शिवविद्या अथवा शिवदीक्षामहिमा Shivavidya Evam Shivadiksha Mahima

शिवदीक्षाप्रभावस्तु शिवेन ज्ञायते परः ।यद्यप्यथापि तद्रूपं शृणु सादरमस्ति कः ॥ १॥

śivadīkṣāprabhāvastu śivena jñāyate paraḥ |yadyapyathāpi tadrūpaṃ śṛṇu sādaramasti kaḥ || 1||

शिवमन्त्रे दीक्षितस्य तनुं दृष्ट्वाऽपि दूरतः ।प्रयान्ति यमदूतास्तु तथा पातकपर्वताः ॥ २॥

śivamantre dīkṣitasya tanuṃ dṛṣṭvā'pi dūrataḥ |prayānti yamadūtāstu tathā pātakaparvatāḥ || 2||

अधुनैव त्वया दृष्टः पापाकारो गजो महान् ।महापर्वतसङ्काशो ज्वलत्यद्यापि पश्य तम् ॥ ३॥

adhunaiva tvayā dṛṣṭaḥ pāpākāro gajo mahān |mahāparvatasaṅkāśo jvalatyadyāpi paśya tam || 3||

पापानि गजरूपेण निर्गतानि तवाधुना ।मत्भालभूतिसङ्गेन मदङ्गालोकनादपि ॥ ४॥

pāpāni gajarūpeṇa nirgatāni tavādhunā |matbhālabhūtisaṅgena madaṅgālokanādapi || 4||

दीक्षितः शैवविद्यायां बाल्ये भाग्यवशादहम् ।श्रीकालकालकरुणां सम्पूर्णा मयि तिष्ठति ॥ ५॥

dīkṣitaḥ śaivavidyāyāṃ bālye bhāgyavaśādaham |śrīkālakālakaruṇāṃ sampūrṇā mayi tiṣṭhati || 5||

ये ये शाम्भाविद्यायां दीक्षितास्ते तपोधनाः ।तत्पादरजला तावत् पावनं भुवनत्रयम् ॥ ६॥

ye ye śāmbhāvidyāyāṃ dīkṣitāste tapodhanāḥ |tatpādarajalā tāvat pāvanaṃ bhuvanatrayam || 6||

यस्य शाम्भवविद्यायां भक्तिर्भवति भाग्यतः ।तं नमन्ति सुराः सर्वे शर्वानुग्रहकाङ्क्षया ॥ ७॥

yasya śāmbhavavidyāyāṃ bhaktirbhavati bhāgyataḥ |taṃ namanti surāḥ sarve śarvānugrahakāṅkṣayā || 7||

अक्षयं धनमस्माकं सा विद्या शाम्भवी खलु ।अन्यत् धनं क्षयं याति न तद्याति क्षयं (नृप) ॥ ८॥

akṣayaṃ dhanamasmākaṃ sā vidyā śāmbhavī khalu |anyat dhanaṃ kṣayaṃ yāti na tadyāti kṣayaṃ (nṛpa) || 8||

बहुपुण्याब्धयः शैवाः तां दीक्षां प्राप्य सादरम् ।दृष्ट्वा भवन्ति ते तावत् द्वित्रा एव कलौ खलु ॥ ९॥

bahupuṇyābdhayaḥ śaivāḥ tāṃ dīkṣāṃ prāpya sādaram |dṛṣṭvā bhavanti te tāvat dvitrā eva kalau khalu || 9||

न यस्य पातकाद्भीतिः न यमादपि जायते ।तस्य पुण्यस्वरूपस्य विद्या भवति शाम्भवी ॥ १०॥

na yasya pātakādbhītiḥ na yamādapi jāyate |tasya puṇyasvarūpasya vidyā bhavati śāmbhavī || 10||

कैलासमपि सम्प्राप्ताः शैवाः शाम्भवविद्यया ।सोपानरूपा विद्येयं कैलासारोहणोद्यमा ॥ ११॥

kailāsamapi samprāptāḥ śaivāḥ śāmbhavavidyayā |sopānarūpā vidyeyaṃ kailāsārohaṇodyamā || 11||

नान्यैरुपायैस्तल्लाभः कैलासो दुर्लभोऽप्ययम् ।सुलभत्वेन विज्ञेयस्तया शाम्भवविद्यया ॥ १२॥

nānyairupāyaistallābhaḥ kailāso durlabho'pyayam |sulabhatvena vijñeyastayā śāmbhavavidyayā || 12||

न यस्य शाम्भवी विद्या तस्य जन्म निरर्थकम् ।वन्ध्या तज्जननी (राजन्) तेन पुत्रेण कि फलम् ॥ १३॥

na yasya śāmbhavī vidyā tasya janma nirarthakam |vandhyā tajjananī (rājan) tena putreṇa ki phalam || 13||

मानुषं जन्म सम्प्राप्य द्विजत्वं च विशेषतः ।सम्प्राप्य शाम्भवीं विद्यां राजते द्विजराजवत् ॥ १४॥

mānuṣaṃ janma samprāpya dvijatvaṃ ca viśeṣataḥ |samprāpya śāmbhavīṃ vidyāṃ rājate dvijarājavat || 14||

तृप्ता भवन्ति पितरः तया शाम्भवविद्यया ।तद्विद्यासहितं विषं प्रणमन्ति मुनीश्वराः ॥ १५॥

tṛptā bhavanti pitaraḥ tayā śāmbhavavidyayā |tadvidyāsahitaṃ viṣaṃ praṇamanti munīśvarāḥ || 15||

ब्राह्मणः शाम्भवीं विद्यां यावन्नाप्नोति पुण्यदाम् ।तावन्न स प्रणामार्हो न दानार्होऽपि (भूपते) ॥ १६॥

brāhmaṇaḥ śāmbhavīṃ vidyāṃ yāvannāpnoti puṇyadām |tāvanna sa praṇāmārho na dānārho'pi (bhūpate) || 16||

अभ्यस्य शाम्भवीं विद्यां शिवार्चनरतो यदि ।तदैव स्यात् प्रणामार्हो दानार्होऽपीति मन्महे ॥ १७॥

abhyasya śāmbhavīṃ vidyāṃ śivārcanarato yadi |tadaiva syāt praṇāmārho dānārho'pīti manmahe || 17||

परमा शाम्भवी विद्या दुर्लभा परमार्थतः ।अतस्तत्राधिकारोऽपि दुर्लभत्वेन निश्चितः ॥ १८॥

paramā śāmbhavī vidyā durlabhā paramārthataḥ |atastatrādhikāro'pi durlabhatvena niścitaḥ || 18||

सम्प्राप्य शाम्भवीं विद्यां शम्भुपूजां करोति चेत् ।तदा शिवेन सा पूजा गृह्यते प्रीतिपूर्वकम् ॥ १९॥

samprāpya śāmbhavīṃ vidyāṃ śambhupūjāṃ karoti cet |tadā śivena sā pūjā gṛhyate prītipūrvakam || 19||

तथैव विद्यया दत्तं शिवलिङ्गे जलादिकम् ।सुधात्वं याति तेनैव मुक्तास्तत्पितरोऽपि हि ॥ २०॥

tathaiva vidyayā dattaṃ śivaliṅge jalādikam |sudhātvaṃ yāti tenaiva muktāstatpitaro'pi hi || 20||

॥ इति शिवरहस्यान्तर्गते शिवविद्या एवं शिवदीक्षा महिमा सम्पूर्णा ॥॥ श्रीशिवरहस्यम् । हराख्यः तृतीयांशः । पूर्वार्धम् । अध्यायः २३। ५२४ ॥

|| iti śivarahasyāntargate śivavidyā evaṃ śivadīkṣā mahimā sampūrṇā |||| śrīśivarahasyam | harākhyaḥ tṛtīyāṃśaḥ | pūrvārdham | adhyāyaḥ 23| 524 ||

– ॥ श्रीशिवरहस्यम् ।हराख्यः तृतीयांशः ।पूर्वार्धम् ।अध्यायः २३। ५-२४ ॥

– || śrīśivarahasyam |harākhyaḥ tṛtīyāṃśaḥ |pūrvārdham |adhyāyaḥ 23| 5-24 ||