हनुमदष्टोत्तरशतनामस्तोत्रम् १० Shri Hanumad Ashtottarashatanama Stotram from Ramarahasya

। श्रीसीतारामौ विजयेते ।ॐ हनुमानञ्जनासूनुर्धीमान् केसरिनन्दनः ।वातात्मजो वरगुणो वानरेन्द्रो विरोचनः ॥ १॥

| śrīsītārāmau vijayete |oṃ hanumānañjanāsūnurdhīmān kesarinandanaḥ |vātātmajo varaguṇo vānarendro virocanaḥ || 1||

सुग्रीवसचिवः श्रीमान् सूर्यशिष्यस्सुखप्रदः ।ब्रह्मदत्तवरो ब्रह्मभूतो ब्रह्मर्षिसन्नुतः ॥ २॥

sugrīvasacivaḥ śrīmān sūryaśiṣyassukhapradaḥ |brahmadattavaro brahmabhūto brahmarṣisannutaḥ || 2||

जितेन्द्रियो जिताराती रामदूतो रणोत्कटः ।सञ्जीविनीसमाहर्ता सर्वसैन्यप्रहर्षकः ॥ ३॥

jitendriyo jitārātī rāmadūto raṇotkaṭaḥ |sañjīvinīsamāhartā sarvasainyapraharṣakaḥ || 3||

रावणाकम्प्यसौमित्रिनयनस्फुटभक्तिमान् ।अशोकवनिकाच्छेदी सीतावात्सल्यभाजनम् ॥ ४॥

rāvaṇākampyasaumitrinayanasphuṭabhaktimān |aśokavanikācchedī sītāvātsalyabhājanam || 4||

विषीदद्भूमितनयार्पितरामाङ्गुलीयकः ।चूडामणिसमानेता रामदुःखापहारकः ॥ ५॥

viṣīdadbhūmitanayārpitarāmāṅgulīyakaḥ |cūḍāmaṇisamānetā rāmaduḥkhāpahārakaḥ || 5||

अक्षहन्ता विक्षतारिस्तृणीकृतदशाननः ।कुल्याकल्पमहाम्भोधिस्सिंहिकाप्राणनाशनः ॥ ६॥

akṣahantā vikṣatāristṛṇīkṛtadaśānanaḥ |kulyākalpamahāmbhodhissiṃhikāprāṇanāśanaḥ || 6||

सुरसाविजयोपायवेत्ता सुरनरार्चितः ।जाम्बवन्नुतमाहात्म्यो जीविताहतलक्ष्मणः ॥ ७॥

surasāvijayopāyavettā suranarārcitaḥ |jāmbavannutamāhātmyo jīvitāhatalakṣmaṇaḥ || 7||

जम्बुमालिरिपुर्जम्भवैरिसाध्वसनाशनः ।अस्त्रावध्यो राक्षसारिस्सेनापतिविनाशनः ॥ ८॥

jambumāliripurjambhavairisādhvasanāśanaḥ |astrāvadhyo rākṣasārissenāpativināśanaḥ || 8||

लङ्कापुरप्रदग्धा च वालानलसुशीतलः ।वानरप्राणसन्दाता वालिसूनुप्रियङ्करः ॥ ९॥

laṅkāpurapradagdhā ca vālānalasuśītalaḥ |vānaraprāṇasandātā vālisūnupriyaṅkaraḥ || 9||

महारूपधरो मान्यो भीमो भीमपराक्रमः ।भीमदर्पहरो भक्तवत्सलो भर्त्सिताशरः ॥ १०॥

mahārūpadharo mānyo bhīmo bhīmaparākramaḥ |bhīmadarpaharo bhaktavatsalo bhartsitāśaraḥ || 10||

रघुवंशप्रियकरो रणधीरोरयाकरः ।भरतार्पितसन्देशो भगवच्छिलष्टविप्रग्रहः ॥ ११॥

raghuvaṃśapriyakaro raṇadhīrorayākaraḥ |bharatārpitasandeśo bhagavacchilaṣṭavipragrahaḥ || 11||

अर्जुनध्वजवासी च तर्जिताशरनायकः ।महान् महामधुरवाङ्महात्मा मातरिश्वजः ॥ १२॥

arjunadhvajavāsī ca tarjitāśaranāyakaḥ |mahān mahāmadhuravāṅmahātmā mātariśvajaḥ || 12||

मरुन्नुतो महोदारगुणो मधुवनप्रियः ।महाधैर्यो महवीर्यो मिहिराधिककान्तिमान् ॥ १३॥

marunnuto mahodāraguṇo madhuvanapriyaḥ |mahādhairyo mahavīryo mihirādhikakāntimān || 13||

अन्नदो वसुदो वाग्मी ज्ञानदो वत्सलो वशी ।वशीकृताखिलजगद्वरदो वानराकृतिः ॥ १४॥

annado vasudo vāgmī jñānado vatsalo vaśī |vaśīkṛtākhilajagadvarado vānarākṛtiḥ || 14||

भिक्षुरूपप्रतिच्छन्नोऽभीतिदो भीतिवर्जितः ।भूमीधरहरोभूतिदायको भूतसन्नुतः ॥ १५॥

bhikṣurūpapraticchanno'bhītido bhītivarjitaḥ |bhūmīdharaharobhūtidāyako bhūtasannutaḥ || 15||

भुक्तिमुक्तिप्रदो भूमा भुजनिर्जितराक्षसः ।वाल्मीकिस्तुतमाहात्म्यो विभीषणसुहृद्विभुः ॥ १६॥

bhuktimuktiprado bhūmā bhujanirjitarākṣasaḥ |vālmīkistutamāhātmyo vibhīṣaṇasuhṛdvibhuḥ || 16||

अनुकम्पानिधिः पम्पातीरचारी प्रतापवान् ।बह्मास्त्रहतरामादिजीवनो ब्रह्मवत्सलः ॥ १७॥

anukampānidhiḥ pampātīracārī pratāpavān |bahmāstrahatarāmādijīvano brahmavatsalaḥ || 17||

जयवार्ताहरो जेता जानकीशोकनाशनः ।जानकीरामसाहित्यकारी जनसुखप्रदः ॥ १८॥

jayavārtāharo jetā jānakīśokanāśanaḥ |jānakīrāmasāhityakārī janasukhapradaḥ || 18||

बहुयोजनगन्ता च बलवीर्यगुणाधिकः ।रावणालयमर्दी च रामपादाब्जवाहकः ॥ १९॥

bahuyojanagantā ca balavīryaguṇādhikaḥ |rāvaṇālayamardī ca rāmapādābjavāhakaḥ || 19||

रामनामलसद्वक्तो रामायणकथादृतः ।रामस्वरूपविलसन्मानसो रामवल्लभः ॥ २०॥

rāmanāmalasadvakto rāmāyaṇakathādṛtaḥ |rāmasvarūpavilasanmānaso rāmavallabhaḥ || 20||

इत्थमष्टोत्तरशतं नाम्नां वातात्मजस्य यः ।अनुसन्ध्यं पठेत्तस्य मारुतिस्संप्रसीदति ॥ २१॥

itthamaṣṭottaraśataṃ nāmnāṃ vātātmajasya yaḥ |anusandhyaṃ paṭhettasya mārutissaṃprasīdati || 21||

प्रसन्ने मारुतौ रामो भुक्तिमुक्ती प्रयच्छति ।इति श्रीरामरहस्योक्तं श्रीहनुमदष्टोत्तरशतनामस्तोत्रं समाप्तम् ।

prasanne mārutau rāmo bhuktimuktī prayacchati |iti śrīrāmarahasyoktaṃ śrīhanumadaṣṭottaraśatanāmastotraṃ samāptam |