गोपालराजस्तोत्रम् Shri Gopalarajastotram

वपुरतुलतमालस्फीतबाहूरुशाखोपरिधृतगिरिवर्यस्वर्णवर्णैकगुच्छः ।कटिकृतपरहस्तारक्तशाखाग्रहृद्यःप्रतपति गिरिपट्टे सुष्ठु गोपालराजः ॥ १॥

vapuratulatamālasphītabāhūruśākhoparidhṛtagirivaryasvarṇavarṇaikagucchaḥ |kaṭikṛtaparahastāraktaśākhāgrahṛdyaḥpratapati giripaṭṭe suṣṭhu gopālarājaḥ || 1||

रुचिरदृगभिधाने पङ्कजे फुल्लयन्तंसुभगवदनगात्रं चित्रचन्द्रं दधानः ।विलसदधरबिम्बघ्रायिनासाशुकोष्ठःप्रतपति गिरिपट्टे सुष्ठु गोपालराजः ॥ २॥

ruciradṛgabhidhāne paṅkaje phullayantaṃsubhagavadanagātraṃ citracandraṃ dadhānaḥ |vilasadadharabimbaghrāyināsāśukoṣṭhaḥpratapati giripaṭṭe suṣṭhu gopālarājaḥ || 2||

चलकुटिलतरभ्रूकर्मुकान्तर्दृगन्तक्रमणनिशितबाणं शीघ्रयानं दधानः ।दवयितुमिव राधाधैर्यपारीन्द्रवर्यंप्रतपति गिरिपट्टे सुष्ठु गोपालराजः ॥ ३॥

calakuṭilatarabhrūkarmukāntardṛgantakramaṇaniśitabāṇaṃ śīghrayānaṃ dadhānaḥ |davayitumiva rādhādhairyapārīndravaryaṃpratapati giripaṭṭe suṣṭhu gopālarājaḥ || 3||

असुलभमिह राधावक्त्रचुम्बं विजानन्निव विलसितुमेता छाययापि प्रदूरात् ।मुकुरयुगलमच्छं गण्डदम्भेन बिभ्रत्प्रतपति गिरिपट्टे सुष्ठु गोपालराजः ॥ ४॥

asulabhamiha rādhāvaktracumbaṃ vijānanniva vilasitumetā chāyayāpi pradūrāt |mukurayugalamacchaṃ gaṇḍadambhena bibhratpratapati giripaṭṭe suṣṭhu gopālarājaḥ || 4||

रुचिनिकरविराजद्दाडिमीपक्वबीजप्रकरविजयिदन्तश्रेणिसौरभ्यवातैः ।रचितयुवतिचेतःकीरजिह्वातिलौल्यःप्रतपति गिरिपट्टे सुष्ठु गोपालराजः ॥ ५॥

rucinikaravirājaddāḍimīpakvabījaprakaravijayidantaśreṇisaurabhyavātaiḥ |racitayuvaticetaḥkīrajihvātilaulyaḥpratapati giripaṭṭe suṣṭhu gopālarājaḥ || 5||

वचनमधुरसानां पायनैर्गोपरामाकुलमुरुधृतधामाप्युन्मदीकृत्य कामम् ।अभिमतरतिरत्नान्याददानस्ततो द्राक्प्रतपति गिरिपट्टे सुष्ठु गोपालराजः ॥ ६॥

vacanamadhurasānāṃ pāyanairgoparāmākulamurudhṛtadhāmāpyunmadīkṛtya kāmam |abhimataratiratnānyādadānastato drākpratapati giripaṭṭe suṣṭhu gopālarājaḥ || 6||

कुवलयनिभभाले कौङ्कुमद्रावपुण्ड्रंदधदिव घनशण्डे निश्चलाचञ्चलाग्रम् ।रचयितुमिव साध्वीकीर्तिमुग्धालिभीतिंप्रतपति गिरिपट्टे सुष्ठु गोपालराजः ॥ ७॥

kuvalayanibhabhāle kauṅkumadrāvapuṇḍraṃdadhadiva ghanaśaṇḍe niścalācañcalāgram |racayitumiva sādhvīkīrtimugdhālibhītiṃpratapati giripaṭṭe suṣṭhu gopālarājaḥ || 7||

श्रवणमदनरज्जू सज्जयल्लज्जिराधानयनचलचकोरौ बन्धुमुत्कः किशोरौ ।कृतमकरवतंसस्निग्धचन्द्रांशुचारःप्रतपति गिरिपट्टे सुष्ठु गोपालराजः ॥ ८॥

śravaṇamadanarajjū sajjayallajjirādhānayanacalacakorau bandhumutkaḥ kiśorau |kṛtamakaravataṃsasnigdhacandrāṃśucāraḥpratapati giripaṭṭe suṣṭhu gopālarājaḥ || 8||

युवतिकरणरत्नव्रातमाच्छिद्य नेत्रभ्रमणपटुभटैस्तं न्यस्य हृत्सौधमध्ये ।गरुडमणिकवाटेनोरसाघुष्य हृष्टःप्रतपति गिरिपट्टे सुष्ठु गोपालराजः ॥ ९॥

yuvatikaraṇaratnavrātamācchidya netrabhramaṇapaṭubhaṭaistaṃ nyasya hṛtsaudhamadhye |garuḍamaṇikavāṭenorasāghuṣya hṛṣṭaḥpratapati giripaṭṭe suṣṭhu gopālarājaḥ || 9||

त्रिबलिललिततुण्डस्यन्दिनाभिह्रदोद्यत्तनुरुहततिसर्पीमत्र बिभ्राण उग्राम् ।युवतिपतिभयाखुग्रासनायेव सद्यःप्रतपति गिरिपट्टे सुष्ठु गोपालराजः ॥ १०॥

tribalilalitatuṇḍasyandinābhihradodyattanuruhatatisarpīmatra bibhrāṇa ugrām |yuvatipatibhayākhugrāsanāyeva sadyaḥpratapati giripaṭṭe suṣṭhu gopālarājaḥ || 10||

मरकतकृतरम्भागर्वसर्वाङ्कशोरुद्वयमुरुरसधाम प्रेयसीनां दधानः ।स्फुरदविरलपुष्टश्रोणिभारातिरम्यःप्रतपति गिरिपट्टे सुष्ठु गोपालराजः ॥ ११॥

marakatakṛtarambhāgarvasarvāṅkaśorudvayamururasadhāma preyasīnāṃ dadhānaḥ |sphuradaviralapuṣṭaśroṇibhārātiramyaḥpratapati giripaṭṭe suṣṭhu gopālarājaḥ || 11||

मदनमणिवरालीसम्पुटक्षुल्लजानुद्वयसुललितजङ्घामञ्जुपादाब्जयुग्मः ।विविधवसनभूषाभूषिताङ्गः सुकण्ठःप्रतपति गिरिपट्टे सुष्ठु गोपालराजः ॥ १२॥

madanamaṇivarālīsampuṭakṣullajānudvayasulalitajaṅghāmañjupādābjayugmaḥ |vividhavasanabhūṣābhūṣitāṅgaḥ sukaṇṭhaḥpratapati giripaṭṭe suṣṭhu gopālarājaḥ || 12||

कलितवपुरिव श्रीविट्ठलप्रेमपुञ्जःपरिजनपरिचर्यावर्यपीयूषपुष्टः ।द्युतिभरजितमद्यन्मन्मथोद्यत्समाजःप्रतपति गिरिपट्टे सुष्ठु गोपालराजः ॥ १३॥

kalitavapuriva śrīviṭṭhalapremapuñjaḥparijanaparicaryāvaryapīyūṣapuṣṭaḥ |dyutibharajitamadyanmanmathodyatsamājaḥpratapati giripaṭṭe suṣṭhu gopālarājaḥ || 13||

विविधभजनपुष्पैरिष्टनामानि गृह्णन्पुलकिततनुरिह श्रीविट्ठलस्योरुसख्यैः ।प्रणयमणिसरं स्वं हन्त तस्मै ददानःप्रतपति गिरिपट्टे सुष्ठु गोपालराजः ॥ १४॥

vividhabhajanapuṣpairiṣṭanāmāni gṛhṇanpulakitatanuriha śrīviṭṭhalasyorusakhyaiḥ |praṇayamaṇisaraṃ svaṃ hanta tasmai dadānaḥpratapati giripaṭṭe suṣṭhu gopālarājaḥ || 14||

गिरिकुलपतिपट्टोल्लासिगोपालराजस्तुतिविलसितपद्यान्युद्भटप्रेमदानि ।नटयति रसनाग्रे श्रद्धया निर्भरं यःस सपदि लभते तत्प्रेमरत्नं प्रसादम् ॥ १५॥

girikulapatipaṭṭollāsigopālarājastutivilasitapadyānyudbhaṭapremadāni |naṭayati rasanāgre śraddhayā nirbharaṃ yaḥsa sapadi labhate tatpremaratnaṃ prasādam || 15||

इति श्रीरघुनाथदासगोस्वामिविरचितस्तवावल्यांश्रीगोपालराजस्तोत्रं सम्पूर्णम् ।

iti śrīraghunāthadāsagosvāmiviracitastavāvalyāṃśrīgopālarājastotraṃ sampūrṇam |