शिवविद्याकथनं अथवा शिवविद्याप्रश्नः Shivavidyakathanam Shivavidyaprashnah

शिवविद्या महाविद्या सा विद्या मुक्तिदायिनी ।तां विद्यां वेद वेदो वा गौरी वा शङ्करोऽथवा ॥ १॥

śivavidyā mahāvidyā sā vidyā muktidāyinī |tāṃ vidyāṃ veda vedo vā gaurī vā śaṅkaro'thavā || 1||

कुमारो वा गणेशो वा नन्दिकेशोऽपि वा स्वयम् ।यदि स्याद्गिरिजाकान्ते भक्तिरव्यभिचारिणी ॥ २॥

kumāro vā gaṇeśo vā nandikeśo'pi vā svayam |yadi syādgirijākānte bhaktiravyabhicāriṇī || 2||

तदैव शिवविद्यायाः स्वरूपप्रवणो भवेत् ।भक्तिरीशे तथा तावत् न कम्याप्यद्भुतं तपः ॥ ३॥

tadaiva śivavidyāyāḥ svarūpapravaṇo bhavet |bhaktirīśe tathā tāvat na kamyāpyadbhutaṃ tapaḥ || 3||

शिवविद्याप्रभावज्ञो दुर्लभो भूतले मुने ।यथा भक्तिर्महादेवे तव सा तपसा खलु ॥ ४॥

śivavidyāprabhāvajño durlabho bhūtale mune |yathā bhaktirmahādeve tava sā tapasā khalu || 4||

तथाऽद्यापि न दृष्टैव भक्तिरव्यभिचारिणी ।भक्तिरत्नतया ख्याता सैव भक्तिर्महेश्वरे ॥ ५॥

tathā'dyāpi na dṛṣṭaiva bhaktiravyabhicāriṇī |bhaktiratnatayā khyātā saiva bhaktirmaheśvare || 5||

सा भक्तिर्मुक्तिदा नॄणां संसारभयमोचिनी ।महादेवश्चिदाकारः परमानन्दविग्रहः ॥ ६॥

sā bhaktirmuktidā nṝṇāṃ saṃsārabhayamocinī |mahādevaścidākāraḥ paramānandavigrahaḥ || 6||

निर्गुणोऽपीति निर्णीतः पार्वतीपतिरित्यपि ।चन्द्रचूड इति ख्यातः त्रिपुरान्तक इत्यपि ॥ ७॥

nirguṇo'pīti nirṇītaḥ pārvatīpatirityapi |candracūḍa iti khyātaḥ tripurāntaka ityapi || 7||

स्मरारिरिति विख्यातः कालकण्ठ इति स्मृतः ।त्रिशूलपाणिः सर्वेशो जटामण्डलमण्डितः ॥ ८॥

smarāririti vikhyātaḥ kālakaṇṭha iti smṛtaḥ |triśūlapāṇiḥ sarveśo jaṭāmaṇḍalamaṇḍitaḥ || 8||

उमार्धविग्रहत्वेन प्रख्यातः परमेश्वरः ।अन्धकारिरिति ख्यातो वृषभध्वज इत्यपि ॥ ९॥

umārdhavigrahatvena prakhyātaḥ parameśvaraḥ |andhakāririti khyāto vṛṣabhadhvaja ityapi || 9||

लिङ्गाकार इति ख्यातो भस्मोद्धूलितविग्रहः ।रुद्राक्षभूषणः शान्तो नीलकण्ठ इति स्मृतः ॥ १०॥

liṅgākāra iti khyāto bhasmoddhūlitavigrahaḥ |rudrākṣabhūṣaṇaḥ śānto nīlakaṇṭha iti smṛtaḥ || 10||

विरूपाक्ष इति ख्यातो दक्षो दाक्षायणीप्रियः ।कुमारगुरुरव्यक्तो व्यक्तः सुन्दरविग्रहः ॥ ११॥

virūpākṣa iti khyāto dakṣo dākṣāyaṇīpriyaḥ |kumāragururavyakto vyaktaḥ sundaravigrahaḥ || 11||

कामारिरिति विख्यातः कामदत्वेन कीर्तितः ।अक्षरत्वेन विज्ञातो विज्ञानानन्दसागरः ॥ १२॥

kāmāririti vikhyātaḥ kāmadatvena kīrtitaḥ |akṣaratvena vijñāto vijñānānandasāgaraḥ || 12||

ईश्वरः परमात्मा च परमात्मा परात्परः ।इत्यन्योन्यं विरुद्धं हि नाम सर्वे चिदात्मके ॥ १३॥

īśvaraḥ paramātmā ca paramātmā parātparaḥ |ityanyonyaṃ viruddhaṃ hi nāma sarve cidātmake || 13||

चिद्विलास इति ख्यातं चिदित्यपि विशेषतः ।इदं सर्वं वदास्मभ्यं शिवधर्मान् विशेषतः ॥ १४॥

cidvilāsa iti khyātaṃ cidityapi viśeṣataḥ |idaṃ sarvaṃ vadāsmabhyaṃ śivadharmān viśeṣataḥ || 14||

॥ इति शिवरहस्यान्तर्गते शिवविद्याकथनं / शिवविद्याप्रश्नः सम्पूर्णः ॥॥ श्रीशिवरहस्यम् । हराख्यः तृतीयांशः । पूर्वार्धम् । अध्यायः २। ११४ ॥

|| iti śivarahasyāntargate śivavidyākathanaṃ / śivavidyāpraśnaḥ sampūrṇaḥ |||| śrīśivarahasyam | harākhyaḥ tṛtīyāṃśaḥ | pūrvārdham | adhyāyaḥ 2| 114 ||

– ॥ श्रीशिवरहस्यम् ।हराख्यः तृतीयांशः ।पूर्वार्धम् ।अध्यायः २। १-१४ ॥

– || śrīśivarahasyam |harākhyaḥ tṛtīyāṃśaḥ |pūrvārdham |adhyāyaḥ 2| 1-14 ||