मासशिवरात्रिपूजोपदेशम् ईश्वरप्रोक्तं Ishvaraproktam Masashivaratripujopadesham

(शिवरहस्यान्तर्गते महादेवाख्ये)शिवपार्वतीसंवादेशिव उवाच ।मासि मास्यपि देवेशि कुर्याच्चैव चतुर्दशीम् ।सा मासशिवरात्रीति कथिता कृष्णपक्षगा ॥ १॥

(śivarahasyāntargate mahādevākhye)śivapārvatīsaṃvādeśiva uvāca |māsi māsyapi deveśi kuryāccaiva caturdaśīm |sā māsaśivarātrīti kathitā kṛṣṇapakṣagā || 1||

चैत्रादिकृष्णपक्षेषु तत्तन्मासि चतुर्दशीम् ।प्राप्य सम्पूजयेद्देवं लिङ्गमूर्तिं सदाशिवम् ॥ २॥

caitrādikṛṣṇapakṣeṣu tattanmāsi caturdaśīm |prāpya sampūjayeddevaṃ liṅgamūrtiṃ sadāśivam || 2||

रात्रौ चतुर्षु यामेषु पूजयेद्बिल्व पत्रकैः ।एक भुक्तेन नक्तेन सोपवासेन वा शिवे ॥ ३॥

rātrau caturṣu yāmeṣu pūjayedbilva patrakaiḥ |eka bhuktena naktena sopavāsena vā śive || 3||

तत्र कृष्णचतुर्दश्यां सायं शौचं निवर्त्य च ।नद्यां वा देवखाते वा स्नायान्मन्त्रैः कुशैर्युतः ॥ ४॥

tatra kṛṣṇacaturdaśyāṃ sāyaṃ śaucaṃ nivartya ca |nadyāṃ vā devakhāte vā snāyānmantraiḥ kuśairyutaḥ || 4||

धृतवासा भस्मयुतस्त्रिपुण्ड्राक्षधरो भवेत् ।संशोध्य कलशं शुद्धं स्वयमम्बु प्रसाधयेत् ॥ ५॥

dhṛtavāsā bhasmayutastripuṇḍrākṣadharo bhavet |saṃśodhya kalaśaṃ śuddhaṃ svayamambu prasādhayet || 5||

वस्त्रपूतं तदा देवि सुपुष्पाणि तदा व्रती ।गृहीत्वा नियमोपेतो गृहे वापि शिवालये ॥ ६॥

vastrapūtaṃ tadā devi supuṣpāṇi tadā vratī |gṛhītvā niyamopeto gṛhe vāpi śivālaye || 6||

संशोध्य गोमयाम्भोभिः स्थण्डिलं शिवपूजने ।वितानपुष्पमालाढ्यं मण्टपं परिकल्पयेत् ॥ ७॥

saṃśodhya gomayāmbhobhiḥ sthaṇḍilaṃ śivapūjane |vitānapuṣpamālāḍhyaṃ maṇṭapaṃ parikalpayet || 7||

पीठं तत्र निधायैव प्राङ्मुखोदङ्मुखोऽपि वा ।चेलाजिनकुशः स्थित्वा सम्पाद्यार्ध्याचमं शिवे ॥ ८॥

pīṭhaṃ tatra nidhāyaiva prāṅmukhodaṅmukho'pi vā |celājinakuśaḥ sthitvā sampādyārdhyācamaṃ śive || 8||

प्रक्षाल्य धातुपात्राणि नवानि कलशं तथा ।शङ्खं च दीपधूपौ च स पुष्पाम्बूनि साधयेत् ॥ ९॥

prakṣālya dhātupātrāṇi navāni kalaśaṃ tathā |śaṅkhaṃ ca dīpadhūpau ca sa puṣpāmbūni sādhayet || 9||

पञ्चामृतं पञ्चगव्यं तथा फलरसं शिवे ।गन्धपुष्पाक्षतांस्तत्र संस्थाप्याथ निवेदनम् ॥ १०॥

pañcāmṛtaṃ pañcagavyaṃ tathā phalarasaṃ śive |gandhapuṣpākṣatāṃstatra saṃsthāpyātha nivedanam || 10||

ताम्बूलं चैव वासोऽथ रत्नालङ्करणानि च ।सङ्कल्प्य नियमोपेतो मासिकीं शिवरात्रिकाम् ॥ ११॥

tāmbūlaṃ caiva vāso'tha ratnālaṅkaraṇāni ca |saṅkalpya niyamopeto māsikīṃ śivarātrikām || 11||

ततोऽथ प्रथमे यामे सम्पूज्यैव महेश्वरम् ।पञ्चाक्षरशतं जप्त्वा साङ्गन्यासं महेश्वरि ॥ १२॥

tato'tha prathame yāme sampūjyaiva maheśvaram |pañcākṣaraśataṃ japtvā sāṅganyāsaṃ maheśvari || 12||

कलशं पूज्य शङ्खं च गन्धपुष्पाक्षतादिभिः ।अङ्गेषु भावयेद्देवांस्ततः प्रजननेति च ॥ १३॥

kalaśaṃ pūjya śaṅkhaṃ ca gandhapuṣpākṣatādibhiḥ |aṅgeṣu bhāvayeddevāṃstataḥ prajananeti ca || 13||

लिङ्गसंस्थं महादेवमेवं ध्यायेत्त्वया सह ।साम्बं त्रिणेत्रं चन्द्राङ्कं नीलकण्ठं पिनाकिनम् ॥ १४॥

liṅgasaṃsthaṃ mahādevamevaṃ dhyāyettvayā saha |sāmbaṃ triṇetraṃ candrāṅkaṃ nīlakaṇṭhaṃ pinākinam || 14||

वरदाभयहस्तं च मृगटङ्कधरं शिवम् ।नागयज्ञोपवीताढ्यं दिव्यालङ्कारभूषितम् ॥ १५॥

varadābhayahastaṃ ca mṛgaṭaṅkadharaṃ śivam |nāgayajñopavītāḍhyaṃ divyālaṅkārabhūṣitam || 15||

सोमधामसमानास्यां नीलेन्दीवरलोचनाम् ।फुल्लकल्हारसङ्काशां सर्वाभरणभूषिताम् ॥ १६॥

somadhāmasamānāsyāṃ nīlendīvaralocanām |phullakalhārasaṅkāśāṃ sarvābharaṇabhūṣitām || 16||

मदङ्कसंस्थां त्वां ध्यायेत्साधकः परमेश्वरि ।तत्रानन्यमना देवि पञ्चाक्षरपुरःसरम् ॥ १७॥

madaṅkasaṃsthāṃ tvāṃ dhyāyetsādhakaḥ parameśvari |tatrānanyamanā devi pañcākṣarapuraḥsaram || 17||

समावाह्य ततो लिङ्गे वामनासापुटेन हि ।पाद्यार्घ्याचमनादीनि मूलमन्त्रेण दापयेत् ॥ १८॥

samāvāhya tato liṅge vāmanāsāpuṭena hi |pādyārghyācamanādīni mūlamantreṇa dāpayet || 18||

पञ्चगव्यैर्विशोध्येशं ततः पञ्चामृतैरपि ।पुनः फलरसैर्देवि गन्धपुष्पकुशोदकम् ॥ १९॥

pañcagavyairviśodhyeśaṃ tataḥ pañcāmṛtairapi |punaḥ phalarasairdevi gandhapuṣpakuśodakam || 19||

दद्यादनुक्रमेणैव रुद्रेणैवाभिषेचयेत् ।तदन्ते तर्पणं कुर्याद्भवाद्यैरष्टनामभिः ॥ २०॥

dadyādanukrameṇaiva rudreṇaivābhiṣecayet |tadante tarpaṇaṃ kuryādbhavādyairaṣṭanāmabhiḥ || 20||

वाससा परिमृज्येशं पीठे संस्थाप्य पूजयेत् ।भस्मना चन्दनेनापि अक्षताभिर्महेश्वरम् ॥ २१॥

vāsasā parimṛjyeśaṃ pīṭhe saṃsthāpya pūjayet |bhasmanā candanenāpi akṣatābhirmaheśvaram || 21||

बिल्वपत्रैः शिवे पुष्पैर्वासोऽलङ्कारभूषणैः ।निधनेत्यादिभिर्मन्त्रैबिल्वैः पुष्पैः प्रपूजयेत् ॥ २२॥

bilvapatraiḥ śive puṣpairvāso'laṅkārabhūṣaṇaiḥ |nidhanetyādibhirmantraibilvaiḥ puṣpaiḥ prapūjayet || 22||

शताष्टनामभिर्वापि पूजयेदिन्दुशेखरम् ।चतुर्दश्यां तथा देवि नामभिश्च चतुर्दशम् ॥ २३॥

śatāṣṭanāmabhirvāpi pūjayedinduśekharam |caturdaśyāṃ tathā devi nāmabhiśca caturdaśam || 23||

पूजयेद्द्द्बिल्वपत्राद्यैर्नमोऽन्तैरेवमीश्वरि ।चतुर्दश्यां मृगधरमपामार्गैः प्रपूजयेत् ॥ २४॥

pūjayedddbilvapatrādyairnamo'ntairevamīśvari |caturdaśyāṃ mṛgadharamapāmārgaiḥ prapūjayet || 24||

अजैकपादहिर्बुध्न्यो भवः शर्व उमापतिः ।रुद्रः पशुपतिः शम्भुर्महेशः शिव ईश्वरः ॥ २५॥

ajaikapādahirbudhnyo bhavaḥ śarva umāpatiḥ |rudraḥ paśupatiḥ śambhurmaheśaḥ śiva īśvaraḥ || 25||

महादेवो हरो भीमो नामान्येवं चतुर्दश ।एभिर्नामभिरीशानं चतुर्दश्यां सुमैर्यजेत् ॥ २६॥

mahādevo haro bhīmo nāmānyevaṃ caturdaśa |ebhirnāmabhirīśānaṃ caturdaśyāṃ sumairyajet || 26||

सापूपाज्यं हविर्देवि निवेद्य प्रणवेन हि ।ताम्बूलं दीपधूपं च नीराजनमथाचरेत् ॥ २७॥

sāpūpājyaṃ havirdevi nivedya praṇavena hi |tāmbūlaṃ dīpadhūpaṃ ca nīrājanamathācaret || 27||

कर्पूरखण्डदीपं च घृतदीपौ हि दापयेत् ।स्तोत्रैः स्तुवीतैवमीशं प्रदक्षिणनमस्कृतैः ॥ २८॥

karpūrakhaṇḍadīpaṃ ca ghṛtadīpau hi dāpayet |stotraiḥ stuvītaivamīśaṃ pradakṣiṇanamaskṛtaiḥ || 28||

छत्रं च चामरं चैव ध्वजं व्यजनमेव च ।दद्याच्छिवाय देवेशि वाद्यानि विविधानि च ॥ २९॥

chatraṃ ca cāmaraṃ caiva dhvajaṃ vyajanameva ca |dadyācchivāya deveśi vādyāni vividhāni ca || 29||

नर्तनं करतालं च ऋक्सामाथर्वयाजुषैः ।पुराणैरितिहासोत्थैः स्तोत्रवर्यैः स्तुवीत च ॥ ३०॥

nartanaṃ karatālaṃ ca ṛksāmātharvayājuṣaiḥ |purāṇairitihāsotthaiḥ stotravaryaiḥ stuvīta ca || 30||

नमः शिवायाथ नमः शिवायैनमोऽस्तु गौर्यै शशिशेखराय ।नमोस्तु देव्यै च नमोऽस्तु शम्भवेनममोऽस्तु देवाय नमोस्तु देव्यै ॥ ३१॥

namaḥ śivāyātha namaḥ śivāyainamo'stu gauryai śaśiśekharāya |namostu devyai ca namo'stu śambhavenamamo'stu devāya namostu devyai || 31||

नमः शिवाय प्रणतार्तिहारिणेनमो जगज्जन्मगतिप्रदायै ।नमोऽस्तु वेद्याय महेश्वरायनमोऽस्तुगन्धर्वगणस्तुतायै ॥ ३२॥

namaḥ śivāya praṇatārtihāriṇenamo jagajjanmagatipradāyai |namo'stu vedyāya maheśvarāyanamo'stugandharvagaṇastutāyai || 32||

नमः शिवायाथ विहारकारिणेनमो जनित्र्यै भवमङ्गलायै ।नमोऽस्तुविष्ण्वादिपदप्रदायनमोऽस्तु पाकारिमुखस्तुतायै ॥ ३३॥

namaḥ śivāyātha vihārakāriṇenamo janitryai bhavamaṅgalāyai |namo'stuviṣṇvādipadapradāyanamo'stu pākārimukhastutāyai || 33||

नमः शिवायान्तकगर्वहारिणेनमोऽस्तु भण्डासुरखण्डनायै ।नमोऽस्तु वेदान्तवचः स्तुतायनमोऽस्तु सत्केसरिवाहनायै ॥ ३४॥

namaḥ śivāyāntakagarvahāriṇenamo'stu bhaṇḍāsurakhaṇḍanāyai |namo'stu vedāntavacaḥ stutāyanamo'stu satkesarivāhanāyai || 34||

नमः शिवाय प्रमथाधिपायनमोऽस्तुरुद्राणि वरप्रदायै ।नमोऽस्तु देवादिगणस्तुतायनमोऽस्तु भद्रप्रदमङ्गलायै ॥ ३५॥

namaḥ śivāya pramathādhipāyanamo'sturudrāṇi varapradāyai |namo'stu devādigaṇastutāyanamo'stu bhadrapradamaṅgalāyai || 35||

एवं स्तुत्वा शिवौ देवि चतुर्दश्यां सदाशिवम् ।प्रहरे प्रहरे चापि एवमेव यथाविधि ॥ ३६॥

evaṃ stutvā śivau devi caturdaśyāṃ sadāśivam |prahare prahare cāpi evameva yathāvidhi || 36||

दद्यादर्घ्यं क्रमेणैव पूजान्ते च महेश्वरि ।आधिव्याधिसमायुक्तः ऋणदौर्भाग्यपीडितः ॥ ३७॥

dadyādarghyaṃ krameṇaiva pūjānte ca maheśvari |ādhivyādhisamāyuktaḥ ṛṇadaurbhāgyapīḍitaḥ || 37||

दद्यादर्घ्यं महेशाय सुप्रीतस्तेन मे भवेत् ।एवमेवार्घ्यदानं च रात्रौ यामचतुष्टये ॥ ३८॥

dadyādarghyaṃ maheśāya suprītastena me bhavet |evamevārghyadānaṃ ca rātrau yāmacatuṣṭaye || 38||

मासि मासि महेशानि कृष्णपक्षे विशेषतः ।चैत्रादिसर्वमासेषु मासि मास्यसितासु च ॥ ३९॥

māsi māsi maheśāni kṛṣṇapakṣe viśeṣataḥ |caitrādisarvamāseṣu māsi māsyasitāsu ca || 39||

एकं वा प्रहरं पूजां यदि कुर्याच्च नक्तभुक् ।एवं नरो वा नारी वा विधवोपवनसेन्निशि ॥ ४०॥

ekaṃ vā praharaṃ pūjāṃ yadi kuryācca naktabhuk |evaṃ naro vā nārī vā vidhavopavanasenniśi || 40||

सुकृतैर्लभ्यते भूता तस्यामर्चनमेव मे ।पुण्यलक्षैश्च लभ्येत जपनामप्रसादतः ॥ ४१॥

sukṛtairlabhyate bhūtā tasyāmarcanameva me |puṇyalakṣaiśca labhyeta japanāmaprasādataḥ || 41||

ब्रह्मा स्वयं चतुर्वक्त्रः पञ्चवक्त्रः स्वयं हरिः ।असितार्चाफलं शम्भोर्वक्तुं शक्तो न पार्वति ॥ ४२॥

brahmā svayaṃ caturvaktraḥ pañcavaktraḥ svayaṃ hariḥ |asitārcāphalaṃ śambhorvaktuṃ śakto na pārvati || 42||

ब्रह्माण्डोदरमध्यानि यानि तीर्थानि सन्ति वै ।संस्थितानि भवन्तीह भूतायां पारणे कृते ॥ ४३॥

brahmāṇḍodaramadhyāni yāni tīrthāni santi vai |saṃsthitāni bhavantīha bhūtāyāṃ pāraṇe kṛte || 43||

परेद्युः पूज्य मां देवि यथा शक्त्या द्विजार्चनम् ।एवं त्र्यब्दं द्वादशाब्दं व्रतं कुर्याद्विधानतः ॥ ४४॥

paredyuḥ pūjya māṃ devi yathā śaktyā dvijārcanam |evaṃ tryabdaṃ dvādaśābdaṃ vrataṃ kuryādvidhānataḥ || 44||

संवत्सरं वा देवेशि आजन्म मद्गणो भवेत् ।उद्यापनविधिं वक्ष्ये भूतायां मासि मासि ते ॥ ४५॥

saṃvatsaraṃ vā deveśi ājanma madgaṇo bhavet |udyāpanavidhiṃ vakṣye bhūtāyāṃ māsi māsi te || 45||

देव्युवाच ।व्रतस्योद्यापने देव किं कर्तव्यं च मानवैः ।को विधिः कानि द्रव्याणि कथं कार्यं वद प्रभो ॥ ४६॥

devyuvāca |vratasyodyāpane deva kiṃ kartavyaṃ ca mānavaiḥ |ko vidhiḥ kāni dravyāṇi kathaṃ kāryaṃ vada prabho || 46||

ईश्वर उवाच ।शृणु काम्यविधिं भद्रे लोकानां हितकाम्यया ।चतुर्दशाब्दं कर्तव्यं मासभूताव्रतं शिवे ॥ ४७॥

īśvara uvāca |śṛṇu kāmyavidhiṃ bhadre lokānāṃ hitakāmyayā |caturdaśābdaṃ kartavyaṃ māsabhūtāvrataṃ śive || 47||

एकभुक्तस्त्रयोदश्यां चतुर्दश्यामुपोषणम् ।सम्पाद्य सर्वसम्भारान्मण्टपं तत्र कारयेत् ॥ ४८॥

ekabhuktastrayodaśyāṃ caturdaśyāmupoṣaṇam |sampādya sarvasambhārānmaṇṭapaṃ tatra kārayet || 48||

वस्त्रैः पुष्पैः समायुक्तं फलपल्लवशोभितम् ।तन्मध्ये विलिखेत्पद्मं सर्वतोभद्रमण्डलम् ॥ ४९॥

vastraiḥ puṣpaiḥ samāyuktaṃ phalapallavaśobhitam |tanmadhye vilikhetpadmaṃ sarvatobhadramaṇḍalam || 49||

धूपदीपसमायुक्तं कुम्भाष्टक विराजितम् ।आचार्यं वरयेत्तत्र ऋत्विग्भिः सहितं शिवे ॥ ५०॥

dhūpadīpasamāyuktaṃ kumbhāṣṭaka virājitam |ācāryaṃ varayettatra ṛtvigbhiḥ sahitaṃ śive || 50||

शिवरूपाश्च ते विप्राः पूज्याश्चन्दनपुष्पकैः ।अनुज्ञातश्च तैर्विप्रैः शिवमावाह्य कुम्भके ॥ ५१॥

śivarūpāśca te viprāḥ pūjyāścandanapuṣpakaiḥ |anujñātaśca tairvipraiḥ śivamāvāhya kumbhake || 51||

अव्रणं सजलं कुम्भं मृन्मयं हेमताम्रजम् ।कुम्भोपरि न्यसेद्देवमुमया सहितं शिवम् ॥ ५२॥

avraṇaṃ sajalaṃ kumbhaṃ mṛnmayaṃ hematāmrajam |kumbhopari nyaseddevamumayā sahitaṃ śivam || 52||

सौवर्णं वापि रौप्यं वा ताम्रं मृन्मयमेव वा ।रत्नालङ्करणैर्युक्तं वस्त्रैः पुष्पैः प्रपूजयेत् ॥ ५३॥

sauvarṇaṃ vāpi raupyaṃ vā tāmraṃ mṛnmayameva vā |ratnālaṅkaraṇairyuktaṃ vastraiḥ puṣpaiḥ prapūjayet || 53||

प्रतिष्ठाप्यार्चयेन्मूर्तिं सोमं दिक्पालकानपि ।परितोऽष्टसु कुम्भेषु पूजयेन्मूलमन्त्रतः ॥ ५४॥

pratiṣṭhāpyārcayenmūrtiṃ somaṃ dikpālakānapi |parito'ṣṭasu kumbheṣu pūjayenmūlamantrataḥ || 54||

पूर्वोद्युर्गन्धपुष्पैश्च सोपवासं प्रपूजयेत् ।धूपदीपैश्च नैवेद्यैः फलैर्नानाविधैरपि ॥ ५५॥

pūrvodyurgandhapuṣpaiśca sopavāsaṃ prapūjayet |dhūpadīpaiśca naivedyaiḥ phalairnānāvidhairapi || 55||

प्रातः स्नात्वा परेद्युर्मां पूजयेत्कृतनैत्यकः ।ऋत्विगाचार्यसहितो मूर्ति दिक्पालसंयुताम् ॥ ५६॥

prātaḥ snātvā paredyurmāṃ pūjayetkṛtanaityakaḥ |ṛtvigācāryasahito mūrti dikpālasaṃyutām || 56||

पूजयेद्गन्धपुष्पाद्यैर्धूपं दीपं निवेदयेत् ।नैवेद्यं भक्ष्यभोज्यं च अपूपांश्च चतुर्दश ॥ ५७॥

pūjayedgandhapuṣpādyairdhūpaṃ dīpaṃ nivedayet |naivedyaṃ bhakṣyabhojyaṃ ca apūpāṃśca caturdaśa || 57||

प्रत्येकं सुघृताक्ताश्च सङ्ख्यया च चतुर्दश ।स्वाशाखोक्तेन मार्गेण प्रतिष्ठाप्य हुताशनम् ॥ ५८॥

pratyekaṃ sughṛtāktāśca saṅkhyayā ca caturdaśa |svāśākhoktena mārgeṇa pratiṣṭhāpya hutāśanam || 58||

परिस्तीर्य विलाप्याज्यं हविः संस्कृत्य हावयेत् ।आचार्य ऋत्विक्सहितः सपत्नीकः स्वयं शुचिः ॥ ५९॥

paristīrya vilāpyājyaṃ haviḥ saṃskṛtya hāvayet |ācārya ṛtviksahitaḥ sapatnīkaḥ svayaṃ śuciḥ || 59||

रुद्रेणैव नमोऽन्तेन जुहुयाज्जातवेदसि ।ततः स्विष्टकृतं हुत्वा होमशेषं समापयेत् ॥ ६०॥

rudreṇaiva namo'ntena juhuyājjātavedasi |tataḥ sviṣṭakṛtaṃ hutvā homaśeṣaṃ samāpayet || 60||

आचार्यं ऋत्विजश्चैव पूजयेद्दक्षिणादिभिः ।गां सवत्सां सवसनामाचार्याय निवेदयेत् ॥ ६१॥

ācāryaṃ ṛtvijaścaiva pūjayeddakṣiṇādibhiḥ |gāṃ savatsāṃ savasanāmācāryāya nivedayet || 61||

ततः सकुम्भां तां मूर्तिमाचार्याय निवेदयेत् ।प्रीयेतां मे शिवौ नित्यं स्यातां मुक्तिप्रदौ मम ॥ ६२॥

tataḥ sakumbhāṃ tāṃ mūrtimācāryāya nivedayet |prīyetāṃ me śivau nityaṃ syātāṃ muktipradau mama || 62||

दिक्पालमूर्तिं कुम्भांश्च ऋत्विग्भ्यो दापयेत्क्रमात् ।नत्वा तान् ब्रह्मणान् देवि गन्धपुष्पैः प्रपूजयेत् ॥ ६३॥

dikpālamūrtiṃ kumbhāṃśca ṛtvigbhyo dāpayetkramāt |natvā tān brahmaṇān devi gandhapuṣpaiḥ prapūjayet || 63||

वित्तशाठ्यमकुर्वाणो दक्षिणाभिः प्रसादेत् ।पुनः सम्पूज्य मां लिङ्गे प्रार्थयेद्व्रतसिद्धये ॥ ६४॥

vittaśāṭhyamakurvāṇo dakṣiṇābhiḥ prasādet |punaḥ sampūjya māṃ liṅge prārthayedvratasiddhaye || 64||

व्रतमेतत्कृतं यन्मे पूर्णं वाऽपूर्णमेव वा ।रोगपीडान्वितेनेश दिवा भुक्तं तु यन्मया ॥ ६५॥

vratametatkṛtaṃ yanme pūrṇaṃ vā'pūrṇameva vā |rogapīḍānviteneśa divā bhuktaṃ tu yanmayā || 65||

मासि मासि चतुर्दश्यां कदाचित्पुण्ययोगतः ।सर्वं सम्पूर्णतां यातु त्वत्प्रसादान्महेश्वर ॥ ६६॥

māsi māsi caturdaśyāṃ kadācitpuṇyayogataḥ |sarvaṃ sampūrṇatāṃ yātu tvatprasādānmaheśvara || 66||

ब्राह्मणान्भोजयेत्तत्र परेद्युश्च चतुर्दश ।सपत्नीकान्भक्ष्यभोज्यैर्गन्धपुष्पाक्षतादिभिः ॥ ६७॥

brāhmaṇānbhojayettatra paredyuśca caturdaśa |sapatnīkānbhakṣyabhojyairgandhapuṣpākṣatādibhiḥ || 67||

दक्षिणाभिः प्रतोष्यैव स्वयं भुञ्जीत बन्धुभिः ।एवं नरो वा नारी वा विधवापि चतुर्दशीम् ॥ ६८॥

dakṣiṇābhiḥ pratoṣyaiva svayaṃ bhuñjīta bandhubhiḥ |evaṃ naro vā nārī vā vidhavāpi caturdaśīm || 68||

प्राप्य मत्पूजनाद्यच्च लभते तच्छृणु प्रिये ।अपुत्रो लभते पुत्रं कुमारी सत्पतिं लभेत् ॥ ६९॥

prāpya matpūjanādyacca labhate tacchṛṇu priye |aputro labhate putraṃ kumārī satpatiṃ labhet || 69||

निर्धनो धनवान्भूयादायुर्हीनस्तथायुषा ।भक्तो मुक्तिमवाप्नोति विधवा पतिलोकगा ॥ ७०॥

nirdhano dhanavānbhūyādāyurhīnastathāyuṣā |bhakto muktimavāpnoti vidhavā patilokagā || 70||

भक्तो मद्गणपो भूयान्मसि भूतार्चनेन मे ।किम्पुनर्बहुनोक्तेन सर्वान् कामानवाप्नुयात् ॥ ७१॥

bhakto madgaṇapo bhūyānmasi bhūtārcanena me |kimpunarbahunoktena sarvān kāmānavāpnuyāt || 71||

ईश्वर उवाच ।एवं मासचतुर्दशीषु नियतः सम्पूजयन्मां हरंशर्वाणीसहितं स शर्म लभते सर्वेषु लोकेष्वपि ।पूर्वोद्यच्छशिसुन्दरं नगवरं कैलासमप्यादरात्पश्चान्मे गणपेन्द्रतामुपगतोऽज्ञानाद्विमुक्तो भवेत् ॥ ७२॥

īśvara uvāca |evaṃ māsacaturdaśīṣu niyataḥ sampūjayanmāṃ haraṃśarvāṇīsahitaṃ sa śarma labhate sarveṣu lokeṣvapi |pūrvodyacchaśisundaraṃ nagavaraṃ kailāsamapyādarātpaścānme gaṇapendratāmupagato'jñānādvimukto bhavet || 72||

॥ इति शिवरहस्यान्तर्गते ईश्वरप्रोक्तं मासशिवरात्रिपूजोपदेशं सम्पूर्णम् ॥॥ श्रीशिवरहस्यम् । महादेवाख्यः एकादशमांशः । अध्यायः ३३ मासशिवरात्रि सोद्यापनव्रतकथनम् । वावृत्तश्लोकाः ॥– ॥ श्रीशिवरहस्यम् । महादेवाख्यः एकादशमांशः । अध्यायः ३३ मासशिवरात्रि सोद्यापनव्रतकथनम् । वावृत्तश्लोकाः ॥

|| iti śivarahasyāntargate īśvaraproktaṃ māsaśivarātripūjopadeśaṃ sampūrṇam |||| śrīśivarahasyam | mahādevākhyaḥ ekādaśamāṃśaḥ | adhyāyaḥ 33 māsaśivarātri sodyāpanavratakathanam | vāvṛttaślokāḥ ||– || śrīśivarahasyam | mahādevākhyaḥ ekādaśamāṃśaḥ | adhyāyaḥ 33 māsaśivarātri sodyāpanavratakathanam | vāvṛttaślokāḥ ||