शनैश्चरस्तोत्रम् अथवा शनैश्चराष्टकम् Shanaishcharastotram

श्रीगणेशाय नमः ॥अस्य श्रीशनैश्चरस्तोत्रस्य । दशरथ ऋषिः ।शनैश्चरो देवता । त्रिष्टुप् छन्दः ॥शनैश्चरप्रीत्यर्थ जपे विनियोगः ।दशरथ उवाच ॥कोणोऽन्तको रौद्रयमोऽथ बभ्रुः कृष्णः शनिः पिंगलमन्दसौरिः ।नित्यं स्मृतो यो हरते च पीडां तस्मै नमः श्रीरविनन्दनाय ॥ १॥

śrīgaṇeśāya namaḥ ||asya śrīśanaiścarastotrasya | daśaratha ṛṣiḥ |śanaiścaro devatā | triṣṭup chandaḥ ||śanaiścaraprītyartha jape viniyogaḥ |daśaratha uvāca ||koṇo'ntako raudrayamo'tha babhruḥ kṛṣṇaḥ śaniḥ piṃgalamandasauriḥ |nityaṃ smṛto yo harate ca pīḍāṃ tasmai namaḥ śrīravinandanāya || 1||

सुरासुराः किंपुरुषोरगेन्द्रा गन्धर्वविद्याधरपन्नगाश्च ।पीड्यन्ति सर्वे विषमस्थितेन तस्मै नमः श्रीरविनन्दनाय ॥ २॥

surāsurāḥ kiṃpuruṣoragendrā gandharvavidyādharapannagāśca |pīḍyanti sarve viṣamasthitena tasmai namaḥ śrīravinandanāya || 2||

नरा नरेन्द्राः पशवो मृगेन्द्रा वन्याश्च ये कीटपतंगभृङ्गाः ।पीड्यन्ति सर्वे विषमस्थितेन तस्मै नमः श्रीरविनन्दनाय ॥ ३॥

narā narendrāḥ paśavo mṛgendrā vanyāśca ye kīṭapataṃgabhṛṅgāḥ |pīḍyanti sarve viṣamasthitena tasmai namaḥ śrīravinandanāya || 3||

देशाश्च दुर्गाणि वनानि यत्र सेनानिवेशाः पुरपत्तनानि ।पीड्यन्ति सर्वे विषमस्थितेन तस्मै नमः श्रीरविनन्दनाय ॥ ४॥

deśāśca durgāṇi vanāni yatra senāniveśāḥ purapattanāni |pīḍyanti sarve viṣamasthitena tasmai namaḥ śrīravinandanāya || 4||

तिलैर्यवैर्माषगुडान्नदानैर्लोहेन नीलाम्बरदानतो वा ।प्रीणाति मन्त्रैर्निजवासरे च तस्मै नमः श्रीरविनन्दनाय ॥ ५॥

tilairyavairmāṣaguḍānnadānairlohena nīlāmbaradānato vā |prīṇāti mantrairnijavāsare ca tasmai namaḥ śrīravinandanāya || 5||

प्रयागकूले यमुनातटे च सरस्वतीपुण्यजले गुहायाम् ।यो योगिनां ध्यानगतोऽपि सूक्ष्मस्तस्मै नमः श्रीरविनन्दनाय ॥ ६॥

prayāgakūle yamunātaṭe ca sarasvatīpuṇyajale guhāyām |yo yogināṃ dhyānagato'pi sūkṣmastasmai namaḥ śrīravinandanāya || 6||

अन्यप्रदेशात्स्वगृहं प्रविष्टस्तदीयवारे स नरः सुखी स्यात् ।गृहाद् गतो यो न पुनः प्रयाति तस्मै नमः श्रीरविनन्दनाय ॥ ७॥

anyapradeśātsvagṛhaṃ praviṣṭastadīyavāre sa naraḥ sukhī syāt |gṛhād gato yo na punaḥ prayāti tasmai namaḥ śrīravinandanāya || 7||

स्रष्टा स्वयंभूर्भुवनत्रयस्य त्राता हरीशो हरते पिनाकी ।एकस्त्रिधा ऋग्यजुःसाममूर्तिस्तस्मै नमः श्रीरविनन्दनाय ॥ ८॥

sraṣṭā svayaṃbhūrbhuvanatrayasya trātā harīśo harate pinākī |ekastridhā ṛgyajuḥsāmamūrtistasmai namaḥ śrīravinandanāya || 8||

शन्यष्टकं यः प्रयतः प्रभाते नित्यं सुपुत्रैः पशुबान्धवैश्च ।पठेत्तु सौख्यं भुवि भोगयुक्तः प्राप्नोति निर्वाणपदं तदन्ते ॥ ९॥

śanyaṣṭakaṃ yaḥ prayataḥ prabhāte nityaṃ suputraiḥ paśubāndhavaiśca |paṭhettu saukhyaṃ bhuvi bhogayuktaḥ prāpnoti nirvāṇapadaṃ tadante || 9||

कोणस्थः पिङ्गलो बभ्रुः कृष्णो रौद्रोऽन्तको यमः ।सौरिः शनैश्चरो मन्दः पिप्पलादेन संस्तुतः ॥ १०॥

koṇasthaḥ piṅgalo babhruḥ kṛṣṇo raudro'ntako yamaḥ |sauriḥ śanaiścaro mandaḥ pippalādena saṃstutaḥ || 10||

एतानि दश नामानि प्रातरुत्थाय यः पठेत् ।शनैश्चरकृता पीडा न कदाचिद्भविष्यति ॥ ११॥

etāni daśa nāmāni prātarutthāya yaḥ paṭhet |śanaiścarakṛtā pīḍā na kadācidbhaviṣyati || 11||

॥ इति श्रीब्रह्माण्डपुराणे श्रीशनैश्चरस्तोत्रं सम्पूर्णम् ॥

|| iti śrībrahmāṇḍapurāṇe śrīśanaiścarastotraṃ sampūrṇam ||