शनैश्चरस्तवराजः Shanaishcharastavarajah

श्री गणेशाय नमः ॥नारद उवाच ॥ध्यात्वा गणपतिं राजा धर्मराजो युधिष्ठिरः ।धीरः शनैश्चरस्येमं चकार स्तवमुत्तमम् ॥ १॥

śrī gaṇeśāya namaḥ ||nārada uvāca ||dhyātvā gaṇapatiṃ rājā dharmarājo yudhiṣṭhiraḥ |dhīraḥ śanaiścarasyemaṃ cakāra stavamuttamam || 1||

शिरो मे भास्करिः पातु भालं छायासुतोऽवतु ।कोटराक्षो दृशौ पातु शिखिकण्ठनिभः श्रुती ॥ २॥

śiro me bhāskariḥ pātu bhālaṃ chāyāsuto'vatu |koṭarākṣo dṛśau pātu śikhikaṇṭhanibhaḥ śrutī || 2||

घ्राणं मे भीषणः पातु मुखं बलिमुखोऽवतु ।स्कन्धौ संवर्तकः पातु भुजौ मे भयदोऽवतु ॥ ३॥

ghrāṇaṃ me bhīṣaṇaḥ pātu mukhaṃ balimukho'vatu |skandhau saṃvartakaḥ pātu bhujau me bhayado'vatu || 3||

सौरिर्मे हृदयं पातु नाभिं शनैश्चरोऽवतु ।ग्रहराजः कटिं पातु सर्वतो रविनन्दनः ॥ ४॥

saurirme hṛdayaṃ pātu nābhiṃ śanaiścaro'vatu |graharājaḥ kaṭiṃ pātu sarvato ravinandanaḥ || 4||

पादौ मन्दगतिः पातु कृष्णः पात्वखिलं वपुः ।रक्षामेतां पठेन्नित्यं सौरेर्नामबलैर्युताम् ॥ ५॥

pādau mandagatiḥ pātu kṛṣṇaḥ pātvakhilaṃ vapuḥ |rakṣāmetāṃ paṭhennityaṃ saurernāmabalairyutām || 5||

सुखी पुत्री चिरायुश्च स भवेन्नात्र संशयः ।सौरिः शनैश्चरः कृष्णो नीलोत्पलनिभः शनिः ॥ ६॥

sukhī putrī cirāyuśca sa bhavennātra saṃśayaḥ |sauriḥ śanaiścaraḥ kṛṣṇo nīlotpalanibhaḥ śaniḥ || 6||

शुष्कोदरो विशालाक्षो दुर्निरीक्ष्यो विभीषणः ।शिखिकण्ठनिभो नीलश्छायाहृदयनन्दनः ॥ ७॥

śuṣkodaro viśālākṣo durnirīkṣyo vibhīṣaṇaḥ |śikhikaṇṭhanibho nīlaśchāyāhṛdayanandanaḥ || 7||

कालदृष्टिः कोटराक्षः स्थूलरोमावलीमुखः ।दीर्घो निर्मांसगात्रस्तु शुष्को घोरो भयानकः ॥ ८॥

kāladṛṣṭiḥ koṭarākṣaḥ sthūlaromāvalīmukhaḥ |dīrgho nirmāṃsagātrastu śuṣko ghoro bhayānakaḥ || 8||

नीलांशुः क्रोधनो रौद्रो दीर्घश्मश्रुर्जटाधरः ।मन्दो मन्दगतिः खंजो तृप्तः संवर्तको यमः ॥ ९॥ओरतृप्तः

nīlāṃśuḥ krodhano raudro dīrghaśmaśrurjaṭādharaḥ |mando mandagatiḥ khaṃjo tṛptaḥ saṃvartako yamaḥ || 9||oratṛptaḥ

ग्रहराजः कराली च सूर्यपुत्रो रविः शशी ।कुजो बुधो गुरुः काव्यो भानुजः सिंहिकासुतः ॥ १०॥

graharājaḥ karālī ca sūryaputro raviḥ śaśī |kujo budho guruḥ kāvyo bhānujaḥ siṃhikāsutaḥ || 10||

केतुर्देवपतिर्बाहुः कृतान्तो नैरृतस्तथा ।शशी मरुत्कुबेरश्च ईशानः सुर आत्मभूः ॥ ११॥

keturdevapatirbāhuḥ kṛtānto nairṛtastathā |śaśī marutkuberaśca īśānaḥ sura ātmabhūḥ || 11||

विष्णुर्हरो गणपतिः कुमारः काम ईश्वरः ।कर्ता हर्ता पालयिता राज्यभुग् राज्यदायकः ॥ १२॥ओर्राज्येशो

viṣṇurharo gaṇapatiḥ kumāraḥ kāma īśvaraḥ |kartā hartā pālayitā rājyabhug rājyadāyakaḥ || 12||orrājyeśo

छायासुतः श्यामलाङ्गो धनहर्ता धनप्रदः ।क्रूरकर्मविधाता च सर्वकर्मावरोधकः ॥ १३॥

chāyāsutaḥ śyāmalāṅgo dhanahartā dhanapradaḥ |krūrakarmavidhātā ca sarvakarmāvarodhakaḥ || 13||

तुष्टो रुष्टः कामरूपः कामदो रविनन्दनः ।ग्रहपीडाहरः शान्तो नक्षत्रेशो ग्रहेश्वरः ॥ १४॥

tuṣṭo ruṣṭaḥ kāmarūpaḥ kāmado ravinandanaḥ |grahapīḍāharaḥ śānto nakṣatreśo graheśvaraḥ || 14||

स्थिरासनः स्थिरगतिर्महाकायो महाबलः ।महाप्रभो महाकालः कालात्मा कालकालकः ॥ १५॥

sthirāsanaḥ sthiragatirmahākāyo mahābalaḥ |mahāprabho mahākālaḥ kālātmā kālakālakaḥ || 15||

आदित्यभयदाता च मृत्युरादित्यनन्दनः ।शतभिरुक्षदयिता त्रयोदशीतिथिप्रियः ॥ १६॥

ādityabhayadātā ca mṛtyurādityanandanaḥ |śatabhirukṣadayitā trayodaśītithipriyaḥ || 16||

तिथ्यात्मा तिथिगणनो नक्षत्रगणनायकः ।ओर्तिथ्यात्मकस्तिथिगणोयोगराशिर्मुहूर्तात्मा कर्ता दिनपतिः प्रभुः ॥ १७॥

tithyātmā tithigaṇano nakṣatragaṇanāyakaḥ |ortithyātmakastithigaṇoyogarāśirmuhūrtātmā kartā dinapatiḥ prabhuḥ || 17||

शमीपुष्पप्रियः श्यामस्त्रैलोक्याभयदायकः ।नीलवासाः क्रियासिन्धुर्नीलाञ्जनचयच्छविः ॥ १८॥

śamīpuṣpapriyaḥ śyāmastrailokyābhayadāyakaḥ |nīlavāsāḥ kriyāsindhurnīlāñjanacayacchaviḥ || 18||

सर्वरोगहरो देवः सिद्धो देवगणस्तुतः ।अष्टोत्तरशतं नाम्नां सौरेश्छायासुतस्य यः ॥ १९॥

sarvarogaharo devaḥ siddho devagaṇastutaḥ |aṣṭottaraśataṃ nāmnāṃ saureśchāyāsutasya yaḥ || 19||

पठेन्नित्यं तस्य पीडा समस्ता नश्यति ध्रुवम् ।कृत्वा पूजां पठेन्मर्त्यो भक्तिमान्यः स्तवं सदा ॥ २०॥

paṭhennityaṃ tasya pīḍā samastā naśyati dhruvam |kṛtvā pūjāṃ paṭhenmartyo bhaktimānyaḥ stavaṃ sadā || 20||

विशेषतः शनिदिने पीडा तस्य विनश्यति ।जन्मलग्ने स्थितिर्वापि गोचरे क्रूरराशिगे ॥ २१॥

viśeṣataḥ śanidine pīḍā tasya vinaśyati |janmalagne sthitirvāpi gocare krūrarāśige || 21||

दशासु च गते सौरौ तदा स्तवमिमं पठेत् ।पूजयेद्यः शनिं भक्त्या शमीपुष्पाक्षताम्बरैः ॥ २२॥

daśāsu ca gate saurau tadā stavamimaṃ paṭhet |pūjayedyaḥ śaniṃ bhaktyā śamīpuṣpākṣatāmbaraiḥ || 22||

विधाय लोहप्रतिमां नरो दुःखाद्विमुच्यते ।बाधा याऽन्यग्रहाणां च यः पठेत्तस्य नश्यति ॥ २३॥

vidhāya lohapratimāṃ naro duḥkhādvimucyate |bādhā yā'nyagrahāṇāṃ ca yaḥ paṭhettasya naśyati || 23||

भीतो भयाद्विमुच्येत बद्धो मुच्येत बन्धनात् ।रोगी रोगाद्विमुच्येत नरः स्तवमिमं पठेत् ॥ २४॥

bhīto bhayādvimucyeta baddho mucyeta bandhanāt |rogī rogādvimucyeta naraḥ stavamimaṃ paṭhet || 24||

पुत्रवान्धनवान् श्रीमान् जायते नात्र संशयः ॥ २५॥

putravāndhanavān śrīmān jāyate nātra saṃśayaḥ || 25||

नारद उवाच ॥स्तवं निशम्य पार्थस्य प्रत्यक्षोऽभूत् शनैश्चरः ।दत्त्वा राज्ञे वरः कामं शनिश्चान्तर्दधे तदा ॥ २६॥

nārada uvāca ||stavaṃ niśamya pārthasya pratyakṣo'bhūt śanaiścaraḥ |dattvā rājñe varaḥ kāmaṃ śaniścāntardadhe tadā || 26||

॥ इति श्री भविष्यपुराणे शनैश्चरस्तवराजः सम्पूर्णः ॥

|| iti śrī bhaviṣyapurāṇe śanaiścarastavarājaḥ sampūrṇaḥ ||