गोदावरीभीमशङ्करमहिमवर्णनं Godavaryevam Bhimashankara Mahima Varnanam

ईश्वरःब्रह्मादयस्तदा देवि त्रियम्बकमुमासखम् ।मां तुष्टुवुस्तदा भक्त्या नदी गोदावरीं तथा ॥ १॥

īśvaraḥbrahmādayastadā devi triyambakamumāsakham |māṃ tuṣṭuvustadā bhaktyā nadī godāvarīṃ tathā || 1||

ब्रह्माद्याःभगाक्षिमथनान्तक प्रमथनाथ नः सर्वदासुरासुरमुनिव्रजप्रणतपादपङ्केरुह ।प्रपन्नजनकरक्षक प्रमथनाथ विश्वाधिकप्रसीद दुरितापह प्रवरनाम देवोत्तम ॥ २॥

brahmādyāḥbhagākṣimathanāntaka pramathanātha naḥ sarvadāsurāsuramunivrajapraṇatapādapaṅkeruha |prapannajanakarakṣaka pramathanātha viśvādhikaprasīda duritāpaha pravaranāma devottama || 2||

प्रकृष्टजनिनाशद प्रवरमाय मायाहरउमाधव रमाधव प्रणतपादकञ्ज प्रभो ।शचीधवमुखामर द्विरदवक्त्र नन्दिस्तुतगरादर निशाकराद्यमर चारयाणाव नः ॥ ३॥

prakṛṣṭajanināśada pravaramāya māyāharaumādhava ramādhava praṇatapādakañja prabho |śacīdhavamukhāmara dviradavaktra nandistutagarādara niśākarādyamara cārayāṇāva naḥ || 3||

ईश्वरःएवं ब्रह्मादयस्तत्र त्र्यम्बकं मां महेश्वरिययुः स्वस्थानममलं ब्रह्मलोकं सनातनम् ॥ ४॥

īśvaraḥevaṃ brahmādayastatra tryambakaṃ māṃ maheśvariyayuḥ svasthānamamalaṃ brahmalokaṃ sanātanam || 4||

वर्णयन्तो विमानेषु गोदावर्यास्तदुद्भवम् ।त्रियम्बकोरुशिखरात्गोदावर्यास्तदाम्बिके ॥ ५॥

varṇayanto vimāneṣu godāvaryāstadudbhavam |triyambakoruśikharātgodāvaryāstadāmbike || 5||

तत्र सप्तमुखी भूत्वा कुशावर्ते महेश्वरि ।तत्रत्यान्पावयन्ती सा शैवान्मम पदाश्रयान् ॥ ६॥

tatra saptamukhī bhūtvā kuśāvarte maheśvari |tatratyānpāvayantī sā śaivānmama padāśrayān || 6||

तत्रत्या मुनयः सर्वे प्रवरातीरवासिनः ।गोदावरीं तदा देवीं युक्तां प्रवरया सह ॥ ७॥

tatratyā munayaḥ sarve pravarātīravāsinaḥ |godāvarīṃ tadā devīṃ yuktāṃ pravarayā saha || 7||

तत्र स्थानवरं देवि मम सान्निध्यकृत्तमम् ।भीमशङ्करसञ्ज्ञं तल्लिङ्गं मम मनोहरम् ॥ ८॥

tatra sthānavaraṃ devi mama sānnidhyakṛttamam |bhīmaśaṅkarasañjñaṃ talliṅgaṃ mama manoharam || 8||

तत्र पूर्वं महादेवि ब्रह्मणः पञ्चमं शिरः ।मया विवदता तस्य सम्यग्वादेन शङ्करि ॥ ९॥

tatra pūrvaṃ mahādevi brahmaṇaḥ pañcamaṃ śiraḥ |mayā vivadatā tasya samyagvādena śaṅkari || 9||

तत्पञ्चमं तस्य शिरो वृक्णं मम नखाग्रतः ।तत्र स्तुवन्ति मां विप्रा भीमशङ्करसञ्ज्ञितम् ॥ १०॥

tatpañcamaṃ tasya śiro vṛkṇaṃ mama nakhāgrataḥ |tatra stuvanti māṃ viprā bhīmaśaṅkarasañjñitam || 10||

मुनयःत्वत्साम्यवादपरिचिन्हितपञ्चसंस्थं पञ्चाननस्य करकोणनखाग्रकृत्तम् ।तत्कन्धरेण विलसत्करपल्लवं ते शूलामलेन विलसत् तव घोररूपम् ॥ ११॥

munayaḥtvatsāmyavādaparicinhitapañcasaṃsthaṃ pañcānanasya karakoṇanakhāgrakṛttam |tatkandhareṇa vilasatkarapallavaṃ te śūlāmalena vilasat tava ghorarūpam || 11||

त्वं भीमशङ्करमिति श्रुतिषु प्रसिद्धः स्थानं तवैतदमलं मुनयो वदन्ति ।गोदा सदा वहति या प्रवरासमेता तत्तीरगोऽसि विधिहन्पुरकामशत्रो ॥ १२॥

tvaṃ bhīmaśaṅkaramiti śrutiṣu prasiddhaḥ sthānaṃ tavaitadamalaṃ munayo vadanti |godā sadā vahati yā pravarāsametā tattīrago'si vidhihanpurakāmaśatro || 12||

ईश्वरःएवं स्तुवन्ति मुनयो भृगाद्या मां महेश्वरि ।सापि गोदावरी पुण्या तटलिङ्गैर्विभूषिता ॥ १३॥

īśvaraḥevaṃ stuvanti munayo bhṛgādyā māṃ maheśvari |sāpi godāvarī puṇyā taṭaliṅgairvibhūṣitā || 13||

समुद्रं सङ्गता गौरि तरङ्गावलिभासुरम् ।गोदावर्यां सकृत्स्नात्वा सदा पर्वणि सत्तमे ॥ १४॥

samudraṃ saṅgatā gauri taraṅgāvalibhāsuram |godāvaryāṃ sakṛtsnātvā sadā parvaṇi sattame || 14||

अग्निष्टोमातिरात्राणां फलं प्राप्नोति मानवः ।स्नात्वा योऽब्धौ महादेवि गोदावर्याश्च सङ्गमे ॥ १५॥

agniṣṭomātirātrāṇāṃ phalaṃ prāpnoti mānavaḥ |snātvā yo'bdhau mahādevi godāvaryāśca saṅgame || 15||

सर्वमेधफलं प्राप्य मल्लोके निवसेच्चिरम् ।गोदावर्यां शिवे स्नात्वा सिंहसंस्थे बृहस्पतौ ॥ १६॥

sarvamedhaphalaṃ prāpya malloke nivasecciram |godāvaryāṃ śive snātvā siṃhasaṃsthe bṛhaspatau || 16||

॥ इति शिवरहस्यान्तर्गते शिवगौरीसंवादे गोदावर्येवं भीमशङ्करमहिमवर्णनं सम्पूर्णम् ॥॥ श्रीशिवरहस्यम् । भर्गाख्यः पञ्चमांशः । अध्यायः २२॥– ॥ श्रीशिवरहस्यम् । भर्गाख्यः पन्चमांशः । अध्यायः २२॥

|| iti śivarahasyāntargate śivagaurīsaṃvāde godāvaryevaṃ bhīmaśaṅkaramahimavarṇanaṃ sampūrṇam |||| śrīśivarahasyam | bhargākhyaḥ pañcamāṃśaḥ | adhyāyaḥ 22||– || śrīśivarahasyam | bhargākhyaḥ pancamāṃśaḥ | adhyāyaḥ 22||