श्रीकृष्णस्तोत्रम् (इन्द्रकृतं १ ब्रह्मवैवर्तपुराणान्तर्गतम् अक्षरं परमं ब्रह्म ज्योतीरूपं सनातनम्) Krishnastotra by Indra

श्रीगणेशाय नमः ॥इन्द्र उवाच ।अक्षरं परमं ब्रह्म ज्योतीरूपं सनातनम् ।गुणातीतं निराकारं स्वेच्छामयमनन्तजम् ॥ १॥

śrīgaṇeśāya namaḥ ||indra uvāca |akṣaraṃ paramaṃ brahma jyotīrūpaṃ sanātanam |guṇātītaṃ nirākāraṃ svecchāmayamanantajam || 1||

भक्तध्यानाय सेवायै नानारूपधरं वरम् ।शुक्लरक्तपीतश्यामं युगानुक्रमणेन च ॥ २॥

bhaktadhyānāya sevāyai nānārūpadharaṃ varam |śuklaraktapītaśyāmaṃ yugānukramaṇena ca || 2||

शुक्लतेजःस्वरूपं च सत्ये सत्यस्वरूपिणम् ।त्रेतायां कुङ्कुमाकारं ज्वलन्तं ब्रह्मतेजसा ॥ ३॥

śuklatejaḥsvarūpaṃ ca satye satyasvarūpiṇam |tretāyāṃ kuṅkumākāraṃ jvalantaṃ brahmatejasā || 3||

द्वापरे पीतवर्णं च शोभितं पीतवाससा ।कृष्णवर्णं कलौ कृष्णं परिपूर्णतमं प्रभुम् ॥ ४॥

dvāpare pītavarṇaṃ ca śobhitaṃ pītavāsasā |kṛṣṇavarṇaṃ kalau kṛṣṇaṃ paripūrṇatamaṃ prabhum || 4||

नवधाराधरोत्कृष्टश्यामसुन्दरविग्रहम् ।नन्दैकनन्दनं वन्दे यशोदानन्दनं प्रभुम् ॥ ५॥

navadhārādharotkṛṣṭaśyāmasundaravigraham |nandaikanandanaṃ vande yaśodānandanaṃ prabhum || 5||

गोपिकाचेतनहरं राधाप्राणाधिकं परम् ।विनोदमुरलीशब्दं कुर्वन्तं कौतुकेन च ॥ ६॥

gopikācetanaharaṃ rādhāprāṇādhikaṃ param |vinodamuralīśabdaṃ kurvantaṃ kautukena ca || 6||

रूपेणाप्रतिमेनैव रत्नभूषणभूषितम् ।कन्दर्पकोटिसौन्दर्यं विभ्रतं शान्तमीश्वरम् ॥ ७॥

rūpeṇāpratimenaiva ratnabhūṣaṇabhūṣitam |kandarpakoṭisaundaryaṃ vibhrataṃ śāntamīśvaram || 7||

क्रीडन्तं राधया सार्धं वृन्दारण्ये च कुत्रचित् ।कृत्रचिन्निर्जनेऽरण्ये राधावक्षःस्थलस्थितम् ॥ ८॥

krīḍantaṃ rādhayā sārdhaṃ vṛndāraṇye ca kutracit |kṛtracinnirjane'raṇye rādhāvakṣaḥsthalasthitam || 8||

जलक्रीडां प्रकुर्वन्तं राधया सह कुत्रचित् ।राधिकाकबरीभारं कुर्वन्तं कुत्रचिद्वने ॥ ९॥

jalakrīḍāṃ prakurvantaṃ rādhayā saha kutracit |rādhikākabarībhāraṃ kurvantaṃ kutracidvane || 9||

कुत्रचिद्राधिकापादे दत्तवन्तमलक्तकम् ।राधार्चवितताम्बूलं गृह्णन्तं कुत्रचिन्मुदा ॥ १०॥

kutracidrādhikāpāde dattavantamalaktakam |rādhārcavitatāmbūlaṃ gṛhṇantaṃ kutracinmudā || 10||

पश्यन्तं कुत्रचिद्राधां पश्यन्तीं वक्रचक्षुषा ।दत्तवन्तं च राधायै कृत्वा मालां च कुत्रचित् ॥ ११॥

paśyantaṃ kutracidrādhāṃ paśyantīṃ vakracakṣuṣā |dattavantaṃ ca rādhāyai kṛtvā mālāṃ ca kutracit || 11||

कुत्रचिद्राधया सार्धं गच्छन्तं रासमण्डलम् ।राधादत्तां गले मालां धृतवन्तं च कुत्रचित् ॥ १२॥

kutracidrādhayā sārdhaṃ gacchantaṃ rāsamaṇḍalam |rādhādattāṃ gale mālāṃ dhṛtavantaṃ ca kutracit || 12||

सार्धं गोपालिकाभिश्च विहरन्तं च कुत्रचित् ।राधां गृहीत्वा गच्छन्तं तां विहाय च कुत्रचित् ॥ १३॥

sārdhaṃ gopālikābhiśca viharantaṃ ca kutracit |rādhāṃ gṛhītvā gacchantaṃ tāṃ vihāya ca kutracit || 13||

विप्रपत्नीदत्तमन्नं भुक्तवन्तं च कुत्रचित् ।भुक्तवन्तं तालफलं बालकैः सह कुत्रचित् ॥ १४॥

viprapatnīdattamannaṃ bhuktavantaṃ ca kutracit |bhuktavantaṃ tālaphalaṃ bālakaiḥ saha kutracit || 14||

वस्त्रं गोपालिकानां च हरन्तं कुत्रचिन्मुदा ।गवां गणं व्याहरन्तं कुत्रचिद्बालकैः सह ॥ १५॥

vastraṃ gopālikānāṃ ca harantaṃ kutracinmudā |gavāṃ gaṇaṃ vyāharantaṃ kutracidbālakaiḥ saha || 15||

कालीयमूर्ध्नि पादाब्जं दत्तवन्तं च कुत्रचित् ।विनोदमुरलीशब्दं कुर्वन्तं कुत्रचिन्मुदा ॥ १६॥

kālīyamūrdhni pādābjaṃ dattavantaṃ ca kutracit |vinodamuralīśabdaṃ kurvantaṃ kutracinmudā || 16||

गायन्तं रम्यसङ्गीतं कुत्रचिद्बालकैः सह ।स्तुत्वा शक्रः स्तवेन्द्रेण प्रणनाम हरिं भिया ॥ १७॥

gāyantaṃ ramyasaṅgītaṃ kutracidbālakaiḥ saha |stutvā śakraḥ stavendreṇa praṇanāma hariṃ bhiyā || 17||

पुरा दत्तेन गुरुणा रणे वृत्रासुरेण च ।कृष्णेन दत्तं कृपया ब्रह्मणे च तपस्यते ॥ १८॥

purā dattena guruṇā raṇe vṛtrāsureṇa ca |kṛṣṇena dattaṃ kṛpayā brahmaṇe ca tapasyate || 18||

एकादशाक्षरो मन्त्रः कवचं सर्वलक्षणम् ।दत्तमेतत्कुमाराय पुष्करे ब्रह्मणा पुरा ॥ १९॥

ekādaśākṣaro mantraḥ kavacaṃ sarvalakṣaṇam |dattametatkumārāya puṣkare brahmaṇā purā || 19||

तेन चाङ्गिरसे दत्तं गुरवेऽङ्गिरसा मुने ।इदमिन्द्रकृतं स्तोत्रं नित्यं भक्त्या च यः पठेत् ॥ २०॥

tena cāṅgirase dattaṃ gurave'ṅgirasā mune |idamindrakṛtaṃ stotraṃ nityaṃ bhaktyā ca yaḥ paṭhet || 20||

इह प्राप्य दृढां भक्तिमन्ते दास्यं लभेद्ध्रुवम् ।जन्ममृत्युजराव्याधिशोकेभ्यो मुच्यते नरः ॥ २१॥

iha prāpya dṛḍhāṃ bhaktimante dāsyaṃ labheddhruvam |janmamṛtyujarāvyādhiśokebhyo mucyate naraḥ || 21||

न हि पश्यति स्वप्नेऽपि यमदूतं यमालयम् ॥ २२॥

na hi paśyati svapne'pi yamadūtaṃ yamālayam || 22||

॥ इति श्रीब्रह्मवैवर्ते इन्द्रकृतं श्रीकृष्णस्तोत्रं समाप्तम् ॥इति ब्रह्मवैवर्तपुराणे श्रीकृष्णजन्मखण्डे एकविंशाध्यायान्तर्गतंइन्द्रकृतं श्रीकृष्णस्तोत्रं सम्पूर्णम् ।ब्रह्मवैवर्तपुराण । श्रीकृष्णजन्म, पूर्वभाग । अध्याय २१/१७९२००॥ब्रह्मवैवर्तपुराण । श्रीकृष्णजन्म, पूर्वभाग । अध्याय २१/१७९-२००॥

|| iti śrībrahmavaivarte indrakṛtaṃ śrīkṛṣṇastotraṃ samāptam ||iti brahmavaivartapurāṇe śrīkṛṣṇajanmakhaṇḍe ekaviṃśādhyāyāntargataṃindrakṛtaṃ śrīkṛṣṇastotraṃ sampūrṇam |brahmavaivartapurāṇa | śrīkṛṣṇajanma, pūrvabhāga | adhyāya 21/179200||brahmavaivartapurāṇa | śrīkṛṣṇajanma, pūrvabhāga | adhyāya 21/179-200||