शिवपूजनमहिमा Shivapujanamahima

शिवपूजनमुत्कृष्टं सर्वसिद्धिप्रदायकम् ।तदेव न कृतं तस्य जन्म तावन्निरर्थकम् ॥ १७॥

śivapūjanamutkṛṣṭaṃ sarvasiddhipradāyakam |tadeva na kṛtaṃ tasya janma tāvannirarthakam || 17||

शिवप्रसादलब्धानि धनधान्यादिकान्यतः ।तैरर्चनं महेशस्य कृत्वा मुक्तिमवाप्नुयात् ॥ १८॥

śivaprasādalabdhāni dhanadhānyādikānyataḥ |tairarcanaṃ maheśasya kṛtvā muktimavāpnuyāt || 18||

तदीयमेव दत्वापि तस्मै भाग्यमनुत्तमम् ।प्राध्यमित्येव यत्नेन कर्तव्यं शिवपूजनम् ॥ १९॥

tadīyameva datvāpi tasmai bhāgyamanuttamam |prādhyamityeva yatnena kartavyaṃ śivapūjanam || 19||

विना न पुण्यपुञ्जेन भक्तिर्मृत्युञ्जयार्चने ।अतः पुण्यात्मना नित्यं कर्तव्यं शिवपूजनम् ॥ २०॥

vinā na puṇyapuñjena bhaktirmṛtyuñjayārcane |ataḥ puṇyātmanā nityaṃ kartavyaṃ śivapūjanam || 20||

शिवार्चनेन विज्ञेयः पुण्यवानिति मानवः ।तदभावेन विज्ञेयो महापातकवानिति ॥ २१॥

śivārcanena vijñeyaḥ puṇyavāniti mānavaḥ |tadabhāvena vijñeyo mahāpātakavāniti || 21||

अतः स दूरतस्त्याज्यो यो नार्चयति शङ्करम् ।तत्संयोगाभिलापाद्यैर्मानवः पापवान् भवेत् ॥ २२॥

ataḥ sa dūratastyājyo yo nārcayati śaṅkaram |tatsaṃyogābhilāpādyairmānavaḥ pāpavān bhavet || 22||

येन केनापि रूपेण शरीरं प्राप्य मानवः ।शिवार्चनपरो भूयात् स भूयः पुण्यवान् भवेत् ॥ २३॥

yena kenāpi rūpeṇa śarīraṃ prāpya mānavaḥ |śivārcanaparo bhūyāt sa bhūyaḥ puṇyavān bhavet || 23||

शिवार्चनपरो मर्त्यः प्रणतः संस्तुतः स्मृतः ।हरत्यघान्यनन्तानि घोराणि विविधान्यपि ॥ २४॥

śivārcanaparo martyaḥ praṇataḥ saṃstutaḥ smṛtaḥ |haratyaghānyanantāni ghorāṇi vividhānyapi || 24||

घोरपापवनस्यायं कुठारः शङ्करार्चकः ।अतः सर्वप्रयत्नैश्च कर्तव्यं शिवपूजनम् ॥ २५॥

ghorapāpavanasyāyaṃ kuṭhāraḥ śaṅkarārcakaḥ |ataḥ sarvaprayatnaiśca kartavyaṃ śivapūjanam || 25||

अतः परं त्वयोन्मादः परित्याज्यः प्रयत्नतः ।शिवपूजां कुरु प्रीत्या तव मुक्तिर्भविष्यति ॥ २६॥

ataḥ paraṃ tvayonmādaḥ parityājyaḥ prayatnataḥ |śivapūjāṃ kuru prītyā tava muktirbhaviṣyati || 26||

शरीरं शिवपूजायै यौवने दक्षमित्यतः ।प्रयत्नेन महादेवं पूजयस्व यथोचितम् ॥ २७॥

śarīraṃ śivapūjāyai yauvane dakṣamityataḥ |prayatnena mahādevaṃ pūjayasva yathocitam || 27||

स्नानं कुरु प्रयत्नेन शिवकुण्डे शिवोदके ।उद्धूल्य भस्मनाङ्गानि त्रिपुण्ड्र च प्रयत्नतः ॥ २८॥

snānaṃ kuru prayatnena śivakuṇḍe śivodake |uddhūlya bhasmanāṅgāni tripuṇḍra ca prayatnataḥ || 28||

शिरोललाटवक्षःसु स्कन्धे च मणिबन्धने ।कूर्परे नाभिदेशेच पार्श्वयोर्गण्डमण्डले ॥ २९॥

śirolalāṭavakṣaḥsu skandhe ca maṇibandhane |kūrpare nābhideśeca pārśvayorgaṇḍamaṇḍale || 29||

ऊरुप्रदेशे गुल्फेच त्रिपुण्ड्रं धारयेन्मुहुः ।रुद्राक्षधारणं कार्यं द्वात्रिंशत् कण्ठमालया ॥ ३०॥

ūrupradeśe gulpheca tripuṇḍraṃ dhārayenmuhuḥ |rudrākṣadhāraṇaṃ kāryaṃ dvātriṃśat kaṇṭhamālayā || 30||

शिखायामेकमेव स्यात् द्विचत्वारिंशदुत्तमाः ।रुद्राक्षाः शिरसा धार्याः कर्णयोर्द्वादश द्वयोः ॥ ३१॥

śikhāyāmekameva syāt dvicatvāriṃśaduttamāḥ |rudrākṣāḥ śirasā dhāryāḥ karṇayordvādaśa dvayoḥ || 31||

शतत्रयं तूपवीते बाह्वोः षोडश षोडश ।चतुर्विंशति रुद्राक्षाः द्वयोस्तु मणिबन्धयोः ॥ ३२॥

śatatrayaṃ tūpavīte bāhvoḥ ṣoḍaśa ṣoḍaśa |caturviṃśati rudrākṣāḥ dvayostu maṇibandhayoḥ || 32||

अष्टोत्तरशतैरेव रुद्राक्षैर्जपमालिका ।तया पञ्चाक्षरं जप्त्वा शैवः शिवमवाप्नुयात् ॥ ३३॥

aṣṭottaraśataireva rudrākṣairjapamālikā |tayā pañcākṣaraṃ japtvā śaivaḥ śivamavāpnuyāt || 33||

त्रिभिराचमनं स्त्रीणां पुंसामिव यथाविधि ।भवाद्यैर्नामभिर्यद्वा शिवपञ्चाक्षरेण वा ॥ ३४॥

tribhirācamanaṃ strīṇāṃ puṃsāmiva yathāvidhi |bhavādyairnāmabhiryadvā śivapañcākṣareṇa vā || 34||

पश्चात् कुशासने स्थित्वा यद्वा व्याघ्राजिनादिषु ।उदङ्मुखः प्राङ्मुखो वा पूजयेद्गिरिजापतिम् ॥ ३५॥

paścāt kuśāsane sthitvā yadvā vyāghrājinādiṣu |udaṅmukhaḥ prāṅmukho vā pūjayedgirijāpatim || 35||

पञ्चामृताभिषेकाद्यैः कर्पूरादिसमन्वितैः ।जलैः फलोदकैरीशं आम्रादिकरसैरपि ॥ ३६॥

pañcāmṛtābhiṣekādyaiḥ karpūrādisamanvitaiḥ |jalaiḥ phalodakairīśaṃ āmrādikarasairapi || 36||

शुद्धोदकैः कवोष्णैर्वा शीतलैर्वा मनोहरैः ।पश्चात् दुकूलवसनैः पूजयित्वा सदाशिवम् ॥ ३७॥

śuddhodakaiḥ kavoṣṇairvā śītalairvā manoharaiḥ |paścāt dukūlavasanaiḥ pūjayitvā sadāśivam || 37||

सुगन्धचन्दनेनापि पूजयेद्गिरिजापतिम् ।बिल्वपत्रैरक्षतैश्च प्रफुल्लकुसुमैरपि ॥ ३८॥

sugandhacandanenāpi pūjayedgirijāpatim |bilvapatrairakṣataiśca praphullakusumairapi || 38||

मन्दारादिप्रसूनानां मालिकाभिः समर्चयेत् ।पश्चाद्धूपय धूपैश्च दीपैः कर्पूरसम्भवैः ॥ ३९॥

mandārādiprasūnānāṃ mālikābhiḥ samarcayet |paścāddhūpaya dhūpaiśca dīpaiḥ karpūrasambhavaiḥ || 39||

ओदनैराज्यसंयुक्तैः शाकसूपसमन्वितैः ।परमान्नैर्घृतयुतैः शर्कराराशिसंयुतैः ॥ ४०॥

odanairājyasaṃyuktaiḥ śākasūpasamanvitaiḥ |paramānnairghṛtayutaiḥ śarkarārāśisaṃyutaiḥ || 40||

लड्डुकैर्वटुकैराज्यैः अपूपैर्मण्डकादिभिः ।भक्ष्यैर्लेह्येश्च चोष्यैश्च पेयैश्च विविधैरपि ॥ ४१॥

laḍḍukairvaṭukairājyaiḥ apūpairmaṇḍakādibhiḥ |bhakṣyairlehyeśca coṣyaiśca peyaiśca vividhairapi || 41||

कदलीनारिकेलाद्यैः अपारैः फलमण्डलैः ।इक्षुदण्डैश्च मण्डैश्च दधिक्षीररसोद्भवैः ॥ ४२॥

kadalīnārikelādyaiḥ apāraiḥ phalamaṇḍalaiḥ |ikṣudaṇḍaiśca maṇḍaiśca dadhikṣīrarasodbhavaiḥ || 42||

दध्योदनैश्च क्षीरैश्च दधिर्पूरैर्मनोरमैः ।सुगन्धजलपूरैश्च नवेक्षुरसपूरकैः ॥ ४३॥

dadhyodanaiśca kṣīraiśca dadhirpūrairmanoramaiḥ |sugandhajalapūraiśca navekṣurasapūrakaiḥ || 43||

द्राक्षाराशिरसैरेता लवङ्गपरिवेष्टितैः ।अन्यैरपि रसद्रव्यैः पूजयित्वा महेश्वरम् ॥ ४४॥

drākṣārāśirasairetā lavaṅgapariveṣṭitaiḥ |anyairapi rasadravyaiḥ pūjayitvā maheśvaram || 44||

पश्चादाभरणं दद्यात् रत्नराशिविराजितम् ।पुनर्वस्त्राणि रम्याणि रत्नछत्रादिकं तथा ॥ ४५॥

paścādābharaṇaṃ dadyāt ratnarāśivirājitam |punarvastrāṇi ramyāṇi ratnachatrādikaṃ tathā || 45||

दर्पणं चारु व्यजनं चामीकरविराजितम् ।चामरं पुष्पमालाश्च पताकाश्च मनोहराः ॥ ४६॥

darpaṇaṃ cāru vyajanaṃ cāmīkaravirājitam |cāmaraṃ puṣpamālāśca patākāśca manoharāḥ || 46||

देयं कर्पूरदीपानां नीराजनमनुत्तमम् ।पश्चादास्वेदमीशाय प्रणतो नर्तनोत्सवैः ॥ ४७॥

deyaṃ karpūradīpānāṃ nīrājanamanuttamam |paścādāsvedamīśāya praṇato nartanotsavaiḥ || 47||

रुद्राध्यायादिमन्त्राणां स्तोत्रैः शाम्भवशोभनैः ।पुण्यैः शिवकथालापैः कालो नेयः प्रयत्नतः ॥ ४८॥

rudrādhyāyādimantrāṇāṃ stotraiḥ śāmbhavaśobhanaiḥ |puṇyaiḥ śivakathālāpaiḥ kālo neyaḥ prayatnataḥ || 48||

एवमासायमीशार्चा कर्तव्या मुक्तिकाङ्क्षिभिः ।सायङ्काले विशेषेण पुनः पूजां समारभेत् ॥ ४९॥

evamāsāyamīśārcā kartavyā muktikāṅkṣibhiḥ |sāyaṅkāle viśeṣeṇa punaḥ pūjāṃ samārabhet || 49||

उक्तैनैव प्रकारेण मोक्षदं शिवपूजनम् ।लिङ्गरूपिणमीशानं प्रदोषे यस्तु पश्यति ॥ ५०॥

uktainaiva prakāreṇa mokṣadaṃ śivapūjanam |liṅgarūpiṇamīśānaṃ pradoṣe yastu paśyati || 50||

स वंशकोटिसंयुक्तः शिवलोकं प्रयच्छति ।ब्रह्महत्यादिपापानां प्रलयाय प्रजायते ॥ ५१॥

sa vaṃśakoṭisaṃyuktaḥ śivalokaṃ prayacchati |brahmahatyādipāpānāṃ pralayāya prajāyate || 51||

॥ इति शिवरहस्यान्तर्गते शिवपूजनमहिमा सम्पूर्णा ॥॥ श्रीशिवरहस्यम् । हराख्यः तृतीयांशः । उत्तरार्धम् । अध्यायः १याज्ञवल्क्यजनकसंवादे राजपुत्रेण राजपत्न्युपदेशवर्णनम् । १७५१॥

|| iti śivarahasyāntargate śivapūjanamahimā sampūrṇā |||| śrīśivarahasyam | harākhyaḥ tṛtīyāṃśaḥ | uttarārdham | adhyāyaḥ 1yājñavalkyajanakasaṃvāde rājaputreṇa rājapatnyupadeśavarṇanam | 1751||

– ॥ श्रीशिवरहस्यम् । हराख्यः तृतीयांशः । उत्तरार्धम् । अध्यायः १ –याज्नवल्क्यजनकसंवादे राजपुत्रेण राजपत्न्युपदेशवर्णनम् । १७-५१॥

– || śrīśivarahasyam | harākhyaḥ tṛtīyāṃśaḥ | uttarārdham | adhyāyaḥ 1 –yājnavalkyajanakasaṃvāde rājaputreṇa rājapatnyupadeśavarṇanam | 17-51||