मिथिलामङ्गलम् Shri Jangidevacharyapranitam Shrimithilamangalam

रामं च भाष्यकृद्रामानन्दाचार्यं च मारुतिम् ।कुर्वे नत्त्वाऽग्रदेवाचार्यं मिथिलामङ्गलमं शुभम् ॥ १॥

rāmaṃ ca bhāṣyakṛdrāmānandācāryaṃ ca mārutim |kurve nattvā'gradevācāryaṃ mithilāmaṅgalamaṃ śubham || 1||

सुधातुल्यजलैर्युक्ता यत्र सरःसरिद्वराः ।तस्यै सरः सरिद्वत्यै मिथिलायै सुमङ्गलम् ॥ २॥

sudhātulyajalairyuktā yatra saraḥsaridvarāḥ |tasyai saraḥ saridvatyai mithilāyai sumaṅgalam || 2||

यत्रोद्यानानि शोभन्ते वृक्षैः सफलपुष्पकैः ।तस्यै चोद्यानयुक्तायै मिथिलायै सुमङ्गलम् ॥ ३॥

yatrodyānāni śobhante vṛkṣaiḥ saphalapuṣpakaiḥ |tasyai codyānayuktāyai mithilāyai sumaṅgalam || 3||

यत्र दार्शनिका जाता श्रीमद्बोधायनादयः ।तस्यै विद्वद्विशिष्टायै मिथिलायै सुमङ्गलम् ॥ ४॥

yatra dārśanikā jātā śrīmadbodhāyanādayaḥ |tasyai vidvadviśiṣṭāyai mithilāyai sumaṅgalam || 4||

यस्यां पुर्यामुदूढा च रामेण जनकात्मजा ।तस्यै महोत्सवाढ्यायै मिथिलायै सुमङ्गलम् ॥ ५॥

yasyāṃ puryāmudūḍhā ca rāmeṇa janakātmajā |tasyai mahotsavāḍhyāyai mithilāyai sumaṅgalam || 5||

सीतारामपदस्पर्शात् पुण्यशीला च यत्क्षितिः ।तस्यै पापापहारिण्यै मिथिलायै सुमङ्गलम् ॥ ६॥

sītārāmapadasparśāt puṇyaśīlā ca yatkṣitiḥ |tasyai pāpāpahāriṇyai mithilāyai sumaṅgalam || 6||

जानकीजन्मभूमिर्या भक्तिदा मुक्तिदा तथा ।तस्यै महाप्रभावायै मिथिलायै सुमङ्गलम् ॥ ७॥

jānakījanmabhūmiryā bhaktidā muktidā tathā |tasyai mahāprabhāvāyai mithilāyai sumaṅgalam || 7||

द्वारपीठार्यश्री जङ्गिदेवाचार्यविनिर्मितम् ।पठतां मङ्गलं कुर्यान्मिथिलामङ्गलं शुभम् ॥ ८॥

dvārapīṭhāryaśrī jaṅgidevācāryavinirmitam |paṭhatāṃ maṅgalaṃ kuryānmithilāmaṅgalaṃ śubham || 8||

इति श्रीजङ्गिदेवाचार्यप्रणीतं श्रीमिथिलामङ्गलं सम्पूर्णम् ।

iti śrījaṅgidevācāryapraṇītaṃ śrīmithilāmaṅgalaṃ sampūrṇam |