गोपीनाथदेवाष्टकम् Shri Gopinathadevashtakam

आस्ये हास्यं तत्र माध्वीकमस्मिन्वंशी तस्यां नादपीयूषसिन्धुः ।तद्वीचीभिर्मज्जयन् भाति गोपीर्गोपीनाथः पीनवक्षा गतिर्नः ॥ १॥

āsye hāsyaṃ tatra mādhvīkamasminvaṃśī tasyāṃ nādapīyūṣasindhuḥ |tadvīcībhirmajjayan bhāti gopīrgopīnāthaḥ pīnavakṣā gatirnaḥ || 1||

शोणोष्णीषभ्राजिमुक्तास्रजोद्यत्पिञ्छोत्तंसस्पन्दनेनापि नूनम् ।हृन्नेत्रालीवृत्तिरत्नानि मुञ्चन्गोपीनाथः पीनवक्षा गतिर्नः ॥ २॥

śoṇoṣṇīṣabhrājimuktāsrajodyatpiñchottaṃsaspandanenāpi nūnam |hṛnnetrālīvṛttiratnāni muñcangopīnāthaḥ pīnavakṣā gatirnaḥ || 2||

बिभ्रद्वासः पीतमूरूरुकान्त्याश्लीष्टं भास्वत्किङ्किणीकं नितम्बे ।सव्याभीरीचुम्बितप्रान्तबाहुर्गोपीनाथः पीनवक्षा गतिर्नः ॥ ३॥

bibhradvāsaḥ pītamūrūrukāntyāślīṣṭaṃ bhāsvatkiṅkiṇīkaṃ nitambe |savyābhīrīcumbitaprāntabāhurgopīnāthaḥ pīnavakṣā gatirnaḥ || 3||

गुञ्जामुक्तारत्नगाङ्गेयहारैर्माल्यैः कण्ठे लम्बमानैः क्रमेण ।पीतोदञ्चत्कञ्चुकेनाञ्चितश्रीर्गोपीनाथः पीनवक्षा गतिर्नः ॥ ४॥

guñjāmuktāratnagāṅgeyahārairmālyaiḥ kaṇṭhe lambamānaiḥ krameṇa |pītodañcatkañcukenāñcitaśrīrgopīnāthaḥ pīnavakṣā gatirnaḥ || 4||

श्वतोष्णीषः श्वेतसुश्लोकधौतःसुश्वेतस्रक्द्वित्रशः श्वेतभूषः ।चुम्बन् शर्यामङ्गलारात्रिके हृद्गोपीनाथः पीनवक्षा गतिर्नः ॥ ५॥

śvatoṣṇīṣaḥ śvetasuślokadhautaḥsuśvetasrakdvitraśaḥ śvetabhūṣaḥ |cumban śaryāmaṅgalārātrike hṛdgopīnāthaḥ pīnavakṣā gatirnaḥ || 5||

श्रीवत्सश्रीकौस्तुभोद्भिन्नरोम्णांवर्णैः श्रीमान् यश्चतुर्भिः सदेष्टः ।दृष्टः प्रेम्णैवातिधन्यैरनन्यैर्गोपीनाथः पीनवक्षा गतिर्नः ॥ ६॥

śrīvatsaśrīkaustubhodbhinnaromṇāṃvarṇaiḥ śrīmān yaścaturbhiḥ sadeṣṭaḥ |dṛṣṭaḥ premṇaivātidhanyairananyairgopīnāthaḥ pīnavakṣā gatirnaḥ || 6||

तापिञ्छः किं हेमवल्लीयुगान्तःपार्श्वद्वन्द्वोद्द्योतिविद्युद्घनः किम् ।किं वा मध्ये राधयोः श्यामलेन्दुर्गोपीनाथः पीनवक्षा गतिर्नः ॥ ७॥

tāpiñchaḥ kiṃ hemavallīyugāntaḥpārśvadvandvoddyotividyudghanaḥ kim |kiṃ vā madhye rādhayoḥ śyāmalendurgopīnāthaḥ pīnavakṣā gatirnaḥ || 7||

श्रीजाह्नव्या मूर्तिमान् प्रेमपुञ्जोदीनानाथान् दर्शयन् स्वं प्रसीदन् ।पुष्णन् देवालभ्यफेलासुधाभिर्गोपीनाथः पीनवक्षा गतिर्नः ॥ ८॥

śrījāhnavyā mūrtimān premapuñjodīnānāthān darśayan svaṃ prasīdan |puṣṇan devālabhyaphelāsudhābhirgopīnāthaḥ pīnavakṣā gatirnaḥ || 8||

गोपीनाथाष्टकं तुष्टचेतास्तत्पदाब्जप्रेमपुष्णीभविष्णुः ।योऽधीते तन्मन्तुकोटीरपश्यन्गोपीनाथः पीनवक्षा गतिर्नः ॥ ९॥

gopīnāthāṣṭakaṃ tuṣṭacetāstatpadābjapremapuṣṇībhaviṣṇuḥ |yo'dhīte tanmantukoṭīrapaśyangopīnāthaḥ pīnavakṣā gatirnaḥ || 9||

इति श्रीविश्वनाथचक्रवर्तिठक्कुरविरचितस्तवामृतलहर्यांश्रीगोपिनाथाष्टकं सम्पूर्णम् ।

iti śrīviśvanāthacakravartiṭhakkuraviracitastavāmṛtalaharyāṃśrīgopināthāṣṭakaṃ sampūrṇam |