बुधस्तोत्रम् २ Budhastotram 2

ॐ नमो बुधाय विज्ञाय सोमपुत्राय ते नमः ।रोहिणीगर्भसम्भूत कुङ्कुमच्छविभूषित ॥ १॥

oṃ namo budhāya vijñāya somaputrāya te namaḥ |rohiṇīgarbhasambhūta kuṅkumacchavibhūṣita || 1||

सोमप्रियसुताऽनेकशास्त्रपारगवित्तम ।रौहिणेय नमस्तेऽस्तु निशाकामुकसूनवे ॥ २॥

somapriyasutā'nekaśāstrapāragavittama |rauhiṇeya namaste'stu niśākāmukasūnave || 2||

पीतवस्त्रपरीधान स्वर्णतेजोविराजित ।सुवर्णमालाभरण स्वर्णदानकरप्रिय ॥ ३॥

pītavastraparīdhāna svarṇatejovirājita |suvarṇamālābharaṇa svarṇadānakarapriya || 3||

नमोऽप्रतिमरूपाय रूपानां प्रियकारिणे ।विष्णुभक्तिमते तुभ्यं चेन्दुराजप्रियङ्कर ॥ ४॥

namo'pratimarūpāya rūpānāṃ priyakāriṇe |viṣṇubhaktimate tubhyaṃ cendurājapriyaṅkara || 4||

सिंहासनस्थो वरदः कर्णिकारसमद्युतिः ।खड्गचर्मगदापाणिः सौम्यो वोऽस्तु सुखप्रदः ॥ ५॥

siṃhāsanastho varadaḥ karṇikārasamadyutiḥ |khaḍgacarmagadāpāṇiḥ saumyo vo'stu sukhapradaḥ || 5||

स्थिरासनो महाकायः सर्वकर्मावबोधकः ।विष्णुप्रियो विश्वरूपो महारूपो महेश्वरः ॥ ६॥

sthirāsano mahākāyaḥ sarvakarmāvabodhakaḥ |viṣṇupriyo viśvarūpo mahārūpo maheśvaraḥ || 6||

बुधाय विष्णुभक्ताय महारूपधराय च ।सोमात्मजस्वरूपाय पीतवस्त्रप्रियाय च ॥ ७॥

budhāya viṣṇubhaktāya mahārūpadharāya ca |somātmajasvarūpāya pītavastrapriyāya ca || 7||

अग्रवेदी दीर्घश्मश्रुर्हेमाङ्गः कुङ्कुमच्छविः ।सर्वज्ञः सर्वदः सर्वः सर्वपूज्यो ग्रहेश्वरः ॥ ८॥

agravedī dīrghaśmaśrurhemāṅgaḥ kuṅkumacchaviḥ |sarvajñaḥ sarvadaḥ sarvaḥ sarvapūjyo graheśvaraḥ || 8||

सत्यवादी खड्गहस्तो ग्रहपीडानिवारकः ।सृष्टिकर्ताऽपहर्ता च सर्वकामफलप्रदः ॥ ९॥

satyavādī khaḍgahasto grahapīḍānivārakaḥ |sṛṣṭikartā'pahartā ca sarvakāmaphalapradaḥ || 9||

एतानि बुधनामानि प्रातरुत्थाय यः पठेत् ।न भयं विद्यते तस्य कार्यसिद्धिर्भविष्यति ॥ १०॥

etāni budhanāmāni prātarutthāya yaḥ paṭhet |na bhayaṃ vidyate tasya kāryasiddhirbhaviṣyati || 10||

इत्येतत्स्तोत्रमुत्थाय प्रभाते पठते नरः ।न तस्य पीडा बाधन्ते बुद्धिभाक्च भवेत्सुधीः ॥ ११॥

ityetatstotramutthāya prabhāte paṭhate naraḥ |na tasya pīḍā bādhante buddhibhākca bhavetsudhīḥ || 11||

सर्वपापविनिर्मुक्तो विष्णुलोकं स गच्छति ।बुधो बुद्धिप्रदाता च सोमपुत्रो महाद्युतिः ।आदित्यस्य रथे तिष्ठन्स बुधः प्रीयतां मम ॥ १२॥

sarvapāpavinirmukto viṣṇulokaṃ sa gacchati |budho buddhipradātā ca somaputro mahādyutiḥ |ādityasya rathe tiṣṭhansa budhaḥ prīyatāṃ mama || 12||

इति बुधस्तुतिः समाप्ता ।

iti budhastutiḥ samāptā |