प्रार्थनादशकस्तोत्रम् Prarthanadashaka Stotram

रमारमण मध्वादिदेशिक श्रीहृदब्जग ।हयग्रीव कृपालो मे प्रार्थनां श्रुणु सादरम् ॥ १॥

ramāramaṇa madhvādideśika śrīhṛdabjaga |hayagrīva kṛpālo me prārthanāṃ śruṇu sādaram || 1||

अयोग्यविषये स्वामिन् सर्वथा न मनो भवेत् ।चाञ्चल्यं मूलतश्छिन्धि दुराशां हर दूरतः ॥ २॥

ayogyaviṣaye svāmin sarvathā na mano bhavet |cāñcalyaṃ mūlataśchindhi durāśāṃ hara dūrataḥ || 2||

दुर्बुद्धिं च न मे देहि दुःशास्त्रावर्तने रतिम् ।हापयस्व च दुर्मानं दुर्गुणं मोचय प्रभो ॥ ३॥

durbuddhiṃ ca na me dehi duḥśāstrāvartane ratim |hāpayasva ca durmānaṃ durguṇaṃ mocaya prabho || 3||

दुःसङ्गं दुष्क्रियां छिन्धि हर लोकाटनात्पदौ ।न नियोजय चक्षूंषि परदारादिदर्शने ॥ ४॥

duḥsaṅgaṃ duṣkriyāṃ chindhi hara lokāṭanātpadau |na niyojaya cakṣūṃṣi paradārādidarśane || 4||

दुष्प्रतिग्रहदुस्पर्शे करौ मा चोदय ध्रुवम् ।अगम्यागमने गुह्यां घ्राणमाघ्राणनेऽसताम् ॥ ५॥

duṣpratigrahadusparśe karau mā codaya dhruvam |agamyāgamane guhyāṃ ghrāṇamāghrāṇane'satām || 5||

अपकर्षतु जिह्वां मे लोकवार्तादुरन्नतः ।दुर्वार्तादुष्टशब्देभ्यो निवर्तय हरे श्रुती ॥ ६॥

apakarṣatu jihvāṃ me lokavārtādurannataḥ |durvārtāduṣṭaśabdebhyo nivartaya hare śrutī || 6||

भवदिच्छानुगं चेतो योग्यसद्विषयं भवेत् ।यदृच्छालाभसन्तृप्तं निश्चाञ्चल्यं भवेत्वयि ॥ ७॥

bhavadicchānugaṃ ceto yogyasadviṣayaṃ bhavet |yadṛcchālābhasantṛptaṃ niścāñcalyaṃ bhavetvayi || 7||

सज्ञानं सर्वदा देहि सच्छास्त्रावर्तने रतिम् ।सत्सङ्गं सत्क्रियां चैव पादौ त्वत्क्षेत्रसर्पणे ॥ ८॥

sajñānaṃ sarvadā dehi sacchāstrāvartane ratim |satsaṅgaṃ satkriyāṃ caiva pādau tvatkṣetrasarpaṇe || 8||

श्रीमध्वशास्त्रश्रवणे नियङ्क्ष्व श्रवणे सदा ।हयास्य चक्षुषी चेमे दर्शने सन्नियोजय ॥ ९॥

śrīmadhvaśāstraśravaṇe niyaṅkṣva śravaṇe sadā |hayāsya cakṣuṣī ceme darśane sanniyojaya || 9||

करौ त्वदर्चने नित्यं सुखतीर्थस्य लेखने ।त्वदालापे त्वदुच्छिष्टभोजने कुरु जिह्विकाम् ॥ १०॥

karau tvadarcane nityaṃ sukhatīrthasya lekhane |tvadālāpe tvaducchiṣṭabhojane kuru jihvikām || 10||

घ्राणं भवतु निर्माल्याघ्राणने नमने शिरः ।देहि मे तु ज्ञानभक्तिपशुपुत्रधनादिकम् ॥ ११॥

ghrāṇaṃ bhavatu nirmālyāghrāṇane namane śiraḥ |dehi me tu jñānabhaktipaśuputradhanādikam || 11||

प्रार्थनादशनं चैतत् त्रिकाले यः पठेन्नरः ।तस्याभीष्टं हयास्योऽसौ दत्वा रक्षति सर्वदा ॥ १२॥

prārthanādaśanaṃ caitat trikāle yaḥ paṭhennaraḥ |tasyābhīṣṭaṃ hayāsyo'sau datvā rakṣati sarvadā || 12||

॥ इति श्रीमद्वादिराजपूज्यचरणविरचितं प्रार्थनादशकस्तोत्रं समाप्तम् ॥

|| iti śrīmadvādirājapūjyacaraṇaviracitaṃ prārthanādaśakastotraṃ samāptam ||