बृहस्पतिस्तोत्रम् Brihaspati Stotram (Navagraha)

ॐ चराचरगुरुं नौमि गुरुं सर्वोपकारकम् ।यस्य सङ्कीर्तनादेव क्षणादिष्टं प्रजायते ॥ १॥

oṃ carācaraguruṃ naumi guruṃ sarvopakārakam |yasya saṅkīrtanādeva kṣaṇādiṣṭaṃ prajāyate || 1||

बृहस्पतिः सुराचार्यो नीतिज्ञो नीतिकारकः ।गुरुर्जीवोऽथ वागीशो वेदवेत्ता विदांवरः ॥ २॥

bṛhaspatiḥ surācāryo nītijño nītikārakaḥ |gururjīvo'tha vāgīśo vedavettā vidāṃvaraḥ || 2||

सौम्यमूर्तिः सुधादृष्टिः पीतवासाः पितामहः ।अग्रवेदी दीर्घश्मश्रुर्हेमाङ्गः कुड्कुमच्छविः ॥ ३॥

saumyamūrtiḥ sudhādṛṣṭiḥ pītavāsāḥ pitāmahaḥ |agravedī dīrghaśmaśrurhemāṅgaḥ kuḍkumacchaviḥ || 3||

सर्वज्ञः सर्वदः सर्वः सर्वपूज्यो ग्रहेश्वरः ।सत्यधामाऽक्षमाली च ग्रहपीडानिवारकः ॥ ४॥

sarvajñaḥ sarvadaḥ sarvaḥ sarvapūjyo graheśvaraḥ |satyadhāmā'kṣamālī ca grahapīḍānivārakaḥ || 4||

पञ्चविंशतिनामानि गुरुं स्मृत्वा तु यः पठेत् ।आयुरारोग्यसम्पन्नो धनधान्यसमन्वितः ॥ ५॥

pañcaviṃśatināmāni guruṃ smṛtvā tu yaḥ paṭhet |āyurārogyasampanno dhanadhānyasamanvitaḥ || 5||

जीवेद्वर्षशतं साग्रं सर्वव्याधिविवर्जितः ।कर्मणा मनसा वाचा यत्पापं समुपार्जितम् ॥ ६॥

jīvedvarṣaśataṃ sāgraṃ sarvavyādhivivarjitaḥ |karmaṇā manasā vācā yatpāpaṃ samupārjitam || 6||

तदेतत्पठनादेव दह्यतेऽग्निरिवेन्धनम् ।गुरोर्दिनेऽर्चयेद्यस्तु पीतवस्त्रानुलेपनैः ॥ ७॥

tadetatpaṭhanādeva dahyate'gnirivendhanam |gurordine'rcayedyastu pītavastrānulepanaiḥ || 7||

धूपदीपोपहारैश्च विप्रभोजनपूर्वकम् ।पीडाशान्तिर्भवेत्तस्य स्वयमाह बृहस्पतिः ॥ ८॥

dhūpadīpopahāraiśca viprabhojanapūrvakam |pīḍāśāntirbhavettasya svayamāha bṛhaspatiḥ || 8||

मेरुमूर्ध्नि समाक्रान्तो देवराजपुरोहितः ।ज्ञाता यः सर्वशास्त्राणां स गुरुः प्रीयतां मम ॥ ९॥

merumūrdhni samākrānto devarājapurohitaḥ |jñātā yaḥ sarvaśāstrāṇāṃ sa guruḥ prīyatāṃ mama || 9||

इति बृहस्पतिस्तोत्रम् ।

iti bṛhaspatistotram |