शङ्कराचार्यस्तवः Shankaracharya Stava

श्रीशङ्कराचार्यवर्यं सर्वलोकैकवन्द्यं भजे देशिकेन्द्रम् ॥ ध्रुवपदम्॥धर्मप्रचारेऽतिदक्षं योगिगोविन्दपादाप्तसंन्यासदीक्षम् ।दुर्वादिगर्वापनोदं पद्मपादादिशिष्यालिसंसेव्यपादम् ॥ १॥

śrīśaṅkarācāryavaryaṃ sarvalokaikavandyaṃ bhaje deśikendram || dhruvapadam||dharmapracāre'tidakṣaṃ yogigovindapādāptasaṃnyāsadīkṣam |durvādigarvāpanodaṃ padmapādādiśiṣyālisaṃsevyapādam || 1||

शङ्काद्रिदम्भोलिलीलं किङ्कराशेषशिष्यालिसन्त्राणशीलम् ।बालार्कनीकाशचेलं बोधिताशेषवेदान्तगूढार्थजालम् ॥ २॥

śaṅkādridambholilīlaṃ kiṅkarāśeṣaśiṣyālisantrāṇaśīlam |bālārkanīkāśacelaṃ bodhitāśeṣavedāntagūḍhārthajālam || 2||

रुद्राक्षमालाविभूषं चन्द्रमौलीश्वराराधनावाप्ततोषम् ।विद्राविताशेषदोषं भद्रपूगप्रदं भक्तलोकस्य नित्यम् ॥ ३॥

rudrākṣamālāvibhūṣaṃ candramaulīśvarārādhanāvāptatoṣam |vidrāvitāśeṣadoṣaṃ bhadrapūgapradaṃ bhaktalokasya nityam || 3||

पापाटवीचित्रभानुं ज्ञानदीपेन हार्दं तमो वारयन्तम् ।द्वैपायनप्रीतिभाजं सर्वतापापहामोघबोधप्रदं तम् ॥ ४॥

pāpāṭavīcitrabhānuṃ jñānadīpena hārdaṃ tamo vārayantam |dvaipāyanaprītibhājaṃ sarvatāpāpahāmoghabodhapradaṃ tam || 4||

राजाधिराजाभिपूज्यं रम्यशृङ्गाद्रिवासैकलोलं यतीड्यम् ।राकेन्दुसङ्काशवक्त्रं रत्नगर्भेभवक्त्राङ्घ्रिपूजानुरक्तम् ॥ ५॥

rājādhirājābhipūjyaṃ ramyaśṛṅgādrivāsaikalolaṃ yatīḍyam |rākendusaṅkāśavaktraṃ ratnagarbhebhavaktrāṅghripūjānuraktam || 5||

श्रीभारतीतीर्थगीतं शङ्करार्यस्तवं यः पठेद्भक्तियुक्तः ।सोऽवाप्नुयात्सर्वमिष्टं शङ्कराचार्यवर्यप्रसादेन तूर्णम् ॥ ६॥

śrībhāratītīrthagītaṃ śaṅkarāryastavaṃ yaḥ paṭhedbhaktiyuktaḥ |so'vāpnuyātsarvamiṣṭaṃ śaṅkarācāryavaryaprasādena tūrṇam || 6||

इति शङ्कराचार्यस्तवः सम्पूर्णः ।

iti śaṅkarācāryastavaḥ sampūrṇaḥ |