गौरिस्तुतिः देवैः कृता Devaih Krita Gauri Stuti

जय गौरि जगद्वन्द्ये जय शङ्करवल्लभे ।जय पद्मानने देवि जय श्रीसर्वमङ्गले ॥ १॥

jaya gauri jagadvandye jaya śaṅkaravallabhe |jaya padmānane devi jaya śrīsarvamaṅgale || 1||

जय स्मरहरार्धाङ्गतुङ्गसिंहासनाश्रिते ।जय श्रीकण्ठविविधशृङ्गाररससंश्रये ॥ २॥

jaya smaraharārdhāṅgatuṅgasiṃhāsanāśrite |jaya śrīkaṇṭhavividhaśṛṅgārarasasaṃśraye || 2||

जय कर्पूरकस्तूरीचन्दनाङ्गविलेपने ।जय मन्दारविलसन्मल्लिकासमलङ्कृते ॥ ३॥

jaya karpūrakastūrīcandanāṅgavilepane |jaya mandāravilasanmallikāsamalaṅkṛte || 3||

जय हारविहाराढ्यकुचकुम्भान्तरस्थले ।जय रत्नगणाकीर्णकोटीरवरभासुरे ॥ ४॥

jaya hāravihārāḍhyakucakumbhāntarasthale |jaya ratnagaṇākīrṇakoṭīravarabhāsure || 4||

जयानन्तमणिच्छन्नसुवर्णाभरणान्विते ।जय पूर्णसुधारश्मिसमानवसनोज्वले ॥ ५॥

jayānantamaṇicchannasuvarṇābharaṇānvite |jaya pūrṇasudhāraśmisamānavasanojvale || 5||

तारहीवराक्रान्तताटङ्कघटितालके ।मणिदर्पणसङ्काशकपोलललिते शिवे ॥ ६॥

tārahīvarākrāntatāṭaṅkaghaṭitālake |maṇidarpaṇasaṅkāśakapolalalite śive || 6||

जय नीलाचलाकारवेणीमण्डलमण्डिते ।जय मत्तेभकुम्भाभसुधापूर्णकुचाश्रये ॥ ७॥

jaya nīlācalākāraveṇīmaṇḍalamaṇḍite |jaya mattebhakumbhābhasudhāpūrṇakucāśraye || 7||

उन्मत्तमीनसङ्काशनयनश्रीसमन्विते ।गङ्गावर्तातिगम्भीरनाभिकान्तिविराजिते ॥ ८॥

unmattamīnasaṅkāśanayanaśrīsamanvite |gaṅgāvartātigambhīranābhikāntivirājite || 8||

जयाणुमध्यललितरोमालिभ्रमरावृते ।उन्मत्तहंसगमने जय चन्द्रालिके शिवे ॥ ९॥

jayāṇumadhyalalitaromālibhramarāvṛte |unmattahaṃsagamane jaya candrālike śive || 9||

जय मौनिमनःपद्मसद्माश्रितपदाम्बुजे ।जय भक्तजनानन्दप्रवृद्धिकरणोद्यते ॥ १०॥

jaya maunimanaḥpadmasadmāśritapadāmbuje |jaya bhaktajanānandapravṛddhikaraṇodyate || 10||

जय श्रीकण्ठकण्ठस्थबाहुवल्लीविराजिते ।जय स्वभक्तदुःखाब्धिविशोषणविचक्षणे ॥ ११॥

jaya śrīkaṇṭhakaṇṭhasthabāhuvallīvirājite |jaya svabhaktaduḥkhābdhiviśoṣaṇavicakṣaṇe || 11||

जयानन्दसुधाम्भोधिस्वरूपे जय शाम्भवि ।जय स्वर्गापवर्गादिफलदानोन्मुखे शिवे ॥ १२॥

jayānandasudhāmbhodhisvarūpe jaya śāmbhavi |jaya svargāpavargādiphaladānonmukhe śive || 12||

पाहि पाहि सुरानस्मान् त्वत्पादाम्बुरुहार्चकान् ।अनन्यशरणानम्ब जगदालम्बने जय ॥ १३॥

pāhi pāhi surānasmān tvatpādāmburuhārcakān |ananyaśaraṇānamba jagadālambane jaya || 13||

भजामो भजामः स्मरारिप्रियां त्वां भजामो भजामो भजामो भवानीम् ।भजामो भजामो भजामो भजामः शरण्याग्रगण्यां भजामो भजामः ॥ १४॥

bhajāmo bhajāmaḥ smarāripriyāṃ tvāṃ bhajāmo bhajāmo bhajāmo bhavānīm |bhajāmo bhajāmo bhajāmo bhajāmaḥ śaraṇyāgragaṇyāṃ bhajāmo bhajāmaḥ || 14||

भजामो भवत्पादपद्मप्रसादप्रभावानुवद्धाः प्रबुद्धाः सुखेन ।भजामश्चिरं गौरि संसारबन्धं सनिबन्धमाशु प्रलीनं कुरुष्व ॥ १५॥

bhajāmo bhavatpādapadmaprasādaprabhāvānuvaddhāḥ prabuddhāḥ sukhena |bhajāmaściraṃ gauri saṃsārabandhaṃ sanibandhamāśu pralīnaṃ kuruṣva || 15||

भवत्पादसेवासमासक्तचित्ताः श्रिया सेविताः सर्वदा भाग्यवन्तः ।भवत्पादपद्मं विनाऽन्यन्न विद्मः प्रसादानुकूलं न विद्मो न विद्मः ॥ १६॥

bhavatpādasevāsamāsaktacittāḥ śriyā sevitāḥ sarvadā bhāgyavantaḥ |bhavatpādapadmaṃ vinā'nyanna vidmaḥ prasādānukūlaṃ na vidmo na vidmaḥ || 16||

भवत्पादुकाराधका एव लोके नराः स्युर्धराधीशपूज्यादिपूज्याः ।भवद्दर्शनं जातमस्माकमम्ब प्रसन्नाः कृतार्थाः कृतार्थाः कृतार्थाः ॥ १७॥

bhavatpādukārādhakā eva loke narāḥ syurdharādhīśapūjyādipūjyāḥ |bhavaddarśanaṃ jātamasmākamamba prasannāḥ kṛtārthāḥ kṛtārthāḥ kṛtārthāḥ || 17||

सकृद्वा भवत्पादपद्मप्रभाभिः वयं भूषिताश्चेत् तवाद्याम्ब किं वा ।धनं याति दीनेषु दत्तं धनं चेत् धनं वृद्धिमेतीति धन्या वदन्ति ॥ १८॥

sakṛdvā bhavatpādapadmaprabhābhiḥ vayaṃ bhūṣitāścet tavādyāmba kiṃ vā |dhanaṃ yāti dīneṣu dattaṃ dhanaṃ cet dhanaṃ vṛddhimetīti dhanyā vadanti || 18||

प्रतीक्षा कृता तावदद्याम्ब शीघ्रं त्वदङ्घ्र्यम्बुजाराधने साऽधुनापि ।न जाता तथापि स्वचित्तेषु दुःखं न वृत्तं भवत्पादपद्मश्रिया नः ॥ १९॥

pratīkṣā kṛtā tāvadadyāmba śīghraṃ tvadaṅghryambujārādhane sā'dhunāpi |na jātā tathāpi svacitteṣu duḥkhaṃ na vṛttaṃ bhavatpādapadmaśriyā naḥ || 19||

अनन्तैस्तपोभिस्तुलाकोटिदानेः तथा यागपूगैः व्रतानां समूहैः ।भवत्पादसन्दर्शनं धर्मबीजं परन्तु प्रसादात्तवैवाद्रिकन्ये ॥ २०॥

anantaistapobhistulākoṭidāneḥ tathā yāgapūgaiḥ vratānāṃ samūhaiḥ |bhavatpādasandarśanaṃ dharmabījaṃ parantu prasādāttavaivādrikanye || 20||

भवत्पादपद्माम्बुजादेतु वातः करोतु श्रिया संयुतानेव लोकान् ।स लोकोपकाराय सृष्टस्त्वयाऽपि त्वमेवासि माता पिताऽसि त्वमेव ॥ २१॥

bhavatpādapadmāmbujādetu vātaḥ karotu śriyā saṃyutāneva lokān |sa lokopakārāya sṛṣṭastvayā'pi tvamevāsi mātā pitā'si tvameva || 21||

भवत्पादपद्मश्रिया संयुतानां पवित्राणि गात्राणि शर्वाणि गौरि ।गिरीन्द्रोऽपि धन्यस्त्वदाराधनेन स्त्रिया मेनका सापि धन्यापि मान्या ॥ २२॥

bhavatpādapadmaśriyā saṃyutānāṃ pavitrāṇi gātrāṇi śarvāṇi gauri |girīndro'pi dhanyastvadārādhanena striyā menakā sāpi dhanyāpi mānyā || 22||

तदानुग्रहः प्रार्थितोऽपि प्रयासो न लभ्यः कृतेऽपि प्रयासं विनापि ।अकस्माद्यदि त्वत्पदाम्भोजभक्तिः तदा सोऽपि लभ्यो भवत्येव गौरि ॥ २३॥

tadānugrahaḥ prārthito'pi prayāso na labhyaḥ kṛte'pi prayāsaṃ vināpi |akasmādyadi tvatpadāmbhojabhaktiḥ tadā so'pi labhyo bhavatyeva gauri || 23||

भवत्पादपद्मप्रसादस्य पात्रं वयं तावदम्बाधुना धन्यधन्याः ।इतोऽप्यन्यदस्माकमाशास्यमस्तीत्युपेक्षा न कार्या त्वया दीनवर्गे ॥ २४॥

bhavatpādapadmaprasādasya pātraṃ vayaṃ tāvadambādhunā dhanyadhanyāḥ |ito'pyanyadasmākamāśāsyamastītyupekṣā na kāryā tvayā dīnavarge || 24||

शिवे किश्चिदन्यत् न नः प्रार्थनीयं भवत्पादपद्मानुरागं विनाऽपि ।स एवानुरागो महाभोगहेतुः स सेतुः सुराभीष्टरानाम्बुराशेः ॥ २५॥

śive kiścidanyat na naḥ prārthanīyaṃ bhavatpādapadmānurāgaṃ vinā'pi |sa evānurāgo mahābhogahetuḥ sa setuḥ surābhīṣṭarānāmburāśeḥ || 25||

नमस्ते कल्याणि त्रिपुरवरवामाङ्गसदनेनमस्ते शर्वाणि स्मरहरमनोहारिवदने ।नमस्ते रुद्राणि स्खलदमलनीलोत्पलदलच्छलच्छायाच्छन्नच्छदिमधुरगम्भीरनयने ॥ २६॥

namaste kalyāṇi tripuravaravāmāṅgasadanenamaste śarvāṇi smaraharamanohārivadane |namaste rudrāṇi skhaladamalanīlotpaladalacchalacchāyācchannacchadimadhuragambhīranayane || 26||

नमस्ते नीलाद्रिद्रवविपुलकल्लोलविविधप्रभाभावाभावद्रवललितनीलालककुले ।नमस्ते भक्तेष्टप्रदचतुरपादाम्बुजयुगेनमस्ते भूयस्ते पुनरपि नमस्ते पुनरपि ॥ २७॥

namaste nīlādridravavipulakallolavividhaprabhābhāvābhāvadravalalitanīlālakakule |namaste bhakteṣṭapradacaturapādāmbujayugenamaste bhūyaste punarapi namaste punarapi || 27||

प्रणामानम्रेन्द्रप्रमुखवनितायल्लकमणिप्रभास्पर्धामर्धामृतकरशिरोरत्नमहिला ।मुहुर्दृष्ट्वा दृष्ट्वा निजचरणजाग्रच्छविकृतस्मितव्यक्तानन्दा दिशतु मम कल्याण सरणीम् ॥ २८॥

praṇāmānamrendrapramukhavanitāyallakamaṇiprabhāspardhāmardhāmṛtakaraśiroratnamahilā |muhurdṛṣṭvā dṛṣṭvā nijacaraṇajāgracchavikṛtasmitavyaktānandā diśatu mama kalyāṇa saraṇīm || 28||

॥ इति शिवरहस्यान्तर्गते देवैः कृता गौरिस्तुतिः सम्पूर्णा ॥॥ श्रीशिवरहस्यम् । हराख्यः तृतीयांशः । पूर्वार्धम् । अध्यायः ५। २५५२ ॥

|| iti śivarahasyāntargate devaiḥ kṛtā gauristutiḥ sampūrṇā |||| śrīśivarahasyam | harākhyaḥ tṛtīyāṃśaḥ | pūrvārdham | adhyāyaḥ 5| 2552 ||

– ॥ श्रीशिवरहस्यम् ।हराख्यः तृतीयांशः ।पूर्वार्धम् ।अध्यायः ५। २५-५२ ॥

– || śrīśivarahasyam |harākhyaḥ tṛtīyāṃśaḥ |pūrvārdham |adhyāyaḥ 5| 25-52 ||