दक्षिणास्यभुजङ्गप्रयातस्तुतिः Shri Dakshinasyabhujangaprayatastutih

भवाम्भोधिपारे नयन्तं स्वभक्तान्कृपापूरपूर्णैरपाङ्गैः स्वकीयैः ।समस्तागमान्तप्रगीतापदानंसदा दक्षिणास्यं तमाराधयेऽहम् ॥ १॥

bhavāmbhodhipāre nayantaṃ svabhaktānkṛpāpūrapūrṇairapāṅgaiḥ svakīyaiḥ |samastāgamāntapragītāpadānaṃsadā dakṣiṇāsyaṃ tamārādhaye'ham || 1||

चतुर्विंशदर्णस्य मन्त्रोत्तमस्यप्रजापाद्दृढं वश्यभावं समेत्य ।प्रयच्छत्यरं यश्च विद्याममोघांसदा दक्षिणास्यं तमाराधयेऽहम् ॥ २॥

caturviṃśadarṇasya mantrottamasyaprajāpāddṛḍhaṃ vaśyabhāvaṃ sametya |prayacchatyaraṃ yaśca vidyāmamoghāṃsadā dakṣiṇāsyaṃ tamārādhaye'ham || 2||

जडायापि विद्यां प्रयच्छन्तमाशुप्रपन्नार्तिविध्वंसदक्षाभिधानम् ।जराजन्ममृत्यून्हरन्तं प्रमोदात्सदा दक्षिणास्यं तमाराधयेऽहम् ॥ ३॥

jaḍāyāpi vidyāṃ prayacchantamāśuprapannārtividhvaṃsadakṣābhidhānam |jarājanmamṛtyūnharantaṃ pramodātsadā dakṣiṇāsyaṃ tamārādhaye'ham || 3||

यमाराध्य पद्माक्षपद्मोद्भवाद्याःसुराग्र्याः स्वकार्येषु शक्ता बभूवुः ।रमाभारतीपार्वतीस्तूयमानंसदा दक्षिणास्यं तमाराधयेऽहम् ॥ ४॥

yamārādhya padmākṣapadmodbhavādyāḥsurāgryāḥ svakāryeṣu śaktā babhūvuḥ |ramābhāratīpārvatīstūyamānaṃsadā dakṣiṇāsyaṃ tamārādhaye'ham || 4||

सुधासूतिबालोल्लसन्मौलिभागंसुधाकुम्भमालालसत्पाणिपद्मम् ।सपुत्रं सदारं सशिष्यं सवाहंसदा दक्षिणास्यं तमाराधयेऽहम् ॥ ५॥

sudhāsūtibālollasanmaulibhāgaṃsudhākumbhamālālasatpāṇipadmam |saputraṃ sadāraṃ saśiṣyaṃ savāhaṃsadā dakṣiṇāsyaṃ tamārādhaye'ham || 5||

गजास्याग्निभूसेव्यपादारविन्दंगजाश्वादिसम्पत्तिहेतुप्रणामम् ।निजानन्दवाराशिराकासुधांशुंशुचीन्द्वर्कनेत्रं भजे दक्षिणास्यम् ॥ ६॥

gajāsyāgnibhūsevyapādāravindaṃgajāśvādisampattihetupraṇāmam |nijānandavārāśirākāsudhāṃśuṃśucīndvarkanetraṃ bhaje dakṣiṇāsyam || 6||

गुणान्षट्शमादीनिहामुत्र भोगेविरक्तिं विवेकं ध्रुवानित्ययोश्च ।मुमुक्षां च शीघ्रं लभेत प्रसादात्तमानन्दकन्दं भजे दक्षिणास्यम् ॥ ७॥

guṇānṣaṭśamādīnihāmutra bhogeviraktiṃ vivekaṃ dhruvānityayośca |mumukṣāṃ ca śīghraṃ labheta prasādāttamānandakandaṃ bhaje dakṣiṇāsyam || 7||

जडो जन्ममूकोऽपि यन्मन्त्रजप्तुःकरस्पर्शनात्स्यात्सुराचार्यतुल्यः ।तमज्ञानवारान्निधेर्बाडवाग्निंमुदा सर्वकालं भजे दक्षिणास्यम् ॥ ८॥

jaḍo janmamūko'pi yanmantrajaptuḥkarasparśanātsyātsurācāryatulyaḥ |tamajñānavārānnidherbāḍavāgniṃmudā sarvakālaṃ bhaje dakṣiṇāsyam || 8||

जहौ मृत्युभीतिं यदीयाङ्घ्रिपद्मंसदा पूजयित्वा मृकण्डोस्तनूजः ।तमद्रीन्द्रकन्यासमाश्लिष्टदेहंकृपावारिराशिं भजे दक्षिणास्यम् ॥ ९॥

jahau mṛtyubhītiṃ yadīyāṅghripadmaṃsadā pūjayitvā mṛkaṇḍostanūjaḥ |tamadrīndrakanyāsamāśliṣṭadehaṃkṛpāvārirāśiṃ bhaje dakṣiṇāsyam || 9||

पुरा कामयाना पतिं स्वानुरूपांचरित्वा तपो दुष्करं शैलकन्या ।अवापादराद्या रुचा कामगर्वंहरन्तं तमन्तर्भजे दक्षिणास्यम् ॥ १०॥

purā kāmayānā patiṃ svānurūpāṃcaritvā tapo duṣkaraṃ śailakanyā |avāpādarādyā rucā kāmagarvaṃharantaṃ tamantarbhaje dakṣiṇāsyam || 10||

यदीयाङ्घ्रिसेवापराणां नराणांसुसाध्या भवेयुर्जवात्सर्वयोगाः ।हठाद्याः शिवान्ता यमाद्यङ्गयुक्तामुदा सन्ततं तं भजे दक्षिणास्यम् ॥ ११॥

yadīyāṅghrisevāparāṇāṃ narāṇāṃsusādhyā bhaveyurjavātsarvayogāḥ |haṭhādyāḥ śivāntā yamādyaṅgayuktāmudā santataṃ taṃ bhaje dakṣiṇāsyam || 11||

वटागस्य मूले वसन्तं सुरस्त्रीकदम्बैः सदा सेव्यमानं प्रमोदात् ।वरान् कामितान्नम्रपङ्क्त्यै दिशन्तंदयाजन्मभूभिं भजे दक्षिणास्यम् ॥ १२॥

vaṭāgasya mūle vasantaṃ surastrīkadambaiḥ sadā sevyamānaṃ pramodāt |varān kāmitānnamrapaṅktyai diśantaṃdayājanmabhūbhiṃ bhaje dakṣiṇāsyam || 12||

विधूताभिमानैस्तनौ चक्षुरादावहन्त्वेन सम्प्राप्यमेकाग्रचित्तैः ।यतीन्द्रैर्गुरुश्रेष्ठविज्ञाततत्त्वैर्महावाक्यगूढं भजे दक्षिणास्यम् ॥ १३॥

vidhūtābhimānaistanau cakṣurādāvahantvena samprāpyamekāgracittaiḥ |yatīndrairguruśreṣṭhavijñātatattvairmahāvākyagūḍhaṃ bhaje dakṣiṇāsyam || 13||

शुकाद्या मुनीन्द्रा विरक्ताग्रगण्याःसमाराध्य यं ब्रह्मविद्यामवापुः ।तमल्पार्चनातुष्टचेतोऽम्बुजातंचिदानन्दरूपं भजे दक्षिणास्यम् ॥ १४॥

śukādyā munīndrā viraktāgragaṇyāḥsamārādhya yaṃ brahmavidyāmavāpuḥ |tamalpārcanātuṣṭaceto'mbujātaṃcidānandarūpaṃ bhaje dakṣiṇāsyam || 14||

श्रुतेर्युक्तितश्चिन्तनाद्।ह्ध्यानयोगाद्भवेद्यस्य साक्षात्कृतिः पुण्यभाजाम् ।अखण्डं सदानन्दचिद्रूपमन्तःसदाहं मुदा तं भजे दक्षिणास्यम् ॥ १५॥

śruteryuktitaścintanād|hdhyānayogādbhavedyasya sākṣātkṛtiḥ puṇyabhājām |akhaṇḍaṃ sadānandacidrūpamantaḥsadāhaṃ mudā taṃ bhaje dakṣiṇāsyam || 15||

सुवर्णाद्रिचापं रमानाथबाणंदिनेशेन्दुचक्रं धरास्यन्दनाग्र्यम् ।विधिं सारथिं नागनाथं च मौर्वींप्रकुर्वाणमीशं भजे दक्षिणास्यम् ॥ १६॥

suvarṇādricāpaṃ ramānāthabāṇaṃdineśenducakraṃ dharāsyandanāgryam |vidhiṃ sārathiṃ nāganāthaṃ ca maurvīṃprakurvāṇamīśaṃ bhaje dakṣiṇāsyam || 16||

कराम्भोरुहैः पुस्तकं बोधमुद्रांसुधापूर्णकुम्भं स्रजं मौक्तिकानाम् ।दधानं धराधीशमौलौ शयानंशशाङ्कार्धचूडं भजे दक्षिणास्यम् ॥ १७॥

karāmbhoruhaiḥ pustakaṃ bodhamudrāṃsudhāpūrṇakumbhaṃ srajaṃ mauktikānām |dadhānaṃ dharādhīśamaulau śayānaṃśaśāṅkārdhacūḍaṃ bhaje dakṣiṇāsyam || 17||

कलादानदक्षं तुलाशून्यवक्त्रंशिलादात्मजेड्यं वलारातिपूज्यम् ।जलाद्यष्टमूर्तिं कलालापयुक्तंफलालिं दिशन्तं भजे दक्षिणास्यम् ॥ १८॥

kalādānadakṣaṃ tulāśūnyavaktraṃśilādātmajeḍyaṃ valārātipūjyam |jalādyaṣṭamūrtiṃ kalālāpayuktaṃphalāliṃ diśantaṃ bhaje dakṣiṇāsyam || 18||

यदालोकमात्रान्नतानां हृदब्जेशमाद्या गुणाः सत्वरं सम्भवन्ति ।प्रणम्रालिचेतःसरोजातभानुंगुरुं तं सुरेड्यं नमामो भजामः ॥ १९॥

yadālokamātrānnatānāṃ hṛdabjeśamādyā guṇāḥ satvaraṃ sambhavanti |praṇamrālicetaḥsarojātabhānuṃguruṃ taṃ sureḍyaṃ namāmo bhajāmaḥ || 19||

पिनद्धानि भक्त्याख्यसूत्रेण कण्ठेसदेमानि रत्नानि धत्ते दृढं यः ।मुदा मुक्तिकान्ता द्रुतं तं वृणीतेस्वयं शान्तिदान्तिप्रमुख्यालियुक्ता ॥ २०॥

pinaddhāni bhaktyākhyasūtreṇa kaṇṭhesademāni ratnāni dhatte dṛḍhaṃ yaḥ |mudā muktikāntā drutaṃ taṃ vṛṇītesvayaṃ śāntidāntipramukhyāliyuktā || 20||

इति शृङ्गेरि श्रीजगद्गुरु श्रीसच्चिदानन्दशिवाभिनवनृसिंहभारतीस्वामिभिः विरचिता श्रीदक्षिणास्यभुजङ्गप्रयातस्तुतिः सम्पूर्णा ।

iti śṛṅgeri śrījagadguru śrīsaccidānandaśivābhinavanṛsiṃhabhāratīsvāmibhiḥ viracitā śrīdakṣiṇāsyabhujaṅgaprayātastutiḥ sampūrṇā |