mahābhīmaḥ sadā pātu sarvasthāna vallabham | ?kālīpārśvasthito devaḥ sarvadā pātu me mukhe || 23||

॥ फल श्रुति॥पठनात् कालिकादेवी पठेत् कवचमुत्तमम् ।श्रुणुयाद् वा प्रयत्नेन सदाऽऽनन्दमयो भवेत् ॥ १॥

|| phala śruti||paṭhanāt kālikādevī paṭhet kavacamuttamam |śruṇuyād vā prayatnena sadā''nandamayo bhavet || 1||

श्रद्धयाऽश्रद्धया वापि पठनात् कवचस्य यत् ।सर्वसिद्धिमवाप्नोति यद्यन्मनसि वर्तते ॥ २॥

śraddhayā'śraddhayā vāpi paṭhanāt kavacasya yat |sarvasiddhimavāpnoti yadyanmanasi vartate || 2||

बिल्वमूले पठेद् यस्तु पठनाद् कवचस्य यत् ।त्रिसन्ध्यं पठनाद् देवि भवेन्नित्यं महाकविः ॥ ३॥

bilvamūle paṭhed yastu paṭhanād kavacasya yat |trisandhyaṃ paṭhanād devi bhavennityaṃ mahākaviḥ || 3||

कुमारीं पूजयित्वा तु यः पठेद् भावतत्परः ।न किञ्चिद् दुर्लभं तस्य दिवि वा भुवि मोदते ॥ ४॥

kumārīṃ pūjayitvā tu yaḥ paṭhed bhāvatatparaḥ |na kiñcid durlabhaṃ tasya divi vā bhuvi modate || 4||

दुर्भिक्षे राजपीडायां ग्रामे वा वैरिमध्यके ।यत्र यत्र भयं प्राप्तः सर्वत्र प्रपठेन्नरः ॥ ५॥

durbhikṣe rājapīḍāyāṃ grāme vā vairimadhyake |yatra yatra bhayaṃ prāptaḥ sarvatra prapaṭhennaraḥ || 5||

तत्र तत्राभयं तस्य भवत्येव न संशयः ।वामपार्श्वे समानीय शोभितां वरकामिनीम् ॥ ६॥

tatra tatrābhayaṃ tasya bhavatyeva na saṃśayaḥ |vāmapārśve samānīya śobhitāṃ varakāminīm || 6||

श्रद्धयाऽश्रद्धया वापि पठनात् कवचस्य तु ।प्रयत्नतः पठेद् यस्तु तस्य सिद्धिः करे स्थिता ॥ ७॥

śraddhayā'śraddhayā vāpi paṭhanāt kavacasya tu |prayatnataḥ paṭhed yastu tasya siddhiḥ kare sthitā || 7||

इदं कवचमज्ञात्वा कालं यो भजते नरः ।नैव सिद्धिर्भवेत् तस्य विघ्नस्तस्य पदे पदे ।आदौ वर्म पठित्वा तु तस्य सिद्धिर्भविष्यति ॥ ८॥

idaṃ kavacamajñātvā kālaṃ yo bhajate naraḥ |naiva siddhirbhavet tasya vighnastasya pade pade |ādau varma paṭhitvā tu tasya siddhirbhaviṣyati || 8||

॥ इति रुद्रयामले महातन्त्रे महाकालभैरवकवचं सम्पूर्णम्॥

|| iti rudrayāmale mahātantre mahākālabhairavakavacaṃ sampūrṇam||