कपटेश्वरावतारशिवस्तोत्रराजः Kapateshvaravatara Shivastotrarajah

ॐ वृक्षैरावृतकायाय पराय परमात्मने ।नानारूपाय देवाय नमस्तुभ्यं स्वयम्भुवे ॥ १॥

oṃ vṛkṣairāvṛtakāyāya parāya paramātmane |nānārūpāya devāya namastubhyaṃ svayambhuve || 1||

शिवाय शितिकण्ठाय सोमसूर्याग्निचक्षुषे ।भीमाय भीमरूपाय भीषणायामृताय च ॥ २॥

śivāya śitikaṇṭhāya somasūryāgnicakṣuṣe |bhīmāya bhīmarūpāya bhīṣaṇāyāmṛtāya ca || 2||

चण्डाय चण्डरुद्राय चण्डशूलाग्रपाणये ।योगिने ब्रह्मनिष्ठाय सर्वायुधधराय च ॥ ३॥

caṇḍāya caṇḍarudrāya caṇḍaśūlāgrapāṇaye |yogine brahmaniṣṭhāya sarvāyudhadharāya ca || 3||

उमायाः स्वामिने तुभ्यं पशूनां पतये नमः ।ऋग्यजुःसाममन्त्राणां त्रैलोक्यपतये नमः ॥ ४॥

umāyāḥ svāmine tubhyaṃ paśūnāṃ pataye namaḥ |ṛgyajuḥsāmamantrāṇāṃ trailokyapataye namaḥ || 4||

चन्द्रसूर्याग्निमरुतामम्भसां पतये नमः ।सिताय कृष्णवर्णाय पीताय कर्बुराय च ॥ ५॥

candrasūryāgnimarutāmambhasāṃ pataye namaḥ |sitāya kṛṣṇavarṇāya pītāya karburāya ca || 5||

अरुणाय पिशङ्गाय सर्वोद्भवभवाय च ।सवृषायोग्रकायाय सोमाय सगुहाय च ॥ ६॥

aruṇāya piśaṅgāya sarvodbhavabhavāya ca |savṛṣāyograkāyāya somāya saguhāya ca || 6||

सगणाय नमस्तुभ्यं नमस्तेऽस्तु सनन्दिने ।गजेन्द्रवक्त्रसहितसभृङ्गिन्टिये नमः ॥ ७॥

sagaṇāya namastubhyaṃ namaste'stu sanandine |gajendravaktrasahitasabhṛṅginṭiye namaḥ || 7||

विश्वैः साध्यैः सुतस्त्वं हि ब्रह्मणा केशवेन च ।सततं स्तूयसे देवैरृषिभिर्भावितात्मधिः ॥ ८॥

viśvaiḥ sādhyaiḥ sutastvaṃ hi brahmaṇā keśavena ca |satataṃ stūyase devairṛṣibhirbhāvitātmadhiḥ || 8||

स्तुत्यानां गुणसङ्घानां नान्तोऽस्ति तव शङ्कर ।देवान्पितृईँश्च देवेश मुनीन्सिद्धान्प्रजापतीन् ॥ ९॥

stutyānāṃ guṇasaṅghānāṃ nānto'sti tava śaṅkara |devānpitṛīm̐śca deveśa munīnsiddhānprajāpatīn || 9||

नियुनक्षि सदा देव स्वेषु स्वेष्वेव कर्मसु ।योगिनां योगयोनिस्त्वं योगकर्ता च शङ्कर ॥ १०॥

niyunakṣi sadā deva sveṣu sveṣveva karmasu |yogināṃ yogayonistvaṃ yogakartā ca śaṅkara || 10||

ध्रुवोऽव्ययो ह्यजो नित्यः संहर्ता भूतभावनः ।विश्वरूपो ह्यनन्तश्च स्वनित्यो वृषवाहनः ॥ ११॥

dhruvo'vyayo hyajo nityaḥ saṃhartā bhūtabhāvanaḥ |viśvarūpo hyanantaśca svanityo vṛṣavāhanaḥ || 11||

अजितो ह्यप्रमेयश्च लोकालोकप्रकाशकः ।प्रभुर्वरेण्यो भगवान्वर्णाश्रमविभागवित् ॥ १२॥

ajito hyaprameyaśca lokālokaprakāśakaḥ |prabhurvareṇyo bhagavānvarṇāśramavibhāgavit || 12||

सुसूक्ष्मो ह्यव्ययो व्यापी भवार्णवतरिर्विभुः ।त्वां न जानन्ति ये मूढा नैते यान्ति परां गतिम् ॥ १३॥

susūkṣmo hyavyayo vyāpī bhavārṇavatarirvibhuḥ |tvāṃ na jānanti ye mūḍhā naite yānti parāṃ gatim || 13||

जायन्ते च म्रियन्ते च कर्मभिर्विवशीकृताः ।जितकामा जितक्रोधा जितद्वन्द्वा जितेन्द्रियाः ॥ १४॥

jāyante ca mriyante ca karmabhirvivaśīkṛtāḥ |jitakāmā jitakrodhā jitadvandvā jitendriyāḥ || 14||

त्वां ज्ञात्वा देहिनो नित्यं गच्छन्ति परमां गतिम् ।त्र्यम्बकस्त्रिपुरेशानस्त्रिपुरघ्नो महीधरः ॥ १५॥

tvāṃ jñātvā dehino nityaṃ gacchanti paramāṃ gatim |tryambakastripureśānastripuraghno mahīdharaḥ || 15||

त्रिलोकपाता पर्जन्यः कालकामाङ्गनाशनः ।ब्रह्मविष्ण्विन्द्ररुद्राणामन्येषां चैव देहिनाम् ॥ १६॥

trilokapātā parjanyaḥ kālakāmāṅganāśanaḥ |brahmaviṣṇvindrarudrāṇāmanyeṣāṃ caiva dehinām || 16||

संहारकाले देवेश स्मृतिमाक्षिप्य तिष्ठसि ।ध्येयस्त्वं योगनिष्ठानां मुनीनां भावितात्मनाम् ॥ १७॥

saṃhārakāle deveśa smṛtimākṣipya tiṣṭhasi |dhyeyastvaṃ yoganiṣṭhānāṃ munīnāṃ bhāvitātmanām || 17||

स्तुतवन्तश्च ते सर्वे सर्वदुःखविनाशनम् ।योगिनां योगसिद्धिस्त्वं योगस्योत्पत्तिकारकः ॥ १८॥

stutavantaśca te sarve sarvaduḥkhavināśanam |yogināṃ yogasiddhistvaṃ yogasyotpattikārakaḥ || 18||

तिष्ठ मे हृदये नित्यं वीर्यात्मा सुरसत्तमः ।चक्षुषोर्हृदये चैव भ्रुवोर्मध्यगतस्तथा ॥ १९॥

tiṣṭha me hṛdaye nityaṃ vīryātmā surasattamaḥ |cakṣuṣorhṛdaye caiva bhruvormadhyagatastathā || 19||

निष्कलं ध्यायिनस्त्वां हि प्रपश्यन्ति सदाशिवम् ।पञ्चधा त्वं शरीरेषु देहिनां सम्प्रतिष्ठसि ॥ २०॥

niṣkalaṃ dhyāyinastvāṃ hi prapaśyanti sadāśivam |pañcadhā tvaṃ śarīreṣu dehināṃ sampratiṣṭhasi || 20||

प्राणायामैः क्षपयसे कल्मषं विश्वसम्भवम् ।ब्रह्मादीनां च देवानामन्येषां चैव देहिनाम् ॥ २१॥

prāṇāyāmaiḥ kṣapayase kalmaṣaṃ viśvasambhavam |brahmādīnāṃ ca devānāmanyeṣāṃ caiva dehinām || 21||

सुखस्य दाता नान्योऽस्ति इति मे निश्चिता मतिः ।अस्माकमपि देवेश कर्मण्युद्विग्नचेतसाम् ।शरणं भव भीतानां संसाराध्वनि वर्तताम् ॥ २२॥

sukhasya dātā nānyo'sti iti me niścitā matiḥ |asmākamapi deveśa karmaṇyudvignacetasām |śaraṇaṃ bhava bhītānāṃ saṃsārādhvani vartatām || 22||

नान्या गतिर्महादेव विद्यते शरणार्थिनाम् ।मुक्त्वा तद्भक्तिमीशान शशाङ्ककृतशेखर ॥ २३॥

nānyā gatirmahādeva vidyate śaraṇārthinām |muktvā tadbhaktimīśāna śaśāṅkakṛtaśekhara || 23||

तनुभिर्धारयस्येव जगत्स्थावरजङ्गमम् ।नान्यं पश्यामि देवेश व्यापिनं सचराचरम् ॥ २४॥

tanubhirdhārayasyeva jagatsthāvarajaṅgamam |nānyaṃ paśyāmi deveśa vyāpinaṃ sacarācaram || 24||

अङ्गुष्ठपर्वमात्राणां जातानां ब्रह्मतेजसा ।तपसा च महादेवाद्वाञ्छितमुत्तमं वरम् ॥ २५॥

aṅguṣṭhaparvamātrāṇāṃ jātānāṃ brahmatejasā |tapasā ca mahādevādvāñchitamuttamaṃ varam || 25||

संसारार्णवमग्नानामिच्छतां विपुलं यशः ।अस्माकं देवदेवेश प्रसादं कर्तुमर्हसि ॥ २६॥

saṃsārārṇavamagnānāmicchatāṃ vipulaṃ yaśaḥ |asmākaṃ devadeveśa prasādaṃ kartumarhasi || 26||

न ज्ञानं न च वा ध्यानं न तपो न च वै क्रतुः ।सर्वभावविहीनानां शरणं त्वं महेश्वर ॥ २७॥

na jñānaṃ na ca vā dhyānaṃ na tapo na ca vai kratuḥ |sarvabhāvavihīnānāṃ śaraṇaṃ tvaṃ maheśvara || 27||

ब्रह्मविष्विन्द्रगोप्ता त्वं ब्रह्मण्यो ब्रह्मवित्तमः ।ब्रह्मचारी परं पात्रं नीलग्रीवो गुहाशयः ॥ २८॥

brahmaviṣvindragoptā tvaṃ brahmaṇyo brahmavittamaḥ |brahmacārī paraṃ pātraṃ nīlagrīvo guhāśayaḥ || 28||

फलश्रुतिः ।एवं स्तुतो महादेवो वालखिल्यैरहर्निशम् ।प्रीयते स्म महादेवः कपटेश्वरविग्रहः ॥ २९॥

phalaśrutiḥ |evaṃ stuto mahādevo vālakhilyairaharniśam |prīyate sma mahādevaḥ kapaṭeśvaravigrahaḥ || 29||

इदं पौराणिकस्तोत्रं वालखिल्यैर्विनिर्मितम् ।कपटेश्वरदेवस्य प्रत्यहं यः पठेन्नरः ॥ ३०॥

idaṃ paurāṇikastotraṃ vālakhilyairvinirmitam |kapaṭeśvaradevasya pratyahaṃ yaḥ paṭhennaraḥ || 30||

तस्य रोगा विनश्यन्ति धनधान्यादि वर्धते ।आयुश्च दीर्घतां याति सन्ततिश्च प्रवर्धते ॥ ३१॥

tasya rogā vinaśyanti dhanadhānyādi vardhate |āyuśca dīrghatāṃ yāti santatiśca pravardhate || 31||

भुक्तिमुक्तित्वमभ्येति संसारश्च विनश्यति ।शृण्वतामपि सर्वेषामेतदेव फलं भवेत् ॥ ३२॥

bhuktimuktitvamabhyeti saṃsāraśca vinaśyati |śṛṇvatāmapi sarveṣāmetadeva phalaṃ bhavet || 32||

यः कश्चित्पथि वा गच्छन्स्तोत्रमेतत्पठेन्नरः ।स सर्वसिद्धिमाप्नोतीत्याज्ञा सत्या महेशितुः ॥ ३३॥

yaḥ kaścitpathi vā gacchanstotrametatpaṭhennaraḥ |sa sarvasiddhimāpnotītyājñā satyā maheśituḥ || 33||

इदं पवित्रं दातव्यं पापिष्ठाय न जातुचित् ।श्रद्धाभक्तिमनोज्ञाय दातव्यं सर्वथा पुनः ॥ ३४॥

idaṃ pavitraṃ dātavyaṃ pāpiṣṭhāya na jātucit |śraddhābhaktimanojñāya dātavyaṃ sarvathā punaḥ || 34||

इति काश्मीरिकमहामाहेश्वराचार्यजयद्रथविरचिते हरचरितचिन्तामणौ कपटेश्वरावतारशिवस्तोत्रराजः सम्पूर्णः ।॥ हरचरितचिन्तामणिः । चतुर्दशः प्रकाशः कपटेश्वरावतारवर्णनम् । १३६१६९॥

iti kāśmīrikamahāmāheśvarācāryajayadrathaviracite haracaritacintāmaṇau kapaṭeśvarāvatāraśivastotrarājaḥ sampūrṇaḥ ||| haracaritacintāmaṇiḥ | caturdaśaḥ prakāśaḥ kapaṭeśvarāvatāravarṇanam | 136169||

– ॥ हरचरितचिन्तामणिः ।चतुर्दशः प्रकाशः – कपटेश्वरावतारवर्णनम् ।१३६-१६९ ॥

– || haracaritacintāmaṇiḥ |caturdaśaḥ prakāśaḥ – kapaṭeśvarāvatāravarṇanam | 136-169 ||