दक्षिणामूर्तिमनुसुवर्णमालास्तवः Shri Dakshinamurtimanusuvarnamalastavah

ओमिति निखिला देवा यस्याज्ञां शिरसि कुर्वते सततम् ।ओङ्कारपद्मभृङ्गं तमहं प्रणमामि दक्षिणामूर्तिम् ॥ १॥

omiti nikhilā devā yasyājñāṃ śirasi kurvate satatam |oṅkārapadmabhṛṅgaṃ tamahaṃ praṇamāmi dakṣiṇāmūrtim || 1||

नत्वा यत्पदयुग्मं मूका अपि वाग्विधूतगुरवः स्युः ।नतजनरक्षणदक्षं तमहं प्रणमामि दक्षिणामूर्तिम् ॥ २॥

natvā yatpadayugmaṃ mūkā api vāgvidhūtaguravaḥ syuḥ |natajanarakṣaṇadakṣaṃ tamahaṃ praṇamāmi dakṣiṇāmūrtim || 2||

मोहमतङ्गजभेदनपञ्चास्या यत्पदाम्बुजप्रणताः ।मोहान्धकारमिहिरं तमहं प्रणमामि दक्षिणामूर्तिम् ॥ ३॥

mohamataṅgajabhedanapañcāsyā yatpadāmbujapraṇatāḥ |mohāndhakāramihiraṃ tamahaṃ praṇamāmi dakṣiṇāmūrtim || 3||

भववारिधिमाशु तरेत्कुल्यामिव यत्पदाम्बुजध्यानात् ।भगवत्पदादिरूपं तमहं प्रणमामि दक्षिणामूर्तिम् ॥ ४॥

bhavavāridhimāśu taretkulyāmiva yatpadāmbujadhyānāt |bhagavatpadādirūpaṃ tamahaṃ praṇamāmi dakṣiṇāmūrtim || 4||

गतिविजितहंसगर्वं गगनमरुद्वह्णिजलधरारूपम् ।गजमुखषडास्यपूजितमनिशं प्रणमामि दक्षिणामूर्तिम् ॥ ५॥

gativijitahaṃsagarvaṃ gaganamarudvahṇijaladharārūpam |gajamukhaṣaḍāsyapūjitamaniśaṃ praṇamāmi dakṣiṇāmūrtim || 5||

वरयन्तेऽखिलविद्याः स्वयमेव यदङ्घ्रिपद्मनम्रजनान् ।वनवासलोलचित्तं तमहं प्रणमामि दक्षिणामूर्तिम् ॥ ६॥

varayante'khilavidyāḥ svayameva yadaṅghripadmanamrajanān |vanavāsalolacittaṃ tamahaṃ praṇamāmi dakṣiṇāmūrtim || 6||

तेन जितं जगदखिलं तेनैवात्तं समस्तभाग्यं च ।येन त्वत्पदयुगलं पूजितमपि जातु दक्षिणामूर्ते ॥ ७॥

tena jitaṃ jagadakhilaṃ tenaivāttaṃ samastabhāgyaṃ ca |yena tvatpadayugalaṃ pūjitamapi jātu dakṣiṇāmūrte || 7||

दमशममुखास्तु सुगुणाः प्राप्यन्ते सत्वरं यस्य ।पादाम्बुजयुगनमनात्तमहं प्रणमामि दक्षिणामूर्तिम् ॥ ८॥

damaśamamukhāstu suguṇāḥ prāpyante satvaraṃ yasya |pādāmbujayuganamanāttamahaṃ praṇamāmi dakṣiṇāmūrtim || 8||

क्षितिपतयो दासाः स्युर्यत्पादपाथोजपूजकस्याशु ।क्षितिधरशिखरावासं तमहं प्रणमामि दक्षिणामूर्तिम् ॥ ९॥

kṣitipatayo dāsāḥ syuryatpādapāthojapūjakasyāśu |kṣitidharaśikharāvāsaṃ tamahaṃ praṇamāmi dakṣiṇāmūrtim || 9||

णाणेति यन्मनुस्थं वर्णं जप्तुः समस्तपुरुषार्थाः ।करतलमध्यगताः स्युस्तमहं प्रणमामि दक्षिणामूर्तिम् ॥ १०॥

ṇāṇeti yanmanusthaṃ varṇaṃ japtuḥ samastapuruṣārthāḥ |karatalamadhyagatāḥ syustamahaṃ praṇamāmi dakṣiṇāmūrtim || 10||

मूर्तिं निरीक्ष्य मोहं प्राप्यागसुता पुरा तपस्तेपे ।यस्य प्राप्त्यै सुचिरं तमहं प्रणमामि दक्षिणामूर्तिम् ॥ ११॥

mūrtiṃ nirīkṣya mohaṃ prāpyāgasutā purā tapastepe |yasya prāptyai suciraṃ tamahaṃ praṇamāmi dakṣiṇāmūrtim || 11||

तस्याणिमादिसिद्धिर्विनैव योगं भवेन्न सन्देहः ।तरुणेन्दुभूषितजटं यस्त्वां नमतीह दक्षिणामूर्ते ॥ १२॥

tasyāṇimādisiddhirvinaiva yogaṃ bhavenna sandehaḥ |taruṇendubhūṣitajaṭaṃ yastvāṃ namatīha dakṣiṇāmūrte || 12||

ये त्वत्पादाब्जयुगलं चित्ते सन्दधति दक्षिणामूर्ते ।तान्मत्तवारणेन्द्रा दधति तुरङ्गाः सुवर्णशिबिकाश्च ॥ १३॥

ye tvatpādābjayugalaṃ citte sandadhati dakṣiṇāmūrte |tānmattavāraṇendrā dadhati turaṅgāḥ suvarṇaśibikāśca || 13||

मथितासुरसन्दोहं मानसचरमद्रिराजतनयायाः ।मानप्रदमानमतामनिशं प्रणमामि दक्षिणामूर्तिम् ॥ १४॥

mathitāsurasandohaṃ mānasacaramadrirājatanayāyāḥ |mānapradamānamatāmaniśaṃ praṇamāmi dakṣiṇāmūrtim || 14||

ह्यम्भोधौ लुठतां तत्पारं गन्तुं यदीयपदभक्तिः ।संसृतिरूपे नौका तमहं प्रणमामि दक्षिणामूर्तिम् ॥ १५॥

hyambhodhau luṭhatāṃ tatpāraṃ gantuṃ yadīyapadabhaktiḥ |saṃsṛtirūpe naukā tamahaṃ praṇamāmi dakṣiṇāmūrtim || 15||

मेधाप्रज्ञे चेटीभावं व्रजतो यदङ्घ्रिनतिकर्तुः ।मेनासखजाकान्तं तमहं प्रणमामि दक्षिणामूर्तिम् ॥ १६॥

medhāprajñe ceṭībhāvaṃ vrajato yadaṅghrinatikartuḥ |menāsakhajākāntaṃ tamahaṃ praṇamāmi dakṣiṇāmūrtim || 16||

धां बापूर्वां निखिलां योऽरं वारयति भक्तवृन्दस्य ।धाम्नामपि धामत्वदमनिशं प्रणमामि दक्षिणामूर्तिम् ॥ १७॥

dhāṃ bāpūrvāṃ nikhilāṃ yo'raṃ vārayati bhaktavṛndasya |dhāmnāmapi dhāmatvadamaniśaṃ praṇamāmi dakṣiṇāmūrtim || 17||

प्रज्ञामात्रशरीरं प्रणताघाम्भोधिकुम्भसञ्जातम् ।प्रत्यक्षं नतविततेः सततं प्रणमामि दक्षिणामूर्तिम् ॥ १८॥

prajñāmātraśarīraṃ praṇatāghāmbhodhikumbhasañjātam |pratyakṣaṃ natavitateḥ satataṃ praṇamāmi dakṣiṇāmūrtim || 18||

ज्ञांशीभूताञ्जीवान् भवमग्नान् ब्रह्मबोधदानेन ।कुर्वाणं प्रविमुक्तान् सततं प्रणमामि दक्षिणामूर्तिम् ॥ १९॥

jñāṃśībhūtāñjīvān bhavamagnān brahmabodhadānena |kurvāṇaṃ pravimuktān satataṃ praṇamāmi dakṣiṇāmūrtim || 19||

प्रत्नवचस्ततिगेयं प्रज्ञादानप्रचण्डनिजनमनम् ।प्रणवप्रतिपाद्यतनुं सततं प्रणमामि दक्षिणामूर्तिम् ॥ २०॥

pratnavacastatigeyaṃ prajñādānapracaṇḍanijanamanam |praṇavapratipādyatanuṃ satataṃ praṇamāmi dakṣiṇāmūrtim || 20||

यस्यार्धवर्ष्मलाभादेवाभूत्सर्वमङ्गला गिरिजा ।यमिवरहृदब्जनिलयं तमहं प्रणमामि दक्षिणामूर्तिम् ॥ २१॥

yasyārdhavarṣmalābhādevābhūtsarvamaṅgalā girijā |yamivarahṛdabjanilayaṃ tamahaṃ praṇamāmi dakṣiṇāmūrtim || 21||

छत्रीभूतवटागं छन्नमविद्याऽऽख्यवाससानादिम् ।छत्रादिनृपविभूतिदमनिशं प्रणमामि दक्षिणामूर्तिम् ॥ २२॥

chatrībhūtavaṭāgaṃ channamavidyā''khyavāsasānādim |chatrādinṛpavibhūtidamaniśaṃ praṇamāmi dakṣiṇāmūrtim || 22||

स्वाहास्वधानिषेव्यं स्वाकृतिसन्तोषितागजाहृदयम् ।स्वाहासहायतिलकं सततं प्रणमामि दक्षिणामूर्तिम् ॥ २३॥

svāhāsvadhāniṣevyaṃ svākṛtisantoṣitāgajāhṛdayam |svāhāsahāyatilakaṃ satataṃ praṇamāmi dakṣiṇāmūrtim || 23||

हासाधरीकृतविधुं हालाहलशोभमानगलदेशम् ।हारायिताहिराजं सततं प्रणमामि दक्षिणामूतिम्म् ॥ २४॥

hāsādharīkṛtavidhuṃ hālāhalaśobhamānagaladeśam |hārāyitāhirājaṃ satataṃ praṇamāmi dakṣiṇāmūtimm || 24||

श्रीमन्नृसिंहयतिराट्शिष्यः श्रीसच्चिदानन्दः ।अकरोद्गुरुवरकृपया स्तोत्रं श्रीदक्षिणामूर्तेः ॥ २५॥

śrīmannṛsiṃhayatirāṭśiṣyaḥ śrīsaccidānandaḥ |akarodguruvarakṛpayā stotraṃ śrīdakṣiṇāmūrteḥ || 25||

मनुवर्णघटितमेतत्स्तोत्रं यः पठति भक्तिसंयुक्तः ।तस्मै वटतटवासी दद्यात्सकलाः कलास्त्वरितम् ॥ २६॥

manuvarṇaghaṭitametatstotraṃ yaḥ paṭhati bhaktisaṃyuktaḥ |tasmai vaṭataṭavāsī dadyātsakalāḥ kalāstvaritam || 26||

इति शृङ्गेरि श्रीजगद्गुरु श्रीसच्चिदानन्दशिवाभिनवनृसिंहभारतीस्वामिभिः विरचितः श्रीदक्षिणामूर्तिमनुसुवर्णमालास्तवः समाप्तः ।

iti śṛṅgeri śrījagadguru śrīsaccidānandaśivābhinavanṛsiṃhabhāratīsvāmibhiḥ viracitaḥ śrīdakṣiṇāmūrtimanusuvarṇamālāstavaḥ samāptaḥ |