स्वप्रभुस्वरूपनिरूपणाष्टकम् Svaprabhusvarupanirupanashtakam

स्वामिनीभावगौरस्य स्वस्वरूपं प्रपश्यतः ।कटाक्षैर्विठ्ठलेशस्य श्यामताचित्रितं वपुः ॥ १॥

svāminībhāvagaurasya svasvarūpaṃ prapaśyataḥ |kaṭākṣairviṭhṭhaleśasya śyāmatācitritaṃ vapuḥ || 1||

स्वास्मिन्नभयभावेन स्वेषामुभयरूपताम् ।स्पष्टं बोधयितुं गौरश्यामः श्रीविठ्ठलेश्वरः ॥ २॥

svāsminnabhayabhāvena sveṣāmubhayarūpatām |spaṣṭaṃ bodhayituṃ gauraśyāmaḥ śrīviṭhṭhaleśvaraḥ || 2||

निजाचार्योदितस्वीयमार्गसेव्यस्वरूपताम् ।बोधयन्नभयात्माऽयं गौरश्यामो विराजते ॥ ३॥

nijācāryoditasvīyamārgasevyasvarūpatām |bodhayannabhayātmā'yaṃ gauraśyāmo virājate || 3||

रसस्य द्विविधस्यापि स्वरूपे बोधयन् स्थितिम् ।ऐक्यं विरुद्धधर्मत्वाद्गौरश्यामः कृपानिधिः ॥ ४॥

rasasya dvividhasyāpi svarūpe bodhayan sthitim |aikyaṃ viruddhadharmatvādgauraśyāmaḥ kṛpānidhiḥ || 4||

स्त्रीभावभगवद्भावोभयात्मेति विबोधितुम् ।स्वस्वरूपं हरिर्गौरश्यामः श्रीविठ्ठलेश्वरः ॥ ५॥

strībhāvabhagavadbhāvobhayātmeti vibodhitum |svasvarūpaṃ harirgauraśyāmaḥ śrīviṭhṭhaleśvaraḥ || 5||

भावात्मकत्वतो दृष्टिर्हासलीलाकृतिस्तथा ।अतो विलोक्यते गौरश्यामः श्रीविठ्ठलेश्वरः ॥ ६॥

bhāvātmakatvato dṛṣṭirhāsalīlākṛtistathā |ato vilokyate gauraśyāmaḥ śrīviṭhṭhaleśvaraḥ || 6||

निजानन्दप्रदानेन व्यवधाने दिवानिशम् ।न करोति व्रजस्थानमिति श्रीमत्प्रभुस्तथा ॥ ७॥

nijānandapradānena vyavadhāne divāniśam |na karoti vrajasthānamiti śrīmatprabhustathā || 7||

सर्वात्मकामभावात्मस्वरूपं बोधयन्प्रभुः ।श्रीविठ्ठलेश्वरोऽस्माकं गौरश्यामो विराजते ॥ ८॥

sarvātmakāmabhāvātmasvarūpaṃ bodhayanprabhuḥ |śrīviṭhṭhaleśvaro'smākaṃ gauraśyāmo virājate || 8||

इति श्रीहरिदासोदितं स्वप्रभुस्वरूपनिरूयणाष्टकं सम्पूर्णम् ।

iti śrīharidāsoditaṃ svaprabhusvarūpanirūyaṇāṣṭakaṃ sampūrṇam |