महाकालस्तोत्रम् १ Shri Mahakala Stotram

दृष्ट्वा देवं महाकालं कालिकाङ्गं महाप्रभुम् ।भार्गवः पतितो भूमौ दण्डवत्सुरपूजिते ॥ १॥

dṛṣṭvā devaṃ mahākālaṃ kālikāṅgaṃ mahāprabhum |bhārgavaḥ patito bhūmau daṇḍavatsurapūjite || 1||

भार्गव उवाचकल्यन्तकालाग्निसमानभासं चतुर्भुजं कालिकयोपजुष्टम् ।कपलखट्वाङ्गवराभयाढ्यकरं महाकालमनन्तमीडे ॥ २॥

bhārgava uvācakalyantakālāgnisamānabhāsaṃ caturbhujaṃ kālikayopajuṣṭam |kapalakhaṭvāṅgavarābhayāḍhyakaraṃ mahākālamanantamīḍe || 2||

नमः परमरूपाय परामलसुरूपिणे ।नियतिप्राप्तदेहाय तत्त्वरूपाय ते नमः ॥ ३॥

namaḥ paramarūpāya parāmalasurūpiṇe |niyatiprāptadehāya tattvarūpāya te namaḥ || 3||

नमः परमरूपाय परमार्थैकरूपिणे ।वियन्मायास्वरूपाय भैरवाय नमोऽस्तुते ॥ ४॥

namaḥ paramarūpāya paramārthaikarūpiṇe |viyanmāyāsvarūpāya bhairavāya namo'stute || 4||

ॐ नमः परमेशाय परतत्त्वार्थदर्शिणे ।वियन्मायाद्यधीशाय धीविचित्राय शम्भवे ॥ ५॥

oṃ namaḥ parameśāya paratattvārthadarśiṇe |viyanmāyādyadhīśāya dhīvicitrāya śambhave || 5||

त्रिलोकेशाय गूढाय सूक्ष्मायाव्यक्तरूपिणे ।पराकाष्ठादिरूपाय पराय शम्भवे नमः ॥ ६॥

trilokeśāya gūḍhāya sūkṣmāyāvyaktarūpiṇe |parākāṣṭhādirūpāya parāya śambhave namaḥ || 6||

ॐ नमः कालिकाङ्काय कालाञ्जननिभाय ते ।जगत्संहारकर्त्रे च महाकालाय ते नमः ॥ ७॥

oṃ namaḥ kālikāṅkāya kālāñjananibhāya te |jagatsaṃhārakartre ca mahākālāya te namaḥ || 7||

नम उग्राय देवाय भीमाय भयदायिने ।महाभयविनाशाय सृष्टिसंहारकारिणे ॥ ८॥

nama ugrāya devāya bhīmāya bhayadāyine |mahābhayavināśāya sṛṣṭisaṃhārakāriṇe || 8||

नमः परापरानन्दस्वरूपाय महात्मने ।परप्रकाशरूपाय प्रकाशानां प्रकाशिने ॥ ९॥

namaḥ parāparānandasvarūpāya mahātmane |paraprakāśarūpāya prakāśānāṃ prakāśine || 9||

ॐ नमो ध्यानगम्याय योगिहृत्पद्मवासिने ।वेदतन्त्रार्थगम्याय वेदतन्त्रार्थदर्शिने ॥ १०॥

oṃ namo dhyānagamyāya yogihṛtpadmavāsine |vedatantrārthagamyāya vedatantrārthadarśine || 10||

वेदागमपरामर्शपरमानन्ददायिने ।तन्त्रवेदान्तवेद्याय शम्भवे विभवे नमः ॥ ११॥

vedāgamaparāmarśaparamānandadāyine |tantravedāntavedyāya śambhave vibhave namaḥ || 11||

धियां प्रचोदकं यत्तु परमं ज्योतिरुत्तमम् ।तत्प्रेरकाय देवाय परमज्योतिषे नमः ॥ १२॥

dhiyāṃ pracodakaṃ yattu paramaṃ jyotiruttamam |tatprerakāya devāya paramajyotiṣe namaḥ || 12||

गुणाश्रयाय देवाय निर्गुणाय कपर्दिने ।अतिस्थूलाय देवाय ह्यतिसूक्ष्माय ते नमः ॥ १३॥

guṇāśrayāya devāya nirguṇāya kapardine |atisthūlāya devāya hyatisūkṣmāya te namaḥ || 13||

त्रिगुणाय त्र्यधीशाय शक्तित्रितयशालिने ।नमस्त्रिज्योतिषे तुभ्यं त्र्यक्षाय च त्रिमूर्तये ॥ १४॥

triguṇāya tryadhīśāya śaktitritayaśāline |namastrijyotiṣe tubhyaṃ tryakṣāya ca trimūrtaye || 14||

इति महाकालस्तोत्रं सम्पूर्णम् ।

iti mahākālastotraṃ sampūrṇam |