गोवर्धनाश्रयदशकम् Govardhanashrayadashakam

सप्ताहं मुरजित्कराम्बुजपरिभ्राजत्कनिष्ठाङ्गुलिप्रोद्यद्वल्गुवरातकोपरिमिलन्मुग्धद्विरेफोऽपि यः ।पाथःक्षेपकशक्रनक्रमुखतः क्रोडे व्रजं द्राग् अपात्कस्तं गोकुलबन्धवं गिरिवरं गोवर्धनं नाश्रयेत् ॥ १॥

saptāhaṃ murajitkarāmbujaparibhrājatkaniṣṭhāṅguliprodyadvalguvarātakoparimilanmugdhadvirepho'pi yaḥ |pāthaḥkṣepakaśakranakramukhataḥ kroḍe vrajaṃ drāg apātkastaṃ gokulabandhavaṃ girivaraṃ govardhanaṃ nāśrayet || 1||

इन्द्रत्वे निभृतं गवां सुरनदीतोयेन दीनात्मनाशक्रेणानुगता चकार सुरभिर्येनाभिषेकं हरेः ।यत्कच्छेऽजनि तेन नन्दितजनं गोविन्दकुण्डं कृतीकस्तं गोनिकरेन्द्रपट्टशिखरं गोवर्धनं नाश्रयेत् ॥ २॥

indratve nibhṛtaṃ gavāṃ suranadītoyena dīnātmanāśakreṇānugatā cakāra surabhiryenābhiṣekaṃ hareḥ |yatkacche'jani tena nanditajanaṃ govindakuṇḍaṃ kṛtīkastaṃ gonikarendrapaṭṭaśikharaṃ govardhanaṃ nāśrayet || 2||

स्वर्धुन्यादिवरेण्यतीर्थगणतो हृद्यान्यजस्रं हरेःसीरिब्रह्महराप्सरःप्रियकतत्श्रीदानकुण्डान्यपि ।प्रेमक्षेमरुचिप्रदानि परितो भ्राजन्ति यस्य व्रतीकस्तं मन्यमुनीन्द्रवर्णितगुणं गोवर्धनं नाश्रयेत् ॥ ३॥

svardhunyādivareṇyatīrthagaṇato hṛdyānyajasraṃ hareḥsīribrahmaharāpsaraḥpriyakatatśrīdānakuṇḍānyapi |premakṣemarucipradāni parito bhrājanti yasya vratīkastaṃ manyamunīndravarṇitaguṇaṃ govardhanaṃ nāśrayet || 3||

ज्योत्स्नामोक्षणमाल्यहारसुमनोगौरीबलारिध्वजागान्धर्वादिसरांसि निर्झरगिरिः शृङ्गारसिंहासनम् ।गोपालोऽपि हरिस्थलं हरिरपि स्फूर्जन्ति यत्सर्वतःकस्तं गोमृगपक्षिवृक्षललितं गोवर्धनं नाश्रयेत् ॥ ४॥

jyotsnāmokṣaṇamālyahārasumanogaurībalāridhvajāgāndharvādisarāṃsi nirjharagiriḥ śṛṅgārasiṃhāsanam |gopālo'pi haristhalaṃ harirapi sphūrjanti yatsarvataḥkastaṃ gomṛgapakṣivṛkṣalalitaṃ govardhanaṃ nāśrayet || 4||

गङ्गाकोट्यधिकं बकारिपदजारिष्टारिकुण्डं वहन्भक्त्या यः शिरसा नतेन सततं प्रेयान्शिवादप्यभूत् ।राधाकुण्डमणिं तथैव मुरजित्प्रौढप्रसादं दधात्प्रेयःस्तव्यमनोऽभवत्क इह तं गोवर्धनं नाश्रयेत् ॥ ५॥

gaṅgākoṭyadhikaṃ bakāripadajāriṣṭārikuṇḍaṃ vahanbhaktyā yaḥ śirasā natena satataṃ preyānśivādapyabhūt |rādhākuṇḍamaṇiṃ tathaiva murajitprauḍhaprasādaṃ dadhātpreyaḥstavyamano'bhavatka iha taṃ govardhanaṃ nāśrayet || 5||

यस्यां माधवनाविको रसवतीमाधाय राधां तरौमध्ये चञ्चलकेलिपातवलनात्त्रासैः स्तुवत्यास्ततः ।स्वाभिष्ठं पणमादधे वहति सा यस्मिन्मनोजाह्नवीकस्तं तन्नवदम्पतिप्रतिभुवं गोवर्धनं नाश्रयेत् ॥ ६॥

yasyāṃ mādhavanāviko rasavatīmādhāya rādhāṃ taraumadhye cañcalakelipātavalanāttrāsaiḥ stuvatyāstataḥ |svābhiṣṭhaṃ paṇamādadhe vahati sā yasminmanojāhnavīkastaṃ tannavadampatipratibhuvaṃ govardhanaṃ nāśrayet || 6||

रासे श्रीशतवन्द्यसुन्दरसखी वृन्दाञ्चिता सौरभभ्राजत्कृष्णरसालबाहुविलसत्कण्ठी मधौ माधवी ।राधा नृत्यति यत्र चारु वलते रासस्थली सा परायस्मिन्स सुकृती तमुन्नतमये गोवर्धनं नाश्रयेत् ॥ ७॥

rāse śrīśatavandyasundarasakhī vṛndāñcitā saurabhabhrājatkṛṣṇarasālabāhuvilasatkaṇṭhī madhau mādhavī |rādhā nṛtyati yatra cāru valate rāsasthalī sā parāyasminsa sukṛtī tamunnatamaye govardhanaṃ nāśrayet || 7||

यत्र स्वीयगणस्य विक्रमभृता वाचा मुहुः फुल्लतोःस्मेरक्रूरदृगन्तविभ्रमशरैः शश्वन्मिथो विद्धयोः ।तद्यूनोर्नवदानसृष्टिजकलिर्भङ्ग्या हसन्जृम्भतेकस्तं तत्पृथुकेलिसूचनशिलं गोवर्धनं नाश्रयेत् ॥ ८॥

yatra svīyagaṇasya vikramabhṛtā vācā muhuḥ phullatoḥsmerakrūradṛgantavibhramaśaraiḥ śaśvanmitho viddhayoḥ |tadyūnornavadānasṛṣṭijakalirbhaṅgyā hasanjṛmbhatekastaṃ tatpṛthukelisūcanaśilaṃ govardhanaṃ nāśrayet || 8||

श्रीदामादिवयस्यसञ्चयवृतः सङ्कर्षणेनोल्लसन्यस्मिन्गोचयचारुचारणपरो रीरीति गायत्यसौ ।रङ्गे गूढगुहासु च प्रथयति स्मारक्रियां राधयाकस्तं सौभगभूषिताञ्चिततनुं गोवर्धनं नाश्रयेत् ॥ ९॥

śrīdāmādivayasyasañcayavṛtaḥ saṅkarṣaṇenollasanyasmingocayacārucāraṇaparo rīrīti gāyatyasau |raṅge gūḍhaguhāsu ca prathayati smārakriyāṃ rādhayākastaṃ saubhagabhūṣitāñcitatanuṃ govardhanaṃ nāśrayet || 9||

कालिन्दीं तपनोद्भवं गिरिगणानत्युन्नमाचेखरान्श्रीवृन्दाविपिनं जनेप्सितधरं नन्दीश्वरं चाश्रयम् ।हित्वा यं प्रतिपूजयन्व्रजकृते मानं मुकुन्दो ददौकस्तं शृङ्गिकिरीटिनं गिरिनृपं गोवर्धनं नाश्रयेत् ॥ १०॥

kālindīṃ tapanodbhavaṃ girigaṇānatyunnamācekharānśrīvṛndāvipinaṃ janepsitadharaṃ nandīśvaraṃ cāśrayam |hitvā yaṃ pratipūjayanvrajakṛte mānaṃ mukundo dadaukastaṃ śṛṅgikirīṭinaṃ girinṛpaṃ govardhanaṃ nāśrayet || 10||

तस्मिन्वासदमस्य रम्यदशकं गोवर्धनस्येह यत्प्रादुर्भूतमिदं यदीयकृपया जीर्णान्धवक्त्रादपि ।तस्योद्यद्गुणवृन्दबन्धुरखणेर्जीवातुरूपस्य तत्तोषायाप्यलं भवत्टिह फलं पक्वं मया मृग्यते ॥ ११॥

tasminvāsadamasya ramyadaśakaṃ govardhanasyeha yatprādurbhūtamidaṃ yadīyakṛpayā jīrṇāndhavaktrādapi |tasyodyadguṇavṛndabandhurakhaṇerjīvāturūpasya tattoṣāyāpyalaṃ bhavatṭiha phalaṃ pakvaṃ mayā mṛgyate || 11||

इति श्रीरघुनाथदासगोस्वामिविरचितस्तवावल्यांश्रीगोवर्धनवासप्रार्थनादशकं सम्पूर्णम् ।

iti śrīraghunāthadāsagosvāmiviracitastavāvalyāṃśrīgovardhanavāsaprārthanādaśakaṃ sampūrṇam |