गङ्गाष्टकम् (वाल्मिकीविरचितम्) Gangashtakam By Shage Valmiki

मातः शैलसुतासपत्नि वसुधाशृङ्गारहारावलिस्वर्गारोहणवैजयन्ति भवतीं भागीरथीं प्रार्थये ।त्वत्तीरे वसतः त्वदंबु पिबतस्त्वद्वीचिषु प्रेङ्खतःत्वन्नाम स्मरतस्त्वदर्पितदृशः स्यान्मे शरीरव्ययः ॥ १॥

mātaḥ śailasutāsapatni vasudhāśṛṅgārahārāvalisvargārohaṇavaijayanti bhavatīṃ bhāgīrathīṃ prārthaye |tvattīre vasataḥ tvadaṃbu pibatastvadvīciṣu preṅkhataḥtvannāma smaratastvadarpitadṛśaḥ syānme śarīravyayaḥ || 1||

त्वत्तीरे तरुकोटरान्तरगतो गङ्गे विहङ्गो परंत्वन्नीरे नरकान्तकारिणि वरं मत्स्योऽथवा कच्छपः ।नैवान्यत्र मदान्धसिन्धुरघटासंघट्टघण्टारणत्कारस्तत्र समस्तवैरिवनितालब्धस्तुतिर्भूपतिः ॥ २॥

tvattīre tarukoṭarāntaragato gaṅge vihaṅgo paraṃtvannīre narakāntakāriṇi varaṃ matsyo'thavā kacchapaḥ |naivānyatra madāndhasindhuraghaṭāsaṃghaṭṭaghaṇṭāraṇatkārastatra samastavairivanitālabdhastutirbhūpatiḥ || 2||

उक्षा पक्षी तुरग उरगः कोऽपि वा वारणो वाऽवारीणः स्यां जननमरणक्लेशदुःखासहिष्णुः ।न त्वन्यत्र प्रविरलरणत्किङ्किणीक्वाणमित्रंवारस्त्रीभिश्चमरमरुता वीजितो भूमिपालः ॥ ३॥

ukṣā pakṣī turaga uragaḥ ko'pi vā vāraṇo vā'vārīṇaḥ syāṃ jananamaraṇakleśaduḥkhāsahiṣṇuḥ |na tvanyatra praviralaraṇatkiṅkiṇīkvāṇamitraṃvārastrībhiścamaramarutā vījito bhūmipālaḥ || 3||

काकैर्निष्कुषितं श्वभिः कवलितं गोमायुभिर्लुण्टितंस्रोतोभिश्चलितं तटाम्बुलुलितं वीचीभिरान्दोलितम् ।दिव्यस्त्रीकरचारुचामरमरुत्संवीज्यमानः कदाद्रक्ष्येऽहं परमेश्वरि त्रिपथगे भागीरथी स्वं वपुः ॥ ४॥

kākairniṣkuṣitaṃ śvabhiḥ kavalitaṃ gomāyubhirluṇṭitaṃsrotobhiścalitaṃ taṭāmbululitaṃ vīcībhirāndolitam |divyastrīkaracārucāmaramarutsaṃvījyamānaḥ kadādrakṣye'haṃ parameśvari tripathage bhāgīrathī svaṃ vapuḥ || 4||

अभिनवबिसवल्लीपादपद्मस्य विष्णोःमदनमथनमौलेर्मालतीपुष्पमाला ।जयति जयपताका काप्यसौ मोक्षलक्ष्म्याःक्षपितकलिकलङ्का जाह्नवी नः पुनातु ॥ ५॥

abhinavabisavallīpādapadmasya viṣṇoḥmadanamathanamaulermālatīpuṣpamālā |jayati jayapatākā kāpyasau mokṣalakṣmyāḥkṣapitakalikalaṅkā jāhnavī naḥ punātu || 5||

एतत्तालतमालसालसरलव्यालोलवल्लीलताच्छत्रं सूर्यकरप्रतापरहितं शङ्खेन्दुकुन्दोज्ज्वलम् ।गन्धर्वामरसिद्धकिन्नरवधूतुङ्गस्तनास्पालितंस्नानाय प्रतिवासरं भवतु मे गाङ्गं जलं निर्मलम् ॥ ६॥

etattālatamālasālasaralavyālolavallīlatācchatraṃ sūryakarapratāparahitaṃ śaṅkhendukundojjvalam |gandharvāmarasiddhakinnaravadhūtuṅgastanāspālitaṃsnānāya prativāsaraṃ bhavatu me gāṅgaṃ jalaṃ nirmalam || 6||

गाङ्गं वारि मनोहारि मुरारिचरणच्युतम् ।त्रिपुरारिशिरश्चारि पापहारि पुनातु माम् ॥ ७॥पापापहारि दुरितारि तरङ्गधारिशैलप्रचारि गिरिराजगुहाविदारि ।झङ्कारकारि हरिपादरजोपहारिगाङ्गं पुनातु सततं शुभकारि वारि ॥ ८॥

gāṅgaṃ vāri manohāri murāricaraṇacyutam |tripurāriśiraścāri pāpahāri punātu mām || 7||pāpāpahāri duritāri taraṅgadhāriśailapracāri girirājaguhāvidāri |jhaṅkārakāri haripādarajopahārigāṅgaṃ punātu satataṃ śubhakāri vāri || 8||

गङ्गाष्टकं पठति यः प्रयतः प्रभातेवाल्मीकिना विरचितं शुभदं मनुष्यः ।प्रक्षाल्य गात्रकलिकल्मषपङ्कमाशुमोक्षं लभेत् पतति नैव नरो भवाब्धौ ॥ ९॥॥ इति वाल्मीकिविरचितं गङ्गाष्टकं सम्पूर्णम् ॥

gaṅgāṣṭakaṃ paṭhati yaḥ prayataḥ prabhātevālmīkinā viracitaṃ śubhadaṃ manuṣyaḥ |prakṣālya gātrakalikalmaṣapaṅkamāśumokṣaṃ labhet patati naiva naro bhavābdhau || 9|||| iti vālmīkiviracitaṃ gaṅgāṣṭakaṃ sampūrṇam ||