युगलाष्टकम् Shri Yugalashtakam

श्रीमाधवेन्द्रपुरीविरचितम् ।वृन्दावनविहाराढ्यौ सच्चिदानन्दविग्रहौ ।मणिमण्डपमध्यस्थौ राधाकृष्णौ नमाम्यहम् ॥ १॥

śrīmādhavendrapurīviracitam |vṛndāvanavihārāḍhyau saccidānandavigrahau |maṇimaṇḍapamadhyasthau rādhākṛṣṇau namāmyaham || 1||

पीतनीलपटौ शान्तौ श्यामगौरकलेवरौ ।सदा रासरतौ सत्यौ राधाकृष्णौ नमाम्यहम् ॥ २॥

pītanīlapaṭau śāntau śyāmagaurakalevarau |sadā rāsaratau satyau rādhākṛṣṇau namāmyaham || 2||

भावाविष्टौ सदा रम्यौ रासचातुर्यपण्डितौ ।मुरलीगानतत्त्वज्ञौ राधाकृष्णौ नमाम्यहम् ॥ ३॥

bhāvāviṣṭau sadā ramyau rāsacāturyapaṇḍitau |muralīgānatattvajñau rādhākṛṣṇau namāmyaham || 3||

यमुनोपवनावासौ कदम्बवनमन्दिरौ ।कल्पद्रुमवनाधीशौ राधाकृष्णौ नमाम्यहम् ॥ ४॥

yamunopavanāvāsau kadambavanamandirau |kalpadrumavanādhīśau rādhākṛṣṇau namāmyaham || 4||

यमुनास्नानसुभगौ गोवर्धनविलासिनौ ।दिव्यमन्दारमालाढ्यौ राधाकृष्णौ नमाम्यहम् ॥ ५॥

yamunāsnānasubhagau govardhanavilāsinau |divyamandāramālāḍhyau rādhākṛṣṇau namāmyaham || 5||

मञ्जीररञ्जितपदौ नासाग्रगजमौक्तिकौ ।मधुरस्मेरसुमुखौ राधाकृष्णौ नमाम्यहम् ॥ ६॥

mañjīrarañjitapadau nāsāgragajamauktikau |madhurasmerasumukhau rādhākṛṣṇau namāmyaham || 6||

अनन्तकोटिब्रह्माण्डे सृष्टिस्थित्यन्तकारिणौ ।मोहनौ सर्वलोकानां राधाकृष्णौ नमाम्यहम् ॥ ७॥

anantakoṭibrahmāṇḍe sṛṣṭisthityantakāriṇau |mohanau sarvalokānāṃ rādhākṛṣṇau namāmyaham || 7||

परस्परसमाविष्टौ परस्परगणप्रियौ ।रससागरसम्पन्नौ राधाकृष्णौ नमाम्यहम् ॥ ८॥

parasparasamāviṣṭau parasparagaṇapriyau |rasasāgarasampannau rādhākṛṣṇau namāmyaham || 8||

इति श्रीमाधवेन्द्रपुरीविरचितं श्रीयुगलाष्टकं सम्पूर्णम् ।

iti śrīmādhavendrapurīviracitaṃ śrīyugalāṣṭakaṃ sampūrṇam |