वाग्वादिनीषट्कम् Shri Vagvadinishatkam

वरदाप्यहेतुकरुणाजन्मावनिरपि पयोजभवजाये ।किं कुरुषेन कृपां मयि वद वद वाग्वादिनि स्वाहा ॥ १॥

varadāpyahetukaruṇājanmāvanirapi payojabhavajāye |kiṃ kuruṣena kṛpāṃ mayi vada vada vāgvādini svāhā || 1||

किं वा ममास्ति महती पापततिस्तत्प्रभेदने तरसा ।किं वा न तेऽस्ति शक्तिर्वद वद वाग्वादिनि स्वाहा ॥ २॥

kiṃ vā mamāsti mahatī pāpatatistatprabhedane tarasā |kiṃ vā na te'sti śaktirvada vada vāgvādini svāhā || 2||

किं जीवः परमशिवाद्भिन्नोऽभिन्नोऽथ भेदश्च ।औपाधिकः स्वतो वा वद वदवाग्वादिनि स्वाहा ॥ ३॥

kiṃ jīvaḥ paramaśivādbhinno'bhinno'tha bhedaśca |aupādhikaḥ svato vā vada vadavāgvādini svāhā || 3||

वियदादिकं जगदिदं सर्वं मिथ्याऽथवा सत्यम् ।मिथ्यात्वधीः कथं स्याद्वद वद वाग्वादिनि स्वाहा ॥ ४॥

viyadādikaṃ jagadidaṃ sarvaṃ mithyā'thavā satyam |mithyātvadhīḥ kathaṃ syādvada vada vāgvādini svāhā || 4||

ज्ञानं कर्म च मिलितं हेतुर्मोक्षेऽथवा ज्ञानम् ।तज्ज्ञानं केन भवेद्वद वदवाग्वादिनि स्वाहा ॥ ५॥

jñānaṃ karma ca militaṃ heturmokṣe'thavā jñānam |tajjñānaṃ kena bhavedvada vadavāgvādini svāhā || 5||

ज्ञानं विचारसाध्यं किं वा योगेन कर्मसाहस्रैः ।कीदृक्सोऽपि विचारो वद वद वाग्वादिनि स्वाहा ॥ ६॥

jñānaṃ vicārasādhyaṃ kiṃ vā yogena karmasāhasraiḥ |kīdṛkso'pi vicāro vada vada vāgvādini svāhā || 6||

इति शृङ्गेरि श्रीजगद्गुरु श्रीसच्चिदानन्दशिवाभिनवनृसिंहभारतीस्वामिभिः विरचितं श्रीवाग्वादिनीषट्कं सम्पूर्णम् ।

iti śṛṅgeri śrījagadguru śrīsaccidānandaśivābhinavanṛsiṃhabhāratīsvāmibhiḥ viracitaṃ śrīvāgvādinīṣaṭkaṃ sampūrṇam |